ཆབ་མདོ་ཁུལ་ཚ་བ་མཛོ་སྒང་དུ་བོད་མི་གཉིས་ཀྱིས་རང་ལུས་ལ་གྲི་བཙུགས་ཏེ་གཏེར་ཁ་སྔོག་འདོན་པར་ངོ་རྒོལ་བྱས་ཡོད་པར་མ་ཟད། ཡུལ་མི་ཚོ་སྲིད་གཞུང་གི་མདུན་དུ་འཛོམས་ཏེ་ངོ་རྒོལ་བྱས་ཡོད་འདུག
ཟླ་འདིའི་ཚེས་ ༧ ཉིན་ཆབ་མདོ་ཁུལ་ཚ་བ་མཛོ་སྒང་སྟོང་འབར་ཡུལ་ཚོའི་བོད་མི་འཕཊ་པ་རྒྱལ་མཚན་ལགས་ཀྱིས། ས་གནས་ཀྱི་གཏེར་ཁ་སྔོག་འདོན་པར་ངོ་རྒོལ་ཆེད་རང་ལུས་ལ་གྲི་བཙུགས་པ་དང་ཁང་པའི་ཡང་སྟེང་ནས་མར་མཆོང་སྟེ་རང་ཤི་བརྒྱབ་རྗེས། བོད་མི་རིག་འཛིན་གཙོས་པའི་ཡུལ་མི་ཁག་ཅིག་གིས་ཁོང་གི་སྐུ་ཕུང་རང་ཁྱིམ་དུ་བསྐུང་ཡོད་འདུག ཉིན་དེའི་ཕྱི་དྲོ་འཕཊ་པ་རྒྱལ་མཚན་ཛ་དྲག་གི་གནས་སྟངས་འོག་འདས་གྲོངས་སུ་ཕྱིན་རྗེས་བོད་མི་རིག་འཛིན་གྱིས་གཏེར་ཁ་སྔོག་འདོན་པར་ངོ་རྒོལ་ཆེད་རང་ལུས་ལ་གྲིས་བརྒྱབ་ཏེ་ཁང་པའི་ཡང་སྟེང་དུ་མཆོང་རྩིས་བྱས་ཡོད་འདུག་ལ། སྐབས་དེར་ཡུལ་མི་ཚོས་བཀག་འགོག་བྱས་རྗེས་ཆབ་མདོའི་སྨན་ཁང་ཞིག་ཏུ་བསྐྱལ་ཏེ་སྨན་བཅོས་བྱེད་ཀྱི་ཡོད་ཀྱང་། ཉེན་རྟོག་པས་སྨན་ཁང་གི་མཐའ་བསྐོར་ཏེ་དམ་དྲག་ལྟ་སྲུང་བྱས་ཡོད་སྟབས། ད་ཆར་ཁོང་འཆི་གསོན་གྱི་གནས་སྟངས་གསལ་བོ་མ་ཤེས་པར་ལྷག་ཡོད་འདུག རིག་འཛིན་ལགས་ལོ་ ༣༤ ཡིན་འདུག་ལ། ཁོང་དང་བཟའ་ཟླ་གཉིས་ལ་ཟླ་བ་ལྔ་ཡས་མས་ཡིན་པའི་ཕྲུ་གུ་ཞིག་ཡོད་འདུག
ཟླ་འདིའི་ཚེས་ ༡༠ ཉིན་ཡང་བསྐྱར་ཚ་བ་མཛོ་སྒང་སྟོང་འབར་ཡུལ་ཚོའི་བོད་མི་རྒན་དར་གཞོན་གསུམ་ ༡༠༠ ཡས་མས་ཡུལ་ཚོའི་སྲིད་གཞུང་གི་མདུན་དུ་འཛོམས་ཏེ་གཏེར་ཁ་སྔོག་འདོན་ལས་གཞིར་ངོ་རྒོལ་བྱས་སྟབས། རྒྱ་གཞུང་གིས་གཏེར་ཁ་སྔོག་འདོན་པར་རྒྱབ་སྐྱོར་དང་། ས་གནས་ཀྱི་གནས་ཚུལ་ཕྱི་ཕྱོཊ་སུ་ཁྱབ་བསྒྲགས་མི་འགྲོ་ཆེད་དམག་མི་འགྲེམས་འཇོག་གིས་བོད་མི་ཚོར་དམ་དྲག་དང་འཇིགས་སྐུལ་སོགས་བྱེད་ཀྱིན་པར་མ་ཟད། བོད་མི་ཚོ་གང་བྱུང་བཀག་ཉར་གྱིས་ཁ་པར་ཨང་གྲངས་དང་སྐད་འཕྲིན་ཨང་གྲངས་སོགས་ཕབ་བཤུ་སོགས་བྱས་ཡོད་འདུག
གསར་འགོད་པ། དོན་གོ
