ཀརྨ་པ་མཆོག་འཇར་མན་དུ་ཆིབས་བསྒྱུར།

རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འཇར་མན་དུ་ཆིབས་བསྒྱུར་གནང་ཡོད་པ་དང་། འཆར་ཟླའི་ཚེས་ ༩ བར་འཇར་མན་ནང་ཆོས་ཕྱོཊ་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག

ཟླ་འདིའི་ཚེས་ ༢༥ ཉིན་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཡུ་རོབ་རྒྱལ་ཁབ་འཇར་མན་དུ་ཡོད་པའི་ཀརྨ་ལ་ཤི་ལ་ (Kamalashila Institute) བསྟི་གནས་ཁང་དང་ནོ་སྦོར་གྷི་རེན་བྷེ་ཌི་བྷོར་གྷར་ (Bitburger Event_Center Nurburgring) ཆོས་ཚོགས། བྷེལ་ཇེམ་དུ་ཡོད་པའི་ཀརྨ་པའི་ཐེབས་རྩ་ཁང་བཅས་ཐུན་མོང་གིས་གིས་ཇི་ལྟར་གསོལ་འདེབས་ཞུས་དོན་ལྟར། ཡུ་རོབ་འཇར་མན་ཧྥི་རན་ཁི་ཧྥི་ས་གནས་སུ་ཆིབས་བསྒྱུར་ཞབས་སོར་འཁོད་ཡོད་པ་དང་། སྐབས་དེར་སུད་སི་སྐུ་ཚབ་དོན་གཅོད་ཚེ་བརྟན་བསམ་འགྲུབ་མཆོག་གིས་གཙོས་པའི་བོད་མི་དང་བོད་དོན་རྒྱབ་སྐྱོར་བ་བཅས་ཀྱིས་ཕེབས་བསུ་ཞུས་ཡོད་འདུག

ཁ་སང་ཚེས་ ༢༨ ཉིན་གྱི་སྔ་དྲོའི་ཆུ་ཚོད་ ༡༡ ནས་ ༡༢ བར་རྒྱལ་བ་ཀརྨ་པ་མཆོག་གིས་ཡུ་རོབ་ཧྥི་རན་ཁི་ཧྥིར་ཡོད་པའི་བོད་ཀྱི་ཁང་པར་ཡུ་རོབ་རྒྱལ་ཁབ་འདྲ་མིན་ནས་ཕེབས་པའི་གསར་འགོད་པ་བཅུ་གྲངས་ཤིག་ལ་ཐེངས་འདིའི་ཡུ་རོབ་ནང་གི་མཛད་འཕྲིན་དང་། ནང་ཆོས་དང་ཁོར་ཡུག་སྲུང་སྐྱོབ་བཅས་ཀྱི་སྐོར་ནས་གསར་འགོད་གསལ་བསྒྲགས་གནང་ཡོད་པར་མ་ཟད། ཀརྨ་བཀའ་རྒྱུད་གོ་སྒྲིག་ཚོགས་ཆུང་གིས་སྣེ་ལེན་ལྟར་ཀརྨ་ལ་ཤི་ལ་བསྟི་གནས་ཁང་དུ་ཆིབས་བསྒྱུར་གནང་སྟེ་བཀའ་སློབ་གསུང་བཤད་གནང་ཡོད་འདུག

དེ་རིང་ཚེས་ ༢༩ ཉིན་ནོ་སྦོར་གྷི་རེན་བྷེ་ཌི་བྷོར་གྷར་བསྟི་གནས་ཁང་གིས་གདན་ཞུ་ལྟར་ཆིབས་བསྒྱུར་གནང་སྟེ་ཉིན་གསུམ་རིང་དད་ལྡན་ཆོས་ཞུ་བ་རྣམས་ལ་བཀའ་ཆོས་གནང་རྒྱུ་ཡིན་འདུག

ཀརྨ་པའི་ཡིག་ཚང་གི་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཕྱི་ཟླ་ ༦ པའི་ཚེས་ ༥ ཉིན་རྒྱལ་བ་ཀརྨ་པ་མཆོག་གིས་མང་ཚོགས་ལ་དེང་རབས་ལ་སྨན་པའི་གནའ་དེང་གི་སློབ་གསོ་ཞེས་པ་དང་མི་ཚེ་དོན་དང་ལྡན་པ་སྐྱེལ་ཐབས་བཅས་བརྗོད་གཞི་གཉིས་ཀྱི་ཐོག་བཀའ་སློབ་དང་། ཚེས་ ༦ ཉིན་རྒྱལ་ས་བྷེར་ལེན་གྱི་བྷོ་ཌི་ཆིར་རེ་ཡ་ (Bodhicharya Centre) བསྟི་གནས་ཁང་དུ་མང་ཚོཊ་ལ་སེམས་འདུལ་སྟངས་དང་བྱམས་བརྩེ་གོང་འཕེལ་གཏོང་ཕྱོཊ། ནང་ཆོས་དང་ཁོར་ཡུག་གི་སྐོར་ནས་བཀའ་སློབ་གནང་རྒྱུ་ཡིན་འདུག ཚེས་ ༧ ཉིན་མི་མང་ལ་བཀའ་ཆོས་དང་འབྲེལ་བྱམས་བརྩེ་དང་ལྡན་པའི་འཛམ་གླིང་བསྐྲུན་ཐབས་ཐོག་བཀའ་སློབ་དང་། ཚེས་ ༨ ཉིན་མང་ཚོགས་ལ་བཀའ་ཆོས་དང་གཞོན་སྐྱེས་ཚོར་ཐུག་འཕྲད་ཀྱིས་ད་ལྟའི་གཞོན་སྐྱེས་དང་མ་འོངས་པའི་རེ་བ་བྱེད་ཡུལ་ཞེས་པའི་བརྗོད་གཞིའི་ཐོག་བགྲོ་གླེང་བཅས་གནང་རྒྱུ་ཡིན་འདུག

ཐེངས་འདི་ནི་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཡུ་རོབ་ནང་ཕེབས་ཏེ་ཆོས་ཕྱོཊ་ཀྱི་མཛད་འཕྲིན་བསྐྱང་ཐེངས་ཐོག་མ་ཆགས་ཡོད་འདུག

གསར་འགོད་པ། དོན་གོ