དེ་རིང་བཞུགས་སྒར་དུ་སྐབས་ ༡༣ པའི་དབུས་གཙང་ཆོལ་ཁའི་ཚོགས་ཆེན་དབུ་འཛུཊ་གནང་ཡོད་པ་དང་། སང་ཉིན་ནས་ལོ་འཁོར་ལས་བསྡོམས་དང་རྒྱུན་ལས་གསར་འདེམས་བཅས་གནང་རྒྱུ་རེད།
དེ་རིང་སྔ་དྲོའི་ཆུ་ཚོད་ ༡༠།༠༠ ཐོག བཞུགས་དྷ་རམ་ས་ལར་དབུས་གཙང་ཆོལ་ཁའི་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག དབུས་གཙང་ཆོལ་ཁའི་ཚོགས་ཁང་དང་མགྲོན་ཁང་གསར་རྒྱག་ལེགས་གྲུབ་དང་ཚོགས་ཆེན་སྐབས་ ༡༣ པའི་ཚོགས་ཆེན་དབུ་འཛུགས་ཀྱི་མཛད་སྒོ་ཞིག་ཚོགས་སོང་ལ། མཛད་སྒོའི་སྐུ་མགྲོན་གཙོ་བོར་སྤྱི་ཟུར་ཡོན་ཏན་རྒྱ་མཚོ་ལགས་དང་། དབུས་གཙང་ཆོལ་ཁའི་སྤྱི་འཐུས་ལས་ཐོག་རྣམ་པ། ཚོགས་དྲུང་དང་ཆོས་རིག་དྲུང་ཆེ། ཆོལ་ཁའི་དབུས་རྒྱུན་རྣམ་པ། དྷ་སའི་ཚོགས་པ་སྐྱིད་སྡུག་ཁག་དང་དགོན་སྡེ་ཁག་གི་སྐུ་ཚབ། ཕྱོཊ་མཐའ་ཁག་ནས་ཕེབས་པའི་འཐུས་མི་བཅས་མི་ ༢༠༠ ཙམ་འཛོམས་འདུག
མཛད་སྒོའི་ཐོག་མར་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་དབུས་གཙང་ཆོལ་ཁའི་ཚོགས་ཁང་དང་མགྲོན་ཁང་དབུ་འབྱེད་གནང་རྗེས། དབུས་གཙང་ཆོལ་ཁའི་ཚོཊ་གཙོ་སྤྱི་འཐུས་ཟླ་བ་ཚེ་རིང་ལཊ་ཀྱིས། དེ་རིང་དབུས་གཙང་ཆོལ་ཁའི་ཚོགས་ཁང་དང་མགྲོན་ཁང་གསར་རྒྱག་ལེཊ་འགྲུབ་བྱུང་བ་ཁོང་དང་ལས་རོགས་ཚོས་འཇོན་པ་མིན་པར། དང་པོ། བོད་མིའི་འདི་ཕྱི་གཉིས་ཀྱི་སྐྱབས་གནས་༧གོང་ས་མཆོག་གི་ཐུགས་རྗེ་བཀའ་དྲིན་དང་། གཉིས་པ།དབུས་གཙང་ཆོལ་ཁའི་སྒྲིག་འཛུཊ་བཙུགས་པ་ནས་བཟུང་༧གོང་ས་མཆོག་དང་བོད་མིའི་སྒྲིག་འཛུཊ་ཀྱི་བཀའ་དགོངས་གཞིར་བཟུང་མདུན་སྐྱོད་སྐུ་ལས་བསྐྱོན་མཁན་གྱི་མི་རབས་རྒན་པ་རྣམ་པ། གསུམ་པ། མང་ཚོགས་ཚོས་སྒྲིག་འཛུགས་འདིར་ཡིད་ཆེས་དང་མཐུན་སྒྲིལ། མཉམ་རུབ་མཐུན་འགྱུར་གནང་བ་བཅས་ལ་བརྟེན་ནས་བྱུང་བ་ཞིག་ཡིན་སྐོར་བརྗོད་བྱུང་།
དེའི་རྗེས་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས། ཉེ་ལམ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་གསར་པ་དབུ་འབྱེད་རབ་གནས་གནང་སྐབས་༸གོང་ས་མཆོག་གིས་ཁྱེད་ཚོ་མི་སྒེར་སོ་སོས་གང་གནང་གི་ཡོད་མེད་ལ་མ་ལྟོས་པར། བོད་མིའི་སྒྲིག་འཛུགས་དང་གྲོས་ཚོགས་ཀྱི་འཐུས་མི་ཞིག་ཡིན་པའི་ཆ་ནས་བོད་མི་ས་ཡ་དྲུག་ལ་གྱོང་མ་ཕོག་པ་ཞིག་གནང་གལ་ཆེ་གསུངས་པ་ལྟར། བོད་ཆོལ་ཁ་གསུམ་ཁ་མ་བྲལ་བ་ཞིག་གནང་རྒྱུ་ཙམ་མ་ཟད། སྐྱིད་ན་སྐྱིད་མཉམ་དང་སྡུག་ན་སྡུག་མཉམ་བྱ་རྒྱུ་ཧ་ཅང་གི་གལ་ཆེན་པོ་ཆགས་ཡོད་པ་དང་། དེ་ལྟར་གནང་བའི་ཐབས་ལམ་ཡག་ཤོས་༧གོང་ས་མཆོག་གིས་ལམ་སྟོན་གནང་བའི་དབུ་མའི་ལམ་ལས་ལྷག་པ་ཞིག་མེད་སྟབས། ༧གོང་ས་མཆོག་གི་དགོངས་གཞི་དང་མཐུན་པའི་ཕྱག་ལས་གནང་རྒྱུ་གལ་ཆེན་པོ་ཆགས་ཡོད་སྐོར་སོགས་བརྗོད་བྱུང་།
སང་ཉིན་ཕྱི་ཚེས་ ༣༡ ནས་ཕྱི་ཟླ་ ༤ ཚེས་ ༣ བར་སྐབས་ ༡༣ པའི་ཚོགས་ཆེན་ཚོགས་རྒྱུ་ཡིན་འདུག་ལ། ཐེངས་འདིའི་ཚོགས་འདུའི་ཐོག་དབུས་དང་ས་གནས་ཁག་གི་ལོ་འཁོར་ལས་བསྡོམས་སྙན་སྒྲོན་དང་བགྲོ་གླེང་གོ་བསྡུར། རྒྱུན་ལས་གསར་འདེམས་བཅས་གནང་རྒྱུ་ཡིན་འདུག
