ཨོ་སི་ཀྲོ་ལི་ཡའི་སྲིད་བློན་རྒྱ་གར་ནང་སྐོར་སྐྱོད།

དེ་རིང་དང་སང་ཉིན་བཅས་ལ་ཨོ་སི་ཀྲོ་ལི་ཡའི་སྲིད་བློན་རྒྱ་གར་ནང་སྐོར་སྐྱོད་བྱས་ཏེ་རྒྱ་གར་གཞུང་དང་རྡུལ་ཕྲན་གློག་ཤུགས་ཀྱི་མཉམ་ལས་སྐོར་ལ་གྲོས་མཐུན་མིང་རྟགས་འགོད་རྒྱུ་ཡིན་འདུག

དེ་རིང་དང་སང་ཉིན་གཉིས་རིང་ཨོ་སི་ཀྲོ་ལི་ཡའི་སྲིད་བློན་ཀྲོ་ནི་ཨ་བྷོ་ཌེ་ (Tony Abbott) དང་ཚོང་དོན་བློན་ཆེན་ཨན་ཌེའུ་རོབ་ (Andrew Robb)རྣམ་གཉིས་ཀྱི་སྣེ་ཁྲིད་འོག་ཚོང་དོན་ལྷན་ཚོགས་ཤིག་རྒྱ་གར་ནང་སྐོར་སྐྱོད་བྱེད་བཞིན་ཡོད་ཅིང་། དེ་རིང་རྒྱ་གར་མོམ་བྷེ་ (Mumbai) ནང་བསྐྱོད་དེ་བཟོ་གྲྭ་དང་ཁེ་ལས་ཁག་ལ་ལྟ་སྐོར་དང་། ཉེ་ལམ་ཨོ་སི་ཀྲོ་ལི་ཡ་གཞུང་གིས་གསར་འཛུགས་བྱས་པའི་ (New Colombo Plan) ཞེས་པའི་ལས་འཆར་དབུ་འབྱེད་སོགས་བྱས་ཡོད་འདུག

སང་ཉིན་རྒྱ་གར་རྒྱལ་ས་ལྡི་ལི་གསར་པར་སྲིད་བློན་ནཱ་རན་ཌ་མུ་དྷེ་དང་སྲིད་འཛིན་པར་ནཱབ་མུ་ཁར་ཇི་ (Pranab Mukherjee)དང་སྲིད་འཛིན་གཞོན་པ་ཨན་སཱ་རི་ (Hamid Ansari)སོགས་ལ་ཐུག་འཕྲད་ཀྱིས་རྒྱལ་ཁབ་གཉིས་བར་ཞི་བའི་ལས་དོན་ཆེད་དུ་མཁོ་བའི་རྡུལ་ཕྲན་གློག་ཤུགས་ཀྱི་མཉམ་ལས་གྲོས་མཐུན་ (Civil nuclear co-operation agreement)ཞེས་པ་ཞིག་ལ་མིང་རྟགས་འགོད་རྒྱུ་ཡིན་པ་དང་། གཞན། ཨོ་སི་ཀྲོ་ལི་ཡས་རྒྱ་གར་ལ་ཡུ་རེ་ནི་ཡམ་ (uranium) ཕྱིར་ཚོང་། ཤེས་ཡོན། རིག་གཞུང་བརྗེ་ལེན། བཟོ་གྲྭ་གསར་འཛུགས། དམག་དོན་བཅས་ཀྱི་མཉམ་ལས་ཁག་ལ་གྲོས་མཐུན་འཇོག་རྒྱུ་ཡིན་འདུག

ཨོ་སི་ཀྲོ་ལི་ཡའི་སྲིད་བློན་ཀྲོ་ནི་ཨ་བྷོ་ཌེ་ཡིས། “ཨོ་སི་ཀྲོ་ལི་ཡས་ཨུ་རུ་སུར་ཡུ་རེ་ནི་ཡམ་ཕྱིར་ཚོང་གི་ལས་འཆར་ཡོད་པ་ལྟར། དམངས་གཙོའི་ལམ་ལུགས་ཐོག་ཤར་སྐྱོད་བྱེད་བཞིན་པའི་རྒྱ་གར་ལའང་ཡུ་རེ་ནི་ཡམ་བཙོང་རྒྱུ་གལ་ཆེན་པོ་ཆགས་ཡོད་སྟབས། ད་རེབ་སྐོར་སྐྱོད་འདི་བརྒྱུད་རྒྱ་གར་དང་མཉམ་དུ་རྡུལ་ཕྲན་གློག་ཤུགས་ཀྱི་མཉམ་ལས་གྲོས་མཐུན་ལ་མིང་རྟགས་འགོད་རྒྱུ་ཡིན” ཞེས་བརྗོད་འདུག

རྒྱ་གར་ཕྱི་སྲིད་ལྷན་ཁང་གི་ཟུང་དྲུང་སན་ཇེ་ (Sanjay Bhattacharya)ཡིས། “རྒྱ་གར་དང་ཨོ་སི་ཀྲོ་ལི་ཡའི་བར་རྡུལ་ཕྲན་གློག་ཤུགས་མཉམ་ལས་ཐོག་གྲོས་མོལ་ཐེངས་ ༥ ཙམ་བྱས་པ་བརྒྱུད། ད་ཐེངས་ཨོ་སི་ཌོ་ལི་ཡ་གཞུང་གིས་རྒྱ་གར་ལ་ཡུ་རེ་ནི་ཡམ་ཕྱིར་ཚོང་བྱ་རྒྱུའི་ཐག་གཅོད་བྱས་ཡོད་སྟབས། སང་ཉིན་དབུ་ཁྲིད་རྣམ་གཉིས་ཀྱིས་གནད་དོན་དེའི་ཐད་མཉམ་ལས་བྱ་རྒྱུའི་གྲོས་ཆོད་འཇོག་རྒྱུ་རེད། དེ་ནི་གཉིས་ཕན་མཉམ་རྒྱལ་གྱི་གྲོས་ཆོད་ཅིག་ཆགས་ཡོད” ཅེས་བརྗོད་འདུག

ཨོ་སི་ཀྲོ་ལི་ཡ་ནི་རྒྱལ་སྤྱིའི་ཐོག་ཡུ་རེ་ནི་ཡམ་གྱི་ཐོན་ཁུངས་བརྒྱ་ཆ་ ༤༠ ལྷག་གི་ཐོན་ཁུངས་དང་ཕྱིར་ཚོང་བྱེད་མཁན་མང་ཤོས་ཀྱི་གྲས་ཤིག་ཆགས་ཡོད་ཅིང་། ༢༠༡༡ ནས་ ༢༠༡༢ ལོ་བར་ཨོ་སི་ཀྲོ་ལི་ཡས་ཨ་སྒོར་ས་ཡ་ ༧༨༢ ལྷག་གི་མ་གནས་ཡུ་རེ་ནི་ཡམ་ཌོན་ (tonne) ༧༥༢༩ ཙམ་སྔོག་འདོན་བྱས་ཡོད་འདུག

ད་ལྟ་རྒྱ་གར་གྱིས་རྡུལ་ཕྲན་ལྡོག་འགྱུར་ཡོ་ཆས་ (Nuclear reactors) ༢༠ ཙམ་བཀོལ་སྤྱོད་བྱས་ཏེ། རྒྱ་གར་གྱི་གྲོང་ཁྱེར་དང་གྲོང་གསེབ་ཁག་ལ་གློག་ཤུགས་ཀྱི་ཚད་རིམ་ ༤༧༨༠ (Mw)ཙམ་བརྒྱུད་གཏོང་བྱེད་བཞིན་ཡོད་འདུག

རྒྱ་གར་གྱིས་ ༢༠༣༢ ལོའི་ནང་ཚུད་དུ་ཨ་སྒོར་ཐེར་འབུམ་ ༨༥ ཡིས་འགྲོ་གྲོན་བཏང་སྟེ་ཨོ་སི་ཀྲོ་ལི་ཡ་དང་མཉམ་འབྲེལ་བྱས་ཏེ་རྡུལ་ཕྲན་ལྡོག་འགྱུར་ཡོ་ཆས་ ༣༠ ཙམ་གསར་འཛུགས་བྱས་པ་བརྒྱུད་རྒྱ་གར་ནང་གློག་ཤུགས་ཀྱི་ཚད་རིམ་ ༦༣༠༠༠ (Mw) ལ་འཕེལ་རྒྱས་གཏོང་ཐབས་བྱེད་འཆར་ཡོད་འདུག

༢༠༠༡ དང་ ༢༠༠༦ ལོ་སོ་སོར་ཨོ་སི་ཀྲོ་ལི་ཡའི་སྲིད་བློན་ཇོན་ཧོ་ཝར་ཌི་ (John Howard)རྒྱ་གར་ནང་ཕེབས་ཏེ། ཚོང་དོན་དང་དམག་དོན་ཐད་གྲོས་ཆོད་མང་པོ་བཞག་ཡོད་པ་དང་། ༢༠༠༩ ལོར་ཨོ་སི་ཀྲོ་ལི་ཡའི་སྲིད་བློན་ཁེ་ཝུན་ (Kevin Rudd)རྒྱ་གར་ནང་ཕེབས་ཏེ་རྡུལ་ཕྲན་གློག་ཤུགས་གཙོས་ཚོང་དོན་གྲོས་མཐུན་ཁག་ཅིག་ལ་མིང་རྟགས་བཀོད་ཡོད་འདུག

རྒྱ་གར་དང་ཨོ་སི་ཀྲོ་ལི་ཡའི་བར། ༢༠༠༨ ནས་ ༢༠༠༩ ལོར་ཨ་སྒོར་ས་ཡ་ ༡༢༥༣༧།༣༩ ཙམ་གྱི་ཚོང་འབྲེལ་དང་།

༢༠༠༩ ནས་ ༢༠༡༠ ལོ་བར་ཨ་སྒོར་ས་ཡ་ ༡༣༧༩༢།༣༣།

༢༠༡༠ ནས་༢༠༡༡ ལོ་བར་ཨ་སྒོར་ས་ཡ་༡༢༥༠༦།༠༣།

༢༠༡༡ ནས་ ༢༠༡༢ ལོ་བར་ཨ་སྒོར་ས་ཡ་ ༣༩༦༡།༩༨།

༢༠༡༢ ནས་ ༢༠༡༣ ལོ་བར་ཨ་སྒོར་ས་ཡ་ ༢༨༦༡།༧༤ བཅས་ཀྱི་ཚོང་འབྲེལ་བྱས་ཡོད་འདུག

༢༠༠༩ ལོར་ཨོ་སི་ཀྲོ་ལི་ཡར་སློབ་སྦྱོང་བྱེད་བཞིན་པའི་རྒྱ་གར་གྱི་སློབ་མ་ཁག་ཅིག་དང་ཡུལ་མིའི་བར་འཁྲུག་འཛིང་གིས་རྒྱ་གར་གྱི་སློབ་མ་ཞིག་བསད་པ་སོགས་ལ་བརྟེན་ཏེ་རྒྱལ་ཁབ་གཉིས་ཀྱི་འབྲེལ་ལམ་ཐོག་ཕྲན་བུ་གནོད་སྐྱོན་ཕྱིན་ཏེ། ཨོ་སི་ཀྲོ་ལི་ཡའི་གཞུང་གིས་རྒྱ་གར་ལ་ཡུ་རེ་ནི་ཡམ་ཕྱིར་ཚོང་མཚམས་འཇོག་གིས་ཨུ་རུ་སུར་ཚོང་ཁ་སྐོར་ཡོད་ཀྱང་། ཉེ་ལམ་ཨུ་རུ་སུས་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱས་ཏེ་རྒྱལ་སྤྱིའི་བརྟན་ལྷིང་ལ་འགོག་རྐྱེན་བཟོ་བཞིན་ཡོད་པ་དང་། ཨ་རི་གཙོས་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་བཅད་པ་སོགས་ལ་བརྟེན་ཏེ། ཨོ་སི་ཀྲོ་ལི་ཡའི་གཞུང་གིས་རྒྱ་གར་ལ་ཡུ་རེ་ནི་ཡམ་ཕྱིར་ཚོང་བསྐྱར་དུ་སྒོ་འབྱེད་བྱས་ཡོད་འདུག

ད་རེབ་ཀྱི་ཨོ་སི་ཀྲོ་ལི་ཡ་དང་རྒྱ་གར་བར་གྱི་རྡུལ་ཕྲན་གློག་ཤུགས་མཉམ་ལས་གྲོས་མཐུན་བརྒྱུད་ཨོ་སི་ཀྲོ་ལི་ཡ་གཞུང་གིས་ལོ་རེར་རྒྱ་གར་ལ་ཡུ་རེ་ནི་ཡམ་ཌོན་ ༧༠༠༠ ཙམ་ཕྱིར་ཚོང་བྱ་རྒྱུ་ཡིན་འདུག

ཉེ་འཆར་ཨོ་སི་ཀྲོ་ལི་ཡ་དང་རྒྱ་གར་མཉམ་འབྲེལ་ཐོག་འདོན་སྤེལ་བྱས་པའི་ “འདས་མ་འོངས་ད་ལྟ་གསུམ་གྱི་ཨོ་སི་ཀྲོ་ལི་ཡ་དང་རྒྱ་གར་བར་གྱི་ཚོང་འབྲེལ” ཞེས་པའི་རྒྱབ་ཤ་དཀར་པོའི་དེབ་ནང་། ༢༠༠༩ ནས་ ༢༠༡༣ ལོ་བར་རྒྱལ་ཁབ་གཉིས་ཀྱི་ཚོང་འབྲེལ་བརྒྱ་ཆ་ ༢༦ ཙམ་ཉམས་རྒུད་ཕྱིན་ཡོད་སྐོར་དང་། དེ་ནི་སྐབས་དེར་རྒྱལ་ཁབ་གཉིས་ཀྱི་འབྲེལ་ལམ་ཡག་པོ་མེད་པ་ལས་བྱུང་བ་ཞིག་ཡིན་སྐོར་སོགས་འཁོད་ཡོད་འདུག

གསར་འགོད་པ། དོན་གྲུབ།