གྲོས་ཚོགས་ཚོགས་དུས་བརྒྱད་པའི་སྟེང་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་དང་ཆེས་མཐོའི་ཁྲིམས་ཞིབ་ཁང་དང་ཚོགས་དྲུང་ལས་ཁུངས་ཀྱི་ལས་བྱེད་བསྐོ་ཕྱོགས་ཀྱི་གནད་དོན་སོགས་ལ་བགྲོ་གླེང་ཡོང་གི་རེད་ཟེར།
ལོ་ལྟར་ཕྱི་ཟླ་དགུ་བ་དང་གསུམ་པ་སོ་སོར་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་གཏན་འབེབས་དང་ལས་བསྡོམས་བསྐྱར་ཞིབ་ཀྱི་གྲོས་ཚོགས་ཚོགས་སྲོལ་ཡོད་པ་ལྟར། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བརྒྱད་པ་ག་དུས་མགོ་འཛུགས་གནང་གི་ཡོད་མེད་ཐད། དེ་རིང་གསར་འགོད་པ་སྤྱི་འཐུས་ཚོགས་དྲུང་སྟོབས་རྒྱལ་ལགས་སུ་བཅར་འདྲི་ཞུས་པར། ཁོང་གིས་གྲོས་ཚོགས་ཚོགས་དུས་ ༨ པ་དེ་ཕྱི་ཟླ་ ༩ ཚེས་ ༡༢ ནས་ ༢༤ བར་གངས་སྐྱིད་སྤྱི་འཐུས་ཚོགས་ཁང་དུ་གཟའ་ཉི་མ་ཕུད་ཉིན་ ༡༡ རིང་ཚོགས་རྒྱུ་ཡིན་སྐོར་དང་། མཚམས་རེར་ཉིན་ཕྱེད་རིང་སྤྱི་འཐུས་ནང་ཁུལ་གྱི་ཚོགས་འདུ་ཡང་ཚོགས་རྒྱུ་ཡིན་སྐོར་བརྗོད་བྱུང་།
ཐེངས་འདིའི་གྲོས་ཚོགས་ནང་ལས་རིམ་གཙོ་བོ་གང་དག་ཡོད་མེད་དྲིས་པར། ད་རེབ་གཙོ་བོ་བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་གྱི་ཁྱབ་ཁོངས་སུ་ལས་ཁུངས་ཁག་མང་པོ་ཞིག་ཡོད་པ་རེད། ༢༠༡༣ དང་ ༢༠༡༤ ལོའི་ལས་བསྡོམས་རྒྱས་པར་སྤྱི་འཐུས་རྒྱུན་ལས་ཀྱིས་ཞིབ་འཇུག་གནང་བ་གྲོས་ཚོགས་ནང་བསླེབས་ནས་དྲི་བ་དྲི་ལན་གྱིས་བགྲོ་གླེང་ཤུགས་ཆེན་པོ་གནང་གི་རེད། གཞན། ལས་རིམ་གལ་ཆེ་ཤོས་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲ་ཚོགས་ཆུང་སྐབས་ལྔ་པའི་སྤྱི་ཁྱབ་རྩིས་ཞིབ་ལས་ཁུངས་ཀྱིས་ ༢༠༡༠ དང་ ༢༠༡༡ ལོ་ལ་སོགས་པའི་སྙན་ཐོ་ལ་ཞིབ་འཇུག་གནང་བའི་མཐའ་བསྡོམས་འབྲུ་དོན་སྙིང་པོ་དེ་གྲོས་ཚོགས་ཚོགས་དུས་ ༦ པར་སྙན་སྒྲོན་ཞུས་ཚར་བ་རེད། དེ་ཕྱག་ལེན་བསྟར་ཤོག་ཟེར་དུས། བཀའ་ཤག་གིས་མཇུག་སྐྱོང་ག་ཚོད་གནང་མིན་ལ་བཀའ་ལན་ཞིག་གནང་ཡོད་པ་རེད། བཀའ་ཤག་གིས་མཇུག་སྐྱོང་ག་ཚོད་གནང་ཡོད་མེད་ལ་སྤྱི་འཐུས་རྒྱུན་ལས་ཀྱིས་ཀྱང་ཞིབ་འཇུག་དང་མཇུག་སྐྱོང་ཞིབ་ཚགས་གནང་བའི་གྲོས་ཆོད་ཅིག་ཚོགས་དུས་སྔོན་མའི་ནང་བཞག་པ་རེད། དེར་བརྟེན། ད་རེབ་སྤྱི་འཐུས་རྒྱུན་ལས་ཀྱིས་བཀའ་ཤག་གིས་མཇུག་སྐྱོང་གནང་བར་ལྷག་མ་ག་ཚོད་ཡོད་མེད་ལས་ཁུངས་ཡོངས་རྫོགས་ལ་འབྲེལ་བ་བྱས་ཏེ་མཇུག་སྐྱོང་ཞིབ་ཚགས་གནང་ཡོད་པ་རེད། གནད་དོན་འདི་ཚང་མ་གྲོས་ཚོགས་ནང་ལས་བསྡོམས་སྙན་སྒྲོན་གྱི་ངོ་བོར་བཞག་སྟེ་སྙན་འབུལ་དང་བགྲོ་གླེང་གནང་གི་རེད། དེ་ཡང་ལས་དོན་གལ་ཆེན་པོ་དང་རྒྱ་ཆེན་པོ་ཆགས་ཡོད་པ་རེད། ཅེས་བརྗོད་བྱུང་།
སྟོབས་རྒྱལ་ལགས་སུ་ད་རེབ་གཞུང་སྒེར་གྱི་གྲོས་ཆོད་གྲོས་འཆར་གལ་ཆེན་གང་དག་ཡོང་གི་ཡོད་མེད་དྲིས་པར་ཁོང་གིས། སྦྱིར་བཏང་གཞུང་འབྲེལ་གྲོས་ཆོད་གྲོས་འཆར་ཁག་གཅིག་གཉིས་ཤིག་དང་། སྤྱི་འཐུས་སྒེར་གྱི་གྲོས་ཆོད་གྲོས་འཆར་ཡང་བསླེབ་རྒྱུ་ཡིན་སྐོར། དཔེར་ན། ད་ལྟའི་ཆར་སྤྱི་འཐུས་རྒྱུན་ལས་གྱི་གྲོས་ཆོད་གྲོས་འཆར་ནང་གཏན་འབེབས་བྱས་པའི་ཤེས་ཡོན་སྲིད་བྱུས་སྐོར་ལ་གྲོས་ཆོད་གྲོས་འཆར་ཡོང་གི་རེད། དེ་མཚུངས་ཆེས་མཐོ་ཁྲིམས་ཞིབ་ཁང་དང་ཚོགས་དྲུང་ལས་ཁུངས་གཉིས་ཀྱི་ལས་བྱེད་ནང་རིགས་གཉིས་དབྱེ་ཡོད་པའི་ནང་ཆེས་མཐོ་ཁྲིམས་ཞིབ་ཁང་དང་ཚོགས་དྲུང་ལས་ཁུངས་ཀྱིས་ཐད་བསྐོས་བྱེད་པའི་ལམ་ལུགས་དེ་འདྲ་ཡོད་པ་རེད། དེ་འདྲའི་ཐོག་ཏོག་ཙམ་བདེ་དང་མ་བདེ་བའི་གནས་ཚུལ་མང་པོ་དང་། ལས་བྱེད་ཕར་ཚུར་གནས་སྤོར་གཏོང་བ་དང་ཐོབ་ཐང་། འགྲོ་ལུགས་འགྲོ་སྟངས་གནད་འགག་མང་པོ་ཞིག་ཡོད་པའི་གྲོས་གཞི་གྲོས་ཆོད་ཁག་ཅིག་འདུག སྐབས་རེར་དགོས་མཁོའི་དབང་གིས་གྲོས་གཞི་གྲོས་ཆོད་འདྲ་ཡོང་གི་རེད། བཅའ་ཁྲིམས་དང་སྒྲིག་གཞི་ཁག་ལ་བསྐྱར་བཅོས་ཀྱང་རེ་ཟུང་ཡོད་པ་རེད། ཅེས་བརྗོད་བྱུང་།
གསར་འགོད་པས་ད་རེབ་མང་ཚོགས་རྩིས་ཁྲ་ཚོགས་ཆུང་གི་ལས་བསྡོམས་ནང་རྩིས་ཉོག་ག་ཚོད་ཅིག་གཙང་མ་བཟོ་ཐུབ་ཡོད་མེད་དྲིས་པར་ཁོང་གིས། བརྒྱ་ཆར་བཀུག་ན་མང་ཤོས་གཙང་མ་ཆགས་ཚར་བ་རེད། ཡིན་ནའང་ད་དུང་གཙང་མ་བཟོ་མ་ཐུབ་པ་ཉུང་ཤས་ཤིག་ཡོད་པ་རེད། རྒྱུ་མཚན་གང་ཡིན་ཟེར་ན། ཁ་ཤས་ལམ་སེང་ཐག་གཅོད་བྱེད་ཐུབ་ཀྱི་མེད་པ་དང་མི་ཁ་ཤས་གང་དུ་ཡོད་མེད་རྙེད་ཐུབ་ཀྱི་མེད་པ། གཙང་མ་བཟོ་མ་ཐུབ་པའི་རིགས་མུ་མཐུད་མཇུག་སྐྱོང་ཇི་ལྟར་བྱེད་ཀྱི་ཡོད་མེད་སོགས་སྙན་ཐོའི་ནང་གསལ་ཡོང་གི་རེད། ཅེས་བརྗོད་བྱུང་།
གསར་འགོད་པས་ད་ལོར་བོད་གཞུང་མང་རྒྱལ་ཡོངས་ཚོགས་ཆེན་ཚོགས་འཆར་ཡོད་མེད་དྲིས་པར་ཁོང་གིས། ད་སྔ་དེ་འདྲ་ཚོགས་པའི་དགོངས་འཆར་གང་ཡང་མེད། གྲོས་ཚོགས་ཚོགས་དུས་བདུན་པའི་སྐབས་བཀའ་མོལ་གནང་བ་རང་འཇགས་འདྲ་བོ་མ་གཏོགས་དམིགས་བསལ་དོན་གནད་དེ་འདྲ་མེད་སྟབས། ལོ་གཉིས་རེའི་ནང་དམིགས་བསལ་ཚོགས་ཆེན་འཚོགས་མི་དགོས་པར་དགོས་གལ་ལ་ཐུག་ན་འཚོགས་རྒྱུའི་གྲོས་ཆོད་བཞག་ཡོད་པ་རེད། རྗེས་མ་བོད་གཞུང་མང་རྒྱལ་ཡོངས་ཚོགས་ཆེན་ཟེར་བའི་ཚོགས་འདུ་མིང་བརྗེ་བོ་རྒྱག་སྲིད་པ་རེད། ང་ཚོའི་བཅའ་ཁྲིམས་དང་སྒྲིག་གཞི་ཁག་ནང་བོད་གཞུང་ཞེས་པའི་ཐ་སྙད་ལ་བཅོས་བསྒྱུར་གཏོང་གི་ཡོད་པ་རེད། ཅེས་བརྗོད་བྱུང་།
གསར་འགོད་པ། ལྷ་སྐྱབས་རྒྱལ།
ད་ཐེངས་གཞུང་འབྲེལ་གྲོས་འཆར་ནང་། ཤེས་ཡོན་སྲིད་བྱུས་སྐོར་ཡོང་གི་ཡོད་འདུག
དེར་བརྟེན། གྲོས་ཚོགས་མ་ཚུགས་གོང་མི་མང་ཚོས་འདིའི་སྐོར་ལ་བསམ་འཆར་ཏོག་ཙམ་ཕུལ་ཐུབ་ན་ཡག་པོ་འདུག
སྐུ་ངོ་སྟོབས་རྒྱལ་མཆོག་གིས་(ཆེས་མཐོ་ཁྲིམས་ཞིབ་ཁང་དང་ཚོགས་དྲུང་ལས་ཁུངས་གཉིས་ཀྱི་ལས་བྱེད་ནང་རིགས་གཉིས་དབྱེ་ཡོད་པའི་ནང་ཆེས་མཐོ་ཁྲིམས་ཞིབ་ཁང་དང་ཚོགས་དྲུང་ལས་ཁུངས་ཀྱིས་ཐད་བསྐོས་བྱེད་པའི་ལམ་ལུགས་དེ་འདྲ་ཡོད་པ་རེད། དེ་འདྲའི་ཐོག་ཏོག་ཙམ་བདེ་དང་མ་བདེ་བའི་གནས་ཚུལ་མང་པོ་འདུག ) གསུངས་སྟངས་ལ་བལྟས་ན། ད་རེས་སྤྱི་འཐུས་གྲོས་ཚོགས་ཧ་ཅང་འཁྲུག་པོ་ཡོང་ས་རེད་
བོད་ཀྱི་གྲོས་ཚོགས་དྲུང་ཡིག་ཆེན་མོ་ཁོང་གི་ལས་ཁུངས་དང་སྐུ་བརྗིད་ཉམས་དོོད་པོ་འདུག་པས་གཞན་ལ་སྟོན་ཆོག་པའི་པར་ཞིག་རེད་འདུག་འདི་ལ་ཧ་ཅང་དགའ་སོང་།
གཞན་གྲོས་ཚོགས་ཚོགས་ཐེངས་རེ་ལ་གངས་སྐྱིད་ནང་ཁུལ་གྱི་ལས་དོན་ཙག་ཙིག་ཁག་རྩ་ཆེན་དང་གལ་ཆེན་དུ་བརྩིས་ནས་དུས་ཚོད་མང་པོ་གཏོང་བ་ལས་རྩ་བའི་རྩ་དོན་བོད་རྒྱའི་གནད་དོན་ཐད་དང་། གཞིས་བཞུགས་རྒྱ་ཆེའི་མི་མང་གི་མགྲིན་ཚབ་པ་དངོས་མ་ཞིག་ཆགས་པའི་ཆེད་དུ་གྲོས་ཆོད་གང་བཞག་ཐད་ཅི་བྱས་ཀྱི་ལས་བསྡོམས་དང་། མ་འོངས་པར་ཅི་བྱ་ཅི་འགབ་ཀྱི་གྲོས་གཞི་དག་ཟུར་དུ་ཡོད་པ་ནི་ཕྱག་ལས་ཕྲ་ལ་ཕྲན་བུ་གནང་གིན་ཡོད་མེད་ལ་མ་ལྟོས་པར་མཐོང་སྣང་ལའང་ཉམས་དམའ་བོ་ཞིག་འདུག