ངྷ་ས་ས་གནས་མགོ་འཛིན་གྱི་འོས་མི་གསུམ་གྱིས་མང་ཚོགས་ལ་ཁོང་ཅག་གི་སྲིད་བྱུས་དང་འཆར་གཞི་སོགས་ངོ་སྤྲོད་བྱེད་སྐབས། ས་གནས་མགོ་འཛིན་ལས་ཐོག་བསོད་ནམས་རྡོ་རྗེ་ལགས་ཀྱིས་མི་མང་དཀྱུས་མ་སུ་འདྲ་ཞིག་བསླེབས་ཀྱང་ཁོའི་དཀའ་ངལ་སེལ་མ་ཐུབ་ནའང་ཁོའི་དཀའ་ངལ་ལ་ཉན་ཐུབ་པ་བྱས་པ་ཡིན་ཟེར།
ཁ་སང་ཕྱི་དྲོའི་ཆུ་ཚོད་ ༢།༣༠ སྟེང་དྷ་ས་མེག་གྷན་ཉིན་མོ་སློབ་གྲྭའི་ཚོགས་ཁང་དུ། བོད་ཀྱི་རྒྱལ་ཡོངས་མང་གཙོ་ཚོགས་པའི་གོ་སྒྲིག་འོག ༼ས་གནས་མགོ་འཛིན་གྱི་འོས་བསྡུ་དང་དེའི་ལས་དོན་སྐོར་༽ཞེས་པའི་བགྲོ་གླེང་ཞིག་གོ་སྒྲིག་གནང་སྟེ། ངྷ་ས་ས་གནས་མགོ་འཛིན་སྐབས་གསུམ་པའི་འོས་བསྡུ་བསླེབ་ལ་ཉེ་བ་དང་བསྟུན་ཏེ། མང་གཙོ་ཚོགས་པའི་མིང་འདོན་བྱས་པའི་འོས་མི་གསུམ་གདན་འདྲེན་ཞུས་ཏེ་གཏམ་བཤད་སྤེལ་བཅུག་སོང་།
གདན་ཞུའི་འོས་མི་དྷ་ས་ས་གནས་གྲོས་ཚོགས་ཀྱི་འཐུས་མི་བསྟན་འཛིན་སྒྲོལ་མ་ལགས་དང་ས་གནས་མགོ་འཛིན་ལས་ཐོག་པ་བསོད་ནམས་རྡོ་རྗེ་ལགས། ཧིན་བོད་མཛའ་འབྲེལ་ཚོགས་པའི་ཚོགས་གཞོན་ཟླ་བ་རིན་ཆེན་ལགས་བཅས་ཀྱིས་ས་གནས་མགོ་འཛིན་གྱི་འོས་མིར་ལངས་དགོས་པའི་དམིགས་ཡུལ་དང་འཆར་གཞི་ཅི་ཡོད་ངོ་སྤྲོད་དང་མང་ཚོགས་ཀྱི་དྲི་བར་ལན་འདེབས་བཅས་གནང་སོང་། སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས། དྷ་ས་ས་གནས་མགོ་འཛིན་དེ་ས་གནས་གཞན་ལས་ལྷག་གི་གལ་ཆེན་པོ་ཆགས་ཡོད་པ་དང་། སྔོན་འགྲོ་འོས་བསྡུ་དེ་ཕྱི་ཟླ་ ༦ པའི་ཚེས་ ༡༢ དང་དངོས་གཞིའི་འོས་བསྡུ་ཕྱི་ཟླ་ ༦ ཚེས་ ༢༤ བཅས་སུ་ཁེལ་ཡོད་སྟབས། མི་མང་གིས་འོས་བསྡུའི་ཆ་ཤས་ཡག་པོ་ལེན་དགོས་པའི་འབོད་སྐུལ་བཅས་གནང་སོང་།
ཟླ་བ་རིན་ཆེན་ལགས་ཀྱིས་ཁོ་རང་ས་གནས་མགོ་འཛིན་གྱི་འོས་མིར་ལངས་དགོས་བའི་དམིགས་ཡུལ་དང་འཆར་གཞིའི་སྐོར་ལ། ང་ཚོའི་གནས་ཚང་གི་ཡུལ་མི་ཧ་ཅང་གལ་ཆེན་ཆགས་ཡོད་སྟབས་ཡུལ་མིར་མཐུན་ལམ་གལ་ཆེན་དུ་འཛིན་དགོས་པ་དང་། ང་ཚོས་ལས་གཞི་གང་འདྲ་ཞིག་བརྩམས་ཀྱང་གནས་ཚང་གི་ཁྲིམས་དང་སྒྲིག་གཞི། དེ་བཞིན་སོ་སོའི་ཕ་མེས་ནས་བརྒྱུད་པའི་རིག་གཞུང་དང་གོམས་གཤིས་སོགས་དང་མ་འགལ་བའི་ཐོག་ནས་འགྲོ་དགོས་པ་དང་། གནས་ཚང་རྒྱ་གར་དང་བོད་མིའི་འབྲེལ་ལམ་སྔར་ལས་ལྷག་པར་ཡར་རྒྱས་སུ་གཏོང་ཐུབ་པ་ཡིན་ན། ལས་དོན་གཞན་ཁག་མང་པོ་ཞིག་བསྒྲུབ་ཐུབ་པའི་རེ་བ་ཡོད་པ་རེད་བསམ་གྱི་འདུག གཞན། ས་གནས་རེ་ཟུང་མ་ཡིན་པར་ས་གནས་གང་ཞིག་ཡིན་ཡང་དབུལ་ཕོངས་དང་ཉམ་ཐག བདག་མེད། ནད་གཅོང་། དེ་མིན་ཤེས་ཡོན་གྱི་ཕོངས་བའི་རིགས་ལ་དམིགས་བསལ་དོ་སྣང་བྱས་ཏེ་ཕན་ཐོགས་བྱེད་པའི་དམིགས་ཡུལ་གཙོ་བོར་འཛིན་རྒྱུ་དང་། བཙན་བྱོལ་སྒྲིག་འཛུགས་དང་དེས་གཏན་འབེབས་བྱས་པའི་བཅའ་ཁྲིམས་ཀྱི་དགོངས་དོན། བཀའ་ཤག་དང་ལྷན་ཁང་ཁག་བདུན་གྱི་ལས་དོན་ཁག་ལག་བསྟར་བྱེད་མཁན་ས་གནས་མགོ་འཛིན་ཆགས་ཡོད་སྟབས། མཉམ་རུབ་ཐོག་འགྲོ་ཐབས་དང་ལས་ཀ་ཆེ་སར་བལྟས་ནས་ཆུང་ས་སྐྱུར་བ་མ་ཡིན་པར་ལས་དོན་གང་ཞིག་ཡིན་ཡང་གལ་ཆེན་དུ་བརྩི་རྒྱུ་ཡིན། ཞེས་བརྗོད་སོང་།
བསྟན་འཛིན་སྒྲོལ་མ་ལགས་ཀྱིས་༧གོང་ས་མཆོག་གི་ལམ་སྟོན་འོག་ཤར་སྐྱོད་བྱེད་རྒྱུ་གལ་ཆེན་ཡིན་ཚུལ་དང་། ལྷག་པར་དུ་༧གོང་ས་མཆོག་གི་སྐུ་ཕྱྭར་ཕྱི་ནང་གཉིས་ནས་ཉེན་ཁ་ཆེན་པོ་ཡོད་སྟབས་མང་ཚོགས་ཀྱིས་ཐུགས་སྣང་བྱེད་དགོས་པ། ཁོང་མོས་ཁོར་ཡུག་གཙང་བཟོ་དང་གཞུང་ལམ་ཡར་རྒྱས་གཏོང་ཕྱོགས་ལ་འབྲེལ་ཡོད་དཔོན་རིགས་ལ་ཞུ་གཏུག་བྱེད་རྒྱུ་ཡིན་པ་དང་། ས་གནས་མི་མང་གི་བདེ་འཇགས་ཡོང་ཐབས་དང་རྒྱ་གར་ཡུལ་མི་དང་འབྲེལ་ལམ་དམ་ཟབ་གཏོང་རྒྱུ་སོགས་གལ་ཆེན་དུ་འཛིན་རྒྱུ་ཡིན་སྐོར་སོགས་བརྗོད་སོང་།
བསོད་ནམས་རྡོ་རྗེ་ལགས་ཀྱིས། འདས་པའི་ལོ་རིང་ངས་ག་རེ་བྱས་ཡོད་ཅེས་ལབ་པ་ཡིན་ན་ཞེ་དྲག་གང་ཡང་བྱེད་ཐུབ་མ་སོང་། འོན་ཀྱང་བཙན་བྱོལ་བོད་མིའི་སྒྲིག་འཛུགས་ཀྱི་སྒྲིག་གཞིའི་ཐོག་གནས་ཐུབ་པ་ཞིག་བྱུང་ཡོད། ང་ཚོར་ངོམ་རིན་ཡོད་པ་ཞིག་ཡོད་པ་དེ་སྒྲིག་འཛུགས་དང་འདི་དང་དེའི་ཁྲིམས་དང་སྒྲིག་གཞི་ཁག་རེད། དེ་ནས་མི་མང་དཀྱུས་མ་སུ་འདྲ་ཞིག་བསླེབས་ཀྱང་ཁོའི་དཀའ་ངལ་སེལ་མ་ཐུབ་ནའང་ཁོའི་དཀའ་ངལ་ལ་ཉན་ཐུབ་པ་བྱས་པ་ཡིན། ངའི་དམིགས་ཡུལ་གལ་ཆེ་ཤོས་དེ་༧གོང་ས་མཆོག་གི་ཕེབས་ལམ་བཟོ་རྒྱུ་དེ་ཡིན། འདས་བའི་ལོ་གསུམ་རིང་རྒྱ་གར་དབུས་གཞུང་ལ་ཞུ་གཏུག་བརྒྱབ་ནས་ཟླ་གཅིག་རིང་གྲུབ་འབྲས་མཐོང་གི་རེད། དེ་མིན། ཕྱོགས་རིས་མེད་པའི་ཐོག་ནས་ཉམ་ཐག་ཚོར་དམིགས་བསལ་གཟིགས་སྐྱོང་བྱེད་རྒྱུ་ཡིན། ང་ཚོ་ས་གནས་མགོ་འཛིན་ཡིན་ཟེར་ནས་རྐུབ་སྟེགས་རྫིག་པོའི་སྟེང་སྡོད་པའི་དུས་ཚོད་རྫོགས་ཚར་བ་རེད། གཞན། ཟློས་གར་དང་བྷག་སུའི་ལམ་ཁ་གཉིས་བར་ཁང་པ་ ༢༡༤ ལྷག་གི་དཀའ་ངལ་མང་པོ་ཡོད་པ་ལོ་ངོ་ ༥༠ ནང་ཁྲིམས་མཐུན་ཆགས་མེད་པར་ཁྲིམས་མཐུན་བཟོ་རྒྱུ་དེ་དམིགས་ཡུལ་ཆེ་ཤོས་ཤིག་ཡིན། ལམ་འགྲམ་དུ་ཁྲོམ་སྟོན་མཁན་དཀའ་ངལ་ཡོད་པ་ཚོར་ཚོང་ཁང་གསར་རྒྱག་བྱེད་པའི་དམིགས་ཡུལ་དང་འཆར་གཞི་ཡོད་པ་ལྟར་འབད་བརྩོན་བྱེད་རྒྱུ་ཡིན། གཞོན་སྐྱེས་ལས་མེད་རྣམས་ཀྱི་འཕྲོད་བསྟེན་ཡར་རྒྱས་གཏོང་ཆེད་བདེ་དོན་ལས་ཁུངས་ཀྱི་ཚོགས་ཁང་ལ་ཁང་པ་གསར་རྒྱག་བྱས་ཏེ། ལུས་ཕུང་སྦྱོང་བརྡར་ཁང་དང་རྩེད་རིགས་འདྲ་མིན་ཡོད་པའི་རྩེད་ཁང་ཞིག་བཟོ་བའི་དམིགས་ཡུལ་ཡོད། མང་ཚོགས་ཆེད་ཚོགས་ཁང་ཞིག་དང་དཔེ་མཛོད་ཁང་ཞིག་རྒྱག་དགོས་བསམ་གྱི་ཡོད། ཁོར་ཡུག་གཙང་བཟོ་དང་བུད་མེད་ལ་བཙན་གཡེམ་མནར་སྤྱོད་སོགས་ཀྱི་སྐོར་ལ་ཁྲིམས་ལུགས་ཟབ་སྦྱོང་སྤྲོད་རྒྱུ་ཡིན་ཞེས་སོགས་བརྗོད་སོང་།
༼ས་གནས་མགོ་འཛིན་ཁག་གི་ལས་དོན་བར་ཁྱད་པར་ཅི་ཡོད༽ཅེས་པའི་བརྗོད་གཞིའི་ཐོག་བསྟན་འཛིན་སྒྲོལ་མ་ལགས་ཀྱིས། ས་གནས་བདེ་དོན་ཚང་མར་ཁྲིམས་དང་སྒྲིག་གཞི་གཅིག་གྱུར་རེད་མ་གཏོགས་དྷ་རམ་ས་ལར་ཁྲིམས་དང་སྒྲིག་གཞི་ཁ་ཁ་རྩ་བ་ནས་ཡོད་པ་མ་རེད། དྷ་རམ་གནད་འགག་ཆགས་དོན་གཙོ་བོ་༧གོང་ས་མཆོག་གི་བཞུགས་སྒར་དང་བོད་མིའི་སྒྲིག་འཛུགས་ཀྱི་བསྟི་གནས་ཡིན་པ་དང་། འཛམ་གླིང་གི་མི་སྣ་ཆེ་ཆུང་དང་བོད་ནས་གསར་དུ་འབྱོར་རིགས་ཚོའི་་བཞུགས་གནས་ཡིན་པའི་རྐྱེན་གྱིས་རེད། ས་གནས་གཞན་དུ་དེ་དག་ཡོད་མ་རེད། ལྷག་པར་དུ་དྷ་རམ་ས་ལར་གཞུང་དང་གཞུང་འབྲེལ་མིན་པའི་ཚོགས་པ་ཁག་དང་། རྒྱལ་སྤྱིའི་གསར་འགོད་པ་དང་བོད་པའི་གསར་འགོད་པ་སོགས་ཀྱི་བསྟི་གནས་ཡིན་པ་འདི་ལྟ་བུ་ས་གནས་གཞན་གང་དུའང་ཡོད་པ་མ་རེད། ཅེས་སོགས་བརྗོད་སོང་།
༼ས་གནས་མགོ་འཛིན་བྱས་པའི་བརྒྱུད་རིམ་གྱི་ཉམས་མྱོང་༽ཞེས་པའི་བརྗོད་གཞིའི་ཐོག་བསོད་ནམས་རྡོ་རྗེ་ལགས་ཀྱིས། སྐབས་དེར་སྤྱི་ཚོགས་ནང་དྷ་རམ་ས་ལའི་ས་གནས་མགོ་འཛིན་བྱེད་ན་སྟོབས་ཤུགས་ཆེན་པོ་དགོས་ཀྱི་རེད་ཟེར། རྒྱུ་མཚན་བོད་ནས་གསར་དུ་འབྱོར་བ་ཚོར་འབོར་ཤོབ་ཆེན་པོ་ཡོད་པ་རེད་ཟེར། འོན་ཀྱང་ང་འདས་བའི་ལོ་གསུམ་རིང་ས་གནས་མགོ་འཛིན་དུ་བསྡད་པའི་རིང་ང་ལ་ལག་པ་རྐྱོང་མཁན་ཐེངས་གཉིས་བྱུང་སོང་། དེ་གཉིས་བོད་ནས་ཡོང་བའི་གསར་འབྱོར་མ་རེད། བོད་ནས་གསར་དུ་འབྱོར་མཁན་ཚོ་ལས་ཁུངས་ནང་ཡོང་སྐབས། ཕར་འགྲེལ་བཤད་བརྒྱབ་ན་སྐད་ཆར་ཡག་པོ་ཉན་གྱི་འདུག ཁོང་ཚོའི་དཀའ་ངལ་སེལ་མ་ཐུབ་པར་འགྲེལ་བཤད་བརྒྱབ་ན་ཐུགས་རྗེ་ཆེ་ཟེར་ནས་ལོག་འགྲོ་གི་འདུག ཅེས་བརྗོད་སོང་།
ཁོས་མུ་མཐུད་དུ། ང་བསོད་ནམས་རྡོ་རྗེ་ལྟ་བ་མཁྲེགས་པོ་ཞེ་དྲག་ཡོད། ས་གནས་མགོ་འཛིན་བྱེད་སྐབས་དཔལ་འབྱོར་ཡོད་མཁན་མི་ཁ་ཤས་ཤིག་གིས་ཅོག་ཙེ་སྒང་ལ་དངུལ་བཞག་ནས་ལས་ཀ་སྡུག་པོ་བྱེད་ཤོག་ཟེར་བ་དང་། ཡང་ཁ་ཤས་ངའི་ནང་ལ་བསླེབས་ཏེ་ཁྱེད་རང་གི་སྤུན་མཆེད་ཡིན། ཁོ་རང་རྒྱ་གར་ནང་སྐྱེས་མཁན་ཞིག་ལ་བོད་ནས་བསླེབས་པའི་རྒྱབ་གཉེར་ཡི་གེ་སྤྲོད་རོགས་ཟེར་བ་སོགས་བྱུང་ཡང་ངས་རྩ་བ་ནས་ཁས་ལེན་བྱས་མེད། དེ་རིང་ས་གནས་མགོ་འཛིན་གྱི་རྐུབ་སྟེགས་གཡུག་ཟེར་ན་གཡུག་གི་རེད་མ་གཏོགས་མ་ལས་ཀ་སྡུག་ཅག་བྱེད་ཀྱི་མ་རེད། གལ་སྲིད་ས་མགོ་འཛིན་གྱིས་མི་ཚང་མའི་དོན་དག་བསྒྲུབ་ཐུབ་ཀྱི་ཡོད་ན་མི་དེར་ལྷད་ཅིག་ཡོད་པའི་རྟགས་རེད། མི་དེས་ལས་ཀ་ཡག་པོ་བྱེད་ཀྱི་མེད་པའི་རྟགས་རེད། རྒྱུ་མཚན་ང་ཚོས་བཅའ་ཁྲིམས་ཀྱི་དགོངས་དོན་གཞི་བཟུང་འགྲོ་དགོས་ན་མི་ཁ་ཤས་ཀྱི་དོན་ཐག་བསྒྲུབ་མ་ཐུབ་པ་ཡོང་གི་རེད། ཅེས་བརྗོད་སོང་།
༼ས་གནས་མགོ་འཛིན་གྱི་འགན་འཁུར་ཆེ་ཤོས་གང་ཡིན་༽ཞེས་པའི་བརྗོད་གཞིའི་ཐོག་ཟླ་བ་རིན་ཆེན་ལགས་ཀྱིས། འདས་པའི་ལོ་རྒྱུས་ནང་༧གོང་ས་མཆོག་གི་ཆབ་སྲིད་ཀྱི་སྐུ་དབང་རྩིས་སྤྲོད་གནང་ཚར་རྗེས། ང་རང་ཚོའི་སྤྱི་ཚོགས་ཀྱི་འཕེལ་རིམ་དང་ལས་ཀ་བྱེད་ཕྱོགས་ཚང་མའི་སྟེང་ལ་འགན་ཆེན་པོ་དང་འགྱུར་བ་མང་པོ་ཕྱིན་ཡོད། དྷ་རམ་ལའི་མི་མང་གི་ཉིན་རེའི་འཚོ་བ་སྐྱེལ་སྟངས་དང་དཀའ་ངལ་སོགས་ལའང་འགྱུར་བ་ཕྱིན་ཡོད།
ལོ་བཅུ་གྲངས་ཚུན་ལ་ངྷ་རམ་ས་ལ་འདི་ཁྲོམ་ར་ཆེན་པོ་ཞིག་ཆགས་ཚར་ཡོད། གཞན་གྱི་མི་ཡོང་མཁན་དང་ནག་ཉེས་ཀྱི་ཚད་དང་ཉེན་ཁའང་ཆེ་རུ་ཕྱིན་ཡོད། དེ་འདྲའི་གནས་སྟངས་འོག་༧གོང་ས་མཆོག་གི་སྐུ་ཕྱྭར་སྲུང་སྐྱོབ་དང་མི་མང་གི་བདེ་སྡུག་ལ་བལྟ་རྒྱུ་སོགས་ས་གནས་མགོ་འཛིན་གྱི་ལས་འགན་ཆེ་ཤོས་ཆགས་ཡོད་ཅེས་སོགས་བརྗོད་སོང་།
གསར་འགོད་པ། ལྷ་སྐྱབས་རྒྱལ།
ས་འགོ་ལས་ཐོག་བསོད་རྡོ་ནི་གུས་པ་དང་བློ་མཐུན་ཞིག་ཡིན། གུས་པར་ཚོགས་པའི་དཀའ་ངལ་ཞིག་འཕྲད་སྐབས་དེ་དུས་ཁོང་ས་འགོ་འོས་བསྡུ་དངོས་གཞི་ལ་བསླེབ་ཡོད། ཁོས་སང་ཉིན་ང་ལ་འོས་ཤོག་བླུགས་རོགས་འཐོབ་སོང་ན་དེ་ནས་དཀའ་ངལ་འདི་ལ་ཞིབ་འཇུག་ཚན་པ་བཙུག་ནས་རོགས་པ་བྱེད་ཆོག་ཟེར། དངོས་སུ་རྐུབ་སྟེགས་སྟེང་ཕྱག་ལས་གནང་སྐབས་གུས་པས་སླར་ཡང་གནས་ཚུལ་རྣམས་ཞུ་སྐབས་དཀའ་ལས་ཁག་པོ་ཞེ་དྲགས་རེད་ཤག དེ་ལྟ་བུའི་གནས་ཚུལ་ལ་མི་འཇོན་པར་དམིགས་ཡུལ་ཆེན་པོ་ལག་པ་འཆང་བ་ལ་གད་མོ་ཤོར་གྱི།
༼ཁ་ཤས་ངའི་ནང་ལ་བསླེབས་ཏེ་ཁྱེད་རང་གི་སྤུན་མཆེད་ཡིན། ཁོ་རང་རྒྱ་གར་ནང་སྐྱེས་མཁན་ཞིག་ལ་བོད་ནང་བསླེབས་པའི་རྒྱབ་གཉེར་སྤྲོད་རོགས་ཟེར་བ་སོགས་བྱུང་ཡང་ངས་རྩ་བ་ནས་ཁས་ལེན་བྱས་མེད། ༽ ས་གནས་འགོ་འཛིན་གྱི་ཁེ་སང་འདི་ཡིན་ན་ཐང་། རྡ་རམ་ས་ལའི་ས་གནས་འགོ་འཛིན་ལ་མ་གཏོགས་མེད་པའི་ནོར་བུ་འདི་རེད།
ངས་ཀྱང་ཟླ་བ་རིན་ཆེན་ལ་རྒྱབ་སྐྱོར་ཡོད། ཁོང་མི་འཇོན་པོ་དང་རྡ་སའི་སྤྱི་ཚོགས་ཆེད་སེམས་ཤུགས་བླ་མེད་ཡོད་མཁན་ཞིག་རེད། ད་དུང་མི་མཐོ་དམན་སུ་ནའང་བསྟུན་མཁས་ཡོད་པ་ཞིག་རེད།
ལས་ཐོག་བསོད་ནམས་རྡོ་རྗེ་ལགས་སྤྱིར་བཏང་མི་དྲང་མོ་ཞིག་ཡིན་པ་ཡོད། འོན་ཀྱང་མི་དང་བསྟུན་མཁས་དེ་ཙ་མེད་མཁན་ཞིག་རེད། སུ་ལའང་ཧ་མི་ལས་ཟེར་མཁན་ཞིག་རེད། སྤྱིར་མི་དེ་འདྲ་དགོས་ཀྱང་སྤྱི་ཚོགས་ཀྱི་སྣེ་འཁྲིད་མཁན་ལ་འཐེན་རྒྱུ་དང་སྣར་རྒྱུ་ཚང་མ་ཡོད་མཁན་ཀོ་མཉེད་འདྲ་ཞིག་དགོས་པ་རེད་དྲན།
བསྟན་འཛིན་སྒྲོལ་མ་སེམས་ཤུགས་ཡོད་མཁན་ཞིག་རེད། འོན་ཀྱང་རྡ་སའི་གཞིས་འགོ་དེར་མཐོང་རྒྱ་དང་ཐོས་རྒྱ་ཉམས་མྱོང་སོགས་ཅུང་ཡོད་མཁན་ཞིག་ཡོད་ན་ལེགས་སྙམ།
བསོད་རྡོར་གྱིས་སྐད་ཆ་དྲང་མོ་སྐོར་ཞིག་བཤད་ཐུབ་པ་དགའ་ཡོད། དེ་མིན་ང་ཚོའི་མགོ་སྲིད་སྐྱོང་ནས་བཟུང་ཁ་ཐོགས་ཚད་པོས་་་སྟོང་གཏམ་་་འུད་ཤོབ་་་་་ཧམ་རྫུན་་་རྐྱང་རྐྱང་བཤད་ཡོང་དུས་་ངོ་མ་བཙན་བྱོལ་སྤྱི་ཚོགས་འདི་ཡིད་རྟོན་མེད་པའི་སྤྱི་ཚོགས་ཤིག་ཏུ་འགྱུར་བཞིན་འདུག
ད་བར་དུ་ཕྱི་ཡུལ་ནས་རྒྱ་ནག་ལས་ཀྱང་གསར་འབྱོར་བ་ལ་གདོང་ལེན་བྱས་པ་རེད། གསར་འབྱོར་བ་ཐོག་མར་འབྱོར་སའི་སྣེ་ལེན་ཁང་ཁག་ཏུ་དམག་སྦྱོང་ཐོབ་པའི་མི་སྣ་དག་ཆེད་དུ་བསྐོ་བཞག་བྱས་པ་རེད།
གསར་འབྱོར་སློབ་གྲྭ་ཆེ་ཤོས་སོག་སྒར་ཡང་ལོ་མང་པོ་ཞིག་ལ་དམག་མི་རྒན་ཡོལ་ཞིག་གི་ལག་འོག་ཏུ་བཞག་པ་རེད།
གནས་ཚུལ་མང་པོ་ཞིག་གི་ཐོག་ནས་གསར་འབྱོར་བ་དེ་མི་ཞིག་ཏུ་བརྩི་གི་ཡོད་པ་མ་རེད། ཁོང་ཚོས་གསར་འབྱོར་བ་དེ་ཚོ་གོ་བརྡ་འཕྲོད་ས་ཡོད་ས་ཞིག་དང་། བསམ་ཤེས་བྱེད་ཐུབ་མཁན་ཞིག་ཏུ་བརྩི་མྱོང་ཡོད་པ་མ་རེད།
འོན་ཀྱང་དོན་དམ་གྱིས་བསམ་ཤེས་མེད་མཁན་དང་་་གོ་བརྡ་འཕྲོད་རྒྱུ་མེད་མཁན་ནི་ཁོ་རང་ཚོ་ཡིན་པ་འདྲ།
ཟླ་བ་རིན་ཆེན་ཡང་དམག་མི་ཟུར་བ་ཞིག་རེད། ད་གང་དྲག གསར་འབྱོར་ཚོ་ག་ས་གང་ནས་དམག་མི་ཞིག་གི་ལག་ནས་ཐར་ཐབས་མེད་པ་འདྲ།
ངས་ཟླ་བ་རིན་ཆེན་ལགས་སུ་རྒྱབ་སྐྱོར་བྱེད་བཞིན་ཡོད། ཁོང་ལྷག་བསམ་དང་ཤེས་འཇོན་གཉིས་ལྡན་རེད། སྔོན་མ་རྡ་རམ་ས་ལའི་སྤྱི་ཚོགས་ནང་དཀའ་ངལ་ཞིག་འཕྲད་སྐབས་ཁོང་འཐོན་ཡོང་གི་རེད། ཧུར་བོ་པ་རོ་བྱེད་གི་རེད། གཞིས་མགོ་ལས་ཐོག་བསོད་ནམས་རྡོ་རྗེ་ལགས་སུ་རྒྱབ་སྐྱོར་མེད། མ་གཞི་མི་ཡག་པོ་ཡོད་རེད་དེ་ལས་ཀ་ཆེན་པོ་བྱེད་ཐུབ་མཁན་དེ་མ་རེད། དེ་ནས་རླུང་ཚ་བོ་དང་མི་ལ་སྐད་ཆ་བཤད་སྟངས་ཡག་པོ་ཡོད་པ་མ་རེད།
དྷ་རམ་ས་ལའི་ས་གནས་མགོ་འཛིན་བྱེད་ན་སྟོབས་ཤུགས་ཆེན་པོ་དགོས་ཀྱི་རེད
འདི།
དྷ་རམ་ས་ལའི་ས་གནས་མགོ་འཛིན་༼བྱེད་༽ན་སྟོབས་ཤུགས་ཆེན་པོ་དགོས་ཀྱི་རེད
དྷ་རམ་ས་ལའི་ས་གནས་མགོ་འཛིན་བྱས་ན་སྟོབས་ཤུགས་ཆེན་པོ་དགོས་ཀྱི་རེད
འདི་ལ་འདས་ཚིག་ཐོབ་དགོས་སྙམ་པས། དཔྱད་པར་འཚལ།
བསོད་ནམས་རྡོ་རྗེ་ལགས་ཀྱིས་ཡག་པོ་གསུངས་འདུག འོན་ཀྱང་ཁོག་གི་སྐད་ཆ་ཡིན་མིན་མི་ཤེས། ཆབ་སྲིད་པ་འདི་ཚོས་ནམ་ཡང་ཁོག་གི་སྐད་ཆ་བཤད་གི་མ་རེད། ཁ་ནས་གང་བཤད་པ་དེ་དངོས་ཡོད་ལས་ལྡོག་ཕྱོགས་བཤད་གི་རེད། གང་ལྟར། ཁོའི་ཁོག་གི་ཁ་ཆ་ཡིན་དང་ཁ་ཡི་སྐད་ཆ་ཡིན་ལ་མ་ལྟོས་པར། དེང་སྐབས་བོད་ནས་གསར་འབྱོར་བ་ཡོང་མཁན་ཇེ་ཉུང་དུ་ཕྱིན་ཏེ་བཙན་བྱོལ་ནང་གི་དགོན་སྡེ་ཁག་དང་སློབ་གྲྭ་ཁག་སྟོང་པ་ཆགས་བཞིན་ཡོད་པ་དང་བསྟུན་ཏེ་གསར་འབྱོར་ཚོར་ལྟ་སྟངས་ཇེ་ཡག་དང་རིན་ཐང་ཇེ་ཆེ་རུ་འགྲོ་བཞིན་ཡོད་པ་དངོས་ཡོད་རེད།
རྒྱ་བལ་འབྲུག་གསུམ་གྱི་ས་གནས་གང་དུ་ཕྱིན་ཡང་གསར་འབྱོར་ཚོ་ཡ་རབ་སྤྱོད་བཟང་རེད། རྒྱག་རེས་རྒྱག་མཁན་དང་ཐ་མ་ནག་པོ་འཐེན་མཁན། གཞིང་ཚོང་མཁན། རྐུ་འཕྲོག་བྱེད་མཁན། རྒྱན་འཛུགས་ཤོ་རྒྱག་དང་ནག་ཚོང་རིགས་བྱེད་མཁན་ཚང་མ་བཙན་བྱོལ་ནང་སྐྱེས་པའི་རྙིང་འབྱོར་ཚོའི་བུ་དང་བུ་མོ་དག་རེད། འོ་ད་ངས་མང་པོ་མི་བཤད་ཚོར་བའི་དབང་དུ་འགྲོ་བཞིན་འདུག
མཐའ་དོན་ངས་རྡ་རམ་ས་ལའི་ས་གནས་མགོ་འཛིན་དེ་ཟླ་བ་རིན་ཆེན་ལགས་སུ་རྒྱབ་སྐྱོར་ཡོད།