དེ་རིང་བོད་ནང་གི་སྔ་དྲོའི་ཆུ་ཚོད་ ༨ ཙམ་ལ། ལྷ་སའི་འབྲས་སྤུངས་གོས་སྐུ་ཆེན་མོ་བཤམ་སྟོན་གྱིས་ཞོ་སྟོན་མགོ་འཛུགས་གནང་བ་དང་བསྟུན། རྒྱ་གཞུང་གིས་དམག་མི་མང་པོ་འགྲེམས་འཇོག་གིས་དམ་དྲག་ཆེན་པོ་བཞིན་ཡོད་འདུག
ཟླ་འདིའི་ཕྱི་ཚེས་ ༢༥ ནས་འཆར་ཟླའི་ཕྱི་ཚེས་ ༢ བར་དུ། བོད་ཀྱི་རྒྱལ་ས་ལྷ་སར་སྲོལ་རྒྱུན་གྱི་དབྱར་སྐྱིད་ཆེན་མོ་ཞོ་སྟོན་མགོ་འཛུགས་བྱས་ཡོད་སྟབས། རྒྱ་གཞུང་གིས་གདན་ས་གསུམ་གྱི་གཙོས་གྲོང་ཁྱེར་ཡོངས་ལ་རྟོག་ཞིབ་ཤུགས་ཆེན་བྱེད་ཀྱི་ཡོད་པ་མ་ཟད། དྲག་ཆས་ཉེན་རྟོག་པ་དང་དམག་མི་མང་པོ་འགྲེམས་འཇོག་གིས་མཇལ་སྐོར་བ་དང་ལྟད་མོ་བ་ཚོར་དམ་དྲག་བྱས་ཏེ་འཇིགས་རྔམ་ཆེན་པོ་སྟོན་བཞིན་ཡོད་འདུག
ཟླ་འདིའི་ཕྱི་ཚེས་ ༢༣ ཉིན། བོད་རང་སྐྱོང་ལྗོངས་འགྲིམ་འགྲུལ་ཉེན་རྟོག་ཁང་གི་ཁྲིམས་ལུགས་དྲིལ་བསྒྲགས་ཚན་པའི་མགོ་ཁྲིད་གཞོན་པ་ཀྲང་ཞའོ་ནན་ཟེར་བ་དེས། ཞོ་སྟོན་རིང་བོད་རང་སྐྱོང་ལྗོངས་ཉེན་རྟོག་འགྲིམ་འགྲུལ་དོ་དམ་སྡེ་ཚན་པས། ཉེན་རྟོག་པ་འགྲེམས་འཇོག་ཤུགས་ཆེ་རུ་གཏོང་རྒྱུ་ཡིན་པ་མ་ཟད། མཚན་མོར་ཞིབ་བཤེར་དང་གཞུང་ལམ་དོ་དམ། ཆད་པ་གཅོད་རྒྱུ་བཅས་ལ་སྔར་ལས་ཤུགས་སྣོན་རྒྱག་རྒྱུ་ཡིན་སྐོར་བསྒྲགས་ཡོད་འདུག
ད་ལོའི་ཞོ་སྟོན་དེ་༼མཛེས་སྡུག་ལྡན་པའི་ཁྱིམ་གཞིས། བདེ་སྐྱིད་ལྡན་པའི་ལྷ་ས༽ཞེས་པའི་བརྗོད་བྱ་གཙོ་བོར་བཟུང་སྟེ། ཨ་ཅེ་ལྷ་མོ་དང་ལྷ་མོའི་རྣམ་ཐར་སོགས་འཁྲབ་སྟོན། དེ་བཞིན་ཐང་ཀའི་སྒྱུ་རྩལ་དང་ཇོ་མོ་གླང་མའི་པར་རིས་འགྲེམས་སྟོན་འགྲན་བསྡུར་སོགས་བྱེད་སྒོ་རིགས་ ༡༣ ཙམ་བཀོད་སྒྲིག་བྱས་ཡོད་འདུག
གསར་འགོད་པ། པདྨ་མཚོ།
