བོད་ཀྱི་གཞུང་འབྲེལ་མ་ཡིན་པའི་ཚོགས་པ་བཞི་ཡིས་རྒྱ་གར་གྱི་གྲོས་ཚོགས་འཐུས་མི་དང་ཆབ་སྲིད་ཚོགས་པ་ཁག་གི་འཐུས་མིར་བོད་དོན་ཞུ་གཏུག་བྱས་འདུག
ཟླ་འདིའི་ཕྱི་ཚེས་ ༡༩ དང་ ༢༠ ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལི་གསར་པར་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་བུད་མེད་ལྷན་ཚོགས། རྒྱལ་སྤྱིའི་བོད་དོན་འབྲེལ་མཐུད་ལས་ཁུངས། རྒྱ་གར་བོད་རང་བཙན་སློབ་ཕྲུག་ཚོགས་པ་བཅས་ཐུན་མོང་གིས། རྒྱ་གར་གྲོས་ཚོགས་གོང་འོག་གི་འཐུས་མི་གསུམ་དང་རྒྱ་གར་རྒྱལ་ཡོངས་ཀང་རི་སི་ཚོགས་པ་(National of Indian National Congress)དང་། ལྡི་ལིའི་གཞུང་འཛིན་ཚོགས་པ་(Aam Aadmi Party)བཅས་ཀྱི་འཐུས་མི་ ༦ བཅས་ལ་བོད་ཀྱི་ཛ་དྲག་གནས་བབ་ཞུ་གཏུག་བྱས་ཡོད་པ་དང་། འཐུས་མི་རྣམས་པས་བོད་དོན་ཐད་རྒྱབ་སྐྱོར་གྱི་རྣམ་པ་བསྟན་ཡོད་པ་མ་ཟད། རྒྱ་གར་ཀང་རི་སིའི་ཚོགས་པའི་ཚོགས་གཙོ་ལྕམ་སོ་ནེ་ཡ་གྷན་ཌི་མཆོག་དང་རྒྱ་གར་སྲིད་བློན་རྣམ་གཉིས་ལ་བོད་དོན་སྙན་གསེང་ཞུ་རྒྱུ་དང་། དེ་བཞིན་སྐབས་རྗེས་མའི་གྲོས་ཚོགས་ནང་༸གོང་ས་མཆོག་གདན་འདྲེན་ཞུ་ཐབས་ལ་འབད་བརྩོན་གནང་རྒྱུ་ཡིན་པའི་ཞལ་བཞེས་གནང་ཡོད་འདུག
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་རྨེའུ་དཀོན་རྒྱམ་ལགས་ཀྱིས་ཞུ་གཏུག་ལས་འགུལ་གྱི་དགོས་དམིགས་བརྗོད་དོན། “བོད་ཀྱི་གནད་དོན་འདི་བོད་མིའི་དཀའ་ངལ་ཙམ་མ་ཡིན་པར་ཨེ་ཤ་ཡའི་ཆུ་དང་ཐོན་ཁུངས་ཀྱི་གནད་དོན་གལ་ཆེན་པོ་ཞིག་ཆགས་བསྡད་ཡོད་སྟབས། རྒྱལ་ཁབ་སོ་སོའི་གྲོས་ཚོགས་འཐུས་མི་དང་གནད་ཡོད་མི་སྣ་རྣམས་ལ་མཁྱེན་རྟོགས་གསལ་བོ་ཡོང་ཐབས་དང་། ལྷག་པར་དུ་རྒྱ་གཞུང་དང་དེའི་སྲིད་བྱུས་གདུག་རྩུབ་ཅན་གྱིས་སྤྱིར་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མ་ཟད། ཡང་སྒོས་ཨེ་ཤ་ཡའི་ཁོར་ཡུག་གཏོར་བཅོམ་དང་དཔལ་འབྱོར་གནོན་ཤུགས་ཀྱིས་སྒོ་གང་སར་བཙན་འཛུལ་བྱེད་བཞིན་པའི་གནས་སྟངས་རྣམས་གསལ་སྟོན་ཆེད་དུ་ཡིན།”ཞེས་བརྗོད་སོང་།
ཐེངས་འདིའི་གཞུང་འབྲེལ་མ་ཡིན་པའི་ཚོགས་པ་ཁག་གི་བོད་དོན་ཞུ་གཏུག་གི་དགོས་འདུན་གསུམ་ནི། གཅིག ༢༠༠༩ ལོ་ནས་བཟུང་ད་ལྟའི་བར་བོད་ནང་གཅིག་པུར་རང་ལུས་མེར་སྲེག་གིས་ཞི་རྒོལ་གནང་མཁན་ ༡༢༩ བྱུང་བའི་ཛ་དྲག་གི་གནས་བབ་ལ་ངོས་འཛིན་གྱིས་གྲོས་ཚོགས་ནང་གླེང་སློང་གནང་རོགས། གཉིས། ༢༠༡༤ ལོར་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་དུ་ཡོང་སྐབས་རྒྱ་གར་གྲོས་ཚོགས་ཀྱིས་ནུས་ཤུགས་བཏོན་ཏེ་སྲིད་བློན་མཆོག་ལ་བོད་ཀྱི་གནས་བབ་གླེང་སློང་གནང་དུ་འཇུག་རོགས། གསུམ། ༸གོང་ས་མཆོག་རྒྱ་གར་ནང་བཞུགས་ནས་ལོ་དྲུག་ཅུ་ཉེ་བར་འཁོར་བཞིན་ཡོད་ཀྱང་། གྲོས་ཚོགས་ནང་ཐེངས་གཅིག་ཀྱང་གདན་འདྲེན་ཞུས་མེད་པས་གྲོས་ཚོགས་ནང་གདན་འདྲེན་ཞུ་རོགས་བཅས་འབོད་སྐུལ་གནང་ཡོད་འདུག
གསར་འགོད་པ། པདྨ་མཚོ།
ཟླ་འདིའི་ཕྱི་ཚེས་ ༡༩ དང་ ༢༠ ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལི་གསར་པར་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་བུད་མེད་ལྷན་ཚོགས། རྒྱལ་སྤྱིའི་བོད་དོན་འབྲེལ་མཐུད་ལས་ཁུངས། རྒྱ་གར་བོད་རང་བཙན་སློབ་ཕྲུག་ཚོགས་པ་བཅས་ནས་ཞུ་གཏུགས་ལས་འགུལ་ལ་རྗེས་སུ་ཡི་རང་ཡོད། བོད་ཀྱི་གཞོན་ནུ་ཚོགས་པ་དང། བོད་རྒྱལ་ཡོངས་མང་གཙོ་ཚོགས་པ་ག་པར་ཡོད། ཁྱེད་རྣམ་པའི་ཚོགས་པའི་མིང་གི་ཐོག་མར་༼བོད་༽ཅེས་པའི་སྤྱི་མིང་འདི་མིང་དོན་མཚུངས་པ་བྱ་རོགས།