༧གོང་ས་མཆོག་གིས་དེ་རིང་དྷ་སར་བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་གནང་སྟེ། གདན་སའི་དགེ་བཤེས་རྒན་པ་དག་རྫོགས་འགྲོ་བཞིན་ཡོད་པ་དང་ཁོང་ཉིད་ཀྱང་ལོ་བཅོ་ལྔ་ཉི་ཤུ་ལས་འདུག་ཐབས་མེད་སྟབས་གཞོན་སྐྱེས་ཚོས་ནང་ཆོས་སློབ་གཉེར་ཐོག་ཤུགས་བསྐྱོན་དགོས་སྐོར་གསུངས་འདུག
དེ་རིང་ཕྱི་ཚེས་ ༤ ཉིན་གྱི་སྔ་དྲོར་༧གོང་ས་མཆོག་གིས་དྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་བོད་རིཊ་གཞོན་སྐྱེས་ཚོར་ཤེས་རབ་སྙིང་པོའི་རྩ་འགྲེལ་དང་གང་བློ་མའི་ནང་ཆོས་ངོ་སྤྲོད་དབུ་འཛུཊ་གནང་སོང་། དེར་རྒྱ་གར་རྒྱལ་ཡོངས་ཀྱི་མཐོ་སློབ་ཁག་ ༨༠ ཙམ་ནས་བོད་རིགས་སློབ་མ་ ༨༦༣ དང་། དྷ་སྟེང་དང་དྷ་ཤོད། གྷོ་པ་པུར་བཅས་སློབ་གྲྭ་ཁག་གི་དགེ་རྒན་དང་འཛིན་རིམ་བཅུ་བ་དང་བཅུ་གཅིག་གི་སློབ་མ། དེ་བཞིན་ཤེས་རབ་དགའ་ཚལ་སློབ་གླིང་གི་དགེ་སློབ་དང་དྷ་ས་ནང་ཆོས་ངོ་སྤྲོད་ཚོགས་ཆུང་གི་ཚོགས་མི། དྷ་ས་ཉེ་འཁོར་གྱི་སེར་སྐྱ་མང་ཚོཊ་དང་ཕྱི་རྒྱལ་བ་བཅས་མི་ ༣༠༠༠ ལྷག་འདུ་འཛོམས་བྱུང་འདུག
ནང་ཆོས་ངོ་སྤྲོད་ཀྱི་ཐོག་མར་དྷ་སའི་ནང་ཆོས་འཛིན་གྲྭའི་སློབ་མ་ཁག་ཅིག་གིས་༧གོང་ས་མཆོག་ལ་རྟགས་གསལ་གཟིགས་འབུལ་གནང་རྗེས་༧གོང་ས་མཆོག་གིས་སངས་རྒྱས་པའི་ཆོས་ཞེས་པ་དེ་ཤེས་ཡོན་རང་ཆགས་བསྡད་ཡོད་པ་དང་། ཆོས་ཞེས་པ་དེ་སྨོན་ལམ་བརྒྱབ་པ་དང་དད་པ་བྱས་པ། སྔགས་བགྲང་བ་ཙམ་མིན་པར། གཞི་རྩའི་དངོས་ཡོད་གནས་ཚུལ་གང་འདྲ་ཡིན་པ་དེ་གཏན་ལ་ཕབ་པ་དང་བསྡོམས་བརྒྱབ་སྟེ་ང་ཚོ་སྡུག་བསྔལ་མི་འདོད་པ་དང་བདེ་བ་འདོད་མཁན་ཡིན་སྟབས། སྡུག་བསྔལ་གྱི་རྒྱུ་དང་རྐྱེན་ལྡོག་ཐབས་སོགས་དངོས་ཡོད་གནས་ཚུལ་མང་པོ་ཞིག་འགྲེལ་བཤད་རྒྱག་གི་ཡོད་སྐོར་སོགས་སངས་རྒྱས་ཆོས་ཀྱི་དགེ་བ་ངོ་སྤྲོད་དང་། འཛམ་གླིང་སྟེང་དེང་སྐབས་ཡེ་ཤུའི་ཆོས་ལུགས་ལ་དད་པ་བྱེད་མཁན་དུང་ཕྱུར་ ༡༠ དང་ཁ་ཆེ་དུང་ཕྱུར་ ༡༠ ལྷག ཧིན་རྡུ་དུང་ཕྱུར་ ༦ ། ནང་པ་དུང་ཕྱུར་ ༦ ཡས་མས་ཡོད་པ་དང་། ཆོས་ལུགས་ཚང་མས་མི་མང་ལ་ཕན་ཐོགས་ཀྱི་ཡོད་སྟབས། ཆོས་ལུགས་ཚང་མར་བརྩི་བཀུར་བྱེད་རྒྱུ་ཧ་ཅང་གལ་ཆེན་ཡིན་སྐོར་དང་། ཆོས་ལུགས་ཡག་ཉེས་གཙོ་བོ་མིའི་ཁམས་དང་མོས་པ་ལ་ཐུག་ཡོད་སྐོར་སོགས་གསུངས་སོང་།
བོད་མི་ཚོས་ཆོས་ལུགས་ལ་ངོས་འཛིན་བྱེད་སྟངས་ཐད་༧གོང་ས་མཆོག་གིས། ང་ཚོ་བོད་པའི་སྤྱི་ཚོགས་ནང་ཆོས་ཞེས་ལབ་དུས་ཤེས་ཡོན་གྱི་འདུ་ཤེས་མི་འདུག དེས་རིམ་པས་ཆོས་ཉམས་ཆག་འགྲོ་རྒྱུའི་ཉེན་ཁ་འདུག སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། དགོན་པ་ཚོས་ཀྱང་ཆོས་ལབ་དུས་ལམ་སེང་ཆོ་ག་གྲ་སྒྲིག་བྱེད་པ་དང་། དུང་དང་རྒྱ་གླིང་འབུད་རྒྱུ་སོགས་བསླབ་བསྡད་ཀྱི་འདུག དེ་གལ་ཆེན་པོ་རེད། ཡིན་ནའང་རྩ་བ་དཔེ་ཆ་བལྟ་རྒྱུ་དེ་རེད། དེང་སང་ཏོག་ཙམ་དྲག་ཏུ་ཕྱིན་པའི་ཟོལ་འདུག་པ་ལས། གཞན་ཧི་མ་ལ་ཡའི་རི་རྒྱུད། ནུབ་ལ་དྭགས་ནས་ཤར་མོན་བར་དུ་དཔེ་ཆ་ལྟ་རྒྱུ་ཟེར་བ་དེ་མེད་པའི་སྲོལ་འདྲ་འདུག ང་ཚོས་དབང་དང་བྱིན་རླབས་གནང་གི་འདུག་ལབ་དུས་དོ་སྣང་བྱས། ཆོས་སློབ་སྦྱོང་ལབ་དུས་དོ་སྣང་མེད་པའི་སྲོལ་འདུག དེ་ཚོའི་གྲས་ཏེ་བསྟན་པ་ཉམས་པའི་སྔ་བལྟས་རེད། ཅེས་གསུངས་བྱུང་།
གཞོན་སྐྱེས་ཚོས་ནང་ཆོས་སློབ་གཉེར་བྱ་དགོས་པའི་ཐད་༧གོང་ས་མཆོག་གིས། ང་ཚོ་བཙན་བྱོལ་བ་ཆཊ་ནས་ལོ་ ༥༥ ཕྱིན་པ་རེད། མི་རྒན་པ་ཚོ་རྫོགས་འགྲོ་ཡི་ཡོད་པ་རེད། ང་ཚོའི་བཤད་གྲྭ་ཁག་ལས་གཙོ་བོ་གདན་ས་གསུམ་རེད། དེར་ལོ་ ༢༠ དང་ ༣༠ སློབ་སྦྱོང་བྱས་ནས་འགྲོ་བསྡད་ཀྱི་ཡོད་པ་རེད། སྔོན་མ་བཤད་གྲྭ་ཧ་ཅང་ཡག་པོ་ཡོད། བར་སྐབས་དེ་འདྲའི་ཤུགས་ཆེན་པོ་མི་འདུག གདན་ས་ཆེན་པོ་དེ་དག་ནང་མི་རབས་གོང་མ་ཚོ་རྫོགས་འགྲོ་གི་འདུག ད་ལྟ་ཐོན་བཞིན་པའི་མི་རབས་གསར་བའི་ཁྲོད་ཀྱི་དགེ་བཤེས་ཚོས་གཞུག་མཐུད་དེ་ཡོང་གི་ཡོད་པ་རེད། གདན་ས་ཁག་གི་གྲྭ་རྒྱུན་ཡང་རྒྱ་གར་ནང་མང་པོ་མི་འདུག བར་སྐབས་ལ་དྭགས་དང་མོན། གར་ཞ་ཁུ་ནུ་བཅས་ནས་ཡོང་མཁན་ཚོས་སློབ་གཉེར་གྱི་རྐང་བཟུང་བསྡད་པ་རེད། བོད་ཕྱི་ནང་གི་འབྲེལ་བ་མཐུད་ནས་བོད་ནས་ཡོང་མཁན་མང་པོ་བྱུང་ཡོད་པ་རེད། དེ་དག་གིས་སློབ་གཉེར་གྱི་རྐང་ཟིན་བསྡད་སོང་། རྒྱ་གར་ནང་སྐྱེས་པའི་བུ་ཕྲུག་ནང་གྲྭ་སར་སློབ་སྦྱོང་གནང་མཁན་ཧ་ཅང་ཉུང་ཉུང་རེད། དོ་སྣང་མི་འདུག འདི་ལྟར་ཕྱིན་པ་ཡིན་ན། ག་ལེར་རྟག་ཆུ་ཆད་པའི་རྫིང་བུ་ཟེར་བ་ལྟར། ཕལ་ཆེར་རྫིང་བུ་བཟང་པོ་དེ་སྐམ་འགྲོ་བའི་ཉེན་ཁ་འདུག ཁག་ཡོད་མ་རེད། གྲྭ་ཆས་གོན་པ་ཙམ་གྱི་ཕན་གྱི་ཡོད་པ་མ་རེད། དང་དུ་བླངས་ནས་གདན་སར་སློབ་སྦྱོང་གནང་མཁན་ཞིག་དགོས་ཀྱི་ཡོད་པ་རེད། དེ་ཡོང་བར་སྤྲོ་བ་དགོས་ཀྱི་ཡོད་པ་རེད། སྤྲོ་བ་བསླེབ་པ་ལ་ཡོན་ཏན་མཐོང་དགོས་ཀྱི་ཡོད་པ་རེད། ཡོན་ཏན་མཐོང་བ་ལ་དེ་ཤེས་དགོས་ཀྱི་ཡོད་པ་རེད། ཅེས་གསུངས་སོང་།
མ་འོངས་པར་ནང་ཆོས་འཛིན་སྐྱོང་སྤེལ་གསུམ་བྱ་དགོས་པའི་ཐད་༧གོང་ས་མཆོག་གིས། ཉེ་ལམ་བོད་ནས་ཡོང་མཁན་ཞིག་ལ་ཐུག་སྐབས་ཁོས་བོད་ནང་གི་དགོན་པ་ཞིག་གིས་འཁུར་བླངས་ཏེ། དགོན་པའི་ཉེ་འདབས་ཀྱི་གྲོང་པ་ཕོ་མོ་ཚོར་རྟགས་གསལ་བསླབ་སྟབས། དགོན་པའི་གྲྭ་བ་དཔེ་ཆ་མི་བལྟ་མཁན་དེ་འདྲས་གྲོང་པ་ཚོར་དཔེ་ཆ་བསླབ་རྒྱུ་མི་འདུག ང་ཚོ་གྲོང་མཆོག་ཕྱིན་སྐབས་རྟེན་འབྲེལ་ཡན་ལག་བཅུ་གཉིས་དང་བདེན་པ་བཞི་སོགས་ཀྱི་སྐོར་སྐད་ཆ་དྲིས་ཡོང་སྟེ་ང་ཚོར་བཤད་རྒྱུ་མེད་སྟབས། ཁོང་ཚོས་མཐོང་ཆུང་བྱེད་ཀྱི་འདུག་ཅེས་ལབ་ཀྱི་འདུག་ཟེར། དེ་འདྲ་རེད། ང་ཚོའི་སྤྱི་ཚོགས་ཧ་ཅང་སྐྱོ་བོ་རེད། དངོས་ནས་སངས་རྒྱས་ཀྱི་ཆོས་ལ་དད་པ་ཡོད་པ་རེད། བོད་ཁ་བ་གངས་ཅན་འཕགས་པ་སྤྱན་རས་གཟིགས་ཀྱི་གདུལ་ཞིང་ཟེར་གྱི་ཡོད་པ་རེད། འཛམ་གླིང་འདིའི་སྒང་ལ་མི་དུང་ཕྱུར་ ༧༠ ཙམ་ཡོད་པ་ལས་དངོས་ནས་སངས་རྒྱས་ཀྱི་ཆོས་སྤུས་དག་པོ་ཞིག་ཡོད་པ་དེ་ཕལ་ཆེར་བོད་གཅིག་པུ་མ་གཏོགས་མི་འདུག དེ་ངས་ཐག་བཅད་ནས་ཞུ་ཐུབ་ཀྱི་འདུག རྒྱ་ནག་དང་ཉི་ཧོང་། ཀོ་རི་ཡ། ཝེ་ཐི་ནམ། ཐའེ་ཝན། འབར་མ། ཤི་རི་ལིང་ཀ ཀེམ་པོ་ཊི་ཡ། ལོའོ་སི་བཅས་ནང་ཁག་པོ་ཞེ་དྲག་རེད། བསམ་བློ་རྒྱ་ཆེ་རུ་བཏང་སྟེ་སངས་རྒྱས་ཀྱི་བསྟན་པ་འཛམ་གླིང་འདིའི་སྒང་གནས་ དགོས་ཀྱི་ཡོད་ན། ང་ཚོ་བོད་པ་ཚོས་ཤུགས་རྒྱག་དགོས་པ་རེད། བོད་པ་ཚོས་དོ་སྣང་མ་བྱས་པར་འདི་ལྟར་ལྷོད་གཡེང་ཕྱིན་པ་ཡིན་ན། བོད་པར་གྱོང་རག་པ་ཙམ་དུ་མ་ཟད། འཛམ་གླིང་སྤྱི་ཡོངས་ལ་ཞག་རྩི་ཡོད་པའི་སངས་རྒྱས་ཀྱི་བསྟན་པ་དེ་མཛུབ་མོ་འཛུཊ་ས་ཡོད་མ་རེད། དེ་དངོས་ཡོད་གནས་ཚུལ་རེད། དེ་ངས་མི་གཞན་ལ་མ་གུས་པ་བྱས་པ་མིན། མི་ཚང་མར་གུས་ཞབས་ཡོད། ངོ་མཚར་སྐྱེས་ཀྱི་ཡོད། དངོས་ཡོད་གནས་ཚུལ་དཔལ་ན་ལེན་ཊའི་ཆོས་བརྒྱུད་དྲི་མ་མེད་པ་དེ་བསྲེཊ་བཅད་བརྡར་གསུམ་བྱས་ནས་གོ་རྟོགས་ཡོད་བསྡད་པ་ཕལ་ཆེར་བོད་པ་གཅིག་པུ་མ་གཏོགས་མི་འདུག ཅེས་དང་།
ཁོང་གིས་མུ་མཐུད་གསུང་དོན། ཁྱེད་རང་ཚོ་མི་རབས་གཞོན་པ་ཚོ་རེད། རྒན་པ་ཚོ་རྫོགས་འགྲོ་གི་རེད། ང་ལ་ཆ་བཞག་ན་ལོ་ ༧༩ དང་ ༨༠ སྒང་འགྲོ་བསྡད་ཡོད་པ་རེད། བོད་ལོ་རྩིས་ན་བརྒྱད་ཅུའི་སྒང་ལ་སླེབས་པ་རེད། ག་ཚོད་མཐོ་ནའང་ལོ་ ༡༥ དང་ ༢༠ རྗེས་ནས་ཤི་འགྲོ་གི་རེད། ད་ཁྱེད་རང་ཚོ་རེད། རྒན་པ་དེ་དག་རྫོགས་འགྲོ་གི་ཡོད་པ་རེད། གྲྭ་སའི་ནང་གི་དངོས་ནས་རྒྱན་དྲུག་མཆོག་གཉིས་དང་འགྲན་ནུས་པའི་མཁས་པའི་དབང་བོ་མང་པོ་ཞིག་རྫོགས་ཚར་པ་རེད། རྒན་བློ་བཟང་དབང་ཕྱུཊ་དང་རྒན་ཉི་མ། རྒན་པདྨ་རྒྱལ་མཚན་དེ་ཚོའི་གྲས་རྫོགས་ཚར་བ་རེད། ད་ལྷག་བསྡད་པའི་གྲས་དེ་རྒན་གཙང་པ་བློ་བཟང་བཅས་ལས་མི་འདུག ད་ཁྱེད་རང་ཚོས་གཟབ་གཟབ་བྱས་ནས་རིག་པ་སྒྲིམ་ན་མ་གཏོགས། སངས་རྒྱས་ཀྱི་ཆོས་བསྟན་པ་སྤུས་དག་པོ་དེ་འཛིན་མཁན་མི་རབས་གཞོན་པ་ཚོ་རེད། མི་རབས་རྒན་པ་རྫོགས་འགྲོ་གི་རེད། བསྟན་པ་འཛིན་ལབ་པ་དེ་ལྷ་ཁང་སོགས་བརྒྱབ་ནས་བསྟན་པ་འཛིན་ཐུབ་ཀྱི་ཡོད་པ་མ་རེད། ལུང་རྟོགས་ཀྱི་བསྟན་པ་གཉིས་ལས་ལུང་གི་བསྟན་པ་འཆད་ཉན་དང་རྟོགས་པའི་བསྟན་ན་སྒྲུབ་པ་ཉམས་ལེན་བྱས་ནས་འཛིན་སྐྱོང་སྤེལ་གསུམ་བྱ་དགོས་སྟབས། སློབ་གཉེར་ཐོག་འབད་པ་བྱས་ཏེ་མི་རབས་རྗེས་མ་ཚོར་བོད་པའི་རིག་གཞུང་བརྒྱུད་སྤྲོད་བྱ་དགོས་པ་རེད། དུས་རབས་ཉེར་གཅིག་ནང་སངས་རྒྱས་ཀྱི་བསྟན་པ་གནས་ཐུབ་དང་མ་ཐུབ་ཁྱེད་རང་ཚོར་ཐུག་འདུག དེ་དོན་དག་ཆུང་ཆུང་ཞིག་མ་རེད། སྤྱིར་སངས་རྒྱས་ཀྱི་བསྟན་པ་གལ་ཆེན་པོ་རེད། ཡང་སྒོས་བོད་པ་རང་ལ་ཆ་བཞག་ན་ང་ཚོ་བོད་པར་ནང་གི་ནོར་བུ་དང་ཕྱིར་ངོམས་རྒྱུ་ནང་པའི་ལྟ་གྲུབ་མ་གཏོགས་གཞན་ཡོད་མ་རེད། ད་སྔ་མིས་དགའ་བོ་དང་དོ་སྣང་བྱེད་དགོས་དོན་གཙོ་བོ། བོད་པ་ཡ་རབས་འདུག བདེན་པ་བདེན་ཐུབ་བྱེད་ཀྱི་ཡོད་པ་རེད། ཅེས་དགའ་བོ་བྱེད་ཀྱི་ཡོད་པ་ལས། གཞན་པ་ང་ཚོར་ངོམས་རྒྱུ་ཡོད་མ་རེད། ཅེས་གསུངས་སོང་།
ཐེངས་འདིའི་ནང་ཆོས་ངོ་སྤྲོད་ཀྱི་ཉིན་མཐའ་མར་༧གོང་ས་མཆོག་གིས་ཐུགས་རྗེ་ཆེན་པོའི་བཀའ་དབང་གནང་རྒྱུ་ཡིན་འདུག་ལ། དེ་རིང་ཉིན་རྒྱབ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཞོན་སྐྱེས་ཚོར་དོལ་རྒྱལ་དང་འབྲེལ་བའི་ཐོག་གཏམ་བཤད་དང་། སང་ཉིན་ཕྱི་ཚེས་ ༥ ཉིན་གྱི་ཉིན་རྒྱབ་བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུཊ་ཀྱི་ངོས་ནས་དོལ་རྒྱལ་རྗེས་འབྲངས་པར་ལངས་ཕྱོགས་གང་འདྲ་ཡོད་མེད་དང་། དེའི་ཐད་ལས་འགུལ་གང་འདྲ་སྤེལ་གྱི་ཡོད་མེད་ཐོག་གཏམ་བཤད་གནང་རྒྱུ་ཡིན་འདུག
ཐེངས་འདི་ནི་༧གོང་ས་མཆོག་གིས་བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་གནང་ཐེངས་བརྒྱད་པ་དེ་ཆགས་ཡོད་འདུག
གསར་འགོད་པ། དོན་གོ
༈ཨ་རི་གཙོས་པའི་རྒྱལ་ཁབ་རྣམས་ཀྱི་རང་རང་གི་ས་གནས་ཐོག་ཏུ་དོལ་ཚོགས་ལྟ་བུ་རྒྱ་ནག་གཞུང་གི་ཆབ་སྲིད་ཀྱི་ཁ་ཚབ་དང་ལག་ཚབ་བྱེད་མཁན་ཞིག་དགོས་མཁོ་ཡོད་ཀྱི་མ་རེད་
དོལ་ཚོགས་ཀྱི་བྱེད་སྟང་ལབ་སྟངས་འདི་གནས་ཡུལ་རྒྱལ་ཁབ་ཁག་གི་འདིའི་འབོད་ཚིག་གི་རྒྱབ་ལྗོངས་ལ་ཞིབ་འཇུག་གནང་གལ་ཆེ་
༈དོལ་ཚོགས་ཀྱི་བཙན་བྱོལ་བོད་པའི་བག་གྱོན་ཏེ་༧གོང་ས་མཆོག་དང་བོད་མིའི་གདོང་ལ་བུད་དེ་རྒྱ་ནག་དམར་གཞུང་ཀྱི་
ཁ་ཚབ་ལག་ཚབ་བྱེད་བཞིན་འདི་གནས་ཡུལ་རྒྱལ་ཁབ་ཁག་གི་ཀྱང་རྒྱ་གཞུང་ཁ་ཚབ་ལག་ཚབ་བཞིན་འདི་བསམ་ཞིབ་དང་རྟག་དཔྱད་བྱེད་དགོས་པ་ལས་སྣང་ཆུང་བྱས་ཏེ་བཞག་ན་རྒྱ་གཞུང་གིས་ཁྱེད་ཚོའི་ས་གནས་ས་ཐོག་ཏུ་འང་སྣང་བ་གང་དྲན་བྱེད་ངེས་རེད།
༄༅། །མཁྱེན་ཡངས་བོད་ཀྱི་དུས་བབ་གསར་འགོད་པ་ལགས།
༸སྤྱིར་ནོར་༸གོང་ས་༸རྒྱལ་བའི་དབང་པོ་མཆོག་གིས་རྡ་སར་གཞོན་སྐྱེས་ཚོར་བཀའ་ཆོས་གནང་སྐབས། ཁྱེད་རང་ཚོ་མི་རབས་གཞོན་པ་ཚོ་རེད། རྒན་པ་ཚོ་རྫོགས་འགྲོ་གི་རེད། ང་ལ་ཆ་བཞག་ན་ལོ་ ༧༩ དང་ ༨༠ སྒང་འགྲོ་བསྡད་ཡོད་པ་རེད། བོད་ལོ་རྩིས་ན་བརྒྱད་ཅུའི་སྒང་ལ་སླེབས་པ་རེད། ག་ཚོད་མཐོ་ནའང་ལོ་ ༡༥ དང་ ༢༠ རྗེས་ནས་ཤི་འགྲོ་གི་རེད། ད་ཁྱེད་རང་ཚོ་རེད། རྒན་པ་དེ་དག་རྫོགས་འགྲོ་གི་ཡོད་པ་རེད། གྲྭ་སའི་ནང་གི་དངོས་ནས་རྒྱན་དྲུག་མཆོག་གཉིས་དང་འགྲན་ནུས་པའི་མཁས་པའི་དབང་བོ་མང་པོ་ཞིག་རྫོགས་ཚར་པ་རེད། རྒན་བློ་བཟང་དབང་ཕྱུཊ་དང་རྒན་ཉི་མ། རྒན་པདྨ་རྒྱལ་མཚན་དེ་ཚོའི་གྲས་རྫོགས་ཚར་བ་རེད། ད་ལྷག་བསྡད་པའི་གྲས་དེ་རྒན་འཛམ་པ་བློ་བཟང་བཅས་ལས་མི་འདུག ཅེས་བཀའ་ཕེབས་པ་གསར་འགྱུར་གཏོང་སྐབས།
ད་ལྷག་བསྡད་པའི་གྲས་དེ་རྒན་འཛམ་པ་བློ་བཟང་བཅས་ལས་མི་འདུག་ཅེས་བཀོད་པ་ནི། གསར་འགོད་པའི་སྒྲ་འཇུག་ཡོ་ཆས་ནང་་༸རྒྱལ་བའི་བཀའ་ཡག་པོ་ཞིག་བསྡུ་མ་ཐུབ་པས་སྒྲ་གསལ་པོ་མེད་པ་ལས་བྱུང་བའམ་། ཡང་ན་ཡི་གེ་འགོད་ནོར་ཤོར་བ་ཆ་མཆིས་ཀྱང་། བཀའ་དངོས་གནས་ནི། ད་ལྷག་བསྡད་པའི་གྲས་དེ་རྒན་གཙང་པ་བློ་བཟང་བཅས་ལས་མི་འདུག་ཅེས་བཀའ་ཕེབས་འདུག་ན། དྲ་ཐོག་དང་རྗེས་སོར་དུས་བབ་ཚགས་ཤོག་སྟེང་། འཛམ་པ། ཞེས་པ་དེ་གཙང་པ་ཞེས་པར་ནོར་བཅོས་ཡོང་བའི་གསོལ་འདེབས་དགོས་པའི་འབོད་སྐུལ་གནང་བྱུང་བས། དེ་དོན་དགོངས་བཞེས་ཡོད་པ་ཞུ།
གོང་ས་མཆོག་གིས་གཞོན་སྐྱེས་ཚོས་ནང་ཆོས་ལ་བསླབ་པ་སློབ་གཉེར་གནང་དགོས་པ་དང་། ལྷག་པར་དུ་སློབ་གྲྭ་ཁག་ནང་རིགས་ལམ་རྩོད་པ་རྒྱག་པའི་ཐོག་ཤགུས་རྒྱག་དགོས་པའི་བཀའ་སློབ་ལམ་སྟོན་རབས་དང་རིམ་པ་གནང་ཡོད་པ་རེད། འོན་ཀྱང་བཙན་བྱོལ་ནང་གི་རྒད་པོ་རྒན་མོ་ཚོས་རིགས་ལམ་རྩོད་སྟངས་དེ་ལས་བསྡོམས་བཟོ་བྱེད་དང་༧གོང་ས་མཆོག་ཕེབས་སྐབས་ཕྱག་མཆོད་འབུལ་གྱི་ཚབ་ཙམ་རེད།
སློབ་གྲྭ་ཁག་གི་དགེ་རྒན་ཚོ་ཡིད་ཆེས་ཡོད་པ་མ་རེད་ལ་སློབ་ཕྲུག་ཚོར་ཡང་སྤྲོ་སྣང་ཡོད་པ་མ་རེད།
དེང་སྐབས་བོད་ནང་གི་སློབ་གྲྭ་ཁག་མང་པོའི་ནང་ཚད་མ་རིག་པ་སློབ་ཁྲིད་གནང་གི་ཡོད་པ་དེ་དངོས་ཡོད་གནས་ཚུལ་ཞིག་རེད། སློབ་གྲྭ་ཁག་ཁ་ཤས་ནང་གི་རིགས་ལམ་རྩོད་སྟངས་དེ་ཧ་ཅང་ཡག་པོ་དང་ཚད་ལྡན། སློབ་ཕྲུག་ཕོ་མོ་ཚང་མ་རིགས་ལམ་རྩོད་པ་བྱེད་པར་སྤྲོ་སྣང་དང་དོ་ཁུར་ཆེན་པོ་ཡོད་འདུག