དེ་རིང་སྔ་དྲོ་སྲིད་སྐྱོང་མཆོག་གིས་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་ཐབས་ཀྱི་ལས་གཞི་དང་དབུ་མའི་ལམ་གྱི་དྲ་རྒྱ་དབུ་འབྱེད་ཀྱི་གསར་འགོད་གསལ་བསྒྲཊ་གནང་སོང་།
དེ་རིང་ཕྱི་ཚེས་ ༥ ཉིན་སྔ་དྲོར༧གོང་ས་མཆོག་གི་ཉིན་གཉིས་པའི་གསུང་ཆོས་གྲུབ་མཚམས། བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག་གིས་༧གོང་ས་མཆོག་ལ་བོད་མིའི་སྒྲིག་འཛུཊ་ཀྱི་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་རྒྱུའི་ལས་གཞི་དང་འབྲེལ་བའི་ཡིག་ཆ་སྤྱན་འབུལ་ཞུས་སོང་བར་མ་ཟད། ཉིན་གུང་ཆུ་ཚོད་ ༡༢།༠༠ ཡས་མས་སུ་དྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག་དང་། ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས་མཆོག ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་དང་དྲུང་ཆེ་དངོས་གྲུབ་རྡོ་རྗེ་ལགས་བཅས་ཀྱིས་བོད་མིའི་དབུ་ཁྲིད་ཚོས་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་ཐབས་ཀྱི་ལས་གཞི་དང་དྲ་རྒྱ་དབུ་འབྱེད་སྐོར་གྱི་གསར་འགོད་གསལ་བསྒྲགས་སྤེལ་སོང་།
གསར་འགོད་གསལ་བསྒྲགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་དབུ་ཁྲིད་ཚོས་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་ཐབས་ཀྱི་ལས་གཞི་སྤེལ་དགོས་པའི་དམིགས་ཡུལ་སྐོར་གསུང་སྐབས། གཙོ་བོ་བོད་པའི་སྤྱི་ཚོགས་ནང་དང་དམིགས་བསལ་ཕྱི་རྒྱལ་གྱི་གནད་ཡོད་མི་སྣ་ཁག་ལ་མཇལ་སྐབས་དབུ་མའི་ལམ་གྱི་སྐོར་མཁྱེན་མི་མཁྱེན་དང་གོ་ནོར་ཐེབས་པ་ཡང་མང་པོ་ཡོང་གི་ཡོད་སྟབས། རྒྱལ་སྤྱིའི་ཐོག་དབུ་མའི་ལམ་གྱི་སྐོར་གསལ་བོ་ཞིག་ཞུ་ཐུབ་པ་ཡིན་ན་དགེ་མཚན་ཆེན་པོ་ཡོད་པར་མཐོང་བ་དང་། དམིགས་བསལ་རྒྱ་ནག་གཞུང་གིས་སྐུ་ཚབ་དང་ཁོ་རང་ཚོའི་གཞུང་ཚབ་སོཊ་བརྒྱུད་དེ་ཕྱི་རྒྱལ་གྱི་གནད་ཡོད་མི་སྣ་དང་མི་མང་ནང་དབུ་མའི་ལམ་གྱི་སྐོར་ལོག་འགྲེལ་བརྒྱབ་ཏེ་གོ་ནོར་ཐེབས་ཡོད་མཁན་མང་པོ་བྱུང་གི་ཡོད་སྟབས། ང་ཚོས་དབུ་མའི་ལམ་གྱི་གོ་རྟོགས་ལས་འགུལ་དང་དྲ་རྒྱ། བརྙན་འཕྲིན། ཡིག་ལམ་བཅས་བརྒྱུད་དེ་རྒྱལ་སྤྱིའི་སྡིངས་ཆ་དང་བོད་པ་ནང་ཁུལ། བོད་ནང་ཁུལ། རྒྱ་ནག་ནང་ཁུལ་བཅས་སུ་མཁྱེན་རྟོགས་ཡོང་བར་བྱ་ཆེད་ཡིན་སྐོར་གསུངས་སོང་།
ཡང་ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས་མཆོག་གིས་དབུ་མའི་ལམ་གྱི་དྲ་རྒྱ་ངོ་སྤྲོད་དང་འབྲེལ་བའི་གསུང་བཤད་གནང་སྐབས། བོད་མིའི་སྒྲིག་འཛུཊ་ཀྱི་ངོས་ནས་ཕྱི་རྒྱལ་དང་བོད་པ། རྒྱ་རིགས་བཅས་ལ་དབུ་མའི་ལམ་གྱི་གོ་རྟོགས་སྤེལ་རྒྱུ་གལ་ཆེན་བཟུང་སྟེ། དབུ་མའི་ལམ་དང་འབྲེལ་བའི་ཡིག་ཆ་དང་གློག་བརྙན་སོགས་གཟིགས་ཆོག་ཆོག་ཡོང་ཆེད་དམིགས་བསལ་དྲ་རྒྱ་དབུ་འབྱེད་གནང་ཡོད་པ་དང་། དྲ་རྒྱ་བོད་རྒྱ་དབྱིན་གསུམ་བཅས་སྐད་ཡིག་གསུམ་གྱི་ཐོག་ཡོད་པར་མ་ཟད། དམིགས་བསལ་ཡིག་ཆ་ཁག་གསུམ་གྲ་སྒྲིག་བྱས་པ་དག་ཨི་ཊ་ལི་དང་ཧྥི་རན་ཆི། འཇར་མན། སི་པན་བཅས་སྐད་ཡིག་བཞིའི་ནང་གྲ་སྒྲིག་གནང་ཡོད་སྐོར་དང་། བོད་ཡིག་དྲ་རྒྱའི་ནང་ཡིག་ཆ་དང་གློག་བརྙན། ལོ་རྒྱུས་དང་འབྲེལ་བའི་གསལ་བཤད། དབུ་མའི་ལམ་ལ་རྒྱབ་སྐྱོབ་ཡོད་རིགས་ཀྱིས་ཨེ་མེལ་ཁ་བྱང་དང་མིང་ཐོ་འགོད་ས། སྲིད་སྐྱོང་མཆོག་གིས་སྔོན་གླེང་བཅས་དང་། དེ་བཞིན། དབུ་མའི་ལམ་གྱི་ངོ་བོ་དང་བྱུང་རིམ་། གྲུབ་འབྲས་བཅས་ངོ་སྤྲོད། དེ་འབྲེལ་གྱི་གསུང་བཤད་དང་གལ་ཆེའི་ཡིག་ཆ་ཁག་ལས་དང་པོ་དབུ་མའི་ལམ་ངོ་སྤྲོད་སྙིང་བསྡུས་དང་། གཉིས་པ་དབུ་མའི་ལམ་སྐོར་གྱི་དྲི་བ་དྲིས་ལན། ཡིག་ཆ་གསུམ་པ་ཕྱི་ལོ་ ༡༩༥༩ ལོ་ནས་ད་ལྟའི་བར་གྱི་བྱུང་རིམ་ལོ་ཚིགས་བཅས་གཟིགས་བདེ་བོ་བཀོད་ཡོད་ཚུལ་སོགས་གསུངས་བྱུང་།
དེ་རིང་བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུ་འབྱེད་གནང་བའི་དབུ་མའི་ལམ་ཞེས་པའི་དྲ་རྒྱའི་ཁ་བྱང་ (www.middlewayapproach.org དང་ www.tibet.net/mwa) ཡིན་འདུག
གསར་འགོད་པ། དོན་གོ
