སྲིད་སྐྱོང་བློ་བཟང་སེང་གེ་མཆོག་གིས་འཆར་ལ་ཉེ་བའི་བོད་ཀྱི་ལོ་གསར་ལ་བཀྲ་ཤིས་བདེ་ལེགས་ཀྱི་འཚམས་འདྲི་གནང་འདུག
ཟླ་འདིའི་ཕྱི་ཚེས་ ༡༩ ཉིན་སྲིད་སྐྱོང་བློ་བཟང་སེང་གེ་མཆོག་གིས། བོད་རྒྱལ་ལོ་ ༢༡༤༡ རབ་གནས་ཤིང་རྟ་ལོའི་ལོ་གསར་འཆར་ལ་ཉེ་བའི་སྐབས་དང་བསྟུན་ཏེ། བོད་ཕྱི་ནང་གཉིས་ན་ཡོད་པའི་བོད་མི་ཡོངས་ལ་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་ཆབས་ཅིག ད་ལོར་བོད་མི་ཚང་མས་སྲོལ་རྒྱུན་ལྟར་ལོ་གསར་སྲུང་གཙི་བྱེད་པ་དང་འབྲེལ། རྒན་པ་ཚོས་གཞོན་སྐྱེས་རྣམས་ལ་འདས་པའི་ལོ་རྒྱུས་ངོ་སྤྲོད་བྱེད་རྒྱུ་གལ་ཆེན་ཡིན་སྐོར་གསུངས་འདུག
འཚམས་འདྲིའི་ནང་དུ། “ བོད་རྒྱལ་ལོ་ ༢༡༤༡ རབ་གནས་ཤིང་རྟ་ལོའི་གནམ་ལོ་གསར་དུ་བཞད་པའི་དགའ་སྟོན་ལ། གཞིས་བྱེས་བོད་རིགས་སྤུན་ཟླ་ཡོངས་ལ་བཀའ་ཤག་གིས་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། ད་རེས་ཚང་མས་སྲོལ་རྒྱུན་ལྟར་ལོ་གསར་སྲུང་གཙི་ཞུ་གི་ཡོད། དེར་བརྟེན་ཚང་མས་ལོ་གསར་སྐབས་རང་ལུགས་ཀྱི་ན་བཟའ་བཞེས་ནས། སྲོལ་རྒྱུན་དང་ཆོས་ཕྱོགས་ཀྱི་བྱེད་སྒོ་ཁག་སྲུང་བརྩི་ཞུ་དགོས། དེ་བཞིན་མི་རབས་གཞོན་པ་ཚོར་ལོ་གསར་སྐོར་ངོ་སྤྲོད་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ”ཅེས་གསུངས་འདུག
ལོ་གསར་གྱི་ཁྱིམ་མི་ལྷན་འཛོམས་ཀྱི་གོ་སྐབས་དང་བསྟུན་ཏེ། ཁྱིམ་ཚང་སོ་སོའི་ལོ་རྒྱུས་སོགས་ཤེས་རྟོགས་གནང་གལ་ཆེ་བའི་སྐོར་ལ་ཁོང་གིས། “ལོ་གསར་སྐབས་ཕ་མ་སྤུན་ཉེ་ཚང་འཛོམས་སྐབས། ཁྱིམ་ཚང་མི་རེ་ངོ་རེས་སོ་སོའི་ཕ་ཡུལ་དང་ཁ་བྲལ་ནས་བཙན་བྱོལ་དུ་ཡོང་དགོས་དོན། མི་ཐོག་རྒན་པ་ཚོས་ལོ་རྒྱུས་གསུང་དགོས་རྒྱུ་གལ་ཆེན་པོ་འདུག མི་རབས་གཞོན་པ་ཚོས་ཀྱང་རང་ཉིད་ཀྱི་ཕ་མའི་ལོ་རྒྱུས་དང་ཕ་ཡུལ་སྐོར་ཤེས་པ་བྱ་རྒྱུ་གལ་འགངས་ཆེན་པོ་ཆགས་ཡོད། སྤྱི་ཡོངས་བོད་ཀྱི་རྒྱལ་རབས་རྣམས་དེབ་ཐེར་ཁག་ནང་འཁོད་ཡོད། འོན་ཀྱང་ཁྱིམ་ཚང་སོ་སོའི་ལོ་རྒྱུས་དང་ལུང་པའི་གནས་སྟངས་གང་ཡོད་པ་དེ་ཚོ་ཡང་མ་བརྗེད་པ་བྱེད་དགོས། གལ་སྲིད་བོད་ཕྱི་ནང་གཉིས་སུ་ཡོད་པའི་མི་ཐོག་གཞོན་པ་ཚོས་སོ་སོའི་ནང་མི་དང། མི་རིགས་ཀྱི་འབྱུང་ཁུངས་ལོ་རྒྱུས་དེ་ཚོ་བརྗེད་པ་ཡིན་ན། མི་རིགས་ཀྱི་ངོ་བོ་དང་ལ་རྒྱ་ཡང་རིམ་བཞིན་ཉམས་ཆག་འགྲོ་རྒྱུའི་ཉེན་ཁ་ཡོད། ལོ་གསར་གྱི་སྐབས་དགའ་དགའ་སྤྲོ་སྤྲོ་བྱེད་དགོས་ཀྱི་ཡོད་ཀྱང་ས་གནས་ཀྱི་ཁྲིམས་དང་། དེ་བཞིན་ཕྱིའི་མི་རིགས་ཀྱིས་བོད་མིར་བརྩི་བཀུར་བྱེད་རྒྱུའི་ཡ་རབས་བཟང་སྤྱོད་དེ་དག་སེམས་ལ་ཉར་རྒྱུ་གལ་ཆེན་པོ་ཡིན། ”ཞེས་གསུངས་འདུག
གསར་འགོད་པ། པདྨ་མཚོ།
