འཆར་གཞི་ཡག་པོ་བཟོས་ནས་ནང་སྲིད་ལ་སྐྱེད་ཆུང་དངུལ་བུན་གཡར་དུ་ཤོག

ནང་སྲིད་ལས་ཁུངས་ཀྱིས་བཙན་བྱོལ་བོད་མིའི་སྤྱི་ཚོགས་ནང་གི་ན་གཞོན་ལས་མེད་ཚོར་སྐྱེད་ཆུང་བུན་གཏོང་གི་ལམ་ནས་རོགས་སྐྱོར་བྱེད་ཀྱི་ཡོད་པ་དང་། མ་འོངས་པར་ལས་གཞི་རྒྱ་སྐྱེད་ཀྱིས་གཞིས་ཆགས་ཁག་གི་སོ་ནམ་ཐད་དངུལ་བུན་གཏོང་འཆར་ཡོད་འདུག

འདས་པའི་ལོ་ཤས་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་བཙན་བྱོལ་བོད་མིའི་ན་གཞོན་ལས་མེད་ཚོར་སྐྱེད་ཆུང་བུན་གཡར་བརྒྱུད་དེ་ཚོང་ལས་གཉེར་རྒྱུའི་གོ་སྐབས་ཤིག་སྐྲུན་བཞིན་ཡོད་པ་དང་། ཉེ་ལམ་བཀའ་ཤག་གིས་དེ་སྔའི་བུན་ལོན་སྤྲོད་འཇལ་གན་ཡིག་བཟོ་འཇོག་ལ་བཅོས་བསྒྱུར་བཏང་སྟེ། བུན་གཏོང་སྟངས་འཛིན་ཚོགས་ཆུང་དང་ས་གནས་ན་གཞོན་རོགས་སྐྱོར་འབྲེལ་མཐུད་པ་མཉམ་འབྲེལ་ཐོག་ད་ལོའི་བུན་གཏོང་གི་ལས་གཞི་མགོ་འཛུཊ་བྱ་འཆར་ཡོད་འདུག

འདིའི་ཐད་ནང་སྲིད་དྲུང་འཕར་འཆི་མེད་རིག་འཛིན་ལགས་ཀྱིས་ངོ་སྤྲོད་གནང་བ་ལྟར་ན། བོད་མིའི་སྒྲིག་འཛུགས་ཀྱི་སྐྱེད་ཆུང་བུན་གཏོང་གི་ལས་གཞི་དེ་ནི། ༡༩༩༩ ལོར་ནོར་ཝེ་རྒྱལ་ཁབ་ཀྱི་ཨེན་སེ་ཨེད་ (NCA)རོགས་ཚོགས་ཀྱི་རོགས་རམ་འོག ཐོག་མར་བོད་མིའི་སྒྲིག་འཛུགས་འཆར་འགོད་ལྷན་ཁང་གིས་ཕེ་ཌི་མྰེ་ (PADME) ཞེས་པའི་ལས་གཞིའི་འོག་མགོ་འཛུགས་བྱས་ཡོད་པ་དང་། ༢༠༠༧ ལོར་ནང་སྲིད་ལས་ཁུངས་ལ་རྩིས་སྤྲོད་གནང་སྟེ། ནང་སྲིད་ཀྱིས་སོ་ནམ་མཉམ་འབྲེལ་དང་ན་གཞོན་རོགས་སྐྱོར་སྡེ་ཚན་གྱིས་འགན་འཁུར་ཏེ། གཞོན་སྐྱེས་ ༥༠ ཙམ་ལ་སྐྱེད་ཆུང་བུན་གཏོང་གནང་གི་ཡོད་པ་དང་། ལས་གཞི་འདིའི་དམིགས་ཡུལ་གཙོ་བོ། བོད་མིའི་གཞིས་ཆགས་ཁག་ཁ་འཐོར་དུ་མི་འགྲོ་ཆེད། བོད་རིགས་ན་གཞོན་ལས་མེད་ཚོར་འཚོ་བའི་མདུན་ལམ་ལ་ཕན་པའི་ལས་འཆར་སྦེལ་རྒྱུར། མ་དངུལ་གྱི་དཀའ་ངལ་ཡོད་རིགས་ལ་བུན་གཏོང་བརྒྱུད་གཞན་རྟེན་གྱི་བསམ་བློ་དོར་ནས་ས་གནས་སོ་སོའི་ནང་རང་ཁ་རང་གསོ་ཐུབ་ཆེད་ཡིན་འདུག

   ཁོང་གིས་བརྗོད་པ་ལྟར་ན། མི་གཅིག་ཡིན་ན་མང་མཐར་ཧིན་སྒོར་འབུམ་ ༡ དང་། མི་གཉིས་མཉམ་འབྲེལ་ཡིན་ན་མང་མཐར་ཧིན་སྒོར་འབུམ་ ༣ ། མི་གསུམ་ལྷག་མཉམ་འབྲེལ་ཡིན་ན་མང་མཐར་ཧིན་སྒོར་འབུམ་ ༥ བཅས་གཏོང་རྒྱུ་ཡིན་པ་དང་། མཉམ་འབྲེལ་བྱེད་མཁན་དག་ནང་མི་གཅིག་པ་ཡིན་མི་རུང་ཞིང་། སྐྱེད་ཆུང་དངུལ་བུན་ཞུ་མཁན་དག་གི་ལས་འཆར་ནི། འཚེ་བ་མེད་པ་དང་ཁོར་ཡུག་ལ་མི་གནོད་པ། རྒྱུན་གནས་ཐུབ་པ། དོ་བདག་སོ་སོ་ཙམ་མ་ཡིན་པར་ནང་མི་དང་བཅས་པའི་འཚོ་ཐབས་ལ་ཕན་ངེས་ཡིན་པ། ལས་འཆར་ཕུལ་བ་ལྟར་ས་གནས་སུ་རྒྱུ་ཆ་དང་ཁྲོམ་རྭ་དངོས་འབྲེལ་ཡོད་པ། ཡུལ་ཁྲིམས་དང་མཐུན་པ་བཅས་ཡིན་དགོས་ཤིང་། ལས་འཆར་དེའི་འགྲོ་གྲོན་བརྒྱ་ཆ་ ༡༠ ཙམ་ངེས་པར་དུ་དོ་བདག་གིས་གཏོང་དགོས་པ་དང་། ལས་གཞི་སྤེལ་ཡུལ་ས་གནས་སོ་སོའི་ནང་དུའམ་ས་གནས་ཀྱི་ཉེ་ཁུལ་དུ་ལག་བསྟར་བྱ་དགོས་པ་བཅས་ཡིན་འདུག

   བུ་ལོན་ཞུ་སྐབས། བུ་ལོན་འགན་ལེན་པའམ་གཉེན་ཉེ་གྲོགས་པོ་གང་རུང་གིས་བུན་དངུལ་ཞུ་འཆར་གྱི་དངུལ་འབོར་དང་མཉམ་པའི་དངུལ་ཁང་གང་རུང་ལ་བཅོལ་འཇོག་ངམ། མཉམ་འབྲེལ་གྱི་དུས་བཀག་དངུལ་བཅོལ་ (FDR) འཛིན་ངོ་མ་ས་གནས་མགོ་འཛིན་ལས་ཁང་དུ་གཏའ་མར་འཇོག་དགོས་པ་དང་། བུ་ལོན་ལེན་མཁན་རང་ཉིད་དམ་གཉེན་ཉེ། གྲོགས་པོ་ངོ་ཤེས་སུ་རུང་གི་ཁྲིམས་མཐུན་བདག་དབང་ཡོད་པའི་རིན་ཆེན་རྒྱན་ཆ་སོགས་ཀྱི་རྒྱུ་དངོས་ས་གནས་མགོ་འཛིན་ལས་ཁང་དུ་གཏའ་མར་འཇོག་དགོས་པ། ནང་མིའམ་སྤུན་ཉེ་སུ་རུང་ཞིག་ལས་བྱེད་དམ་དྭང་སློབ་ཡིན་རིགས་ཚོས། ཟླ་རེའི་གསོལ་ཕོགས་ནས་བུན་དངུལ་སྒྲུབ་འཇལ་ཞུ་རྒྱུའི་ཁས་ལེན་བྱེད་དགོས་པ་སོགས་ཡོད་འདུག བུ་ལོན་ཕྱིར་སློག་གི་དུས་ཡུན་ལོ་ ༣ དང་ལས་འཆར་གྱི་གཞི་རྒྱར་གཞིགས་ཏེ་མང་མཐར་ལོ་ ༥ ཡིན་འདུག བུན་ལོན་མ་དངུལ་གྱི་ལོ་འཁོར་སྐྱེད་འབབ་བརྒྱ་ཆ་ ༣ རེ་བསྡུ་ལེན་ཞུ་རྒྱུ་དང་། བུ་ལོན་བླངས་ཉིན་ནས་ཟླ་གཉིས་ནང་ལས་འཆར་ལག་བསྟར་མ་ཐུབ་ཚེ་བུན་དངུལ་ཆ་ཚང་ས་གནས་བུན་གཏོང་སྟངས་འཛིན་ཚོགས་ཆུང་ནས་ཕྱིར་བསྡུ་བརྒྱུད་ནང་སྲིད་ལས་ཁུངས་སུ་སྤྲོད་དགོས་པ་དང་། གལ་སྲིད། བུན་ལེན་པ་གང་ཞིག་ནས་བུན་དངུལ་ཕྱིར་སློག་མ་བྱས་ཚེ་གན་རྒྱ་གཞིར་བཟུང་ནང་སྲིད་ལས་ཁུངས་ལ་ཁྲིམས་གཏུགས་འགན་དབང་ཡོད་འདུག

   གསར་འགོད་པས་ཁོང་ལ་ལོ་རེར་ནང་སྲིད་ཀྱིས་སྐྱེད་ཆུང་བུན་གཏོང་ལ་དངུལ་འབོར་ག་ཚོད་གྲ་སྒྲིག་ཡོད་མེད་དྲིས་པར། ཁོང་གིས། “ ཁྱོན་བསྡོམས་བུན་གཏོང་འཁོར་སྐྱོད་མ་དངུལ་འབུམ་ ༡༠༠ ཙམ་ཡོད་པ་རེད། མ་འོངས་པར་ཡག་པོ་བྱུང་ན་མ་དངུལ་མང་དུ་གཏོང་ཐབས་ལ་འབད་བརྩོན་ཞུ་རྒྱུ་ཡིན། ༢༠༠༧ ནས་ ༢༠༡༣ ལོའི་བར་ན་གཞོན་ ༥༠ ཙམ་ལ་བུན་གཡར་ཡོད་པ་དང་། དེ་དག་ལས་ ༡༩༩༩ ནས་ ༢༠༠༧ བར་བུ་ལོན་ཕྱིར་མ་སྤྲད་པ་ ༢ དང་། ༢༠༠༧ ནས་ ༢༠༡༣ ལོའི་བར་བུན་ཕྱིར་མ་སྤྲད་མཁན་ ༡ བཅས་བྱུང་འདུག བརྒྱ་ཆའི་ཕྱོགས་ནས་ཉུང་ཉུང་རེད་ཅེས་བརྗོད་བྱུང་།

   མ་འོངས་པར་བུན་གཏོང་གི་ལས་གཞི་རྒྱ་སྐྱེད་བྱ་འཆར་ཡོད་པའི་ཐད་ཁོང་གིས། ལས་གཞི་མགོ་འཛུཊ་སྐབས་མི་མང་པོ་ཞིག་ཞེད་སྣང་སྐྱེས་ཏེ་བུ་ལོན་མཁོ་གཏོང་ལ་བར་སྟོང་ལྷག་པ་དང་། སྔོན་མ་བཏང་སྟེ་ད་ལྟའི་ཆར་ཕྱིར་བསྡུ་བཞིན་པ་དང་མཇལ་མ་ཐུབ་པ་གང་འཚམ་བྱུང་བ་སོགས་ཀྱི་གནས་ཚུལ་བྱུང་ཡོད་ཀྱང་། འདི་ལོ་བཀའ་ཤག་གིས་ལས་གཞི་འདི་གལ་ཆེན་པོ་ཡིན་པ་དང་། ན་གཞོན་མང་པོ་ཞིག་ལ་ཕན་ཐོགས་པར་གཟིགས་ཏེ་སྔོན་མའི་བུ་ལོན་སྤྲོད་ཕྱོགས་ཀྱི་སྒྲིག་གཞིར་བསྐྱར་བཅོས་བྱས་ཏེ། ས་གནས་མགོ་འཛིན་ཡོད་ས་ཚང་མར་རྩིས་པ་དང་དངུལ་གཉེར། ལས་དྲུང་གང་རུང་ལ་ཆེད་མངགས་བྱས་ཏེ། ན་གཞོན་རོགས་སྐྱོར་འབྲེལ་མཐུད་པ་བསྐོ་འཇོག་གིས་གང་ཐུབ་ཀྱིས་བུ་ལོན་མང་པོ་གཏོང་ཐབས་བྱེད་ཀྱི་ཡོད། མ་འོངས་པར་ང་ཚོས་སོ་ནམ་ཞིང་ལས་ཀྱི་ཐོག་ལ་བུན་གཏོང་བྱ་འཆར་ཡོད། ཅེས་བརྗོད་བྱུང་།

གསར་འགོད་པ། དོན་གོ