༼སློབ་བསྡུ་གསལ་བསྒྲགས།༽

ཆོས་རིག་། ཆོས་༦། ནང་ཆོས་ངོ་སྤྲོད། ༢༠༡༣།༡༤།༠༧   

༼སློབ་བསྡུ་གསལ་བསྒྲགས།༽

༄༅།། སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་སྔ་ཕྱི་བར་གསུམ་དུ་སྐྱ་བོ་ན་གཞོན་ཚོས་ཀྱང་རབ་བྱུང་པ་དང་གཅིག་མཚུངས་ནང་དོན་རིག་པའི་གཞུང་ཆེན་ཁག་ལ་སློབ་གཉེར་གནང་དགོས་པའི་བཀའ་སློབ་ཡང་ཡང་ཕེབས་པའི་དགོངས་དོན་ཐོག དེང་དུས་མཐོ་སློབ་ཐོན་པའི་བོད་མི་གཞོན་སྐྱེས་རྣམས་ནས་བོད་ཀྱི་སྐད་ཡིག་དང་བོད་བརྒྱུད་ནང་དོན་རིག་པའི་སྐོར་རྒྱུས་མངའ་ཤེས་རྟོགས་ལེགས་པར་ཡོད་དགོས་པ་ནི་སྤྱི་སྒེར་ཡོངས་ལ་གལ་ཆེ་དོན་ཆེ་ལ་སོང་། བོད་མིའི་སྒྲིག་འཛུགས་ཆོས་རིག་ལས་ཁུངས་ནས་དཔལ་ལྡན་རྒྱུད་སྨད་གྲྭ་ཚང་དང་ཟུང་འབྲེལ་ཐོག དགོན་པ་དེའི་ཁྱབ་ཁོངས་གངས་ཅན་རིག་གནས་སློབ་གྲྭ་རུ། དེང་དུས་མཐོ་སློབ་ཐོན་པའི་སློབ་ཕྲུག་ ༣༢ ལ་དམིགས་ནས་ཕྱི་ལོ་ ༢༠༡༤ ཟླ་ ༧ ཚེས་ ༡ ནས་ཟླ་ ༡༢ ཚེས་ ༣༡ བར་ཟླ་བ་དྲུག་རིང་༼བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་༽ཅེས་པའི་ལས་རིམ་ཞིག་གོ་སྒྲིག་བྱ་རྒྱུ་ཐུགས་གཏན་འཁེལ་བ་ལྟར། ཕྱི་ལོ་ ༢༠༡༤ ཟླ་ ༢ ཚེས་ ༥ འཁོད་ས་གནས་འགོ་འཛིན་སོགས་ཀྱི་བརྒྱུད་ཡོངས་ཁྱབ་གསལ་བསྒྲགས་ཤིག་སྔོན་དུ་བཏང་ཡོད། ད་ལྟའང་ས་མིག་ལྷག་མ་ཡོད་པ་དང་། ཕྱི་ཟླ་ ༥ པའི་ནང་ལོ་འདིའི་ཡིག་རྒྱུགས་ཟིན་པའི་སློབ་ཕྲུག་མང་པོ་ཡོད་པ། དེ་བཞིན་ལས་རིམ་འདི་ཉིད་གལ་ཆེ་དོན་ཆེར་བརྩིས་ནས་གསར་གཏོད་བྱས་པ་བཅས་ལ་བརྟེན། འགེངས་ཤོག་འབུལ་རྒྱུའི་དུས་བཀག་དེ་ཉིད་ཕྱི་ལོ་ ༢༠༡༤ ཟླ་ ༥ ཚེས་ ༣༡ བར་ཕར་འགྱངས་ཞུས་པ་ལགས་ན། སློབ་སྦྱོང་ལས་རིམ་འདིའི་ནང་དུ་འཛུལ་འདོད་ཡོད་པའི་སློབ་ཕྲུག་རྣམས་ནས་གཤམ་གསལ་དོན་ཚན་རྣམས་ལ་ཐུགས་ཞིབ་ཀྱིས། མཉམ་སྦྱར་འགེངས་ཤོག་ཞིབ་བཀང་རྗེས་དུས་བཀག་གསར་པ་ནང་ཚུད་འདི་ག་ཆོས་རིག་ལས་ཁུངས་སུ་ངེས་འབྱོར་ཐུབ་པ་གནང་དགོས་པས་དེ་དོན་དགོངས་འཇགས་ཞུ།།

༡༽ ཚུགས་ཡུལ་དང་།
ཟབ་ཁྲིད་དུས་ཡུན། རྒྱ་གར་ལྷོ་ཕྱོགས་ཧུན་སུར་དཔལ་ལྡན་སྨད་རྒྱུད་གྲྭ་ཚང་། ཕྱི་ལོ་ ༢༠༡༤ ཟླ་ ༧ ཚེས་ ༡ ཟླ་ ༡༢ ཚེས་ ༣༡ བར།།

༢༽ ལམ་གྲོན་དང་བཞུགས་གནས།
ལམ་གྲོན་དང་། བཞུགས་གནས། བཞེས་ལག་བཅས་ཀྱི་མཐུན་འགྱུར་ཆ་ཚང་ཡོད།།

༣༽ ས་མིག
ཁྱོན་སློབ་ཕྲུག་ ༣༢ བཞེས་རྒྱུ། དེ་ཡང་སྙན་ཞུ་འབྱོར་སྔ་རིམ་བཞིན་འདེམས་རྒྱུ།།

༤༽ སློབ་ཚན་རེའུ་མིག

 ༥༽ རྒྱུགས་སྤྲོད་དང་ལག་འཁྱེར།
སློབ་ཁྲིད་ཟིན་མཚམས་སློབ་ཚན་སོ་སོར་ངག་རྒྱུགས་དང་འབྲི་རྒྱུགས་སོགས་གཏོང་བའི་ཐོག་ནས་གྲུབ་འབྲས་ཨང་ཤོག་དང་སྦྲགས་བསླབ་པ་མཐར་སོོན་གྱི་ལག་འཁྱེར་སྤྲོད་རྒྱུ།།

༦༽ དགོས་ངེས་ཆ་རྐྱེན།
1) མཐོ་རིམ་སློབ་གྲྭ་མཐར་སོན་པ་དང་།
2) འཛིན་རིམ་བཅུ་གཉིས་བར་བོད་ཡིག་སྦྱངས་མྱོང་བ། ཡང་ན་བོད་ཡིག་ཤེས་ཚད་གང་འཚམས་ཡོད་པ།
3) ལས་རིམ་འདིའི་ཁོངས་སུ་ཞུགས་རྗེས་སློབ་དུས་མ་རྫོགས་བར་སློབ་གྲྭར་བཞུགས་ཐུབ་མཁན་ཡིན་པ་བཅས།།

༧༽ སྙན་ཞུ་འབུལ་ཚེས་ཉིན་མཐའ་མ།
ཕྱི་ལོ་ ༢༠༡༤ ཟླ་ ༥ ཚེས་ ༣༡།། ༨༽

སྙན་ཞུ་འབུལ་ཡུལ་ཁ་བྱང་།
The Secretary Department of Religion and Culture,
CTA P. O. Dharamsala – 176215,
District Kangra, H. P.
Email: religion@tibet.net
Phone: 01892 – 226737 / 222685
བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཕྱི་ལོ་ ༢༠༡༤ ཟླ་ ༤ ཚེས་ ༣ ལ།། །།