རྒྱ་དམག་གིས་ལ་དྭགས་ལ་བཙན་འཛུལ།

ཉིན་འགའི་སྔོན་རྒྱ་དམག་གིས་ལ་དྭགས་ནང་བཙན་འཛུལ་བྱས་ཏེ་འབྲོག་པ་ཚོའི་སྡོད་གུར་གཏོར་རྗེས་ཕྱོགས་གཉིས་བར་གྲོས་མོལ་བྱས་ཏེ་གནས་སྐབས་རིང་འགྲིག་འཇགས་བྱུང་ཡོད་འདུག

དེ་རིང་རྒྱ་གར་གྱི་གསར་ལམ་ཁག་ཅིག་ནང་གནས་ཚུལ་ཐོན་པར། ཟླ་འདིའི་ཚེས་ ༢༢ ཉིན་རྒྱ་ནག་བཅིངས་འགྲོལ་དམག་དཔུང་གིས་རྒྱ་དཀར་ནག་གི་རྩོད་རྙོག་ཆེ་བའི་ས་ཁུལ་ལ་དྭགས་ཀྱི་ཅཱར་ཊིན་ནེ་ལོ་ནོ་ལཱ་ (Charding Nilu Nullah ) ཞེས་པའི་ས་ཁུལ་ནང་བཙན་འཛུལ་བྱས་ཏེ། ལ་དྭགས་ཀྱི་འབྲོག་པ་ཚོའི་སྡོད་གུར་གཏོར་བཤིག་བཏང་སྟེ། ཁོ་རང་ཚོས་དམག་གུར་བརྒྱབ་ཡོད་སྟབས། ཕྱོགས་གཉིས་ཀྱི་ས་མཚམས་སྲུང་དམག་ས་གནས་སུ་བསླེབས་ཏེ་གནས་ཚུལ་ཛ་དྲག་ཆགས་བཞིན་པའི་སྐབས་ཕྱོགས་གཉིས་ཀྱི་དམག་དཔོན་བར་གྲོས་མོལ་བྱས་ཏེ་ཕྱིར་འཐེན་བྱས་ཡོད་འདུག

གནད་དོན་འདིའི་ཐད་རྒྱ་གར་གྲོས་ཚོགས་ཀྱི་ལ་དྭགས་བྷེ་ཇེ་པེ་འཐུས་མི་ཐུབ་བསྟན་ཆོས་དབང་ལགས་ཀྱིས་རྒྱ་གར་བརྙན་ འཕྲིན་གསར་ཁང་ (CNN, IBN) གི་གསར་འགོད་པར། གཟའ་པ་སངས་ཉིན་རྒྱ་ནག་དམག་མིས་ལ་དྭགས་ས་གནས་འབྲོག་པ་ཚོའི་སྡོད་གུར་གཏོར་ནས་རྒྱ་དམག་གི་གུར་བརྒྱབ་པའི་ཚབས་ཆེན་རང་བཞིན་གྱི་གནས་ཚུལ་ཞིག་བྱུང་ཡོད་ཅེས་བརྗོད་འདུག བྷེ་ཇེ་པེ་མགོ་ཁྲིད་སི་བཱ་མེ་ (Subramanian Swamy) ལགས་ཀྱིས། རྒྱ་ནག་ང་ཚོའི་རྒྱལ་ཁོངས་སུ་ཚུར་འཛུལ་ཕར་འགྲོ་བྱེད་ཀྱི་ཡོད་པ་མཐོང་རྒྱུ་གལ་ཆེན་པོ་རེད། ང་ཚོར་ཐོག་མ་ནས་ས་མཚམས་ཀྱི་ས་ཐིག་གསལ་བོ་ཞིག་མེད་སྟབས་སོ་སོའི་རྒྱལ་ཁོངས་སུ་བཙན་འཛུལ་བྱེད་པའི་དཀའ་ངལ་འཕྲད་ཀྱི་ཡོད་པ་ཅེས་བརྗོད་འདུག

ཀོང་རེ་སི་ཚོགས་པས་མུ་དྷིའི་གཞུང་ལ་སྐྱོན་བརྗོད་བྱས་ཏེ། ཀོང་རེ་སིའི་མགོ་ཁྲིད་མ་ནེ་ཤཱི་ཌེ་བཱ་རེ་ (Manish Tewari ) ལགས་ཀྱིས་གསར་འགོད་པར། མུ་དྷིའི་སྲིད་དོན་ཚོགས་པས་གཞུང་བཟུང་ནས་ད་བར་རྒྱ་ནག་གིས་རྒྱ་གར་ལ་ཐེངས་ག་ཚོད་བཙན་འཛུལ་བྱས་སོང་། ནམ་རྒྱུན་བྷེ་ཇེ་པེ་ཚོགས་པས་བཤད་བསྡད་པའི་ཕྱི་སྲིད་སྟོབས་ཤུགས་ཟེར་བ་གང་དུ་བྲོས་ཚར་བ་རེད། གཞུང་འཛིན་ཚོགས་པས་ས་མཚམས་དང་འབྲེལ་བའི་གནད་དོན་གང་མགྱོགས་སེལ་ཐུབ་བྱ་རྒྱུ་གལ་ཆེན་པོ་རེད། ཅེས་བརྗོད་འདུག

རྒྱ་གར་གྱི་བདེ་སྲུང་ཆེད་མཁས་པ་བྷ་སི་ཀར་ (Uday Bhaskar) ལགས་ཀྱིས། རྒྱལ་ཁབ་གཉིས་བར་གྱི་ས་མཚམས་ལ་ས་ཐིག་ཏག་ཏག་ཅིག་མེད་ན་བཙན་འཛུལ་ལྟ་བུའི་བྱེད་སྟངས་མུ་མཐུད་དུ་བྱུང་གི་རེད། དེ་ནི་རྒྱལ་ཁབ་ཕན་ཚུན་བར་སྟོབས་ཤུགས་དང་གྲ་སྒྲིག་ཡོད་མེད་ལ་ཉམས་ཚོད་ལེན་སྟངས་ཤིག་ཀྱང་རེད་ཅེས་བརྗོད་འདུག

གནད་དོན་དབྱེ་ཞིབ་པ་ཚོས། རྒྱ་ནག་གིས་རྒྱ་གར་ས་ཁོངས་ལ་བཙན་འཛུལ་བྱེད་པ་དང་། ཨ་རུ་ནཱ་ཅལ་མངའ་སྡེ་དང་ཇ་མུ་ཀ་ཤི་མུར་མངའ་སྡེ་གཉིས་ནང་གི་མི་ཚོས་རྒྱ་ནག་ལ་མཐོང་མཆན་ཞུ་སྐབས། རྒྱ་ནག་གིས་ཁོང་ཚོའི་ཕྱི་སྐྱོད་ལག་ཁྱེར་ཐོག་མཐོང་མཆན་མི་སྤྲོད་པར་སྤྱིར་བཏང་གི་ཤོག་བུའི་ཐོག་སྤྲད་དེ་རྒྱ་གར་ལ་རྣམ་འགྱུར་མི་ལེགས་པ་སྟོན་པ་སོགས་ལ་བརྟེན་ཏེ། རྒྱ་དཀར་ནག་གཉིས་བར་ས་མཚམས་རྩོད་རྙོག་སེལ་དགོས་ན་རྒྱ་གར་གྱི་ཕྱོགས་ནས་བློས་གཏོང་མང་པོ་ཞིག་བྱེད་དགོས་ཡོད་ཚུལ་བརྗོད་འདུག

རྒྱ་ནག་གིས་རྒྱ་གར་གྱི་བདག་བཟུང་འོག་ཡོད་པའི་བྱང་ཤར་ཧི་མ་ཡའི་རི་རྒྱུད་ཀྱི་ས་ཁྱོན་སྤྱི་ལེ་གྲུ་བཞི་མ་ ༩༠༠༠༠ ཙམ་རྒྱ་ནག་གི་ས་ཁོངས་ཡིན་པར་བརྗོད་པ་དང་། རྒྱ་གར་གྱིས་ཀྱང་ཨ་ཀ་སཱ་ཆིན་ (Aksai Chin) མཐོ་སྒང་གི་ས་ཁྱོན་སྤྱི་ལེ་གྲུ་བཞི་མ་ ༣༨༠༠༠ ཙམ་རྒྱ་ནག་གིས་བཙན་བཟུང་བྱས་ཡོད་པར་བརྗོད་ཀྱི་ཡོད་པ་རེད།