ནུབ་ཕྱོཊ་པའི་ཞིབ་འཇུག་གནང་སྟངས་ལྟར་བོད་ཡིག་གི་ཉམ་ཆཊ་ཐད་ཉམས་ཞིབ་གནང་དགོས།

ཁ་སང་བོད་ཀྱི་སྐད་ཡིག་ཞབས་ཞུ་ཁང་གི་གོ་སྒྲིག་གནང་བའི་བགྲོ་གླེང་ཐོག བགྲོ་གླེང་བ་ཚོས་བོད་ཡིག་ཉམ་ཆགས་འགྲོ་བཞིན་པ་དེ་སློབ་དེབ་དང་དགེ་རྒན། གཞན་དབང་སྟབས་བསྟུན་གང་ཡིན་ལ་ནུབ་ཕྱོཊ་པའི་ཞིབ་འཇུག་བྱེད་སྟངས་ལྟར་ཉམས་ཞིབ་མཐིལ་ཕྱིན་གནང་སྟེ་གྲུབ་དོན་རེའུ་མིག་ཅིག་བཏོན་རྒྱུ་གལ་ཆེན་ཡིན་སྐོར་བརྗོད་འདུག

ཁ་སང་ཕྱི་ཚེས་ ༢༢ ཉིན་གྱི་ཉིན་རྒྱབ་ཆུ་ཚོད་ ༢ པ་ནས་ ༥ བར་ཀིརྟིའི་དགེ་རྩ་ཚོགས་པའི་གཞན་ཕན་ཞི་བདེའི་ཚོགས་ཁང་དུ། བོད་ཀྱི་སྐད་ཡིག་ཞབས་ཞུ་ཁང་དབུ་བརྙེས་ཏེ་ལོ་གཅིག་འཁོར་བའི་དུས་དྲན་སྲུང་གཙི་དང་འབྲེལ་༼བོད་ཀྱི་སྐད་ཡིག་དར་སྤེལ་དང་སྲུང་སྐྱོབ༽ཅེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་སོང་། དེར་ས་ར་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་དང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས། མེས་དབོན་གཙུག་ལག་དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེ་ལགས། དེ་བཞིན་ངྷ་སྟེང་བོད་ཁྱིམ་གྱི་སྐུ་ཚབ་དང་བོད་སྐད་ཡིག་ཐོག་ཞིབ་འཇུག་དོན་གཉེར་གནང་མཁན་བཅས་སེར་སྐྱ་ཕོ་མོ་ ༤༠ ཡས་མས་ཤིག་འཛོམས་འདུག

བགྲོ་གླེང་ཐོག་སྐུ་མགྲོན་རྣམ་པས་བོད་སྐད་ཡིག་གི་རིན་ཐང་དང་དགོས་མཁོ། གལ་གནད། སྲུང་སྐྱོབ་དང་དར་སྤེལ་བྱེད་ཕྱོགས། བཙན་བྱོལ་སྤྱི་ཚོགས་ནང་གི་བོད་སྐད་ཡིག་གི་གནས་སྟངས་བཅས་ཀྱི་ཐོག་གཏམ་བཤད་བགྲོ་གླེང་གནང་ཡོད་ཅིང་།  དགེ་བཤེས་འཇམ་དཔལ་གྲགས་པ་ལགས་ཀྱིས་བརྗོད་གཞི་དང་འབྲེལ་བའི་གཏམ་བཤད་གནང་སྐབས། བོད་སྐད་ཡིག་ནི་སངས་རྒྱས་བཅོམ་ལྡན་འདས་ཀྱི་བཀའ་བསྟན་ཡོངས་རྫོགས་གསལ་སྟོན་གནང་བྱེད་དང་། འཛམ་གླིང་སྐྱེ་འགྲོ་ཀུན་ལ་ཕན་བདེ་བསྐྲུན་བྱེད་ཀྱི་སྐད་ཡིག་ཅིག་ཆགས་ཡོད་སྟབས། ང་ཚོའི་མི་ཐོག་འདིར་ཉམས་ཆག་ཕྱིན་པ་ཡིན་ན། ང་ཚོའི་འཐུས་ཤོར་ཅིག་དང་ལོ་རྒྱུས་ཐོག་གི་ནག་ཉེས་ཆེན་པོ་ཞིག་ཡིན་པ་མ་ཟད། འཛམ་གླིང་སྐྱེ་འགྲོ་ཡོངས་ལ་འགན་མ་འཁུར་བ་ཞིག་ཆགས་ངེས་པ་དང་།  སྐད་ཡིག་སྲུང་སྐྱོབ་བྱ་བར་མི་རིགས་སྲུང་སྐྱོབ་བྱེད་དགོས་པ་དང་། མི་རིགས་སྲུང་སྐྱོབ་བྱ་བར་རང་དབང་མེད་དུ་མི་རུང་བ་ཆགས་ཡོད་པ་ལྟར། ཇི་སྲིད་བོད་ལ་རང་དབང་མ་རག་བར་བོད་མི་རིགས་ཀྱི་སྐད་ཡིག་ལ་མུ་མཐུད་དཀའ་ངལ་འཕྲད་སྲིད་སྐོར་སོགས་བརྗོད་སོང་།

དགེ་བཤེས་བློ་བཟང་སྨོན་ལམ་ལགས་ཀྱིས། ང་ཚོས་བོད་སྐད་ཡིག་དར་སྤེལ་གཏོང་ཐབས་ལ་དཀའ་ངལ་གང་ཞིག་འཕྲད་ཀྱི་ཡོད་མེད་ཤེས་ཀྱི་ཡོད་ཀྱང་། ཚོགས་འདུ་དང་སྡིངས་ཆའི་སྟེང་གཏམ་བཤད་གནང་བ་ཙམ་ལས། རྒྱུ་རྐྱེན་གང་གི་དབང་གིས་ཉམས་ཆག་འགྲོ་གི་ཡོད་མེད་ཐད་རྟོག་ཞིབ་དང་འབྲེལ་ལག་བསྟར་གནང་མཁན་དཀོན་པོ་ཆགས་ཡོད་སྟབས། སྐད་ཡིག་ཉམས་ཆག་ཏུ་འགྲོ་བཞིན་པའི་རྒྱུ་རྐྱེན་སློབ་དེབ་དང་དགེ་རྒན། གཞན་དབང་སྟབས་བསྟུན་སོགས་གང་ཡིན་མིན་ལ་ནུབ་ཕྱོགས་པའི་ཞིབ་འཇུག་བྱེད་སྟངས་ལྟར་ཉམས་ཞིབ་མཐིལ་ཕྱིན་གནང་སྟེ་ཞིབ་འཇུག་གི་གྲུབ་དོན་རེའུ་མིག་ཅིག་བཏོན་རྒྱུ་གལ་ཆེན་ཡིན་སྐོར་བརྗོད་བྱུང་བ་མ་ཟད། ཁོང་གིས་བཙན་བྱོལ་སྤྱི་ཚོགས་ནང་སྐད་ཡིག་སྲུང་སྐྱོབ་དར་སྤེལ་གཏོང་རྒྱུ་དེ་ཐ་སྙད་སྦྱོང་རྒྱུ་ཙམ་མིན་པར། བརྡ་སྤྲོད་དང་བྱ་ཚིག ཚིག་རྒྱན་གྱི་འགྲོ་སྟངས་ཐོག་ལ་ཐུགས་འཁུར་མང་ཙམ་བཞེས་ཏེ་དོ་སྣང་བྱ་རྒྱུ་གལ་ཆེན་ཡིན་སྐོར་སོགས་བརྗོད་སོང་།

དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེ་ལགས་ཀྱིས། བོད་མི་ཚོ་སྤྱི་ཚོགས་ཐོག་གདེང་སྤོབས་ཆེན་པོས་འགྲོ་ཐུབ་པ་དང་། རྒྱལ་སྤྱིའི་སྤྱི་ཚོགས་ཀྱིས་གུས་བཀུར་དང་བསྟོད་བསྔགས་ཞུ་ཡུལ་དུ་གྱུར་དོན་གཙོ་བོ་བོད་ཀྱི་སྐད་ཡིག་དང་རིག་གཞུང་ཆགས་ཡོད་སྟབས། དེ་དག་ཉམས་པ་སླར་གསོ་དང་མི་ཉམས་རྒྱུན་འཛིན་བྱ་རྒྱུ་ཧ་ཅང་གལ་ཆེན་ཆགས་ཡོད་པ་དང་། ད་ལྟའི་བར་གཞུང་དང་གཞུང་འབྲེལ་མིན་པའི་ཚོགས་པ་ཁག་གིས་རང་ངོ་རང་ཤེས་དང་རང་འགན་རང་འཁུར་གྱིས་ལས་འགུལ་འདྲ་མིན་སྤེལ་ཡོད་ཀྱང་། གྲུབ་འབྲས་དེ་ཙམ་མ་ཐོན་པ་ཡིན་ན་སེམས་ཤུགས་ཆགས་ཏེ་རྒྱུན་འཁྱོངས་གནང་གི་མེད་པའི་སྣང་ཚུལ་འདུག་སྟབས། ལས་ཀ་གང་ཞིག་མགོ་བརྩམས་ཡང་མཇུག་སྐྱོང་བྱ་རྒྱུ་གལ་ཆེན་ཡིན་སྐོར་བརྗོད་བྱུང་བ་མ་ཟད། ཁོང་གིས་ ༢༠༠༥ ལོ་ནས་བཟུང་དཔེ་སྟོན་སློབ་གྲྭ་གཙོས་སམ་བྷོ་ཊའི་སློབ་གྲྭའི་ཁྱབ་ཁོངས་སློབ་གྲྭ་ཁག་ཏུ་ཤེས་ཡོན་སྲིད་བྱུས་ལག་བསྟར་ཞུ་མུས་ཡིན་ཡང་། ཤེས་ཡོན་སྲིད་བྱུས་ཡག་པོ་ཡོད་མེད་སློབ་གྲྭ་དེ་དག་ལས་ཐོན་པའི་སློབ་མ་ཚོས་སྤྱི་ཚོགས་ནང་ལས་ཀ་བྱེད་སྐབས། བསམ་བློ་གཏོང་སྟངས་དང་ཤེས་ཡོན་གནས་ཚད་བཅས་ལ་བལྟས་ཏེ་བརྗོད་རྒྱུ་ཞིག་ཆགས་ཡོད་སྐོར་སོགས་བརྗོད་སོང་།

བོད་ཀྱི་སྐད་ཡིག་ཞབས་ཞུ་ཁང་ནི། ཕྱི་ལོ་ ༢༠༡༣ ལོར་བོད་སྐད་ཡིག་རྒྱ་གར་གྱི་ཁྲིམས་མཐུན་སྐད་ཡིག་ཅིག་ཏུ་འགྱུར་ཐབས་ལ་འབད་བརྩོན་གནང་ཆེད་གསར་འཛུགས་བྱས་པ་ཞིག་ཡིན་འདུག་ལ། ད་ལྟའི་བར་ཞབས་ཞུ་ཁང་འདིས་བོད་སྐད་ཡིག་ཉམས་པ་སླར་གསོ་དང་མི་ཉམས་རྒྱུན་འཛིན་ཆེད་རྒྱ་གར་གཞུང་ལ་ཞུ་སྐུལ་དང་། བོད་ཀྱི་སྐད་ཡིག་སྲུང་སྐྱོབ་དང་འབྲེལ་བའི་བགྲོ་གླེང་བཅས་གོ་སྒྲིག་གནང་བཞིན་ཡོད་འདུག

གསར་འགོད་པ། དོན་གྲུབ།