ཚ་བ་གཞིས་བྱེས་གཉིས་ནས་བརྟན་བཞུཊ་ཕུལ།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་ཚ་བ་གཞིས་བྱེས་གཉིས་ནས་བརྟན་བཞུགས་བསྟར་འབུལ་ཞུས་བ་དང་འབྲེལ། ༧གོང་ས་མཆོག་གིས་བླ་སློབ་གཉིས་ཀྱི་ངོས་ནས་བསོད་ནམས་བསག་ཐུབ་ན་བརྟན་བཞུགས་ཀྱི་ནུས་པ་འཐོན་ཐུབ་སྐོར་བཀའ་སློབ་གནང་སོང་།

དེ་རིང་སྔ་དྲོའི་ཆུ་ཚོད་ ༩ པ་ཙམ་ལ་དྷ་ས་ཐེག་ཆེན་གཙུག་ལག་ཁང་དུ། ༧གོང་ས་མཆོག་དབུ་བཞུགས་ཐོག་བོད་ཚེས་ ༡༥ ཉིན་གྱི་མཆོད་འབུལ་སྨོན་ལམ་ཆེན་མོ་ཚོགས་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ་གཞན་གཉིས། དེ་བཞིན་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན་རྣམ་པ་དང་། བོད་མི་མང་སྤྱི་འཐུས་སྤེན་པ་ཚེ་རིང་མཆོག་གི་གཙོས་སྤྱི་འཐུས་རྣམ་པ་དང་སྲི་ཞུ་ལས་བྱེད། གཞན་ཡང་། དྷ་ས་ཁུལ་གྱི་སློབ་ཕྲུག་དང་སེར་སྐྱ་མི་མང་བཅས་ཁྱོན་མི་གྲངས་ ༥༠༠༠ ཙམ་འདུ་འཛོམས་གནང་འདུག

གསུང་ཆོས་ཀྱི་ཐོག་མར་ཁམས་ཚ་བ་གཞིས་བྱེས་གཉིས་ཐུན་མོང་གིས། ༧གོང་ས་མཆོག་སྐུ་ཚེ་སྐལ་བརྒྱར་བརྟན་ཞིང་ཐུགས་བཞེད་མ་ལུས་ལྷུན་གྱིས་འགྲུབ་པའི་བརྟན་བཞུགས་བསྟར་འབུལ་ཞུས་སོང་། སྐབས་དེར་༧གོང་ས་མཆོག་གིས་བརྟན་བཞུགས་དང་འབྲེལ་བའི་བཀའ་སློབ་གནང་དོན། “དེ་རིང་ཚ་བའི་ལུང་པ་ཁག་ཁ་ཤས་ནས་བརྟན་བཞུགས་འབུལ་ཆེད་འདིར་འཛོམས་བསྡད་ཡོད་པ་རེད། ལུས་པོ་འདིར་འཛོམས་མེད་ནའང་ལྷག་བསམ་དང་དད་པ། འདུན་པ་རྩེ་གཅིག་ཏུ་གནས་པའི་ཐོག་ནས་བཞུགས་ལུས་རྒྱ་ཆེ་མི་མང་གིས་འདིར་བློ་གཏད་ནས་བསྡད་ཡོད་པ་རེད། བརྟན་བཞུགས་ཕུལ་བའི་ནུས་པ་ཐོན་པར་ང་རང་ཚོ་ཚང་མས་བསོད་ནམས་བསག་དགོས་པ་རེད། བླ་མའི་ངོས་ནས་བསོད་ནམས་བསག སློབ་མའི་ངོས་ནས་ཀྱང་བསོད་ནམས་བསག་པ་ཡིན་ན། བསོད་ནམས་ལྡན་པའི་མི་ཡིས་བསམ་པ་རྣམས་ཀྱང་འགྲུབ་ཅེས་གསུངས་པ་ལྟར། བསོད་ནམས་ལྡན་པའི་མི་ཡིས་བསམ་དོན་འགྲུབ་ཀྱི་རེད་ལ། ཕྱི་ནང་གི་བར་ཆད་ཀྱིས་མི་གནོད་པ་ཞིག་ཡོང་གི་རེད། དེའི་ཕྱིར་བསོད་ནམས་བསག་པའི་ཐབས་ལམ་ཡག་ཤོས་བྱང་ཆུབ་ཀྱི་སེམས་སྒོམ་རྒྱུ་དེ་རེད། ”ཅེས་གསུངས་སོང་།

སྐྱེས་རབས་སོ་བཞི་བའི་གསུང་ཆོས་དབུ་འཛུགས་གནང་སྐབས། ༧གོང་ས་མཆོག་གང་ཉིད་ཀྱིས་དཀོན་མཆོག་གསུམ་ལ་སྐྱབས་སུ་འགྲོ་སྟངས་ཐད། “ ནང་པ་སངས་རྒྱས་པའི་སྐྱབས་གནས་གསུམ་ནི་སངས་རྒྱས་དང་ཆོས། དགེ་འདུན་གསུམ་རེད། དེ་དག་ལས་ཀྱང་སྐྱབས་གནས་དངོས་དེ་སངས་རྒྱས་དང་དགེ་འདུན་གཉིས་མིན་པར་ཆོས་དཀོན་མཆོག་ཡིན་པ་རེད། སངས་རྒྱས་ཆོས་དེ་སྟོན་མཁན་གྱི་སྟོན་པ་ཡིན་པའི་ཆ་ནས་སྐྱབས་སུ་བཞག་པ་རེད། དགེ་འདུན་དེ་དང་པོ་འགོག་ལམ་ནས་བཟུང་ཆོས་དཀོན་མཆོག་ལ་བརྟེན་ནས་རིམ་གྱིས་རྟོགས་པ་མཐོ་རུ་སོང་བ་ཞིག་ཡིན་སྟབས། བསླུ་བ་མེད་པའི་སྐྱབས་གནས་ཀྱི་ཟླ་གྲོགས་ཆགས་པ་རེད། སངས་རྒྱས་སྐྱབས་སྟོན་པ་པོ་དང་ཆོས་སྐྱབས་དངོས། དགེ་འདུན་སྐྱབས་བསྒྲུབ་པའི་ཟླ་གྲོགས་ཞེས་དཀོན་མཆོག་གསུམ་ལ་སྐྱབས་སུ་འགྲོ་སྟངས་ཀྱི་ཆ་ནས་དེ་འདྲ་བྱས་ནས་འགྲོ་དགོས་པ་རེད། ”ཅེས་བཀའ་སློབ་ལམ་སྟོན་གནང་སོང་།

དེ་རིང་ཕྱི་དྲོའི་ཆུ་ཚོད་ ༥ ཐོག་བོད་ཀྱི་ཟློས་གར་ཚོགས་ཁང་དུ། ཚ་བ་གཞིས་བྱེས་གཉིས་ནས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པའི་དབུས་དྲུང་གཞོན་ཡན་གྱི་སྲིད་ཞུ་བ་ཚོར་གླུ་གར་གཟིགས་འབུལ་དང་དགོང་ཟས་གསོལ་སྟོན་ཞིག་གོ་སྒྲིག་གནང་རྒྱུ་ཡིན་འདུག

གསར་འགོད་པ། པདྨ་མཚོ།