ལྷོ་བྱང་ཀོ་རི་ཡའི་གྲོས་མོལ།

དེ་རིང་ལྷོ་བྱང་ཀོ་རི་ཡའི་མཐོ་རིམ་དཔོན་རིགས་ཐུག་འཕྲད་བྱས་ཏེ་རྒྱལ་ཁབ་གཉིས་ཀྱི་དཀའ་རྙོག་ཁག་སེལ་ཐབས་ལ་གྲོས་མོལ་བྱས་ཡོད་འདུག 

ཟླ་སྔོན་མའི་ཚེས་ ༡༩ ཉིན་ནས་བཟུང་ལྷོ་ཀོ་རི་ཡའི་གྲོང་ཁྱེར་ཨེན་ཆོན་ (Incheon) ནང་འཚོགས་བཞིན་པའི་ཨེ་ཤ་ཡའི་རྩེད་འགྲན་གྱི་མཇུག་བསྡོམས་མཛད་སྒོ་དང་བསྟུན་ཏེ། དེ་རིང་བྱང་ཀོ་རི་ཡའི་མགོ་ཁྲིད་ཀེམ་ཇོན་ཨང་ལག་འོག་གི་དབང་ཆ་ཆེ་ཤོས་ཨང་གཉིས་པ་ཧེ་ཝང་ (Hwang Pyong-so) དང་ངལ་རྩོལ་ཚོགས་པའི་མགོ་ཁྲིད་ཆུ་རེ་ཡོན་(Choe Ryong-hae)སོགས་དཔོན་ཁག་ཅིག་ལྷོ་ཀོ་རི་ཡར་སྐྱོད་དེ། ལྷོ་ཀོ་རི་ཡའི་འཐབ་ཕྱོགས་གཅིག་གྱུར་གྱི་བློན་ཆེན་ཀེ་ཧལ་ཇི་ (Ryoo Kihl-jae) དང་། རྒྱལ་སྲུང་སློབ་སྟོན་པ་ཀེམ་ཀེ་ཝང་(Kim Kwan-jin) རྣམ་གཉིས་ཐུག་འཕྲད་ཀྱིས། རྒྱལ་ཁབ་གཉིས་བར་གྱི་ས་མཚམས་རྩོད་རྙོག་དང་མི་སྣའི་འགྲོ་འོང་། དམག་དོན་དང་ཚོང་དོན་སོགས་ཀྱི་འབྲེལ་ལམ་གོང་མཐོར་གཏོང་ཐབས་ལ་གྲོས་མོལ་བྱས་ཡོད་པ་མ་ཟད། མ་འོངས་པར་གྲོས་མོལ་འདི་མུ་མཐུད་མཇུག་སྐྱོང་བྱ་རྒྱུ་ཡིན་སྐོར་བསྒྲགས་འདུག འདི་ནི་ལོ་ ༥ རྗེས་ལྷོ་བྱང་ཀོ་རི་ཡའི་མཐོ་རིམ་དཔོན་རིགས་བར་གྲོས་མོལ་གནང་བ་ཐོག་མ་དེ་ཆགས་ཡོད་འདུག  

འདིའི་ཐད་ལྷོ་ཀོ་རི་ཡའི་འཐབ་ཕྱོགས་གཅིག་གྱུར་ལྷན་ཁང་གི་མགྲིན་ཚབ་པ་ལེམ་ (Lim Byeong Cheol) གྱིས། “ད་རེབ་ཀྱི་གྲོས་མོལ་འདི་ནི་ལྕམ་པག་གྷེན་ཧེ་མཆོག་ལྷོ་ཀོ་རི་ཡའི་སྲིད་འཛིན་ཆགས་རྗེས་ཀྱི་གྲོས་མོལ་ཐོག་མ་དེ་ཆགས་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་ཇེ་བཟང་དུ་འགྲོ་རྒྱུར་ཡིད་ཆེས་བྱེད་བཞིན་ཡོད།’’ཅེས་བརྗོད་འདུག དེ་བཞིན་བྱང་ཀོ་རི་ཡའི་ཧེ་ཝང་(Hwang Pyong-so) གིས་ཀྱང་། “གྲོས་མོལ་འདི་བརྒྱུད་དེ་ཕན་ཚུན་གྱི་གནས་ཚུལ་མང་དག་ཅིག་རྒྱུས་ལོན་ཐུབ་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་ཇེ་བཟང་དུ་འགྲོ་རྒྱུའི་རེ་བ་ཡོད།”ཅེས་བརྗོད་འདུག

༢༠༠༩ ལོར་ལྷོ་ཀོ་རི་ཡིའི་སྲིད་འཛིན་བརྒྱད་པ་ཀེམ་དྷེ་ཇུན་ (Kim Dae-jung)འདས་གྲོངས་སྐབས། བྱང་ཀོ་རི་ཡའི་ཀེམ་ཡང་གྷོན་ (Kim Yang-gon) དང་ཀེམ་ཀི་ནམ་ (Kim Ki Nam) གཉིས་ལྷོ་ཀོ་རི་ཡར་བསྐྱོད་དེ་འདས་པོར་མྱ་ངན་ཞུས་ཡོད་པ་མ་ཟད། སྐབས་དེའི་ལྷོ་ཀོ་རིའི་སྲིད་འཛིན་ལི་མེ་ཡུང་ (Lee Myung-bak)དང་ཐུག་འཕྲད་གནང་སྟེ། རྒྱལ་ཁབ་གཉིས་བར་མཉམ་ལས་བྱེད་ཕྱོགས་སོགས་ཀྱི་སྐོར་ལ་གྲོས་མོལ་བྱས་ཏེ་འབྲེལ་ལམ་བསྐྱར་གསོ་བྱུང་ཡོད།

༢༠༡༣ ལོའི་ཟླ་ ༢ ཚེས་ ༢༥ ཉིན་ལྕམ་པག་གྷེན་ཧེ་ (Park Geun-hye)ལྷོ་ཀོ་རི་ཡའི་སྲིད་འཛིན་ཆགས་རྗེས། ལྷོ་བྱང་ཀོ་རི་ཡའི་མཚོ་ཁུལ་དུ་ཨ་རིའི་མཚོ་དམག་དང་ལྷོ་ཀོ་རི་ཡའི་མཚོ་དམག་བར་མཉམ་ལས་དམག་སྦྱོང་བྱ་རྒྱུའི་གྲོས་མཐུན་བཞག་སྟེ་ད་བར་དམག་སྦྱོང་ཐེངས་བཞི་ཙམ་བྱས་ཡོད་སྟབས། ༢༠༡༤ ལོའི་ཟླ་ ༦ ཚེས་ ༢༦ ཉིན་བྱང་ཀོ་རི་ཡས་མེ་ཤུགས་འཕུར་མདའ་ ༣ དང་། ཚེས་ ༢༩ ཉིན་ ༢ བཅས་ད་བར་ཤུགས་ཚད་འབྲིང་ཆུང་གཉིས་ཀྱི་སྒྱོགས་མདེལ་ ༤༦ ཙམ་ཚོད་ལྟ་བྱས་པ་མ་ཟད། བྱང་ཀོ་རི་ཡའི་གཞུང་འབྲེལ་གསར་འགྱུར་བརྒྱུད་ལམ་ཁག་གིས་ལྷོ་ཀོ་རི་ཡའི་སྲིད་འཛིན་ལྕམ་པག་གྷན་ཧེ་མཆོག་ནི་སྨད་ཚོང་མ་ཞིག་ཡིན་སྐོར་སྐྱོན་བརྗོད་བྱས་ཡོད།

 ཉེ་ལམ་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད་ཀྱང་། ༢༠༡༤ ལོའི་ཟླ་ ༢ ཚེས་ ༡༢ ནས་ ༡༤ ཉིན་བར་ལྷོ་བྱང་ཀོ་རི་ཡའི་བློན་ཆེན་རིམ་པའི་ཚོགས་འདུ་ཚོགས་ཏེ་ཟླ་ ༢ ཚེས་ ༢༠ ཉིན་བྱང་ཀོ་རི་ཡའི་ཀུམ་སྒང་ཡུལ་སྐོར་སྤྲོ་འཆམ་ས་གནས་སུ་ཁ་བྲལ་སོང་བའི་ནང་མི་ཐུག་འཕྲད་དང་། ༢༠༡༤ ལོའི་ཟླ་ ༩ ཚེས་ ༡༩ ཉིན་བྱང་ཀོ་རི་ཡས་ལྷོ་ཀོ་རི་ཡར་ཚོགས་བཞིན་པའི་ཨེ་ཤ་ཡའི་རྩེད་འགྲན་ལ་མཉམ་བཞུགས་སོགས་བྱས་ཡོད།

 ༡༩༨༦ ལོར་བྱང་ཀོ་རི་ཡས་ལྷོ་རི་ཡའི་རྒྱལ་ས་སཱོལ་ནང་ཚོགས་པའི་ཨེ་ཤ་ཡའི་རྩེད་འགྲན་དང་། ༡༩༨༨ ལོའི་དབྱར་ཁའི་ཨོ་ལོམ་པིག་ལ་མཉམ་བཞུགས་བྱས་མེད་ཀྱང་། ཀེམ་དྷེ་ཇུན་ (Kim Dae-jung)ལྷོ་ཀོ་རི་ཡའི་སྲིད་འཛིན་གནང་སྐབས་ཀྱི་ ༢༠༠༢ ལོའི་ལྷོ་ཀོ་རི་ཡའི་བྷུ་སན་གྲོང་ཁྱེར་ (Busan) ནང་ཚོགས་པའི་ཨེ་ཤ་ཡའི་རྩེད་འགྲན་དང་། ༢༠༠༥ ལོར་ཨེན་ཆོན་གྲོང་ཁྱེར་ནང་ཚོགས་པའི་ཨེ་ཤ་ཡའི་རྩེད་འགྲན་ལ་མཉམ་བཞུགས་བྱས་ ཡོད།

ལྷོ་ཀོ་རི་ཡའི་གཙུག་ལག་སློབ་ཆེན་གྱི་བྱང་ཀོ་རི་ཡའི་གནད་དོན་ཆེད་མཁས་པ་ཡང་མཱོ་ཇེན་ (Yang Moo-Jin) གྱིས། “ད་རེབ་བྱང་ཀོ་རི་ཡ་གཞུང་གིས་ལྷོ་ཀོ་རི་ཡར་ཚོགས་པའི་ཨེ་ཤ་ཡའི་རྩེད་འགྲན་ཐོག་མཉམ་བཞུགས་བྱས་པ་མ་ཟད། དེ་རིང་བྱང་ཀོ་རི་ཡའི་མཐོ་རིམ་དཔོན་རིགས་ཀྱི་སྐུ་ཚབ་ཚོགས་ཆུང་ལྷོ་ཀོ་རི་ཡར་སྐོར་སྐྱོད་ཀྱིས་རྒྱལ་ཁབ་གཉིས་བར་གྱི་དཀའ་རྙོག་ཞི་འགྲིག་ཡོང་རྒྱུར་གྲོས་མོལ་གནང་ཡོད་སྟབས། དེ་ནི་བྱང་ཀོ་རི་ཡས་ལྷོ་ཀོ་རི་ཡ་དང་འབྲེལ་ལམ་ཡག་ཏུ་གཏོང་ཐབས་བྱེད་ཀྱིན་ཡོད་པའི་མཚོན་རྟགས་གལ་ཆེན་ཞིག་ཆགས་ཡོད།”ཅེས་བརྗོད་འདུག  

གསར་འགོད་པ། དོན་གྲུབ།