རྒྱ་ནག་གཞུང་གིས་ཤིན་ཅང་ཁུ་ཧྲི་ཁ་ཆེ་ལྷ་ཁང་གི་ཆོས་ལུཊ་དོན་གཉེར་བ་དམར་གསོད་ཀྱི་ཉེས་མིང་འོག་ཡུ་གུར་བའི་གཞོན་སྐྱེས་གཉིས་ལ་སྲོག་ཁྲིམས་དང་། གཞན་གཅིག་ལ་ཚེ་བཙོན་གྱི་ཁྲིམས་ཐག་བཅད་འདུག
ཟླ་འདིའི་ཚེས་ ༢༨ ཉིན་རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། འདི་ལོའི་ཕྱི་ཟླ་ ༧ ཚེས་ ༣༠ ཉིན་ཤིན་ཅང་ཡུ་གུར་རིགས་རང་སྐྱོང་ལྗོངས་ཁུ་ཧྲི་ས་གནས་ཀྱི་ཨེ་ཊེ་ཀ་ (Id Kah Mosque) ཞེས་པའི་ཁ་ཆེ་ལྷ་ཁང་གི་ཆོས་ལུགས་དོན་གཉེར་བ། རང་ལོ་ ༧༤ ཡིན་པའི་སྐུ་ཞབས་ཇོ་མེ་ཊ་ཧེ་ཨེར་ (Jume Tahir) དམར་གསོད་བཏང་བའི་ཉེས་མིང་འོག རང་ལོ་ ༡༨ ཡིན་པའི་གྷེ་ནེ་ཧྰ་སེན་ (Gheni Hasan) ཞུ་བ་ཞིག་དང་། རང་ལོ་ ༡༩ ཡིན་པའི་ནོ་ཨེར་མེ་ཌེ་ཨ་བྷེ་ཊེ་ལེ་མེའེ་ཊེ་ (Nurmemet Abidilimit) ཞུ་བའི་གཞོན་སྐྱེས་གཉིས་ལ་སྲོག་ཁྲིམས་ཀྱི་ཁྲིམས་ཐག་བཅད་ཡོད་པ་དང་། ཨ་ཐ་ཝུ་ལ་ཌིར་སིན་ (Atawulla Tursun) ཞུ་བ་ཞིག་ལ་ཚེ་བཙོན་བཅས་ཀྱི་ཁྲིམས་ཐག་བཅད་ཡོད་སྐོར་བསྒྲགས་འདུག
རྒྱ་ནག་གཞུང་འབྲེལ་མི་དམངས་ཉིན་རེའི་ཚགས་པར་གྱིས། རྒྱ་ནག་གཞུང་ཕྱོགས་ནས་ཁྲིམས་ཐག་བཅད་པའི་ཉེས་ཅན་པ་གསུམ་ལ་འཇབ་རྒོལ་གྱི་སྦྱོང་བརྡར་ཡོད་པ་དང་། ཁོང་ཚོའི་རྒྱབ་ལོགས་སུ་སྒྲིག་འཛུགས་ཡོད་སྐོར་ཤེས་ཡོད་ཚུལ། ཁོང་ཚོར་ཕྱི་ཕྱོགས་ཀྱི་གནས་ཚུལ་འདྲ་མིན་དང་ཆོས་ལུགས་དང་འབྲེལ་བའི་བརྙན་རིས་སོགས་ཀྱི་ཤུགས་རྐྱེན་ཐེབས་ཏེ་དམར་གསོད་ཀྱི་དོན་རྐྱེན་བསླངས་ཡོད་ཚུལ་སོགས་བསྒྲགས་ཡོད་པ་ལས། ཉེས་ཅན་པ་གསུམ་མི་རིགས་གང་ཡིན་དང་། ཉེས་ཅན་པ་གསུམ་གྱིས་ཁྲིམས་རྩོད་པ་གླས་ཏེ་ཁྲིམས་རྩོད་བྱེད་རྒྱུའི་འཆར་གཞི་ཡོད་པའི་སྐོར་སོགས་ཕྱིར་བསྒྲགས་བྱས་མེད་ཀྱང་། ཡུ་གུར་བ་གཙོས་པའི་མི་མང་པོ་ཞིག་གིས་ཐེངས་འདིར་རྒྱ་གཞུང་གིས་སྲོག་ཁྲིམས་བཅད་པའི་གཞོན་སྐྱེས་ཁོང་གསུམ་ཡུ་གུར་མི་རིགས་ཡིན་པ་དང་། རྒྱ་ནག་གཞུང་ཕྱོགས་ནས་ཤིན་ཅང་ནང་མི་རིགས་དབྱེ་འབྱེད་ལས་གཞི་དང་འཁྲུག་རྐྱེན་སློང་གཞིའི་གནས་ཚུལ་མང་དག་ཅིག་སྤེལ་གྱིན་པའི་གླེང་སློང་བྱེད་ཀྱི་ཡོད་འདུག
ཐེངས་འདིའི་གྱོད་དོན་དེ་ནི། འདི་ལོའི་ཕྱི་ཟླ་ ༧ ཚེས་ ༣༠ ཉིན་གྱི་ཞོགས་པའི་ཆུ་ཚོད་ ༦།༣༠ ཡས་མས་སུ། ཤིན་ཅང་ཡུ་གུར་རིགས་རང་སྐྱོང་ལྗོངས་ཁུ་ཧྲི་ས་གནས་ཀྱི་ཨེ་ཊེ་ཀ་ཅེས་པའི་ཁ་ཆེའི་ལྷ་ཁང་དུ་ཞོགས་པའི་ཆོས་ཚོགས་ཚོགས་ཏེ་ཅང་མ་འགོར་བར། ཁུ་ཧྲི་ཉེ་འཁྲིས་ཁུ་ཙི་ལེ་སུའུ་ཤང་ནས་ཡོང་བའི་གཞོན་སྐྱེས་གསུམ་གྱིས་ཁ་ཆེ་ལྷ་ཁང་ནང་འཇབ་རྒོལ་བྱས་ཏེ། ཁ་ཆེའི་ཆོས་ལུགས་དོན་གཉེར་བ་སྐུ་ཞབས་ཇོ་མེ་ཊ་ཧེ་ཨེར་ལྐོག་གསོད་བྱས་ཡོད་པ་དང་། ཅང་མ་འགོར་བར་ཉེན་རྟོག་པ་བསླེབ་ཏེ་ཉིན་དེར་ལྐོག་གསོད་བྱེད་མཁན་གཞོན་སྐྱེས་གཉིས་འཛིན་བཟུང་བྱས་ཡོད་པར་མ་ཟད། རྗེས་སུ་ལྐོག་གསོད་བྱེད་མཁན་གཅིག་ཀྱང་འཛིན་བཟུང་བྱས་ཡོད་འདུག
གནས་ཚུལ་ཤེས་རྟོག་བྱུང་བ་ལྟར་ན། ཉེ་ཆར་ལྐོག་གསོད་ཐེབས་པའི་ཁ་ཆེ་ཆོས་ལུགས་དོན་གཉེར་བ་སྐུ་ཞབས་ཇོ་མེ་ཊ་ཧེ་ཨེར་ལགས་ནི། རྒྱ་ནག་གཞུང་གིས་མངགས་གཏོང་བྱེད་པའི་ཤིན་ཅང་ཡུ་གུར་རིགས་རང་སྐྱོང་ལྗོངས་ཁ་ཆེ་ཆོས་ལུགས་མཐུན་ཚོགས་ཀྱི་མི་སྣ་ཞིག་ཡིན་འདུག་ལ། རྒྱ་ནག་ནང་ཡོད་པའི་ཡུ་གུར་བ་ཁྲི་ ༡༠༠༠ ལྷག་གི་ཁྲོད་གླེང་གཞི་ཆེན་པོ་ཡོད་པའི་ཡུ་གུར་བའི་མི་སྣ་ཞིག་ཡིན་འདུག འདས་པའི་ལོ་ཤས་རིང་ཁོས་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ་རང་ཉིད་ཀྱི་ལྟ་བ་ཁྱབ་བསྒྲགས་དང་འབྲེལ། རྒྱ་ནག་གཞུང་གིས་ཡུ་གུར་བའི་ནང་ལག་བསྟར་བྱེད་བཞིན་པའི་སྲིད་ཇུས། ཡུ་གུར་བའི་གཞོན་སྐྱེས་ཚོ་ཁ་ཆེའི་ལྷ་ཁང་ནང་འགྲོ་རྒྱུར་བཀག་འགོག་བྱེད་པའི་རིགས་དང་། ལྷ་ཁང་ནང་རོལ་དུ་ཡོད་པའི་གནའ་རབས་དཔེ་རྙིང་གི་སློབ་གྲྭ་བཀག་འགོག ཁ་ཆེའི་བུད་མེད་ཚོས་སྐེ་དཀྲིས་རྒྱག་པ་དང་སྐྱེས་པ་ཚོའི་ཁ་སྦུ་འཇོག་པའི་རིགས་སོགས་ལ་བཀག་འགོག་བྱེད་བཞིན་པའི་སྲིད་ཇུས་ཁག་ལ་རྒྱབ་སྐྱོར་ཤུགས་ཆེར་བྱེད་མཁན་ཞིག་ཡིན་འདུག
ཐེངས་འདིའི་ཡུ་གུར་བ་གསུམ་གྱི་ཁྲིམས་ཆད་ཐད། འཇར་མན་དུ་ཡོད་པའི་འཛམ་གླིང་ཡུ་གུར་འཐུས་ཚོགས་ཀྱི་མགྲིན་ཚབ་པ་ཊེ་ལེ་ཤ་ཌེ་ (Dilixiati Raxit) ཡིས། རྒྱ་ནག་གཞུང་གིས་ཆོས་ལུགས་དོན་གཉེར་བ་ཇོ་མེ་ཊ་ཧེ་ཨེར་ལྐོག་གསོད་བྱས་པའི་ནག་ཉེས་འོག་ཡུ་གུར་བའི་གཞོན་སྐྱེས་གསུམ་ལ་ཁྲིམས་ཆད་ལྗིད་མོ་བཅད་པ་དེས། ཡུ་གུར་བ་ཚོ་རྒྱ་གཞུང་གི་སྲིད་ཇུས་ལ་འདོད་མོས་མེད་པའི་བསམ་འདུན་འགོག་མི་ཐུབ་པ་མ་ཟད། ཡུ་གུར་མི་རིགས་ཀྱི་སེམས་ལ་སྔར་ལས་ལྷག་པའི་རྨ་ཁ་བཟོ་བཞིན་པ་ཞིག་ཡིན་པ་དང་། ཡུ་གུར་བའི་གནད་དོན་མཐའ་དག་གི་འབྱུང་རྩ་རྒྱ་ནག་གི་དྲག་གནོན་དབང་བསྒྱུར་གྱི་སྲིད་ཇུས་ལ་ཐུག་ཡོད་སྟབས། རྒྱ་གཞུང་གིས་ངེས་པར་དུ་གནད་དོན་དེ་དག་གི་འབྱུང་རྐྱེན་ལ་བརྩད་ཞིབ་ནན་པོ་གནང་རྒྱུ་དང་། ཡུ་གུར་བའི་ཆོས་ལུགས་དང་མི་རིགས་ཀྱི་གོམས་གཤིས་གཏོར་སྐྱོན། འཁྲུག་རྐྱེན་སློང་གཞི་མཚམས་འཇོག་བྱ་རྒྱུ་ཧ་ཅང་གལ་ཆེན་ཡིན་སྐོར་བརྗོད་འདུག
གསར་འགོད་པ། དོན་གོ
