རྒྱ་གཞུང་གིས་འཕགས་མོ་བསམ་འགྲུབ་ལགས་ཀྱི་སྤུན་མཆེད་གཙོས་པའི་བོད་མི་ལྔ་འཇུ་བཟུང་བྱས་ཡོད་པ་མ་ཟད། ཁོང་གི་ནང་མི་དང་ས་གནས་ཡུལ་མིར་དམ་དྲག་བྱེད་ཀྱི་ཡོད་འདུག
ཀུན་བཟང་བསྟན་འཛིན་ལགས་ཀྱིས་འདི་གར་གནས་ཚུལ་ངོ་སྤྲོད་གནང་བ་ལྟར་ན། ཟླ་འདིའི་ཚེས་ ༥ ཉིན་རྨ་ལྷོ་རྩེ་ཁོག་རྫོང་གི་བོད་རིགས་གཞོན་སྐྱེས་འཕགས་མོ་བསམ་འགྲུབ་ལགས་ཀྱིས། རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་སྟེ་སྐུ་གྲོངས་རྗེས། རྒྱ་གཞུང་གིས་རང་སྲེག་གནས་ཚུལ་དང་འབྲེལ་བ་ཡོད་པའི་དོགས་གཞིའི་འོག་ཁོང་གི་སྤུན་ཆུང་བ་གྲྭ་རྒྱ་མཚོ་ལགས་དང་། དཔའ་རྡོ་བཟའ་མི་གཉིས། པདྨ། ཚེ་བརྟན་རྒྱལ་བཅས་བོད་མི་ ༥ འཇུ་བཟུང་གིས་ཉིན་ཤས་རིང་བཀག་ཉར་འདྲི་བརྩད་བྱས་ཡོད་པ་དང་། ཉིན་ཤས་སྔོན་ཁོང་ཚོའི་ཁྲོད་ཀྱི་མི་ ༤ ཀློད་གྲོལ་བཏང་ཡོད་ཀྱང་། ཚེ་བརྟན་རྒྱལ་ལགས་ད་ཆར་ཡང་བཀག་ཉར་བྱས་ཡོད་འདུག
ཉེ་ཆར་རང་ལུས་མེར་བསྲེགས་ཀྱི་གནས་ཚུལ་བྱུང་རྗེས། རྒྱ་གཞུང་གིས་འཕགས་མོ་བསམ་འགྲུབ་ལགས་ཀྱི་ནང་མིར་མཆོད་མེ་རྐང་གཅིག་ཀྱང་བསྒྲོན་མ་བཅུག་པར་སྒོ་ཕྱི་ནང་ཀུན་ཏུ་དམ་སྲུང་བྱེད་བསྡད་ཡོད་པ་མ་ཟད། གལ་སྲིད། ཁྱིམ་དུ་གྲྭ་བ་ཞིག་ཡོང་ཚེ་གྲྭ་བ་དེ་འཛིན་བཟུང་དང་གྲྭ་བ་དེའི་དགོན་པ་ཡང་སྒོ་རྒྱག་གི་འཇུག་རྒྱུ་ཡིན་ཚུལ་སོགས་འཇིགས་སྐུལ་དང་བཙན་བཀའ་བཏང་སྟེ། ཉེ་འབྲེལ་དང་སྡེ་མི། ཡུལ་ཕྱོགས་གཞན་ནས་གདུང་སེམས་མཉམ་སྐྱེད་ཆེད་ཕེབས་མཁན་སོགས་མི་གཅིག་ཀྱང་འགྲོ་མི་ཆོག་པར་བཟོས་ཡོད་འདུག
ད་ཆར་རྒྱ་གཞུང་གིས་ས་གནས་ཀྱི་བརྒྱུད་ལམ་ཡོངས་ལ་སྟངས་འཛིན་ལྟ་རྟོག་དང་། དམག་མི་དང་ཉེན་རྟོག་པ་འགྲེམས་འཇོག་གིས་མི་མང་གི་འགྲུལ་བཞུད་སོགས་ལ་བཀག་སྡོམ་ནན་མོ་བྱེད་ཀྱི་ཡོད་འདུག
གསར་འགོད་པ། དོན་གོ
