ཁ་སང་མཉམ་འབྲེལ་རྒྱལ་ཚོགས་ཀྱིས་ཁུ་རེ་མྰེ་ཨུ་རུ་སུའི་རྒྱལ་ཁོངས་སུ་འཛུལ་བའི་མང་མོས་ཐག་གཅོད་རྩིས་མེད་བཏང་བའི་གྲོས་ཆོད་ཅིག་བཞག་འདུག
ཁ་སང་ཨ་རིའི་ནེའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱིས། ཟླ་འདིའི་ཚེས་ ༡༦ ཉིན་ཡུའུ་ཁུ་རེན་གྱི་རང་སྐྱོང་མངའ་ཁུལ་ཁུ་རེ་མྰེ་ (Crimea) མང་ཚོགས་ཀྱིས་ཁུའུ་རེ་མྰེ་ཨུ་རུ་སུའི་མངའ་ཁོངས་སུ་འཛུལ་བའི་མང་མོས་ཐག་གཅོད་བྱས་པ་དེ་རྩིས་མེད་ཡིན་པའི་གྲོས་གཞི་ལ་འོས་ཤོག་བླུགས་ཏེ། ཨ་རི་གཙོས་རྒྱལ་ཁབ་ ༡༠༠ ཡིས་རྒྱབ་སྐྱོར་དང་། ཨུ་རུ་སུ་གཙོས་རྒྱལ་ཁབ་ ༡༡ ཡི་དགག་བྱ། རྒྱལ་ཁབ་ ༥༨ གྱིས་བར་གནས་བཅས་བྱས་མཐར་ཁུ་རུ་མྰེའི་མང་མོས་ཐག་གཅོད་ལ་རྩིས་མེད་བཏང་བའི་གྲོས་ཆོད་ཅིག་བཞག་ཡོད་འདུག
ཨུ་རུ་སུའི་སྐུ་ཚབ་སྐུ་ཞབས་བེ་ཊ་ལེ་ (Vitaly Churkin) ཡིས། ཁུ་རེ་མྰེའི་མང་ཚོགས་ལ་རང་ཐག་རང་གཅོད་བྱེད་པའི་ཐོབ་ཐང་ཡོད་སྟབས། ཨུ་རུ་སུའི་རྒྱལ་ཁོངས་སུ་འཛུལ་བའི་ཐག་གཅོད་ལ་ཚང་མས་བརྩི་བཀུར་བྱེད་དགོས་ཞེས་འབོད་སྐུལ་གནང་ཡོད་འདུག
ཨ་རིའི་སྐུ་ཚབ་ལྕམ་སྰ་མན་ཐྰ་ (Samantha Power) ལགས་ཀྱིས། རྒྱལ་ཁབ་ཚང་མས་ཁུ་རེ་མྰེའི་རང་ཐག་རང་གཅོད་ཀྱི་ལངས་ཕྱོགས་ལ་རྒྱབ་སྐྱོར་བྱེད་ཀྱི་ཡོད་ཀྱང་། ཨུ་རུ་སུས་དམག་མི་བེད་སྤྱོད་ཀྱིས་བཙན་བཟུང་བྱས་སྟབས། རང་ཐག་རང་གཅོད་དོན་སྙིང་ལྡན་པ་ཞིག་ཡོང་མེད་ཅེས་སྲིད་འཛིན་པུ་ཊིན་སྲིད་གཞུང་ལ་སྐྱོན་བརྗོད་བྱས་ཡོད་འདུག
ཐེངས་འདིར་མཉམ་འབྲེལ་རྒྱལ་ཚོགས་ཀྱི་ཁུ་རེ་མྰེ་གྲོས་ཆོད་ལ་དགག་བྱ་གནང་མཁན་ཨུ་རུ་སུ་གཙོས་ཨར་མེ་ནི་ཡ་ (Armenia) དང་། བྷེ་ལ་རུ་སི་ (Belarus)། བྱང་ཀོ་རི་ཡ། སེ་རི་ཡ། སུ་ཌན་ (Sudan)། ཝེ་ནེ་ཛུ་ལ། ཛམ་བྷི་ཡ་ (Zambai)། ཀོ་བྷ་ (Cuba)། ནེ་ཁ་ར་གུ་ (Nicaragua) བྷོ་ལི་ཝི་ཡ་ (Bolivia) བཅས་ཡིན་པ་དང་། རྒྱ་ནག་དང་རྒྱ་གར། པ་ཀི་སི་ཐན། ཨབ་གྷན་ནི་སི་ཐན་གཙོས་ལྷོ་ཨ་མི་རི་ཀའི་རྒྱལ་ཁབ་མང་ཆེ་བས་བར་གནས་བྱས་ཡོད་འདུག
གཞན། ཁ་སང་ཡུའུ་ཁུ་རེན་དཔལ་འབྱོར་ཉམས་རྒུད་ལས་སྐྱོབ་ཆེད། འཛམ་གླིང་དངུལ་ཁང་གིས་ལོ་གཉིས་རིང་དངུལ་བུན་ཨ་སྒོར་ཐེར་འབུམ་ ༡༤ ནས་ ༡༨ བར་སྤྲོད་རྒྱུ་ཐག་གཅོད་བྱས་པ་དང། ཨ་རིའི་གྲོས་ཚོགས་ཀྱིས་ཀྱང་དངུལ་བུན་ཨ་སྒོར་ཐེར་འབུམ་གཅིག་སྤྲོད་རྒྱུའི་གྲོས་ཆོད་བྱུང་འདུག ཡུ་རོབ་མཐུན་ཚོགས་ཀྱིས་མི་འགྱངས་བར་དངུལ་བུན་རོགས་སྐྱོར་སྤྲོད་པའི་ཐག་གཅོད་བྱ་འཆར་ཡོད་འདུག
གསར་འགོད་པ། ལྷ་སྐྱབས་རྒྱལ།
