རྒྱལ་བའི་བཀའ་བསྟན་གྱི་ཆོས་སྦྱིན་གནང་གི་འདུག

དཔལ་ཡུལ་དར་ཐང་རིན་པོ་ཆེ་མཆོག་གིས་སྦྱིན་བདག་གནང་སྟེ་རྒྱལ་བའི་བཀའ་འགྱུར་ཚར་ ༡༠ དང་བསྟན་འགྱུར་ཚར་ ༥༠ བཅས་རྒྱ་གར་ནང་སྐྱེལ་འདྲེན་བྱས་ཏེ་རྒྱ་བལ་འབྲུག་གསུམ་གྱི་ཚོགས་སྡེ་ཁག་ལ་ཆོས་སྦྱིན་གནང་བཞིན་ཡོད་འདུག 

    ཕྱི་ལོ་ ༡༩༨༩ ལོར་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་དབུ་འཛུཊ་གནང་བ་ནས་བཟུང་། ཨ་རིའི་མངའ་སྡེ་ཁ་ལེ་ཧྥོར་ནི་ཡའི་ནང་བཞུཊ་པའི་དཔལ་ཡུལ་དར་ཐང་རིན་པོ་ཆེ་མཆོག་གི་ཨོ་ཌི་ཡཱ་ན་ཡེ་ཤེས་སྡེ་ཆོས་དཔར་ཁང་གིས། རྒྱལ་བའི་བཀའ་བསྟན་གཙོས་རིས་སུ་མ་ཆད་པའི་གྲུབ་མཐའ་ཁག་གི་མཁས་པའི་གསུང་འབུམ་དཀོན་པོའི་རིགས་དཔར་སྐྲུན་གནང་སྟེ། རྒྱ་བལ་འབྲུག་གསུམ་ནང་ཆོས་སྦྱིན་དང་། ཕྱི་རྒྱལ་ཁབ་ཁག་ཏུ་ཚོང་འགྲེམས་གནང་གི་ཡོད་ཅིང་། ཟླ་འདིའི་ཚེས་ ༡༧ ཉིན་རྒྱལ་བའི་བསྟན་འགྱུར་པོད་ཉིས་བརྒྱ་དོན་ལྔ་ཡོད་པ་ཚར་ ༥༠ དང་། བཀའ་འགྱུར་ཚར་ ༡༠ བཅས་གནས་མཆོག་རྡོ་རྗེ་གདན་ནས་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་སྐྱེལ་འདྲེན་བྱས་ཏེ། དགའ་ལྡན་ཕོ་བྲང་གཙོས་རྒྱལ་བལ་འབྲུག་གསུམ་གྱི་རིས་མེད་དགོན་སྡེ་དང་སློབ་གྲྭ་ཁག དཔེ་མཛོད་ཁང་སོགས་སྡེ་ཚན་ ༣༢ ཙམ་ལ་རིན་མེད་ཆོས་སྦྱིན་གནང་ཡོད་འདུག 

   གསར་འགོད་པའི་དྷ་རམ་ས་ལ་ཁུལ་གྱི་ཆོས་དཔེ་སྦྱིན་གཏོང་གི་འགན་འཁུར་མཁན་དམ་ཆོས་དཔལ་བཟང་ལགས་སུ་བཅར་འདྲི་ཞུས་པར་ཁོང་གིས། ༡༩༨༩ ལོར་སྔ་འགྱུར་རྙིང་མའི་སྨོན་ལམ་ཆེན་མོ་མགོ་འཛུགས་བྱས་པ་ནས་བཟུང་། དར་ཐང་རིན་པོ་ཆེ་མཆོག་གིས་ཆོས་དཔེ་མང་པོ་དཔར་འགྲེམས་སྦྱིན་གཏོང་གནང་གི་ཡོད་པ་མ་ཟད། ༢༠༡༣ ལོར་རྒྱལ་བའི་བཀའ་འགྱུར་རིན་པོ་ཆེ་པོད་བརྒྱ་དང་སོ་ལྔ་ཡོད་པ་ཚར་ ༡༥༠༠ པར་སྐྲུན་བྱས་ཏེ་རྒྱ་བལ་འབྲུག་གསུམ་ལ་ཆོས་སྦྱིན་གནང་ཡོད་པ་རེད། སྐབས་དེར་གུས་པས་འགན་བླངས་ཏེ་བཞུགས་སྒར་ཁུལ་གྱི་དགའ་ལྡན་ཕོ་བྲང་གཙོས་བཀའ་སྤྱི་གཉིས་དང་བོད་ཀྱི་དཔེ་མཛོད་ཁང་། སཱ་ར་མཐོ་སློབ་སོགས་བཀའ་འགྱུར་ཚར་ ༤༤ ཙམ་རིན་མེད་ཐོག་ཕུལ་བ་ཡིན། ད་ལོ་སླར་ཡང་བསྟན་འགྱུར་རིན་པོ་ཆེ་པོད་ཉིས་བརྒྱ་དོན་ལྔ་ཡོད་པ་ཚར་ ༡༠༠༠ པར་སྐྲུན་བྱས་ཏེ་རྒྱ་བལ་འབྲུག་གསུམ་ལ་རིན་མེད་འགྲེམས་སྤེལ་བྱེད་བཞིན་ཡོད། ཤེས་རིག་ལས་ཁུངས་གཅིག་པུས་བསྟན་འགྱུར་ཚར་ ༡༣ བླངས་ཏེ་སློབ་གྲྭ་ཁག་ཏུ་འགྲེམས་སྤེལ་གནང་གི་ཡོད་པ་རེད། ད་སྔ་བོད་ནང་དུའང་ཆོས་དཔེ་གང་ལ་གང་འཚམ་ཞིག་བཏང་ཡོད་པ་རེད། དར་ཐང་རིན་པོ་ཆེ་མཆོག་གིས་ད་བར་བོད་གངས་ཅན་ལྗོངས་ཀྱི་མཁས་པ་དང་བླ་མ་རྣམ་པའི་གསུང་འབུམ་མང་ཆེ་བ་དཔར་སྐྲུན་གྱིས་སྦྱིན་གཏོང་གནང་ཡོད་པ་རེད། རིན་པོ་ཆེ་མཆོག་གིས་ཆོས་དཔེ་སྦྱིན་གཏོང་ཙམ་མིན་པར། སྔ་འགྱུར་སྨོན་ལམ་ཆེན་མོ་དབུ་ཚུགས་ནས་ད་བར་ཧིན་སྒོར་དུང་ཕྱུར་མང་པོས་ཡར་དཀོན་མཆོག་ལ་དགེ་སྒྲུབ་དང་། མར་སྤྲང་པོ་ལ་སྦྱིན་གཏོང་གནང་བ་སོཊ་སྤྱི་ཚོཊ་ཞབས་ཞུ་དང་ཆོས་ཕྱོགས་ཀྱི་མཛད་པ་རྒྱ་ཆེར་བསྐྱངས་དང་སྐྱོང་བཞིན་ཡོད་པ་རེད།”ཅེས་བརྗོད་བྱུང་། 

    དམ་ཆོས་དཔལ་བཟང་ལགས་སུ་རྒྱ་གར་དང་ཕྱི་རྒྱལ་དཔར་སྐྲུན་ཁང་ཁག་གིས་བོད་པའི་ཆོས་དཔེ་མང་པོ་དཔར་སྐྲུན་བྱས་པར་དཀའ་ངལ་གང་འདྲ་ཡོད་མེད་དྲིས་པར་ཁོང་གིས། ༢༠༡༡ ལོར་ཆོས་དཔར་ཁང་ནས་ཆོས་དཔེ་དཔར་སྐྲུན་སྐོར་ལ་གློག་བརྙན་ཞིག་བཟོ་བཞིན་ཡོད་ཟེར་ནས་མི་སྣ་ ༡༠ ལ་བཅར་འདྲི་བྱས་པ་དང་། སྐབས་དེར་རྡོ་རྗེ་གདན་དུ་ང་ལའང་བཅར་འདྲི་བྱས་སོང་། གློག་བརྙན་དེའི་ཚན་པ་ཞིག་གི་ནང་ད་ལྟའི་བར་ཆོས་དཔེ་དཔར་སྐྲུན་བྱས་ཏེ་སྤྱི་ཚོགས་ཐོག་ཕན་གནོད་དང་བསམ་ཚུལ་ཅི་ཡོད་སྐོར་དྲིས་སོང་། སྐབས་དེར་ངས་དར་ཐང་ཆོས་དཔེ་ཡི་ཤོག་བུ་ལྕི་དྲགས་པ་དང་དཀར་དྲགས་ནས་མིག་ལ་གནོད་པ། དེ་བཞིན་ཤོག་ངོས་རེ་རེ་བཞིན་འཐོར་འགྲོ་བཞིན་འདུག གཉིས་པ་དར་ཐང་ཆོས་དཔར་ཁང་གི་ལས་བྱེད་ཚོ་བོད་ཡིག་ཡག་པོ་ཤེས་མཁན་དེ་འདྲ་མིན་སྟབས། དག་ཆའི་ཐོག་སྐྱོན་གནས་མང་པོ་འདུག འགྲོ་སོང་དེ་ཙམ་བཏང་ནས་ཡི་གེ་ཞུ་དག་ཚགས་ཚུད་མ་ཡོང་བར་ཆོས་དཔེ་རིན་ཐང་མེད་པ་ཆགས་ན་ཕངས་པོ་ཞེ་དྲག་རེད། ད་ལོ་ཡི་གེ་ཞུ་དག་ཐད་ངས་གང་ཐུབ་རོགས་པ་བྱེད་ཆོག་གི་རེད་ཅེས་ཞུས་ཡོད། བཀའ་བསྟན་འགྱུར་ལྟ་བུ་ཡིན་ན། བོད་ནང་གི་དཔེ་བསྡུར་མ་ཡིན་སྟབས་ཕལ་ཆེར་ནོར་འཁྲུལ་ཤོར་ཡོད་ཀྱི་མ་རེད། གང་ཡིན་ཟེར་ན། བོད་ནང་གི་མཁས་པ་ ༢༠ ལྷག་གིས་ལོ་མང་པོར་དེའི་སྒང་ལ་ཕྱག་ལས་གནང་བ་རེད། ནོར་འཁྲུལ་ཤོར་ས་གཙོ་བོ་དེ་འདི་ནས་ཡི་གེ་སྣ་རིང་སྣ་འབྲིང་སོགས་གློག་ཀླད་ནང་འཇུག་སྐབས་ནོར་འཁྲུལ་ཤོར་བ་རེད་བསམ་གྱི་འདུག དར་ཐང་རིན་པོ་ཆེ་ཁོང་གིས་ཀྱང་འདིའི་སྐོར་ལ་དོ་སྣང་ཆེན་པོ་གནང་གི་ཡོད་ཀྱང་དཀའ་ངལ་དེ་མུ་མཐུད་ལྷག་བསྡད་ཡོད་པ་རེད། ཡི་གེ་མ་དག་པ་དེ་མི་ཞིག་ལ་མཚོན་ན་མིག་ཡ་གཅིག་མེད་པ་ལྟ་བུ་རེད།”ཅེས་བརྗོད་སོང་།

       དེང་སང་བོད་ཕྱི་ནང་གཉིས་སུ་དཔེ་དེབ་མང་པོ་དཔར་སྐྲུན་བྱེད་བཞིན་པའི་སྐོར་ལ་ཁོང་གིས། མ་འོངས་པར་སྤྱི་ཚོགས་ལ་འགྱུར་ལྡོག་ཅི་ཞིག་བྱུང་ཡང་དེབ་ཇི་སྲིད་བར་གནས་འདུག་སྟབས། བོད་ཀྱི་རིག་གནས་ཡག་པོ་འདིར་གནོད་པ་ཆེན་པོ་འགྲོ་ངེས་རེད། དེང་སང་བོད་ཕྱི་ནང་གཉིས་ནས་ཁ་ཡོད་ལག་ཐོག་ཚང་མས་རྩོམ་ཡིག་མང་པོ་ཞིག་འབྲི་བཞིན་ཡོད་ཀྱང་། ཀློག་པ་པོས་ཁ་ཙམ་ཕྱེས་མ་མྱོང་བའི་དེབ་མང་པོ་ཡོད། དེབ་ཅིག་པར་སྐྲུན་བྱས་སྐབས་མ་འོངས་པར་གཞོན་སྐྱེས་ཚོས་བོད་རང་གི་རིག་གནས་ཀྱི་རིན་ཐང་རྟོགས་ཐུབ་པ་ཞིག་དང་། སྤྱི་ཚོགས་ལ་ཕན་ཐོགས་ཡོད་པ་ཞིག་ལ་བསམ་བློ་གཏོང་རྒྱུ་ཧ་ཅང་གལ་ཆེན་པོ་རེད། མི་དེས་དེབ་བཏོན་པ་རེད་ཟེར་བ་ཙམ་གྱི་ཆེད་དུ་སྒོར་མོ་མང་པོ་བཏང་བསྡད་ན་དོན་སྙིང་ཡོད་པ་མ་རེད། མདོ་དོན། བོད་ཡིག་གི་དེབ་གང་ཞིག་བརྩམས་ཀྱང་དག་ཆ་ལྡན་པ་ཞིག་དང་སྐད་ཆ་ར་མ་ལུག་ཅིག་མིན་པར་སྤུས་དག་ཅིག་ཡོང་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག”ཅེས་བརྗོད་སོང་།

གསར་འགོད་པ། པདྨ་མཚོ།