ཁ་སང་རྒྱ་ནག་ཀྲེ་ཅང་ཞིང་ཆེན་གྱི་ཡེ་ཤུའི་ལྷ་ཁང་གསུམ་གྱི་ཆོས་རྟཊ་གཏོར་བཤིག་བཏང་ཡོད་པ་དང་། རྒྱ་གཞུང་གི་བསྡོམས་རྩིས་ལྟར་ན་ད་ལྟའི་བར་ཁྱོན་ཡེ་ཤུའི་ལྷ་ཁང་ ༣༦༠ ལྷག་གཏོར་ཡོད་འདུག
ཁ་སང་ཕྱི་ཚེས་ ༢༨ ཉིན་གྱི་ཞོགས་པ་ས་གནས་ཀྱི་ཆུ་ཚོད་ ༣ པ་ཡོལ་ཙམ་ལ། ཀྲེ་ཅང་ཞིང་ཆེན་ཝུན་ཀྲུའུ་གྲོང་ཁྱེར་ཚཱང་ནན་རྫོང་ཁོངས་ཀྱི་ཧེ་ཨིན་ཡེ་ཤུའི་ལྷ་ཁང་དུ་ལས་མི་བརྒྱ་གྲངས་ཤིག་སླེབས་ཏེ། བཙན་གྱིས་ལྷ་ཁང་གི་ཆོས་རྟགས་གཏོར་བཤིག་བཏང་པར་བརྟེན། ཡུལ་མི་ཡེ་ཤུ་བ་དང་ལས་མིའི་བར་འཁྲུག་འཛིང་ཤོར་ཏེ་ཡུལ་མི་མང་པོར་གཅར་རྡུང་བཏང་ཡོད་པ་མ་ཟད། མི་གཅིག་ལ་རྨས་སྐྱོན་ཚབས་ཆེན་ཕོག་སྟེ་སྨན་ཁང་དུ་བསྐྱལ་ཡོད་འདུག
ཡེ་ཤུ་ཡུལ་མི་ཞིག་གིས། ཁྲིམས་འགལ་གྱིས་འཛུགས་བསྐྲུན་བྱས་པའི་ཉེས་མིང་འོག བདུན་ཕྲག་གཉིས་ཙམ་གྱི་གོང་དུ་སྲིད་གཞུང་གིས་ང་ཚོའི་ལྷ་ཁང་གཏོར་རྒྱུ་ཡིན་པའི་བརྡ་ཐོ་ཞིག་བཏང་འདུག་པས། ང་ཚོ་ཉིན་ལྟར་ལྷ་ཁང་དུ་འཛོམས་ཏེ་སྲུང་སྐྱོབ་བྱས་པ་མ་ཟད། ཟླ་འདིའི་ཕྱི་ཚེས་ ༢༧ ཉིན་མཚན་གང་བོར་ང་ཚོ་མི་ ༢༠༠ ཙམ་གྱིས་ལྷ་ཁང་བསྲུངས་སྟེ། ཆོས་དཔེ་གྱེར་འདོན་དང་གསོལ་འདེབས་བྱས་ནས་བསྡད་པ་དང་། ལྷ་ཁང་འདི་བཞེངས་ནས་ལོ་གཉིས་ལས་འགོར་མེད་ལ། འཛུགས་བསྐྲུན་གྱི་ཆོག་མཆན་ཆ་ཚང་ཡོད་ཀྱང་། ང་ཚོས་བཀག་འགོག་མ་ཐུབ་པར་ལྷ་ཁང་གི་ཡེ་ཤུའི་ཆོས་རྟགས་གཏོར་བཤིག་བཏང་སོང་། ཞེས་བརྗོད་འདུག
གཞན་ཡང་། ཉིན་དེའི་མཚན་མོའི་ཆུ་ཚོད་ ༡༢ ཙམ་ལ། ལས་མི་དང་ཉེན་རྟོག་པ་མང་པོ་ཝུན་ཀྲུའུ་ལུའུ་ཁྲིན་ས་ཁུལ་གྱི་ཝོ་ཆོ་ཡེ་ཤུ་ལྷ་ཁང་དུ་བསླེབས་ཏེ། རྒྱུ་མཚན་ཅི་ཡང་མ་བཤད་པར་ལྷ་ཁང་གི་ཆོས་རྟགས་བཙན་གཏོར་བྱས་ཡོད་སྟབས། ཡེ་ཤུ་ཡུལ་མི་ཚོས་རྒྱུ་མཚན་ཅི་ཡིན་འདྲི་སྐབས་ཉེན་རྟོག་པས་གང་བྱུང་གཅར་རྡུང་བཏང་ཡོད་འདུག དེ་བཞིན། ཉིན་དེའི་སྔ་དྲོར་ཝུན་ཀྲུའུ་ཝཱ་ཧེ་ས་ཁུལ་གྱི་ཡེ་ཤུའི་ལྷ་ཁང་ཞིག་གི་ཆོས་རྟགས་ཀྱང་གཏོར་བཤིག་བཏང་ཡོད་པའི་གནས་ཚུལ་ཐོན་འདུག
ལུའུ་ཁྲིན་གྱི་ཡུལ་མི་ཞིག་གིས་གསར་འགོད་པར། ང་ཚོས་དབུས་དང་ས་གནས་སྲིད་གཞུང་གིས་སྤྲད་པའི་གཏོར་བཤིག་ཆོག་པའི་ཡིག་ཆ་སྟོན་དགོས་པའི་རེ་སྐུལ་བྱས་ཀྱང་སྟོན་རྒྱུ་མི་འདུག བརྡ་ཐོ་སོགས་གང་ཡང་མ་འབྱོར་བར་ལྐོག་ལྐོག་སུད་སུད་ཀྱིས་ཡོང་སྟེ་གཏོར་བཤིག་བཏང་སོང་། ད་ལྟའི་བར་དུ་ང་ཚོའི་ས་ཁུལ་ནས་ཡེ་ཤུའི་ལྷ་ཁང་ ༣ ནས་ ༥ ཡི་ཆོས་རྟགས་གཏོར་ཚར་བ་རེད། ཅེས་བརྗོད་འདུག
ད་སྐབས་རྒྱ་ནག་ནང་ཡེ་ཤུ་ཆོས་པ་ཁྱོན་ས་ཡ་ ༦༥ ཙམ་ཡོད་པ་དང་། ཀྲི་ཅང་ཞིང་ཆེན་ནི་རྒྱ་ནག་གི་ཡེ་ཤུ་ཆོས་པ་ཆེས་མང་ཤོས་ཀྱི་ཞིང་ཆེན་ཞིག་ཡིན་སྟབས། འདས་ལོའི་ལོ་མཇུག་ནས་བཟུང་རྒྱ་གཞུང་གིས་ཞིང་ཆེན་ཡོངས་ཀྱི་ཁྲིམས་འགལ་ཆོས་ལུགས་འདུ་འཛོམས་ཁང་གཙང་སེལ་ཞེས་པའི་ལས་འགུལ་སྤེལ་ཏེ། ད་ལྟའི་བར་ཁྱོན་ཡེ་ཤུའི་ལྷ་ཁང་ ༡༣༠ ལྷག་གཏོར་བཤིག་བཏང་ཡོད་པ་དང་། རྒྱ་ནག་གཞུང་ཕྱོགས་ཀྱི་བསྡོམས་རྩིས་ལྟར་ན། ད་ལྟའི་བར་ཀྲི་ཅང་ཞིང་ཆེན་ནང་ཡེ་ཤུ་ལྷ་ཁང་ཡོངས་སུ་གཏོར་བ་དང་ཆོས་རྟགས་གཏོར་བ་ཁྱོན་ ༣༦༠ ལྷག་ཡོད་པ་དང་། དེ་མིན་གྱི་ལྷ་ཁང་མང་པོའི་ངོ་བོ་བསྒྱུར་ཏེ་ཆོས་ཚོགས་ཀྱི་ལས་རྟགས་སོགས་མེད་པར་བཟོས་ཡོད་འདུག
གསར་འགོད་པ། པདྨ་མཚོ།
