ཁ་སང་ཨབ་གྷན་གྱི་སྲིད་འཛིན་གསར་པ་ཨ་ཤི་རབ་གྷ་ཧ་ཎི་ཡིས་ལས་འཁུར་དམ་འབུལ་ཞུས་ཡོད་ཅིང་། སྐབས་དེར་ཨ་རི་གཙོས་པའི་རྒྱལ་ཁབ་ཁག་གིས་འཚམས་འདྲི་ཞུས་ཡོད་འདུག
ཁ་སང་ཨབ་གྷན་གྱི་སྲིད་འཛིན་ལས་ཁུངས་མདུན་ཐང་དུ། ཨབ་གྷན་ཆེས་མཐོའི་ཁྲིམས་ཁང་གི་ཁྲིམས་ཞིབ་པ་ཆེ་བའི་མདུན་དུ། འདི་ལོའི་ཨབ་གྷན་རྒྱལ་ཡོངས་འོས་བསྡུའི་ཁྲོད་རྒྱལ་ཁ་ཐོབ་མཁན་དཔལ་འབྱོར་བློན་ཆེན་ཟུར་པ་ཨ་ཤི་རབ་གྷ་ཧ་ཎི་ (Ashraf Ghani)གྱིས་སྲིད་འཛིན་དང་། ཕྱི་སྲིད་བློན་ཆེན་ཟུར་བ་ཨབ་དྷུ་ལཱ་ (Abdullah Abdullah)གྱིས་སྲིད་བློན་གྱི་ལས་འཁུར་དམ་འབུལ་ཞུས་ཡོད་འདུག
འདི་ནི་ཟླ་ ༣ ཙམ་རིང་ཨ་རི་དང་མཉམ་འབྲེལ་རྒྱལ་ཚོགས་ཀྱིས་ཨབ་གྷན་སྲིད་འཛིན་འོས་མི་ཨ་ཤི་རབ་གྷ་ཧ་ཎི་ (Ashraf Ghani)དང་། ཕྱི་སྲིད་བློན་ཆེན་ཟུར་བ་ཨབ་དྷུ་ལཱ་ (Abdullah Abdullah)གཉིས་བར་རྙོག་གྲ་ཁག་གྲོས་མོལ་བརྒྱུད་སེལ་དགོས་པའི་གནོན་ཤུགས་སྤྲད་པ་བརྒྱུད་དེ། ཨབ་གྷན་ནང་རྒྱལ་ཡོངས་གཅིག་སྒྲིལ་སྲིད་གཞུང་གསར་འཛུགས་བྱས་ཏེ། སྲིད་འཛིན་གྱི་འོས་མི་གཉིས་པོས་དབང་ཆ་བགོ་འགྲེམས་ཀྱིས་ཨ་ཤི་རབ་གྷ་ཧ་ནི་སྲིད་འཛིན་དང་། ཨབ་དྷུ་ལ་སྲིད་བློན་དུ་བསྐོ་རྒྱུའི་ཐག་གཅོད་བྱས་པ་ལས་བྱུང་བ་ཞིག་ཡིན་འདུག
དམ་འབུལ་མཛད་སྒོའི་སྟེང་ཨ་རིའི་སྲིད་འཛིན་ཨོ་བྷ་མའི་སློབ་སྟོན་པ་ཇོན་པོ་ཌི་སེ་ཌ་ (John Podesta) ཡིས་སྣེ་ཁྲིད་པའི་མཐོ་རིམ་དཔོན་རིགས་ ༡༠ ལས་གྲུབ་པའི་སྐུ་ཚབ་ཚོགས་ཆུང་ཞིག་དང་། པ་ཀི་སི་ཐན་གྱི་སྲིད་འཛིན་མམ་ནོན་ཧུ་སན་ (Mamnoon Hussain)། རྒྱ་གར་གྱི་སྲིད་འཛིན་གཞོན་པ་ཧ་མི་ཌི་ཨན་སར་རི་ (Hamid Ansari)། རྒྱ་ནག་གི་མི་ཤུགས་ནུས་སྤེལ་བློན་ཆེན་ཡེན་ཝེ་མིང་ (Yin Weimin)། ཨབ་གྷན་རྒྱལ་ས་ཀཱ་པུལ་ནང་ཡོད་པའི་དབྱིན་ཡུལ་དང་ཧྥ་རན་སི་གཙོས་པའི་གཞུང་ཚབ་ཁག་ཅིག་གི་མི་སྣ། ཨབ་གྷན་གྱི་སྲིད་དོན་པ་དང་ཚོང་པ་སོགས་མི་ ༢༧༠༠ ལྷག་མཉམ་ཞུགས་བྱས་ཡོད་འདུག་ལ། ཐེངས་འདི་ནི་ལོ་ ༡༣ རྗེས་ཨབ་གྷན་གྱི་སྲིད་འཛིན་ལས་འཁུར་གྱི་མཛད་སྒོ་གཞི་རྒྱ་ཆེ་ཤོས་དེ་ཆགས་ཡོད་འདུག
སྲིད་འཛིན་དམ་འབུལ་སྐབས་ཨབ་གྷན་སྲིད་འཛིན་གསར་པ་ཨ་ཤི་རབ་གྷ་ཧ་ཎི་ཡིས། “ངས་དེ་རིང་དཀོན་མཆོག་གི་མདུན་དུ་ཨབ་གྷན་རྒྱལ་ཁབ་འདི་རྩ་ཁྲིམས་འོག་ཤར་སྐྱོད་དང་། རྒྱལ་ཁབ་ཀྱི་བདག་དབང་དང་བདེ་འཇགས་ལ་སྲུང་སྐྱོབ་ཀྱིས་རྒྱལ་ཡོངས་གོང་བུ་གཅིག་སྒྲིལ་ཡོང་ཐུབ། ཨབ་གྷན་མི་མང་ལ་དམངས་གཙོའི་རྒྱལ་ཁབ་ཀྱི་ཁེ་ཕན་དང་ཐོབ་ཐང་ལ་ངོས་ཟིན་གསལ་བོ་ཡོང་ཐུབ་བྱ་རྒྱུ་ཡིན་པ་མ་ཟད། ཁོ་ཚོའི་རང་དབང་ལ་བརྩི་བཀུར་དང་སྲུང་སྐྱོབ་བྱ་རྒྱུ་ཡིན”ཞེས་བརྗོད་འདུག
ཁོང་གིས་མུ་མཐུད་དུ། “ ང་ཚོ་དང་ཌ་ལི་བྷན་དང་ཧ་ཛི་བྷེ་ (Hezb-e-Islami) དྲག་སྤྱོད་ཤོག་ཁག་བར་གྲོས་མོལ་བརྒྱུད་དཀའ་རྙོག་སེལ་རྒྱུར་འབོད་སྐུལ་ཞུ་བཞིན་ཡོད་ལ། ཁ་ཆེའི་མཁས་པ་ཚོས་ཌ་ལི་བྷན་ལ་གོ་བསྐོན་བློ་འགུག་གི་སློབ་གསོ་རྒྱག་དགོས། གལ་ཏེ་ཁོ་ཚོས་ཉན་འཇོག་མ་བྱས་ཚེ་འབྲེལ་ལམ་བཅད་དེ་རྩ་མེད་བཟོ་ཐབས་བྱ་རྒྱུ་ཡིན། ད་རེབ་ངས་དམག་འཐབ་ལ་ཡིད་ཐང་ཆད་དེ་རྒྱལ་ཡོངས་ནང་ཞི་བདེ་ཡོང་རྒྱུར་འབོད་སྐུལ་བྱས་པ་དེས་ང་ཚོའི་སྟོབས་ཤུགས་སྐྱོ་བོ་ཡིན་པ་ར་སྤྲོད་བྱས་པ་ཞིག་ཆགས་མེད” ཅེས་སོགས་བརྗོད་འདུག
ཨབ་གྷན་གྱི་སྲིད་འཛིན་ཟུར་པ་ཧ་མེ་ཌི་ཀར་ཛི་ (Hamid Karzai) ཡིས། “ངས་ཨབ་གྷན་གྱི་སྲིད་འཛིན་གསར་པས་མང་ཚོགས་ཀྱི་མངོན་འདོད་ལྟར། མ་འོངས་པར་རྒྱལ་ཡོངས་ནང་ཞི་བདེ་བརྟན་ལྷིང་ཡོང་རྒྱུར་ཡིད་ཆེས་བྱེད་ཀྱིན་ཡོད། གལ་ཏེ་རྒྱལ་ཁབ་ནང་ཞི་བདེ་མེད་ཚེ་རྒྱལ་ནང་གི་དཔལ་འབྱོར་འཕེལ་རྒྱས་ཡོང་ཁག་པོ་ཡིན”ཞེས་བརྗོད་འདུག
༢༠༠༡ ལོར་ཨ་རིས་སྣེ་འཁྲིད་པའི་བྱང་དམག་ཁུལ་ལྷན་ཚོགས་ (Nato) ཀྱི་དམག་དཔུང་གིས་ཨབ་གྷན་ནང་རྟེན་གཞི་བྱས་པའི་ཏ་ལི་བྷན་དྲག་སྤྱོད་ཤོག་ཁག་གཏོར་ཕམ་བཏང་སྟེ་གཞུང་གསར་པ་བཙུགས་ཤིང་། རྒྱལ་ཡོངས་འོས་བསྡུ་བརྒྱུད་ཨ་མེ་ཌི་ཁར་ཛེ་སྲིད་འཛིན་དུ་བསྐོ་བཞག་བྱས་ཡོད་ཀྱང་། ༢༠༡༣ ལོའི་ལོ་མཇུག་ཏུ་ཨ་རིའི་དམག་མི་ཨབ་གྷན་ནང་མུ་མཐུད་སྡོད་རྒྱུའི་གྲོས་མཐུན་ལ། ཨབ་གྷན་གྱི་སྲིད་འཛིན་ཨ་མེ་ཌི་ཁར་ཛེ་ཡིས་མིང་རྟགས་མ་བཀོད་སྟབས། རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད།
ཨབ་གྷན་གྱི་ས་ཁུལ་ཁག་ཏུ་འཇིགས་སྐུལ་དྲག་སྤྱོད་པས་ཉེས་མེད་མི་སེར་དང་ཕྱི་རྒྱལ་གསར་འགོད་པ་སོགས་གང་བྱུང་འཛིན་བཟུང་དང་དམར་གསོད་བཏང་བ་སོགས་ཨབ་གྷན་རྒྱལ་ཡོངས་ལ་ཟིང་འཁྲུག་བསྟུད་མུར་བསླངས་པ་བཅས་ལ་བརྟེན་ཏེ། ཨབ་གྷན་གྱི་དཔལ་འབྱོར་ཉམས་རྒུད་ཆེན་པོ་ཐེབས་ཏེ་ད་ལྟ་གཞུང་གི་ལས་བྱེད་ཚོར་གླ་ཕོགས་སྤྲོད་རྒྱུར་ཡང་དཀའ་ངལ་འཕྲད་བཞིན་ཡོད་པ་དང་། ད་ལོའི་ཟླ་ ༤ ཚེས་ ༥ ཉིན་ཨབ་གྷན་རྒྱལ་ཡོངས་སྲིད་འཛིན་འོས་བསྡུའི་སྐབས་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་ཨ་སྒོར་ས་ཡ་ ༡༢༦ ཙམ་གྱི་རོགས་དངུལ་སྤྲད་ཡོད་པ་དང་། རྒྱ་གར་གཞུང་གིས་དམག་སྦྱོང་ཐོག་རོགས་རམ་བྱས་ཡོད་འདུག
དེ་རིང་ཨབ་གྷན་གྱི་སྲིད་འཛིན་གསར་པས་ཨ་རིའི་དམག་མི་འདི་ལོའི་ཟླ་ ༡༢ ཚེས་ ༣༡ ཉིན་ཕྱིར་ལེན་བྱ་རྒྱུའི་གྲོས་ཆོད་དེ་བརྩི་མེད་བཏང་སྟེ། ཨ་རིའི་དམག་མི་ ༡༠༠༠༠ ལྷག་ཨབ་གྷན་ནང་མུ་མཐུད་སྡོད་ཆོག་པའི་གྲོས་མཐུན་ལ་མིང་རྟགས་བཀོད་ཡོད་འདུག ཆབ་སྲིད་དབྱེ་ཞིབ་པ་ཚོས། ཨབ་གྷན་སྲིད་འཛིན་གསར་པ་དེ་གནའ་དེང་གི་ཤེས་ཡོན་ལྡན་པའི་སྲིད་དོན་པ་ཞིག་ཡིན་སྟབས། མ་འོངས་པར་རྒྱལ་སྤྱིའི་རྒྱབ་རོགས་འོག་ཨབ་གྷན་ནང་ཞི་བདེ་དང་དཔལ་འབྱོར་འཕེལ་རྒྱས་ཡོང་རྒྱུ་ཡིན་སྐོར་རྗོད་བཞིན་འདུག
སྐུ་ཞབས་ཨ་ཤི་རབ་གྷ་ཧ་ཎི་ (Ashraf Ghani) ༡༩༤༩ ལོའི་ཟླ་ ༢ ཚེས་ ༡༢ ཉིན་ལོ་གྷར་མངའ་སྡེའི་ནང་སྐྱེས་ཤིང་། ཨབ་གྷན་རྒྱལ་ས་ཀཱ་པུར་གྱི་ཧ་བྷེ་བྷེ་ཡ་ (Habibia) མཐོ་འབྲིང་སློབ་མཐར་ཕྱིན་རྗེས། ཨ་རིའི་བྷེ་རུ་ཌེ་(Beirut) གཙུག་ལག་སློབ་ཁང་ནས་ཉེ་བའི་གཙུག་ལག་རབ་འབྱམས་པ་ཐོན་ཡོད་ཅིང་། དེའི་རྗེས་ཨབ་གྷན་ནང་ཕྱིར་ལོག་གིས་རྒྱལ་ས་ཀཱ་པུར་གྱི་གཙུག་ལག་སློབ་ཁང་དུ་མི་ཆོས་རིག་པའི་དགེ་རྒན་ཆེན་མོ་གནང་ཡོད་པ་དང་། ཕྱིས་སུ་སླར་ཡང་ཨ་རིར་བསྐྱོད་དེ་ཀོ་ལོམ་བྷི་ཡའི་གཙུག་ལག་སློབ་ཁང་ནས་མི་ཆོས་རིག་པའི་ཐོག་གཙུག་ལག་རབ་འབྱམས་པ་ཐོན་རྗེས། ༢༠༠༡ བར་རྒྱལ་སྤྱིའི་དངུལ་ཁང་ནང་ཕྱག་ལས་གནང་ཡོད་པ་དང་། ༢༠༠༢ ནས་ ༢༠༠༤ ལོའི་བར་ཨབ་གྷན་གྱི་དཔལ་འབྱོར་བློན་ཆེན་གནང་ཡོད་འདུག ༢༠༡༣ ལོར་ཁོང་ཕྱི་སྲིད་དུས་དེབ་དང་བསམ་རྒྱ་དུས་དེབ་ཀྱིས་རྒྱལ་སྤྱིའི་མཁས་པ་ ༡༠༠ ཁྲོད་ཀྱི་མི་སྣར་བདམས་ཡོད་འདུག
