རྒྱ་དཀར་ནག་གི་མགོ་ཁྲིད་སང་ཉིན་ཐུག་རྒྱུ་རེད།

སང་ཉིན་རྒྱ་ནག་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱས་ཏེ་རྒྱ་གར་སྲིད་བློན་མུ་དྷེ་དང་མཉམ་དུ་རྒྱལ་ཁབ་གཉིས་བར་གྱི་ཚོང་འབྲེལ་ས་མཚམས་རྩོད་རྙོག་སོགས་ལ་བཀའ་བསྡུར་གནང་རྒྱུ་ཡིན་འདུག

སང་ཉིན་ཕྱི་ཚེས་ ༡༧ ནས་༡༩ ཉིན་བར་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱ་རྒྱུ་ཡིན་པ་དང་། སང་ཉིན་རྒྱ་གར་གྷུ་ཅུ་ར་ཌེ་མངའ་སྡེའི་རྒྱལ་ས་ཨ་མེ་ཌ་བྷ་ཌེ་ (Ahmedabad) ནང་བསྐྱོད་དེ། རྒྱ་གར་སྲིད་བློན་ནཱ་རེན་ཌ་མུ་དྷེ་མཆོག་དགུང་གྲངས་ ༦༤ ལ་ཕེབས་པའི་སྐྱེས་སྐར་ཐོག་ཞུགས་རྒྱུ་ཡིན་འདུག་ལ། དེ་དང་འབྲེལ་ནས་རྒྱ་ནག་ཀོང་ཀྲུའུ་གྲོང་ཁྱེར་དང་། རྒྱ་གར་ཨ་མེ་ཌ་བྷ་ཌེ་གྲོང་ཁྱེར་གཉིས་སྤུན་གྲོགས་གྲོང་ཁྱེར་(sister city)ཞེས་པར་བསྒྱུར་ཏེ། གྲོང་ཁྱེར་འདི་གཉིས་བར་ཐད་འཛུགས་མ་འཇོག་ (Foreign Direct Investment) ཆེ་རུ་གཏོང་རྒྱུའི་གྲོས་མཐུན་ལ་མིང་རྟགས་འགོད་རྒྱུ་ཡིན་འདུག ཐེངས་འདིར་སྲིད་བློན་ནཱ་རེན་ཌ་མུ་དྷེས་ཞི་ཅིན་ཕིན་ལ་བསུར་བཅར་རྒྱུ་ཡིན་པ་མ་ཟད། ཁོང་ལ་དབྱིན་ཡིག་དང་རྒྱ་སྐད། གྷུ་ཅུ་ར་དྷེ་སྐད་ཐོག་ནས་འཚམས་འདྲི་ཞུ་རྒྱུ་ཡིན་འདུག

སང་ཉིན་ཕྱི་དྲོར་རྒྱ་གར་རྒྱལ་ས་ལྡི་ལིར་ཕེབས་ཏེ་རྒྱལ་ཁབ་གཉིས་བར་ས་མཚམས་རྩོད་རྙོག་དང་། རྒྱ་གཞུང་གིས་རྒྱ་གར་ཨ་རུ་ནཱ་ཅལ་དང་ཇམ་མུ་ཀཱ་ཤི་མེར་མངའ་སྡེའི་ཡུལ་མི་ཚོར་རྒྱ་ནག་ནང་འགྲོ་སྐྱོད་ཐོངས་མཆན་སྤྲོད་ཕྱོགས། བོད་རྒྱའི་གནད་དོན་སོགས་ལ་གྲོས་མོལ་གནང་འཆར་ཡོད་པ་མ་ཟད། རྒྱ་ནག་གིས་རྒྱ་གར་ནང་མྱུར་ཚད་ལྡན་པའི་མེ་འཁོར་ལྕགས་ལམ་བཟོ་སྐྲུན་དང་། གཞུང་ལམ་རྒྱ་སྐྱེད་དང་གྲུ་ལམ་ (Port) གསར་བཟོ། གློག་ཤུགས་རྒྱུད་གཏོང་བཅས་ཀྱི་ཐོག་མཉམ་ལས་བྱ་རྒྱུ། རྒྱ་ནག་གིས་རྒྱ་གར་ནང་རླངས་འཁོར་བཟོ་སྐྲུན་ཁེ་ལས་དང་ཟས་རིགས་ཀྱི་ཁེ་ལས་གསར་འཛུགས་གིས་ལོ་ལྔའི་ནང་རྒྱ་གར་ནང་ཨ་སྒོར་ཐེར་འབུམ་ ༡༠༠ ཡི་མ་འཛུགས་མཉམ་ལས་བྱ་རྒྱུར་མིང་རྟགས་འགོད་རྒྱུ་ཡིན་འདུག

རྒྱལ་སྤྱིའི་བརྒྱུད་ལམ་ཁག་དང་སྲིད་དོན་པ་ཚོས་རྒྱ་གར་ནག་གི་མགོ་ཁྲིད་ཐུག་འཕྲད་འདིར་དོ་སྣང་ཆེན་པོ་བྱེད་བཞིན་ཡོད་ཅིང་། ཕྱི་རྒྱལ་ཁག་གི་བོད་མི་དང་བོད་དོན་རྒྱབ་སྐྱོར་བ་ཚོས་སྲིད་འཛིན་ཞི་ཅིན་ཕིན་གྱིས་བོད་རྒྱ་འབྲེལ་མོལ་གང་མགྱོགས་མགོ་འཛུགས་བྱེད་དགོས་པའི་ལས་འགུལ་འདྲ་མིན་སྤེལ་བཞིན་ཡོད་པ་དང་། ལྷག་པར་དུ་ལྡི་ལི་ཁུལ་གྱི་བོད་མི་ཚོས་རྒྱ་ནག་གི་སྲིད་འཛིན་ལ་བོད་ནང་གི་ཛ་དྲག་གནས་སྟངས་གང་མགྱོགས་སེལ་དགོས་པའི་འབོད་སྐུལ་འོག་ལས་འགུལ་འདྲ་མིན་སྤེལ་རྒྱུར་དྲ་སྒྲིག་བྱས་ཡོད་འདུག རྒྱ་གར་གཞུང་གིས་ལྡི་ལིའི་ཞི་ཅིན་ཕིན་ཕེབས་ཡུལ་ཁག་ལ་སྲུང་སྐྱོབ་ཧ་ཅང་དམ་པོ་བྱས་ཡོད་འདུག

ཟླ་འདིའི་ཚེས་ ༡༣ ཉིན་ཧིན་རྡུ་སི་ཐན་དུས་བབ་ཀྱིས་བོད་མིའི་སྒྲིག་འཛུགས་ལྡི་ལི་སྐུ་ཚབ་དོན་གཅོད་བསྟན་པ་ཚེ་རིང་ལགས་སུ་བཅར་འདྲི་ཞུས་པ་ཞིག་གི་ནང་ཁོང་གིས། “རྒྱ་གར་ནི་བོད་མི་ཚོར་བཀའ་དྲིན་དང་བསམ་ཤེས་གནང་མཁན་གྱི་རྒྱལ་ཁབ་ཅིག་ཆགས་ཡོད་སྟབས། ང་ཚོས་རྒྱ་གར་གཞུང་གིས་རྒྱ་ནག་སྲིད་འཛིན་ཞི་ཅིན་ཕིན་ལ་བོད་དོན་གླེང་སློང་ཡོང་རྒྱུའི་རེ་སྐུལ་ཞུ་བཞིན་ཡོད། གལ་ཏེ་བོད་ནང་ཞི་བདེ་དང་བརྟན་ལྷིང་བྱུང་བ་ཡིན་ན། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་ལ་བཟང་ཕྱོགས་ཀྱི་འགྱུར་བ་འཐོན་ངེས་ཡིན” ཞེས་སོགས་བརྗོད་འདུག

རྒྱ་གར་སྲིད་བློན་ནཱ་རེན་ཌ་མུ་དྷེ་ཡིས་ཁོ་རང་གི་སྤྱི་ཚོགས་དྲ་འབྲེལ་ཌེའུ་ཌར་(twitter)སྟེང་། “€œཟླ་འདིའི་ཚེས་ ༡༧ ཉིན་རྒྱ་ནག་སྲིད་འཛིན་ཞི་ཅིན་ཕིན་རྒྱ་གར་གྷུ་ཅུ་ར་ཌེ་མངའ་སྡེའི་རྒྱལ་ས་ཨ་མེ་ཌ་བྷ་ཌེ་ནང་རྒྱལ་དོན་འཚམས་གཟིགས་ལ་ཕེབས་བཞིན་ཡོད་སྟབས། མ་འོངས་པར་ཁྱིམ་མཚེས་རྒྱལ་ཁབ་གཉིས་ཀྱི་འབྲེལ་ལམ་སྔར་ལྷག་བཟང་དུ་འགྲོ་རྒྱུའི་རེ་བ་ཆེན་པོ་ཡོད། ལོ་རྒྱུས་ཐོག་རྒྱ་གར་དང་རྒྱ་ནག་བར་ནང་ཆོས་ཀྱི་འབྲེལ་ལམ་ཡག་པོ་ཡོད་སྟབས། ཐང་སེན་བླ་མས་གྷུ་ཅུ་ར་ཌེ་མངའ་སྡེ་ནི་ནང་པའི་དགོན་པ་དང་རིག་གཞུང་གིས་ཕྱུག་པའི་མངའ་སྡེ་ཞིག་ཡིན་གསུངས་པ་ལྟར། ཕྲན་སྐྱེ་ཡུལ་གྱི་གྲོང་ཚོ་ཝ་ཌ་ནཱ་གྷར་ (Vadnagar) ནའང་ནང་ཆོས་ཀྱིས་ཤན་ཤུགས་ཆེ་བའི་རིག་གཞུང་དང་དགོན་སྡེ་མང་པོ་ཡོད་སྟབས། མ་འོངས་པར་རྒྱལ་ཁབ་གཉིས་བར་ནང་ཆོས་གཙོས་ཚོང་དོན་དང་དམག་དོན་གྱི་འབྲེལ་ལམ་བཟང་དུ་འགྲོ་ངེས་ཡིན”€ ཞེས་བཀོད་འདུག

ཁ་སང་རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པས་གསར་ལམ་ཁག་ཏུ། “€œརྒྱ་ནག་སྲིད་འཛིན་ཞི་ཅིན་ཕིན་དང་རྒྱ་གར་སྲིད་བློན་ནཱ་རེན་ཌ་མུ་དྷེ་ཐུག་འཕྲད་སྐབས། རྒྱལ་ཁབ་གཉིས་ཀྱི་ས་མཚམས་དཀའ་རྙོག་དང་། རྒྱ་གཞུང་གིས་ཨ་རུ་ནཱ་ཅལ་དང་ཇམ་མུ་ཀཱ་ཤི་མེར་ཡུལ་མི་ཚོ་རྒྱ་ནག་ནང་རང་གར་འགྲོ་སྐྱོད་ཆོག་པའི་མཐོང་མཆན་སྤྲོད་བཞིན་པ་སོགས་ལ་གྲོས་བསྡུར་བྱ་རྒྱུ་ཙམ་མ་ཟད། བོད་རྒྱའི་དཀའ་རྙོག་དག་ཀྱང་གླེང་སློང་བྱ་འཆར་ཡོད” €ཅེས་བརྗོད་འདུག

ད་ལོའི་ཕྱི་ཟླ་ ༣ པའི་ནང་རྒྱ་གར་གྱི་རྒྱལ་སྲུང་སློབ་སྟོན་པ་རྒྱ་ནག་ནང་སྐོར་སྐྱོད་སྐབས། ༡༩༥༤ ལོར་རྒྱ་གར་གྱི་སྲིད་བློན་ནེ་རུ་དང་རྒྱ་ནག་གི་སྲིད་བློན་ཀྲའུ་ཨིན་ལེ་བར་གྲོས་མཐུན་དོན་ཚན་ལྔ་བཞག་སྟེ་ལོ་ ༦༠ འཁོར་བའི་དུས་དྲན་སྲུང་བརྩི་ཞུ་ཕྱོགས་དང་། ས་མཚམས་སྐོར་ལ་གྲོས་མོལ་གནང་ཡོད་པ་མ་ཟད། ༢༠༡༥ ལོའི་ནང་ཚུད་དུ་ཨ་སྒོར་ཐེར་འབུམ་ ༡༠༠ ཡི་ཚོང་དོན་ལ་མིང་རྟགས་བཀོད་ཡོད་པ་དང་། ཟླ་ ༤ ཚེས་ ༡༨ ཉིན་རྒྱ་གར་ལ་རྒྱང་ལྟ་བྱེད་པ་ (Glimpses of India) ཞེས་པའི་རིག་གཞུང་ཚོགས་པ་ཞིག་རྒྱ་ནག་གི་གྲོང་ཁྱེར་ཁག་ ༩ ཙམ་ནང་སྐོར་སྐྱོད་ཀྱིས་རྒྱ་གར་གྱི་རིག་གཞུང་འགྲེམས་སྟོན་བྱས་ཡོད་པ་མ་ཟད། ཟླ་ ༥ ཚེས་ ༢༦ ཉིན་སྐུ་ཞབས་ནཱ་རེན་ཌ་མུ་དྷེ་རྒྱ་གར་སྲིད་བློན་ལ་བསྐོ་བཞག་གནང་བར། རྒྱ་ནག་གི་སྲིད་བློན་ལི་ཁེ་ཆང་གི་འཚམས་འདྲི་དང་འབྲེལ་རྒྱལ་ཁབ་གཉིས་བར་མཉམ་ལས་བྱེད་ཤུགས་ཆེ་རུ་གཏོང་རྒྱུ་ཡིན་སྐོར་བརྗོད་ཡོད།

རྒྱ་གར་སྲིད་བློན་ནཱ་རེན་ཌ་མུ་དྷེ་རྒྱ་གར་གྷུ་ཅུ་ར་ཌེ་མངའ་སྡེའི་སྤྱི་ཁྱབ་བློན་ཆེན་གནང་སྐབས། རྒྱ་ནག་ནང་ཐེངས་ ༤ ཙམ་སྐོར་སྐྱོད་གནང་ཡོད་པ་དང་། ཟླ་འདིའི་ཚེས་ ༨ ཉིན་རྒྱ་གར་གྱི་རྒྱལ་སྲུང་སློབ་སྟོན་པ་ཌོ་ཝལ་ (Alit Doval) མཆོག་རྒྱ་ནག་ཏུ་བསྐྱོད་ཏེ། སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་སོགས་ལ་ཐུག་འཕྲད་གནང་སྟེ། རྒྱལ་ཁབ་གཉིས་བར་མཉམ་ལས་ཤུགས་ཆེ་རུ་གཏོང་ཐབས་དང་ས་མཚམས་གནད་དོན་སོགས་ཀྱི་སྐོར་ལ་གྲོས་མོལ་བྱས་ཡོད་ཀྱང་། བདུན་ཕྲག་གཅིག་གོང་རྒྱ་ནག་དམག་མིས་ལ་དྭགས་དྷེམ་ཆོག་ (Demchok) ས་ཁུལ་ཐོག་ཆུ་རགས་བརྒྱབ་པ་མ་ཟད། ཁ་སང་བཅིངས་གྲོལ་དམག་མིས་ཆུ་དམར་ (Chumar) ས་ཚིགས་ཁུལ་དུ་ལམ་ཀ་གསར་རྒྱག་གི་ལས་གྲྭ་མགོ་འཛུགས་བྱས་པ་བཅས་ཀྱི་གནས་ཚུལ་ཐོན་ཡོད།

༡༩༥༤ ལོར་རྒྱ་གར་སྲིད་བློན་ནེ་རུ་དང་རྒྱ་ནག་སྲིད་བློན་ཀྲའུ་ཨིན་ལེ་གཉིས་བར་གྲོས་མཐུན་དོན་ཚན་ལྔ་བཞག་སྟེ། རྒྱལ་ཁབ་གཉིས་བར་འབྲེལ་ལམ་ཡག་ཏུ་གཏོང་ཐབས་བྱས་ཡོད་ཀྱང་། ༡༩༦༢ ལོར་རྒྱ་ནག་བཅིངས་གྲོལ་དམག་མིས་རྒྱ་གར་མཐའ་མཚམས་ལ་བཙན་འཛུལ་བྱས་ཡོད་པ་དང་། ༡༩༩༠ ལོ་ཙམ་ནས་བཟུང་རྒྱ་དཀར་ནག་གི་དབུ་ཁྲིད་བར་འབྲེལ་ལམ་ཇེ་ཟབ་ཏུ་ཕྱིན་ཏེ་ཚོང་དོན་གྲོས་མཐུན་མང་པོ་བཞག་ཡོད།༢༠༠༢ ལོར་རྒྱ་གར་དང་རྒྱ་ནག་བར་ཨ་སྒོར་ཐེར་འབུམ་ ༤།༨།

༢༠༠༤ ལོར་ཨ་སྒོར་ཐེར་འབུམ་ ༡༣།༦

༢༠༠༥ ལོར་ཨ་སྒོར་ཐེར་འབུམ་ ༡༨།༧

༢༠༠༨ ལོར་ཨ་སྒོར་ཐེར་འབུམ་ ༢༠།༥༦

༢༠༡༠ ལོར་ཨ་སྒོར་ཐེར་འབུམ་ ༣༠།༣༤

༢༠༡༡ ལོར་ཨ་སྒོར་ཐེར་འབུམ་ ༣༦།༣།

༢༠༡༢ ལོར་ཨ་སྒོར་ཐེར་འབུམ་ ༤༠།༦༨

༢༠༡༣ ལོར་ཨ་སྒོར་ཐེར་འབུམ་ ༥༦།༩༢ བཅས་ཀྱི་ཚོང་འབྲེལ་བྱས་པའི་ཁྲོད་རྒྱ་གར་ལ་ཨ་སྒོར་ཐེར་འབུམ་ ༣༡ ལྷག་གིས་གྱོང་གུད་རག་བཞིན་ཡོད་འདུག

གསར་འགོད་པ། དོན་གྲུབ།