༧གོང་ས་མཆོག་གིས་མུམ་བྷེ་རུ་གསར་འགོད་པར་ལན་འདེབས་གནང་སྐབས། སྔ་ཕྱི་མ་གཏོགས་རྒྱ་དཀར་ནག་གཉིས་ཀྱི་ས་མཚམས་ཀྱི་རྩོད་རྙོག་སེལ་དགོས་པ་ཆགས་ཡོད་སྟབས། ཞི་བའི་སྒོ་ནས་རྩོད་རྙོག་སེལ་ཐབས་གནང་རྒྱུ་ཧ་ཅང་གལ་ཆེན་ཡིན་སྐོར་གསུངས་འདུག
ཉིན་འདི་གར་༧གོང་ས་མཆོག་གིས་རྒྱ་གར་གྱི་གྲོང་ཁྱེར་མུམ་བྷེའི་ནང་ཆོས་ཕྱོགས་ཀྱི་མཛད་འཕྲིན་བསྐྱང་བཞིན་པ་ལྟར། ཁ་སང་ཚེས་ ༡༨ ཉིན་༸གོང་ས་མཆོག་རྒྱ་གར་ཚོང་པའི་ལྷན་ཚོགས་ (Indian Merchants Association) དང་། ཡན་ལག་བུད་མེད་ཚོང་པའི་ལྷན་ཚོགས་བཙུགས་ནས་ལོ་ ༡༠༨ འཁོར་བའི་དུས་དྲན་མཛད་སྒོར་ཆིབས་བསྒྱུར་གྱིས་བཀའ་སློབ་གསུང་བཤད་གནང་ཡོད་འདུག ཉིན་དེར་གསར་འགོད་པའི་བོད་དོན་དང་འབྲེལ་བའི་དྲི་བར་བཀའ་ལན་གནང་སྐབས། ༧གོང་ས་མཆོག་གིས་བོད་ཀྱི་དཀའ་ངལ་དེ་རྒྱ་གར་གྱི་དཀའ་ངལ་ཡིན་པ་དང་། རྒྱ་དཀར་ནག་གཉིས་དབར་ཡུན་རིང་ནས་ས་མཚམས་ཀྱི་རྩོད་རྙོག་ཡོད་པ་དེ་དག་ངེས་པར་དུ་སེལ་ཐབས་བྱེད་དགོས། ཡིན་ནའང་། ཐབས་ལམ་འཚེ་བའི་ལམ་ལ་མ་བརྟེན་པར་ཞི་བའི་ཐབས་ལམ་ཐོག་ནས་དཀའ་རྙོག་སེལ་ཐབས་བྱ་རྒྱུ་ཧ་ཅང་གལ་ཆེན་པོ་རེད། ༡༩༥༠ གོང་ལ་རྒྱ་གར་བྱང་ཕྱོགས་ས་མཚམས་སུ་དམག་མི་གཅིག་མེད་ཀྱང་ཞི་བདེ་ལྷིང་འཇགས་ཡོད། སྔ་ཕྱི་མ་གཏོགས་རྒྱ་དཀར་ནག་གཉིས་ཀྱི་ས་མཚམས་ཀྱི་རྩོད་རྙོག་སེལ་དགོས་པ་ཆགས་ཡོད་སྟབས། ཞི་བའི་སྒོ་ནས་རྩོད་རྙོག་སེལ་ཐབས་གནང་དགོས། ཞེས་བཀའ་ལན་སྩལ་ཡོད་འདུག
རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་ནག་གི་སྲིད་འཛིན་གཞན་དང་བསྡུར་ན། ཕྲན་བུ་བསམ་བློ་གུ་ཡངས་ཡོད་པའི་མགོ་ཁྲིད་ཅིག་ཡིན་སྟབས། ཐེངས་འདིར་རྒྱ་གར་ནང་རྒྱལ་དོན་འཚམས་གཟིགས་གནང་སྐབས་རྒྱ་གར་ནས་བློ་སྐྱེད་ལེན་ཐུབ་པའི་ཡིད་ཆེས་ཡོད་སྐོར་དང་། ལྷག་པར་རྒྱ་དཀར་ནག་གཉིས་ཀྱི་འབྲེལ་ལམ་གཅིག་གིས་གཅིག་ལ་ཡིད་ཆེས་བྱས་ནས་འབྲེལ་ལམ་གྱི་རྨང་གཞི་སྲ་བརྟན་ཞིག་འཛུགས་ཐུབ་པ་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་སོགས་གསུངས་ཡོད་འདུག
ཚེས་ ༡༧ ཉིན་༸གོང་ས་མཆོག་གྲོང་ཁྱེར་མུམ་ཏྲ་ཏྲ་སྤྱི་ཚོགས་ཚན་རིག་སློབ་གཉེར་བསྟི་གནས་ཁང་ (Tata Institute of Social Science) གི་འགན་འཛིན་སློབ་དཔོན་ཨེ་སི་པ་ར་ཤུ་ར་མན་ (Prof Parasuraman) ལགས་གཙོའི་པའི་དགེ་སློབ་རྣམས་ཀྱིས་ཕེབས་བསུའི་ཁྲོད། མཐོ་སློབ་ཀྱི་སྐབས་དང་པོའི་ཁྲིམས་ལུགས་རབ་འབྱམས་ (LL.M) པའི་བསླབ་པ་མཐར་སོན་མཛད་སྒོར་ཆིབས་སྒྱུར་བསྐྱངས་ཏེ། སློབ་ཐོན་སློབ་མར་ཕྱག་འཁྱེར་གསོལ་རས་དང་འབྲེལ་བཀའ་སློབ་གསུང་བཤད་གནང་ཡོད་འདུག
ཉིན་དེར་མཐོ་སློབ་དེའི་དགེ་སློབ་རྣམ་པར་བཀའ་སློབ་གནང་སྐབས། ངོས་ནས་ནམ་རྒྱུན་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་བསམ་བཞིན་པ་ལས། སྤྱི་ཚོགས་ནང་གོ་རིམ་དང་མཐོ་དམའ་སོགས་གལ་ཆེན་དུ་བརྩི་གི་མེད། ང་ཚོའི་བར་རིགས་རུས་དང་ཐོབ་གོ་ས། ཆོས་དད་ཡོད་མེད། རིག་གཞུང་སོགས་མི་འདྲ་བའི་ཁྱད་པར་ཡོད་ཀྱང་། དེ་དག་གྲལ་རིམ་གཉིས་པ་ཆགས་ཡོད། གལ་ཆེ་ཤོས་འཛམ་གླིང་འདིའི་ནང་མི་འབོར་ཐེར་འབུམ་བདུན་ཡོད་པ་ཚང་མ་ལུས་སེམས་དང་ཚོར་བ་གང་གི་ཆ་ནས་ཀྱང་འགྲོ་བ་མི་ཡིན་པ་གཅིག་པ་ཆགས་ཡོད། ང་ཚོ་ཚང་མར་མིའི་ཀླད་པ་ཡོད་སྟབས། དུད་འགྲོ་གཞན་ལྟར་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཆགས་ཡོད། བདེ་བ་བསྒྲུབ་རྒྱུ་དང་སྡུག་བསྔལ་ལས་གྲོལ་ཐབས་བྱ་རྒྱུ་ནི་ང་ཚོ་ཚང་མའི་གཞི་རྩའི་ཐོབ་ཐང་ཡིན། མིར་རྣམ་དཔྱོད་ཡོད་པའི་དབང་གིས་དུད་འགྲོ་དང་མི་འདྲ་བར་རྙོག་གྲ་བཟོ་ཐུབ་པ་ཙམ་མིན་པར། རྙོག་གྲ་ཧ་ཅང་ཆེན་པོ་བཟོ་ཐུབ་པའི་རྣམ་དཔྱོད་ཡོད། ང་ཚོས་རང་གི་རྣམ་དཔྱོད་འདི་དུས་ནམ་ཡང་མཐུན་པའི་རྐྱེན་དུ་འགྲོ་ཐུབ་པ་ཞིག་བྱེད་དགོས། དེ་འདྲ་ཡོང་བར་སེམས་ནང་བྱམས་བརྩེའི་བསམ་པ་དང་གཞན་གྱི་བདེ་སྡུག་ལ་སེམས་ཚོར་ཡོད་པ་བྱེད་དགོས། ཞེས་སོགས་གསུངས་འདུག
ཉིན་རྒྱབ་༧གོང་ས་མཆོག་གིས་བསྟི་གནས་ཁང་གི་ཉེ་འགྲམ་དུ་ཡོད་པའི་ལི་ལ་ཝ་ཏི་སྨན་ཁང་ (Lilavati Hospital) དུ་ཆིབས་སྒྱུར་བསྐྱངས་ཏེ་སྨན་པ་དང་སྨན་ཞབས་པ་ཁག་ཅིག་དང་གསོལ་ཇ་ལྷན་བཞེས་ཀྱིས་བཀའ་མོལ་མཛད་ཡོད་འདུག
ཟླ་འདིའི་ཚེས་ ༡༤ ཉིན་མུམ་བྷེའི་གྲོང་ཁྱེར་ནང་རྟེན་གཞི་བྱས་པའི་འཛམ་གླིང་ཞི་བདེའི་སྲུང་སྐྱོབ་ལས་འགུལ་ཚོགས་པ་ (TWPM) ཞེས་པས། ༸གོང་ས་མཆོག་ལ་དམིགས་བསལ་ཆེ་བསྟོད་ཀྱི་ཞི་བདེའི་གཟེངས་རྟགས་ཤིག་ཕུལ་ཡོད་ཅིང་། དེར་རྒྱ་གར་གྱི་རྩོམ་པ་པོ་དང་སྤྱི་ཚོགས་ཞབས་ཞུ་བ། སློབ་ཕྲུག་བཅས་མི་ ༥༠༠ བརྒལ་བ་མཉམ་ཞུགས་གནང་ཡོད་འདུག ཐེངས་འདིར་༧གོང་ས་མཆོག་ལ་དམིགས་བསལ་ཆེ་བསྟོད་གཟེངས་རྟགས་འབུལ་མཁན། འཛམ་གླིང་ཞི་བདེ་སྲུང་སྐྱོབ་ཚོགས་པ་དེ་ནི། ༢༠༡༡ ལོར་མུམ་བྷེར་གནས་སྡོད་རྒྱ་གར་གྱི་རྩོམ་པ་པོ་དང་སྤྱི་ཚོགས་ཞབས་ཞུ་བ་སྐུ་ཞབས་ཧོ་སེན་བྷར་ལགས་ཀྱིས་གསར་འཛུགས་གནང་བ་ཞིག་ཡིན་འདུག་ལ། ད་ཆར་འཛམ་གླིང་ནང་ཚོགས་པ་དེའི་རྗེས་འཇུག་པ་མི་འབུམ་ལྔ་ཡོད་འདུག ཉེ་ལམ་ཚོགས་པ་དེས་འཛམ་གླིང་ནང་ཞི་བདེ་དང་ཆོས་ལུགས། ཤེས་ཡོན་སོགས་ཀྱི་ཐོག་གཟེངས་སུ་ཐོན་པའི་བྱས་རྗེས་འཇོག་མཁན་གྱི་མི་སྣར་ཆེ་བསྟོད་ཀྱི་དམིགས་བསལ་གཟེངས་རྟགས་འབུལ་ལམ་ཞུ་རྒྱུའི་ལས་རིམ་ཞིག་བསྒྲིགས་ཏེ། ༧གོང་ས་མཆོག་དང་། བུད་མེད་ཀྱི་ཤེས་ཡོན་རྩོད་ལེན་པ་མ་ལཱ་ཡུ་སེལ་ལགས། སྤྱི་ཚོགས་ལས་འགུལ་བ་ཨ་ནཱ་ཧཱ་ཛ་རི་བཅས་མི་སྣ་གྲགས་ཅན་ཁག་ཅིག་འདེམས་སྒྲུག་གནང་འདུག
གསར་འགོད་པ། དོན་གོ
