སང་ཉིན་གཟའ་མིག་དམར་ཉིན་ནས་བཟུང་༧གོང་ས་མཆོག་གིས་སིམ་ལ་ཇོ་ནང་དགོན་དང་སིམ་ལ་གཏན་སློབ། སིམ་ལ་གཙུག་ལག་སློབ་གྲྭ་བཅས་སུ་མཛད་འཕྲིན་བསྐྱང་རྒྱུ་ཡིན་འདུག
དེ་རིང་ཕྱི་ཚེས་ ༡༧ ཉིན་གྱི་སྔ་དྲོའི་ཆུ་ཚོད་ ༡༡།༣༠ ཐོག ༸གོང་ས་མཆོག་དགའ་ལྡན་ཕོ་བྲང་གི་ལས་བྱེད་དང་བཞུགས་སྒར་སེར་སྐྱ་མི་མང་གི་ཕེབས་སྐྱེལ་ཁྲོད་ངྷ་རམ་ས་ལ་ནས་ཧི་མཱ་ཅལ་མངའ་སྡེའི་རྒྱལ་ས་སིམ་ལ་ཁུལ་དུ་ཆིབས་སྒྱུར་བསྐྱངས་སོང་ལ། སང་ཉིན་ཕྱི་ཚེས་ ༡༨ ཉིན་གྱི་སྔ་དྲོ་སིམ་ལར་ཡོད་པའི་ཇོ་ནང་དགོན་དུ་ཆིབས་བསྒྱུང་གནང་རྒྱུ་དང་། ཉིན་རྒྱབ་སིམ་ལ་གཏན་སློབ་དུ་ཆིབས་སྒྱུར་གྱིས་སྐྱབས་འགྲོ་དང་སེམས་བསྐྱེད་ཀྱི་ཆོས་འབྲེལ་སྩལ་རྒྱུ་ཡིན་པ་མ་ཟད། རྡོ་རྗེ་བྲག་དགོན་པར་གུ་རུའི་ལྷ་ཁང་གསར་བཞེངས་གྲུབ་པར་རབ་གནས་གནང་རྒྱུ་ཡིན་འདུག
ཕྱི་ཚེས་ ༡༩ ཉིན་༸གོང་ས་མཆོག་གིས་སིམ་ལ་གཙུག་ལག་སློབ་གྲྭའི་བསླབ་པ་མཐར་སོན་གྱི་མཛད་སྒོར་ཆིབས་བསྒྱུར་གྱིས་བཀའ་སློབ་སྩལ་རྒྱུ་ཡིན་འདུག་ལ། ཉིན་དེའི་མཛད་སྒོར་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ (Chief Minister) མཆོག་དང་། ཧི་མཱ་ཅམ་མངའ་སྡེའི་སྲིད་སྐྱོང་ (Governor) མཆོག་བཅས་ཕེབས་རྒྱུ་ཡིན་འདུག ཚེས་ ༢༠ ཉིན་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་གྱིས་ཉིན་རྒྱབ་ལྡི་ལིའི་བུད་མེད་མཐོ་སློབ་ (Lady Shri Ram College) ཏུ་འགྲོ་བ་དོན་ལྡན་གྱི་མི་ཚེ་དང་མིའི་བཟང་སྤྱོད། བདེ་སྐྱིད་ཅེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག
གསར་འགོད་པ། དོན་གོ
