རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་གིས་དེ་ཁུལ་གྱི་སློབ་གྲྭ་ཁག་གི་སློབ་ཕྲུག་ཚོར་ཡིག་གཟུགས་འགྲན་སྡུར་གྱི་བྱ་འགུལ་ཞིག་སྤེལ་འདུག
ས་གནས་ནས་གནས་ཚུལ་བཏང་འབྱོར་བྱུང་བ་ལྟར་ན། རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་གིས་རང་རེའི་བོད་ཀྱི་ཆོས་རིག་མི་ཉམས་གོང་འཕེལ་དང་ཉམས་པ་སོར་ཆུད་ཆེད། འདས་པའི་ལོ་ངོ་བརྒྱད་ཀྱི་གོང་ནས་ལས་འགུལ་རིམ་པ་མི་ཉུང་པ་ཞིག་སྤེལ་དང་སྤེལ་བཞིན་བཞིན་པའི་ཁྲོད། ཁ་སང་ཕྱི་ཚེས་ ༢༩ རེས་གཟའ་ཉི་མ་དང་སྟབས་བསྟུན་རྡོར་གླིང་ཁུལ་གྱི་དམའ་རིམ་སློབ་གྲྭ་ཁག་དགུའི་བར་ཡིག་གཟུགས་འགྲན་སྡུར་གྱི་ལས་གཞི་ཞིག་བརྩམས་ཡོད་འདུག
ལས་རིམ་ནང་མཉམ་ཞུགས་གནང་མཁན་རྡོར་གླིང་དབུས་བོད་མིའི་སློབ་གྲྭ་སྟེ་རྡོར་གླིང་གཏན་སློབ་དང་། སོ་ན་མདའ་དབུས་བོད་མིའི་སློབ་གྲྭ། སྤོག་རི་སྦོང་སཾ་བྷོ་ཊ་གཏན་སློབ། འབྲུག་དཀར་བརྒྱུད་དགོན་གསང་སྔགས་ཆོས་གླིང་བཅས་ཡིན་ཞིང་། གོང་གསལ་སློབ་ཁག་བཞིའི་བར་གྱི་ཡིག་གཟུགས་འགྲན་སྡུར་ཁྲོད། ཨང་དང་པོ་སྤོག་རི་སྤོང་སཾ་བྷོ་ཊ་གཏན་སློབ་ཀྱི་སློབ་ཕྲུག་ཟླ་བ་དང་། ཨང་གཉིས་པ་སྤོག་རི་སྦོང་སཾ་བྷོ་ཊའི་གཏན་སློབ་ཀྱི་སློབ་ཕྲུག་བློ་བཟང་ཚེ་རིང་། ཨང་གསུམ་པ་སྤོག་རི་སྦོང་སཾ་བྷོ་ཊ་གཏན་སློབ་ཀྱི་སློབ་ཕྲུག་ཀརྨ་ལྷ་མོ་བཅས་ལ་ཐོབ་ཡོད་འདུག
གནས་ཚུལ་ནང་མུ་མཐུད་དུ། ཨང་སྡེ་ཐོབ་མཁན་གྱི་སློབ་ཕྲུག་རྣམས་ལ་འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང་གིས་ཕྱག་འཁྱེར་དང་བྱ་དགའ་བཅས་བསྩལ་ཅིང་། མཇུག་ཏུ་གཅེས་སྐྱོང་ཁང་དེའི་འགན་འཛིན་མཆོག་གིས་ཐེངས་འདིའི་ལས་རིམ་ནང་ཞུགས་པའི་སློབ་གྲྭ་ཁག་ལ་ཐུགས་རྗེ་ཆེའི་ཞུ་དང་འབྲེལ་བའི་གསུང་བཤད་གནང་སྟེ་ལས་རིམ་མཇུག་བསྡུས་ཡོད་པ་རེད། ཅེས་སོགས་འཁོད་འདུག
ཁྱེད་ཚོ་ནི་བོད་ཀྱི་མ་འོངས་བདག་པོ་ཡིན།