ཨ་རིར་དོཊ་ཡོད་ཉེས་ཅན་ ༡༥༠ ལྷག་ཡོད་ཟེར།

རྒྱ་ནག་གཞུང་གིས་ཨ་རིའི་ནང་དཔལ་འབྱོར་གྱི་དོགས་ཡོད་ཉེས་ཅན་ ༡༥༠ ལྷག་ཡོད་ཀྱང་བཀག་ཉར་འདྲི་གཅོད་བྱེད་པར་དཀའ་ངལ་འཕྲད་ཀྱི་ཡོད་སྐོར་བསྒྲགས་འདུག

ཟླ་འདིའི་ཕྱི་ཚེས་ ༡༡ ཉིན་རྒྱ་ནག་ཉིན་རེའི་ཚགས་པར་གྱི་དབྱིན་ཡིག་དྲ་བའི་ཐོག རྒྱ་ནག་ཉེན་རྟོག་ཁང་རྒྱལ་སྤྱིའི་མཉམ་འབྲེལ་སྡེ་ཚན་གྱི་འགན་འཛིན་ལོ་ཅིན་རོང་གིས། ཨ་རི་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་བྲོས་བྱོལ་དུ་འགྲོ་ས་གཙོ་བོ་ཞིག་ཏུ་གྱུར་ཡོད་པ་དང་། ད་ལྟའི་ཆར་ཨ་རིའི་ནང་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་ ༡༥༠ ལྷག་ཡོད་པའི་ཁྲོད། མང་ཆེ་བ་ལྐོག་ཟ་རུལ་སུངས་ཀྱི་དོགས་ཡོད་ཉེས་ཅན་ཡིན་ནའང་། ཨ་རི་དང་རྒྱ་ནག་བར་ཉེས་ཅན་རྩིས་སྤྲོད་ཀྱི་གྲོད་ཆོད་མེད་པའི་ཐོག གཞི་རྩའི་རྙོག་དྲ་འདྲ་མིན་བྱུང་བཞིན་ཡོད་སྟབས། ཨ་རིར་བྲོས་བྱོལ་དུ་ཕྱིན་པའི་དོགས་ཡོད་ཉེས་ཅན་ཚོ་ཕྱིར་ཁྲིད་དེ་འདྲི་གཅོད་བྱེད་པར་དཀའ་ངལ་མང་པོ་འཕྲད་ཀྱི་ཡོད་སྐོར་བརྗོད་འདུག

ཕྱི་ལོ་ ༡༩༩༨ ལོར་ཝ་ཤིང་ཊོན་དང་པེ་ཅིན་བར་བཅའ་ཁྲིམས་ལག་བསྟར་མཉམ་འབྲེལ་ལས་དོན་ཚོགས་ཆུང་གསར་འཛུགས་བྱས་པ་ནས་བཟུང་། ལས་དོན་ཚོགས་ཆུང་དེས་ལོ་ལྟར་ཨ་རྒྱ་བར་གྱི་འབྲེལ་ཡོད་གནད་དོན་ཆེ་ཁག་ཐོག་གྲོས་བསྡུར་བྱེད་ཀྱི་ཡོད་ཀྱང་། ཨ་རིའི་ཕྱོགས་ནས་གཙོ་བོ་དུག་རྫས་ལྐོག་ཚོང་དང་ཚོང་རྫས་རྫུན་བཟོ་སོགས་རྒྱལ་སྤྱིའི་བཅའ་ཁྲིམས་དང་འབྲེལ་བའི་ཉེས་དོན་རིགས་ལ་དོ་འཁུར་བྱེད་ཀྱི་ཡོད་པ་དང་། རྒྱ་ནག་གཞུང་གིས་རྒྱ་ནག་གི་དཔལ་འབྱོར་བྲོས་བྱོལ་བ་ཚོ་འཛིན་བཟུང་བྱ་རྒྱུ་དམིགས་འབེན་དུ་བཟུང་ཡོད་པ་མ་ཟད། འདི་ལོའི་ཕྱི་ཟླ་ ༧ ནང་རྒྱ་ནག་ཉེན་རྟོག་ཁང་གིས་༼༢༠༡༤ ཝ་བརྔོན་པ༽ཞེས་པའི་ཆེད་དམིགས་ལས་གཞིའི་འོག ཕྱི་རྒྱལ་ཁག་ཏུ་ཡོད་པའི་དཔལ་འབྱོར་དོགས་ཡོད་ཉེས་ཅན་ཚོ་རྩད་གཅོད་དང་ཞིབ་འཇུག་ནན་ཏན་བྱ་རྒྱུ་ཡིན་ལུགས་བརྗོད་ཡོད་འདུག

རྒྱ་ནག་གཞུང་ཕྱོགས་ནས་བརྗོད་པ་ལྟར་ན། དེ་སྔོན་རྒྱ་ནག་དངུལ་ཁང་ཀང་ཏུང་ཡན་ལག་དངུལ་ཁང་གི་འགན་འཛིན་ཟུར་པ་ཡཱས་ཀྲིན་ཏུང་གིས། རྒྱ་སྒོར་དུང་ཕྱུར་ ༤༠ བེད་སྤྱོད་ལོག་པར་བཏང་བ་དང་ལྐོག་ཟ་བྱས་ཏེ་ཨ་རིར་བྲོས་བྱོལ་དུ་ཕྱིན་ཡོད་ཀྱང་། ཕྱི་ལོ་ ༢༠༠༤ ཟླ་ ༤ ནང་ཨ་རི་གཞུང་གིས་ཁོ་བོ་རྒྱ་གཞུང་ལ་རྩིས་སྤྲོད་བྱས་ཏེ། ལོ་ ༡༢ བཙོན་འཇུག་ཁྲིམས་ཐག་བཅད་ཡོད་པ་དང་། དེ་ནི་འདས་པའི་ལོ་ངོ་ ༡༠ ནང་ཨ་རིས་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་རྩིས་སྤྲོད་བྱས་པ་ཐོག་མ་དེ་ཆགས་ཡོད་འདུག

ཉིག་ཡོག་ཏུ་ཡོད་པའི་ཁྲིམས་རྩོད་པ་ཡེ་ལིན་གྱིས། ཨ་རི་དམངས་གཙོའི་ཁྲིམས་མཐུན་རྒྱལ་ཁབ་ཅིག་ཡིན་པ་དང་། རྒྱ་ནག་ནི་འབྱོར་མེད་བྲལ་རིམ་དབང་ཆ་གཅིག་སྡུད་ཀྱི་རྒྱལ་ཁབ་ཅིག་ཡིན་སྟབས། རྒྱལ་ཁབ་དེ་གཉིས་བར་ཉེས་ཅན་རྩིས་སྤྲོད་ཀྱི་གྲོས་ཆོད་ལག་བསྟར་བྱེད་པར་དཀའ་ངལ་ཡོད་སྐོར་དང་། ཨ་རིའི་ཉེས་ཅན་རྩིས་སྤྲོད་ཀྱི་གྲོས་ཆོད་ལ་དབྱེ་བ་གཉིས་ཡོད་པའི་ནང་། ཆབ་སྲིད་ཉེས་ཅན་དང་མནར་གཅོད་ཐེབས་པའི་རིགས་རྩིས་སྤྲོད་བྱེད་མི་ཆོག་པས། གལ་སྲིད་རྒྱ་གཞུང་གིས་ཉེས་ཅན་རྩིས་སྤྲོད་ཀྱི་གནད་དོན་ཐག་གཅོད་བྱེད་འདོད་ན། ངེས་པར་དུ་འབྱོར་མེད་གྲལ་རིམ་དབང་ཆ་གཅིག་སྡུད་ཀྱི་ལམ་ལུགས་མེད་པར་བཟོ་དགོས་པ་མ་ཟད། ཆབ་སྲིད་ལམ་ལུགས་དང་བཅའ་ཁྲིམས་ཀྱི་སྒྲོམ་གཞིར་བསྒྱུར་བཅོས་བཏང་སྟེ། ནུབ་ཕྱོགས་ཀྱི་དམངས་གཙོའི་ལམ་ལུགས་ལག་བསྟར་བྱས་པ་ཡིན་ན། ཨ་རྒྱ་བར་ཉེས་ཅན་རྩིས་སྤྲོད་ཀྱི་གྲོས་ཆོད་འཇོག་ཐུབ་པ་མ་ཟད། ཁྲིམས་ལྟར་ལག་བསྟར་བྱེད་ཐུབ་རྒྱུ་ཡིན་སྐོར་བརྗོད་འདུག

རྒྱ་གཞུང་ལ་ཐེངས་མང་པོར་སྙན་ཞུ་སྤྲད་དེ་དཔོན་རིགས་ཚོའི་རྒྱུ་དངོས་ཡོངས་བསྒྲགས་དགོས་པའི་འབོད་སྐུལ་གནང་མཁན་དང་། རྒྱ་ནག་གི་འགྲོ་བ་མིའི་ཐོབ་ཐང་རྩོད་ལེན་པ་གྲགས་ཅན་ཧུའུ་ཅཱ་ཡིས། དཔོན་རིགས་ཚོའི་ཕྱི་ཕྱོགས་ཀྱི་རྒྱུ་དངོས་ཞིབ་བཤེར་བྱ་རྒྱུ་ཡིན་ན། དང་པོ་དཔོན་རིགས་ཚོའི་རྒྱུ་དངོས་ཡོངས་བསྒྲགས་དགོས་པའི་འབོད་སྐུལ་བྱས་ཏེ་བཙོན་དུ་བཅུག་པའི་བཙོན་པ་ཚོ་ཀློད་གྲོལ་གཏོང་དགོས། གཉིས་པ་ལྟ་སྐུལ་དང་ཞིབ་བཤེར་འོག དཔོན་རིགས་ཚོའི་རྒྱུ་དངོས་ཡོངས་བསྒྲགས་བྱེད་པར་འབོད་སྐུལ་ཞུ་རྒྱུ་དང་། གསུམ་པ་རྒྱ་ནག་གི་བཅའ་ཁྲིམས་སྒྲོམ་གཞི་དམངས་གཙོའི་ལམ་དུ་བསྒྱུར་བཅོས་བྱེད་དགོས་ལ། ཏང་ལ་ངོ་རྒོལ་དང་གསར་འགོད་རང་དབང་། སྤྱི་དམངས་བཅས་ནི་ལྐོག་ཟ་རུལ་སུངས་ལ་རྒོལ་བའི་སྟོབས་ཤུགས་ངོ་མ་དེ་ཡིན་སྐོར་བརྗོད་འདུག

རྒྱ་ནག་ཉེན་རྟོག་ཁང་གི་བསྡོམས་རྩིས་ལྟར་ན། ཕྱི་ལོ་ ༢༠༠༨ ནས་ད་ལྟའི་བར་འཛམ་གླིང་གི་རྒྱལ་ཁབ་དང་ཕྱིའི་ས་ཁུལ་ཁག་ ༥༤ ནས་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་ ༧༣༠ ཕྱིར་ལོག་བཏང་ཡོད་པ་དང་། འདས་པའི་ལོ་ལྔའི་ནང་དངུལ་དངོས་ཕྱི་རྒྱལ་དུ་བཅོལ་འཇོག་བྱེད་མཁན་གྱི་དཔོན་རིགས་དང་དཔོན་རིགས་ཀྱི་ཁྱིམ་མི་ཁྱོན་བསྡོམས་ཁྲི་ ༡༠༠ ལྷག་ཡོད་འདུག

གསར་འགོད་པ། པདྨ་མཚོ།