ཡུ་གུར་བ་ ༨ ལ་སྲོག་ཁྲིམས་བཅད།

རྒྱ་གཞུང་གིས་ཡུ་གུར་བ་ ༨ ལ་སྲོག་ཁྲིམས་གཅོད་རྒྱུ་ཐག་གཅོད་བྱས་པར་འཛམ་གླིང་ཡུ་གུར་མི་རིགས་མཐུན་ཚོགས་ཀྱིས་སྐྱོན་བརྗོད་བསྒྲགས་གཏམ་སྤེལ་འདུག

ཟླ་འདིའི་ཕྱི་ཚེས་ ༢༣ ཉིན་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་འབྲིང་རིམ་མི་མང་ཁྲིམས་ ༤ མཉམ་འབྲེལ་ཐོག འཇིགས་སྐུལ་དྲག་སྤྱོད་ཀྱི་ཉེས་དོན་ ༥ དང་འབྲེལ་བ་ཡོད་པའི་ཉེས་མིང་འོག་ཡུ་གུར་བ་ ༨ ལ་སྲོག་ཁྲིམས་གཅོད་རྒྱུ་ཐག་གཅོད་བྱས་ཡོད་པ་མ་ཟད། འཕྲལ་དུ་སྲོག་ཁྲིམས་ལག་བསྟར་བྱ་རྒྱུ་ཡིན་སྐོར་ཀྲུང་དབྱང་བརྙན་འཕྲིན་ཁང་སོགས་ནས་ཕྱིར་བསྒྲགས་བྱས་ཡོད་སྟབས། ཟླ་འདིའི་ཕྱི་ཚེས་ ༢༥ ཉིན་འཇར་མན་དུ་ཡོད་པའི་འཛམ་གླིང་ཡུ་གུར་མི་རིགས་མཐུན་ཚོགས་ཀྱིས་དབྱིན་ཡིག་དང་འཇར་མན་གྱི་ཡི་གེའི་ཐོག་བསྒྲགས་གཏམ་སྤེལ་ཏེ། རྒྱ་གཞུང་གི་ཁྲིམས་འཛིན་ལམ་ལུགས་ལ་སྐྱོན་བརྗོད་དང་། རྒྱལ་སྤྱིའི་སྤྱི་ཚོགས་ནས་རྒྱ་གཞུང་གིས་ཡུ་གུར་བ་ཚོའི་ཐོག་གདུག་རྩུབ་ཆེ་བའི་དྲག་གནོན་གྱི་བྱ་སྤྱོད་སྤེལ་བཞིན་པར་དོ་ཁུར་གནང་དགོས་པའི་འབོད་སྐུལ་བྱས་འདུག

ཡུ་གུར་མཐུན་ཚོགས་ཀྱི་མགྲིན་ཚབ་པ་ཌི་ལི་ཞཱ་ལགས་ཀྱིས་གསར་འགོད་པར་གོང་གི་གནད་དོན་ཐད་བརྗོད་དོན། ས་གནས་ནས་ང་ཚོར་གནས་ཚུལ་ཁུངས་ལྡན་འབྱོར་བ་ལྟར་ན། སྲོག་ཁྲིམས་བཅད་པའི་ཡུ་གུར་བ་ ༨ དེར་ཁྲིམས་བཤེར་བྱེད་སྐབས། ཁྲིམས་རྩོད་པ་རང་ཉིད་ཀྱིས་འཚོལ་བའི་དབང་ཆ་མ་སྤྲད་པར་གཞུང་གིས་བཀོད་སྒྲིག་བྱས་པ་མ་ཟད། ཁྲིམས་རྩོད་པ་དེ་ཚོས་སྲིད་གཞུང་གིས་སྤྲད་པའི་ཆབ་སྲིད་ཀྱི་ལས་འགན་ལེགས་པར་འགྲུབ་ཆེད། ཉེས་ཅན་ལ་གཞུང་གི་ཐག་གཅོད་དང་ལེན་བྱེད་པར་སྐུལ་འདེད་དང་། ཐ་ན་གནད་དོན་སློང་རྐྱེན་རིགས་ལ་གཡོལ་ཐབས་བྱས་པ་སོགས་ཉེས་ཅན་གྱི་ཐོབ་ཐང་དང་ཁེ་དབང་ལ་རྩ་བ་ནས་སྲུང་སྐྱོབ་དང་འགན་བླངས་མེད་སྟབས། ཁོང་ཚོའི་ཁྲིམས་ཆད་ལ་གཏན་ནས་དྲང་བདེན་བྱུང་མེད་སྐོར་བརྗོད་འདུག

འཛམ་གླིང་ཡུ་གུར་མི་རིགས་མཐུན་ཚོགས་ཀྱིས་ཤེས་རྟོགས་བྱུང་བའི་བསྡོམས་རྩིས་ལྟར་ན། ཕྱི་ལོ་ ༢༠༡༣ ཟླ་ ༤ པ་ནས་ད་ལྟའི་བར་རྒྱ་གཞུང་གིས་ཡུ་གུར་བ་ཁྱོན་ ༧༣༥ འཛིན་བཟུང་འདྲི་གཅོད་བྱས་ཡོད་པ་མ་ཟད། རྡུག་རྡེག་མནར་གཅོད་འོག་མི་ ༡༤༠ ལྷག་གིས་ཚེ་སྲོག་ཤོར་ཡོད་པ་དང་། ད་ལོའི་ཕྱི་ཟླ་ ༦ པ་ནས་ད་ལྟའི་བར་མི་ ༢༥ ཙམ་ལ་སྲོག་ཁྲིམས་བཅད་ཡོད་འདུག

གསར་འགོད་པ། པདྨ་མཚོ།