ཟླ་འདིའི་ཕྱི་ཚེས་ ༡༥ ཉིན་རྒྱ་ནག་དབུས་དམག་དོན་ལྷན་ཁང་གི་མགོ་ཁྲིད་གཞོན་པ་ཟུར་པ་ཞི་ཚེ་ཧུའུ་སྨན་ཁང་ནས་ཁྲིད་དེ་ཞིབ་བཤེར་བྱེད་བཞིན་ཡོད་འདུག
ཁ་སང་རོ་ཊིར་སི་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༥ ཉིན་རྒྱ་ནག་དབུས་དྲག་ཆས་ཉེན་རྟོག་པ་བཅུ་གྲངས་ཤིག་གིས། པེ་ཅིན་ ༣༠༡ སྨན་ཁང་དུ་ཡོད་པའི་རྒྱ་ནག་དབུས་དམག་དོན་ལྷན་ཁང་གི་མགོ་ཁྲིད་གཞོན་པ་ཟུར་པ་ཞི་ཚེ་ཧུའུ་སྨན་ཁང་ནས་ཁྲིད་དེ། དམག་དོན་ཐད་ཀྱི་ལྐོག་ཟ་རུལ་སུངས་ཀྱི་གྱོད་གཞི་གལ་ཆེན་ཞིག་གི་ཐོག་ཞིབ་བཤེར་བྱེད་མགོ་བརྩམས་ཡོད་པ་དང་། ཉིན་དེར་ཁོའི་བཟའ་ཟླ་དང་བུ་མོ། ཁོ་རང་གི་དྲུང་ཡིག་གཅིག་བཅས་འཛིན་བཟུང་བཀག་ཉར་བྱས་ཡོད་པ་མ་ཟད། ཁོ་བོའི་དྲུང་ཡིག་དང་ཉེན་སྲུང་དམག ཁ་ལོ་བ་སོགས་གསར་དུ་བཞག་སྟེ་སྟངས་འཛིན་ནན་པོ་བྱེད་བཞིན་ཡོད་འདུག
༢༠༡༢ ལོའི་ཕྱི་ཟླ་ ༢ ནང་རྒྱ་ནག་ཁྲུང་ཆིན་གྲོང་ཁྱེར་ཉེན་རྟོག་ཁང་གི་མགོ་ཁྲིད་ཝང་ལི་ཅིན་ཨ་རིའི་གཞུང་ནང་ཉེན་གཡོལ་དུ་ཕྱིན་རྗེས། རྒྱ་ནག་དབུས་ཆབ་སྲིད་ལྷན་ཁང་གི་མགོ་ཁྲིད་ཟུར་པ་ཀྲུའུ་ཡཱོང་ཁང་དང་པའོ་ཞི་ལེ་གཉིས་ཀྱི་གནད་དོན་མང་པོ་ཕྱི་ནང་གི་བརྒྱུད་ལམ་གང་སར་ཐོན་ཡོད་པ་མ་ཟད། ཀྲུའུ་དང་པའོ་གཉིས་ཀྱི་དབང་ཆ་སྒེར་སྤྱོད་དང་ལྐོག་ཟ་རུལ་སུངས། སྲིད་བསྒྱུར་ལྐོག་ཇུས། བུད་མེད་ལ་ལྐོག་འབྲེལ་སོགས་ཀྱི་ནག་ཉེས་ནང་། ཞི་ཚེ་ཧུའུ་མི་སྣ་གཙོ་གྲས་ཤིག་ཡིན་པ་མ་ཟད། སྲིད་འཛིན་ཟུར་པ་ཅང་ཙེ་མེན་གྱི་རྒྱ་ནག་དམག་ཕྱོགས་ཀྱི་ཆེས་བློ་གཏད་དང་ལྟ་སྐྱོང་ཐོབ་པའི་མི་སྣ་ཞིག་ཡིན་འདུག ཡིན་ནའང་། འདས་ལོའི་ལོ་མགོར་ཁོ་བོར་ལྐང་ཕུག་སྐྲན་ནད་ཕོག་ཡོད་ཚུལ་བརྗོད་དེ་པེ་ཅིན་ ༣༠༡ སྨན་ཁང་དུ་བསྡད་ཡོད་སྟབས། གནད་དོན་དབྱེ་ཞིབ་པ་མང་པོས་ནད་གཞི་དེའི་རྐྱེན་གྱིས་ཁོ་བོའི་ནག་ཉེས་ལ་ཞིབ་བཤེར་མི་བྱེད་པའི་ཚོད་དཔག་བྱས་ཡོད་ཀྱང་། ད་རེབ་གློ་བུར་དུ་ཁོ་བོ་སྨན་ཁང་ནས་ཁྲིད་དེ་ཞིབ་བཤེར་བྱེད་མགོ་བརྩམས་ཡོད་འདུག
ཞི་ཚེ་ཧུའུ་ ༡༩༤༣ ལོར་རྒྱ་ནག་ལོ་ལིན་ཞིང་ཆེན་དུ་སྐྱེས་ཤིང་། ༡༩༦༣ ལོར་མི་མང་བཅིངས་གྲོལ་དམག་ནང་འཛུལ་ཞུགས་བྱས་ཡོད་པ་དང་། ༡༩༦༨ ལོར་ཧ་ཨར་པེན་དམག་དོན་ཆེད་ལས་སློབ་ཆེན་ནས་མཐར་ཕྱིན། དེ་ནས་སྔ་གཞུག་ཏུ་ཁྲིན་ཡཱང་དང་ཅི་ནན་དམག་ཁུལ་གྱི་རྒྱུན་ལས་བྱས་མྱོང་བ་མ་ཟད། ༢༠༠༤ ལོར་རྒྱ་ནག་དབུས་དམག་དོན་ཨུ་ཡོན་ལྷན་ཁང་གི་མགོ་ཁྲིད་གཞོན་པ་དང་། ༢༠༠༧ ལོར་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་སོགས་སུ་བསྐོ་བཞག་བྱས་ཡོད་འདུག
གསར་འགོད་པ། པདྨ་མཚོ།
