དེ་རིང་ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས་བཀའ་བློན་ལྷན་རྒྱས་བསྐོངས་ཏེ། ལོ་རེའི་སྲུང་སྐྱོབ་སྐོར་གྱི་སྲིད་བྱུས་འཛིན་སྟངས་ཐད་ཤོག་ལྷེ་ ༥༠༥ ཅན་གྱི་རྒྱབ་ཤ་དཀར་པོའི་དེབ་ཅིག་ཕྱིར་བསྒྲགས་བྱས་ཡོད་པ་དང་། ཡིག་ཆ་དེའི་ནང་རྒྱ་ནག་གཞུང་གིས་མུ་མཐུད་ཞི་བདེ་རྒྱ་མཚོ་དང་ཤར་རྒྱ་ནག་རྒྱ་མཚོའི་བདག་དབང་ལ་བཙན་འཛུལ་འཇིགས་སྐུལ་བྱས་ཚེ་དེར་མཇུག་འབྲས་ཅི་ཡོང་བཤད་དཀའ་བ་དང་། གལ་སྲིད་ཡ་ང་བའི་གནས་ཚུལ་འདྲ་བྱུང་བ་ཡིན་ན་དེའི་འགན་ཡོངས་རྫོགས་རྒྱ་ནག་གིས་འཁུར་དགོས་པའི་ཉེན་བརྡ་བཏང་ཡོད་པ་མ་ཟད། ཉི་ཧོང་སྲུང་སྐྱོབ་ཆེད་ ༢༠༡༤ ནས་ ༢༠༡༩ བར་ཨ་སྒོར་ཐེར་འབུམ་ ༢༤༠ ཡི་འགྲོ་གྲོན་བཏང་སྟེ་དམག་རྒྱག་གནམ་གྲུ་དང་། བྱིངས་གྲུ། གནམ་ས་གཉིས་ཐོག་གི་དམག་འཐབ་འཕྲུལ་འཁོར། ལྕགས་འཁྲབ་འཁོར་ལོ་གང་མང་བཟོ་སྐྲུན་བྱས་ཏེ་རྒྱ་ནག་གི་བྱ་སྤྱོད་ལ་ཁ་གཏད་གཅོག་རྒྱུ་ཡིན་སྐོར་བསྒྲགས་འདུག
སྲིད་བློན་ཤིང་ཛོ་ཨ་བྷེ་ཡིས། “ཉེ་ལམ་རྒྱ་ནག་གཞུང་གིས་ཞི་བདེ་རྒྱ་མཚོའི་ཐོག་མཁའ་དབྱིངས་དབྱེ་མཚམས་ཐིག་ཚད་བཟོས་པ་མ་ཟད། ལྷོ་ཤར་རྒྱ་ནག་རྒྱ་མཚོའི་བདག་དབང་རྩོད་ལེན་བྱས་ཏེ། ཨེ་ཤ་ཡ་དང་ཉི་ཧོང་གི་བརྟན་ལྷིང་སྲུང་སྐྱོབ་ལ་འགོག་རྐྱེན་བཟོ་བཞིན་ཡོད་སྟབས། ཡིག་ཆ་འདི་ཕྱིར་བསྒྲགས་བྱས་པ་ཡིན” ཞེས་བརྗོད་འདུག
ཡིག་ཆ་དེའི་ནང་། “འདས་པའི་ལོ་ངོ་བཅུ་ཕྲག་ཅིག་རིང་རྒྱ་ནག་གཞུང་གིས་བདེ་སྲུང་ཆེད་འགྲོ་གྲོན་ལྡབ་གསུམ་ཙམ་འཕར་སྣོན་བྱས་པ་མ་ཟད། རྒྱལ་སྤྱིའི་ཁྲིམས་ལུགས་རྩ་བརྒལ་བཏང་སྟེ་ཤར་རྒྱ་ནག་རྒྱ་མཚོའི་བདག་དབང་རྩོད་ལེན་གྱིས་རྒྱལ་སྤྱི་དང་ཨེ་ཤ་ཡ། ལྷག་པར་དུ་ཉི་ཧོང་ལ་དྲག་རྒོལ་མུ་མཐུད་བྱེད་བཞིན་ཡོད་སྟབས། དེའི་མཇུག་འབྲས་གང་ཡོང་རྒྱ་ནག་གཞུང་གིས་འཁུར་དགོས” ཞེས་དང་། “བྱང་ཀོ་རི་ཡས་རྡུལ་ཕྲན་མཚོན་ཆ་དང་དམག་རྒྱག་ལག་ཆ་མང་པོ་ཞིག་བཟོ་སྐྲུན་ཚོད་ལྟ་བྱས་ཏེ། ཉི་ཧོང་དང་ཨེ་ཤ་ཡའི་མངའ་ཁུལ་བདེ་འཇགས་ལ་དཀའ་ངལ་བཟོ་བཞིན་ཡོད་སྟབས། རྒྱལ་སྤྱིའི་བརྟན་ལྷིང་ཆེད་ཨ་རིའི་དམག་མི་ཞི་བདེ་རྒྱ་མཚོའི་ཐོག་གཏན་སྡོད་བྱ་རྒྱུ་གལ་ཆེན་པོ་ཆགས་ཡོད” ཅེས་སོགས་འཁོད་འདུག
༢༠༡༢ ལོའི་ཟླ་ ༩ ནང་ཉི་ཧོང་གཞུང་གིས་རྒྱ་ནག་དང་བདག་དབང་རྩོད་ལེན་བཞིན་པའི་ཤར་རྒྱ་ནག་རྒྱ་མཚོའི་མཚོ་ཁུལ་ཁག་ཅིག་བདག་བཟུང་བྱ་རྒྱུ་ཡིན་སྐོར་བསྒྲགས་རྗེས། རྒྱ་ནག་གིས་ཉི་ཧོང་གཞུང་ལ་སྡིགས་ར་ཐེངས་མང་བྱས་ཡོད་ཅིང་། ལྷག་པར་དུ་ཉི་ཧོང་དང་རྒྱ་ནག་གི་རྩོད་གཞི་ཅན་གྱི་སཱིན་ཁཱ་ཁཱའོ་མཚོ་གླིང་དུ་རྒྱ་ནག་གི་མཚོ་དམག་གྲུ་གཟིངས་བཏང་སྟེ། ༢༠༡༤ ལོའི་ཟླ་ ༥ ཚེས་ ༢ དང་ཚེས་ ༡༢། དེ་བཞིན་ཟླ་ ༦ དང་ ༧ བཅས་ནང་བཙན་འཛུལ་ཐེངས་གསུམ་ཙམ་བྱས་ཡོད་འདུག
༢༠༡༣ ལོའི་ཟླ་ ༡༡ པའི་ཚེས་ ༧ ཉིན་རྒྱ་གཞུང་གིས་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་བཟོས་ཏེ། ཨེ་ཤ་ཡའི་མངའ་ཁུལ་གྱི་ཁྱིམ་མཚེས་རྒྱལ་ཁབ་ཁག་ལ་གནོན་ཤུགས་སྤྲད་ཡོད་སྟབས། བྷུར་ནི་ (Brunei) དང་མ་ལི་ཤི་ཡ། ཝེ་ཋི་ནམ། ཧྥི་ལི་ཕིན། ཐེ་ཝན་བཅས་ཀྱིས་སྐྱོན་བརྗོད་དང་འབྲེལ་ཁ་གཏད་གཅོག་བཞིན་ཡོད།
ཆབ་སྲིད་དབྱེ་ཞིབ་པ་ཚོས། དེ་རིང་ཉི་ཧོང་གིས་རྒྱབ་ཤ་དཀར་པོ་ཞེས་པ་ཞིག་བཏོན་ཏེ་རྒྱ་ནག་དང་བྱང་ཀོ་རི་ཡར་སྡིགས་ར་སྐུལ་ཡོད་སྟབས། མ་འོངས་པར་ཤར་ལྷོ་རྒྱ་ནག་རྒྱ་མཚོ་དང་ཞི་བདེ་རྒྱ་མཚོའི་བདག་དབང་གནད་དོན་ཐད་ ཨེ་ཤ་ཡའི་མངའ་ཁུལ་ནང་དམག་འཁྲུག་གི་ཉེན་ཁ་ཆེན་པོ་ཆགས་ཡོད་སྐོར་བརྗོད་འདུག ཉི་ཧོང་གཞུང་གི་རྒྱབ་ཤ་དཀར་པོའི་ཡིག་ཆ་དེའི་སྐོར་ལ། ད་སྔ་རྒྱ་ནག་དང་བྱང་ཀོ་རི་ཡས་ལན་འདེབས་གང་ཡང་བྱས་མི་འདུག
གསར་འགོད་པ། དོན་གྲུབ།
རྒྱ་ནག་གི་སྟོབས་ཤུགས་ཆེ་ནས་ཆེ་རུ་འགྲོ་བཞིན་པའི་སྐབས་འདིར།
ཉི་ཧོང་གིས་ཀྱང་དགྱ་རོ་ཚང་གི་གནོན་ཤུགས་འོག་དཀའ་སྡུག་མྱོང་གི་ཡོད་རེད།
ཨེ་ཤ་ཡ་རྒྱལ་ཁབ་ཚོའི་ནང་དགྱ་རྒན་ཚང་ལ་ཁ་གཏད་གཅོག་པའི་ནུས་སྟོབས་ཡོད་མཁན་གཅིག་པོ་དེ་ཉི་ཧོང་ལས་གཞན་མེད།
ཉི་ཧོང་རྒྱལ་གྱུར་ཅིག
ཉི་ཧོང་རྒྱལ་འགྱུར་ཅིག་ཤིང་ཛོ་ཨ་བྷེ་ཡི་སྙིང་སྟོབས།