ཁ་སང་རེབ་གོང་ཐུན་རིན་རྫོང་གི་འཕྲལ་སེལ་དགེ་རྒན་ ༡༦༠ ཙམ་གྱིས། རེབ་གོང་ནས་ཟི་ལིང་བར་གོམ་བགྲོད་བྱས་ཏེ་ཞིང་ཆེན་སྲིད་གཞུང་ལ་དཀའ་ངལ་ཞུ་གཏུག་བྱེད་དུ་སོང་ཡོད་ཀྱང་ལམ་བར་ནས་ཕྱིར་ལོག་ཡོད་འདུག
སུད་སིར་གནས་སྡོད་ཤྭ་བོ་རྡོ་རྗེ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཁ་སང་རྨ་ལྷོ་ཁུལ་རེབ་གོང་ཐུན་རིན་རྫོང་གི་འཕྲལ་སེལ་དགེ་རྒན་ ༡༦༠ ཙམ་གྱིས། རེབ་གོང་ནས་ཟི་ལིང་བར་ཞི་བའི་གོམ་བགྲོད་བྱས་ཏེ། ཞིང་ཆེན་སྲིད་གཞུང་ལ་དཀའ་ངལ་ཞུ་གཏུག་བྱེད་དུ་ཕྱིན་ཡོད་ཀྱང་། དེ་རིང་སྔ་དྲོར་གཙན་ཚ་དགུ་རོང་ཁོག་ཏུ་བསླེབས་སྐབས། ཐུན་རིན་རྫོང་གི་མགོ་ཁྲིད་ཞིག་དང་སློབ་གྲྭ་ཁག་གི་སློབ་སྤྱི་ཚོས་གོམ་བགྲོད་པ་རྣམས་བཀག་འགོག་བྱས་ཏེ། ཁོང་ཚོའི་དགོས་འདུན་རྣམས་ལག་བསྟར་བྱ་རྒྱུ་ཡིན་པའི་ཁས་ལེན་བྱས་ཡོད་སྟབས་གོམ་བགྲོད་མཚམས་འཇོག་གནང་ཡོད་འདུག
འདི་ལོའི་ཕྱི་ཟླ་ ༤ ཚེས་ ༣༠ ཉིན། རྨ་ལྷོ་ཁུལ་དང་ཐུན་རིན་རྫོང་སྲིད་གཞུང་མདུན་དུ། མཚོ་སྔོན་ཞིང་ཆེན་རྨ་ཁུལ་ཐུན་རིན་རྫོང་ཁོངས་ཀྱི་འཕྲལ་སེལ་དགེ་རྒན་ ༡༦༠ ཙམ་འདུ་འཛོམས་ཀྱིས། ཡུན་རིང་འཕྲལ་སེལ་གྱི་ངོ་བོར་བཞག་པའི་ལས་བྱེད་རྣམས་བརྟན་འཇགས་བཟོ་དགོས་པ་དང་། ལས་བྱེད་སྤྱི་མཚུངས་ལྟར་གླ་ཕོགས་ཀྱི་ཐོབ་ཐང་སྤྲོད་དགོས་པའི་རེ་འདུན་བཏོན་ཏེ་ཞུ་གཏུག་བྱས་ཡོད་ཀྱང་། ཁུལ་དང་རྫོང་སྲིད་གཞུང་གིས་བཟང་ཕྱོགས་ཀྱི་ཡ་ལན་གང་ཡང་མ་སྤྲད་པར་བརྟེན། ཞིང་ཆེན་སྲིད་གཞུང་ལ་ཞུ་གཏུག་བྱེད་དུ་འགྲོ་དགོས་བྱུང་ཡོད་འདུག
གསར་འགོད་པ། པདྨ་མཚོ།
