གྲོས་ཚོགས་ནང་གི་འཁྲབ་སྟོན།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༠ སྟེང་གི་རྩོམ་སྒྲིག་པའི་གཏམ།

གྲོས་ཚོགས་ཚོགས་དུས་བརྒྱད་པ་དེ་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱས་པ་དང་། བོད་ནང་གི་སློབ་ཕྲུག་ཅིག་གིས་རྒྱ་གཞུང་ཉེན་རྟོག་ཁང་གི་སྒོ་ཁར་རང་ལུས་མེར་བསྲེགས་བཏང་བ་སོགས་ཛ་དྲག་གི་གནས་ཚུལ་སྐོར་ཞིག་དང་མཉམ་དུ་རྫོགས་སོང་། ལོ་གཅིག་ལ་གྲོས་ཚོགས་ཐེངས་གཉིས་རེར་ཚོགས་ཏེ་བོད་མིའི་སྒྲིག་འཛུགས་ཀྱི་དངུལ་རྩིས་གཏན་འབེབས་དང་ལས་བསྡོམས་བསྐྱར་ཞིབ་གནང་གི་ཡོད་ལ། ཞོར་དུ་བོད་པའི་རྩ་དོན་དང་བོད་ཕྱི་ནང་གི་སྤྱི་ཚོགས་ཁྲོད་ཀྱི་གནད་དོན་དག་ལའང་བགྲོ་གླེང་དང་ཐག་གཅོད་གནང་གི་ཡོད།

ཐེངས་འདིའི་གྲོས་ཚོགས་ནང་གི་གསར་འགྱུར་ཆེ་ཁག་ནི། བོད་ནང་གི་གནས་སྟངས་ཐོག་སྤྱི་འཐུས་ཚོས་ས་བཙལ་རྡོ་བཙལ་བྱས་ནས་རྙེད་པའི་སེམས་ཚོར་གླེང་བ་དང་། ཞི་ཅིན་ཕིན་རྒྱ་གར་ནང་སྐོར་སྐྱོད་ཐད་བཙན་གྱིས་བཙིར་བའི་རྣམ་འགྱུར་བསྟན་པ། ལོ་གསུམ་བཞིའི་རིང་གི་རྩིས་ཉོག་ཐོག་མང་ཚོགས་རྩིས་ཁྲ་ཚོཊ་ཆུང་གིས་ཞིབ་འཇུག་བྱས་པའི་ཐོག་བགྲོ་གླེང་གནང་པ། བཀའ་ཤག་གིས་ཁ་ཞེ་གཉིས་མེད་ཐོག་ཤེས་ཡོན་སྲིད་བྱུས་ལག་བསྟར་གནང་གི་ཡོད་མེད་དང་། སྲོལ་རྒྱུན་སོ་ནམ་འདེབས་ལས་ཁུངས་འཁྱོལ་མིན། བོད་སློབ་འཛིན་ཚོཊ་རྩིས་ལེན་ཁྲོད་ཀྱི་དཀའ་རྙོག་སོགས་རེད།

ད་དུང་གནས་ཚུལ་མི་ལེགས་པ་གཅིག་གཉིས་ཤིག་ཞ་དང་ཞོར་ནས་ཐོན་པ་ནི། ཕྱི་རྒྱལ་སྐུ་ཚབ་དོན་གཅོད་ཁག་ཅིག་གི་ལས་ཁུངས་ནང་༧གོང་ས་མཆོག་དང་སྲིད་སྐྱོང་རྣམ་གཉིས་ཀྱི་སྐུ་པར་གྱི་ཆེ་ཆུང་དང་མཐོ་དམན་ཐོག་བཀའ་ཤག་གིས་ལམ་སྟོན་གང་གནང་དང་། ཕྱི་དྲིལ་བཀའ་བློན་གཉིད་ལ་ཤོར་ནས་འཇར་མན་གྲོང་ཁྱེར་ཧམ་བྷག་གི་ཚོགས་འདུར་རྗེས་ལུས་ཐེབས་ཚུལ། འཕྲོད་བསྟེན་བཀའ་བློན་གྱིས་སྦེལ་ཀོབ་སྨན་ཁང་གི་ལྐོག་ཟ་རུལ་སུངས་ལ་རྩད་གཅོད་བྱས་པའི་གོ་རིམ་ཁྲོད་ཁོང་རང་ཉིད་ཀྱི་རྐང་པ་ཡ་གཅིག་ཀྱང་རྩོད་ཉོག་དེའི་ནང་འཐིམ་ཚུལ་སོགས་རེད།

ལོ་འགའི་གོང་ནས་མང་ཚོགས་ཀྱིས་གྲོས་ཚོགས་ལས་རིམ་ལ་དོ་སྣང་ཆེ་རུ་ཕྱིན་སོང་། སྤྱི་སེམས་ཅན་ཚོར་སེམས་ཚབ་ཀྱང་སྔར་ལས་མང་དུ་ཕྱིན་འདུག གྲོས་ཚོགས་ནང་གི་འཐབ་རྩོད་ཀྱི་རྒྱབ་ལྗོངས་དང་ངོ་བོ། བྱེད་ལས་སོགས་ཇེ་གསལ་དང་། སྤྱི་འཐུས་རེ་རེའི་ཤེས་ཡོན་དང་བསམ་བློའི་གནས་ཚད། ལྷག་བསམ་དག་མིན་སོགས་ཀྱི་གཉན་པོ་གསང་བ་དག་ཀྱང་མང་ཚོགས་ཀྱིས་ཁ་གསལ་ཁུངས་དག་ཤེས་ནས་གླེང་མགོ་བརྩམས་ཡོད།

གྲོས་ཚོགས་ལས་རིམ་བརྙན་འཕྲིན་བརྒྱད་འཛམ་གླིང་ལ་ཐད་གཏོང་བྱས་པ་ནས་བཟུང་། གྲོས་ཚོགས་ར་བ་དེ་འཁྲབ་སྟོན་གར་སྟེགས་ཤིག་ཏུ་གྱུར་ཅིང་། གྲོས་ཚོགས་འཐུས་མི་ཚོ་ཡང་འཁྲབ་སྟོན་ཆེད་ལས་པར་གྱུར་ཏེ། སྤྱི་བའི་སྡིངས་ཆ་བརྒྱུད་ནས་སྒེར་གྱི་ཁེ་ཕན་དང་མངོན་འདོད་སྒྲུབ་མཁན་ཡང་ཇེ་མང་རེད་ལ། གྲོས་ཚོགས་ལས་རིམ་དེབ་ཐེར་དང་མང་ཚོགས་ཀྱི་སྣང་ངོར་སོ་སོ་བཞེངས་སྐྲུན་བྱེད་པའི་ཐབས་འཕྲུལ་ཡང་ཇེ་མཁས་རེད།

ནམ་རྒྱུན་གྲོས་ཚོགས་ནང་གསུང་མི་འབྱོན་མཁན་ཚོས་ཀྱང་བསམ་བློ་ཡར་གཏོང་མར་གཏོང་བཅོ་བརྒྱད་བྱས་ཏེ། སྐྲག་ཞོར་འདར་ཞོར་དུ་ཚིག་འགའ་རེ་ཤུགས་ཀྱིས་བཙིར་གྱིན་འདུག་ལ། དུས་ཀུན་ཞེན་ཁོག་གིས་འཚོལ་ཞིང་སྒེར་སེམས་ཀྱིས་ཁེངས་ནས་ཡོད་མཁན་ཚོས་ཀྱང་། བརྙན་འཕྲིན་ཤེལ་ཡོལ་ངོས་ན་དྲང་མོ་ཡིན་ཚུལ་དང་སྤྱི་སེམས་ཆེ་མདོག་སྟོན་གྱི་འདུག

སྤྱི་འཐུས་ཀླད་སྟོང་འགའ་རེས་གྲོས་ཚོགས་བསླེབ་ལ་ཉེ་བ་དང་བསྟུན་ཏེ་གསར་འགྱུར་བརྒྱུད་ལམ་ཁག་དང་སྤྱི་ཚོགས་དྲ་འབྲེལ་དག་ནས་གནས་ཚུལ་བློ་འཛིན་དང་། མང་ཚོགས་ནང་གི་གཏམ་ཡན་བསྡུ་རུབ་ཀྱིས་མགོ་རྐང་བསྒྲིགས་ཏེ། གྲོས་ཚོགས་ཀྱི་སྡིངས་ཆ་བརྒྱུད་དེ། སྤྱི་བའི་རྩ་དོན་ལ་རྒྱུས་མངའ་ཆེ་མདོག་དང་མང་ཚོགས་ཀྱི་བདེ་བ་སྡུག་བསྔལ་ལ་སེམས་ཁུར་ཡོད་མདོག་སྟོན་གྱི་འདུག