རྒྱ་ནག་གི་སྲིད་འཛིན་གཙོས་དམར་ཤོག་ཚོགས་པའི་མགོ་ཁྲིད་ཚོའི་ནང་མི་སྤུན་མཆེད་དག་གི་དཔལ་འབྱོར་འབྲེལ་ལམ་གྱི་གསང་བ་ཕྱིར་བསྒྲགས་བྱས་འདུག
ཟླ་སྔོན་མའི་ཚེས་ ༢༡ ཉིན། ཨ་རིར་རྟེན་གཞི་བྱས་པའི་རྒྱལ་སྤྱིའི་གསར་འགྱུར་བརྒྱུད་ལམ་རྟོག་ཞིབ་མཐུན་ཚོགས་( ICIJ) ཀྱིས། རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་ཚོའི་ཁྱིམ་རྒྱུད་ཀྱི་དམར་ཤོག་རྒྱལ་སྲས་དག་དང་། དེ་དག་གི་གཉེན་ཉེ་སྤུན་མཆེད་ཚོས་ཕྱི་རྒྱལ་གྱི་བདག་བཟུང་འོག་ཡོད་པའི་མཚོ་གླིང་ཁག་ནང་དཔལ་འབྱོར་འཚོལ་སྒྲུབ་ཀྱི་ཁེ་ལས་མཉམ་འབྲེལ་བཙུགས་ཏེ། རྒྱ་ནག་གཞུང་ལ་དཔྱ་ཁྲལ་འཇལ་མི་དགོས་པའི་ཚོང་ལས་གཉེར་བཞིན་ཡོད་སྟབས། དམར་ཤོག་ཚོགས་པའི་འབྱོར་ལྡན་དག་གི་ཚོང་ལས་ཁེ་སྤོགས་ཀྱི་གསང་བ་ཆེན་པོ་ཞིག་ཕྱིར་བསྒྲགས་བྱས་ཡོད་འདུག
དེའི་ནང་རྒྱ་ནག་གི་ད་ལྟའི་སྲིད་འཛིན་ཞི་ཅིན་ཕིན་གྱི་བཟའ་ཟླའི་གཅེན་མོའི་ཁྱོ་ག་ཏིན་ཅ་ཀོས་ (Deng Jiagui) དང་། སྲིད་འཛིན་ཟུར་བ་ཧུའུ་ཅིན་ཐའོ་ཡི་ཚ་བོ་ཧའོ་ཡེ་ཧྲི་ (Hu Yishi)། སྲིད་བློན་ཟུར་བ་ཝིན་ཅ་པའོ་ཡི་བུ་ཝིན་ཡོན་སུང་ (Wen Yungsong) དང་མག་པ་ལའོ་ཁྲུང་ཧང་ (Liu Chunghang)། སྲིད་བློན་ཟུར་བ་ལེ་ཕིན་གྱི་བུ་མོ་ལེ་ཞའོ་ལིན་ (Li Xiaolin) སྲིད་འཛིན་ཟུར་བ་ཝང་ཀྲིན་གྱི་བུ་ཝང་ཀྲི་ (Wang zhi) དང་ཝང་ཇུན་ (Wang Jun)བཅས་ཚུད་ཡོད་འདུག
དབྱིན་ཡུལ་གྱི་བདག་བཟུང་འོག་ཡོད་པའི་གླིང་ཕྲན་ནང་རྒྱ་ནག་དམར་ཤོག་ཚོགས་པའི་རྒྱལ་སྲས་དག་གིས་ཁེ་ལས་མཉམ་འབྲེལ་བཙུགས་ཏེ་ཚོང་ལས་བྱེད་བཞིན་པའི་ཁྲོད། སྲིད་འཛིན་ཞི་ཅིན་ཕིན་གྱི་བཟའ་ཟླའི་གཅེན་མོའི་ཁྱོ་ག་ཏིན་ཅ་ཀོས་ཀྱིས་ཚོང་ལས་སྤྱིའི་བརྒྱ་ཆ་ ༥༠ ཙམ་ཟིན་ཡོད་སྐོར་བརྗོད་འདུག
ན་ནིང་ཞི་ཅིན་ཕིན་ཀྱིས་རྒྱ་ནག་གི་སྲིད་འཛིན་གོ་གནས་བཟུང་རྗེས་དམར་ཤོག་ཚོགས་པ་བརྟན་བརླིང་ཡོང་ཆེད་ལྐོག་ཟ་རྒོལ་རྡུང་ཀྱི་ལས་འགུལ་སྤེལ་མགོ་བཙུགས་ཏེ། ཁོས་གཞུང་དངུལ་ལྐོག་ཟའི་ནང་ཚུད་པའི་སྦྲང་མ་དང་སྟག་མཉམ་རྡུང་བྱེད་རྒྱུ་དང་། སྲིད་གཞུང་གི་ལས་བྱེད་པ་ཚོས་སོ་སོའི་རྒྱུ་དངོས་གང་ཡོད་གསལ་སྟོན་བྱེད་དགོས་པའི་འབོད་སྐུལ་བྱས་ཡོད་ཀྱང་། ལས་དོན་དེ་དག་ལག་ལེན་བསྟར་མིན་དང་གྲུབ་འབྲས་ཐོན་མིན་སྲིད་འཛིན་ཞི་ཅིན་ཕིན་གྱིས་དམར་ཤོག་ཚོགས་པའི་རྒྱལ་སྲས་དང་སྤུན་མཆེད་ཚོར་ཐག་གཅོད་ཇི་ལྟར་བྱེད་མིན་ལ་ཐུག་ཡོད།
རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་གྱིས་ཨ་སྒོར་དུང་ཕྱུར་མང་པོ་ལྐོག་ཟ་བྱས་པ་དང་ཁོའི་བུ་གཉིས་ཀྱིས་རྒྱ་ནག་ནང་གི་བརྡ་འཕྲིན་བརྒྱུད་ལམ་ཕྱེད་ཀ་ཙམ་སྟངས་འཛིན་བྱེད་པའི་དཔལ་འབྱོར་གྱི་གསང་བ། གཞན་ཅང་གི་ཕྱོགས་གཏོགས་མི་བཞི་ཤོག་ཁག་གསར་བའི་ནང་གི་བའོ་པང་ཀོ་ (Wu Bangguo) དང་ཅ་ཆིན་ལིན་ (Jia Qinglin) ལི་ཁྲང་ཁྲུང་ (li Changchun) བཅས་ཀྱི་དཔལ་འབྱོར་གནས་སྟངས་སྐོར་ལ་ད་སྔ་གནས་ཚུལ་གང་ཡང་ཐོན་མེད།
གནད་དོན་དབྱེ་ཞིབ་པ་ཚོས། ན་ནིང་ནེའུ་ཡོག་གསར་ཁང་དང་བྷུ་ལོམ་བྷར་གྷི་( Bloomberg)། ཝ་ཤིན་ཊོན་ཆ་འཕྲིན་བཅས་ཀྱིས་རྒྱ་ནག་དམར་ཤོག་ཚོགས་པའི་མཐོ་རིམ་དཔོན་ཁག་ཚོའི་ནང་མིའི་དཔལ་འབྱོར་གྱི་གསང་བ་ཕྱིར་བསྒྲགས་བྱས་པར་བརྟེན། རྒྱ་ནག་ནང་གི་རྒྱལ་སྤྱིའི་གསར་འགོད་པ་ཚོར་དམ་དྲག་དང་ཐོངས་ཆེན་ཐོག་དཀའ་ངལ་སྤྲད་ཡོད་སྟབས། ད་ཐེངས་དམར་ཤོག་ཚོགས་པའི་མགོ་ཁྲིད་ཚོའི་གསང་བ་བསྐྱར་དུ་ཐེར་འདོན་བྱས་པ་ཞིག་ཡིན་སྐོར་བརྗོད་འདུག
གསར་འགྱུར་བརྒྱུད་ལམ་ཁག་ཏུ། ན་ནིང་སྤྱི་ཟླ་ ༡༡ པའི་ནང་རྒྱ་ནག་དམར་ཤོག་ཚོགས་པའི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ཚོགས་ཏེ། རྒྱ་ནག་གིས་ཨ་རིའི་རྒྱལ་སྲུང་བདེ་འཇགས་ལས་ཁུངས་ལ་དཔེ་བླངས་ཏེ་རྒྱལ་ཁབ་བདེ་འཇགས་ཨུ་ཡོན་ལྷན་ཁང་ཟེར་བ་གསར་འཛུགས་བྱས་ཡོད་ཅིང་། ལས་ཁུངས་དེས་རྒྱལ་ཁབ་ཀྱི་བདེ་འཇགས་ལ་ལྟ་རྟོག་དང་ལྐོག་ཟ་རུལ་སུངས་ལ་རྡུང་རྡེག་གཏོང་འཆར་ཡོད་སྟབས། རྒྱལ་སྤྱིའི་སྤྱི་ཚོགས་ཀྱིས་དེ་སྔོན་སྲིད་འཛིན་ཞི་ཅིན་ཕིན་གྱིས་མི་མང་ལ་ཁས་ལེན་བྱས་པ་ཁག་ལག་ལེན་བསྟར་མིན་ལ་ལྟད་མོར་བལྟ་རྒྱུ་ཡིན་སྐོར་རྗོད་བཞིན་འདུག
གསར་འགོད་པ། ལྷ་སྐྱབས་རྒྱལ།
