ཡུའུ་ཁུ་རེན་གྱི་ཟིང་འཁྲུག་སླར་ཡང་མགོ་བཙུཊ།

ཉེ་ལམ་ཡུའུ་ཁུ་རེན་གཞུང་དང་གྱེན་ཚོགས་པའི་བར་ཟླ་གཅིག་རིང་དམག་འཁྲུག་མཚམས་འཇོག་བྱེད་རྒྱུའི་གྲོས་མོལ་བྱུང་ཡོད་ཀྱང་ཁ་སང་ཡང་བསྐྱར་ཕན་ཚུན་བར་མེ་མདའ་རྒྱག་རེས་བྱས་ཏེ་མི་འགའ་བསད་ཡོད་འདུག

ཟླ་སྔོན་མའི་ ༢༢ ཉིན་ཡུའུ་ཁུ་རེན་གྱི་ཁྱིམ་མཚེས་རྒྱལ་ཁབ་བྷེ་ལཱ་རུ་སི་ (Belarus)ཡི་རྒྱལ་སར། ཡུའུ་ཁུ་རེན་གཞུང་དང་ཡུའུ་ཁུ་རེན་ནང་གི་གྱེན་ལོག་ཚོགས་པ་གཉིས་ཀྱིས་ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ནང་ཟླ་གཅིག་རིང་ཕན་ཚུན་འཇབ་རྒོལ་མི་བྱེད་པའི་གྲོས་མོལ་བྱུང་ཡོད་ཀྱང་། ཁ་སང་གྱེན་ལོག་པ་ཚོས་གྲོང་ཁྱེར་ཌོན་ནེ་ཊི་སི་ཀི་ (Donetsk) ཡི་གནམ་ཐང་གཙོས་ཨུ་རུ་སུའི་ཉེ་འགྲམ་གྱི་ས་མཚམས་ཌེ་བྷལ་ཊི་སེ་ཧུད་ (Debaltseve) དང་ཞི་ཆཱ་སི་ཌེ་(Shchastye) བཅས་ཀྱི་ཤར་ཕྱོགས་ཁུལ་དུ་འཇབ་རྒོལ་བྱས་ཏེ། གཞུང་གི་ལས་བྱེད་གཉིས་དང་གཞན་མི་དྲུག་ལ་རྨས་སྐྱོན་འཚབ་ཆེན་བཟོས་ཡོད་སྟབས། ཡུའུ་ཁུ་རེན་གཞུང་གིས་འཇིགས་སྐུལ་རིང་ལུགས་གྱེན་པ་ཚོགས་པ་ཚོས་གྲོས་མོལ་ལ་རྩིས་མེད་བཏང་ཡོད་པའི་སྐྱོན་བརྗོད་བྱས་ཡོད་འདུག

གནས་ཚུལ་འདིའི་ཐད་གྱེན་ལོག་ཚོགས་པའི་མཐོ་རིམ་དམག་དཔོན་བྷ་སོ་ལིན་ (Basulin) རོའུ་ཊར་གསར་འགོད་པར། ཉེ་བའི་ཆུ་ཚོད་ ༢༤ རིང་ཌོན་ནེ་ཊི་སུ་ཀི་གྲོང་ཁྱེར་ནང་དུ་ཡུའུ་ཁུ་རེན་དམག་དཔུང་གིས་ཁོ་ཚོའི་ འཐབ་འཛིང་པ་གསུམ་བསད་པ་དང་། ཁྱོན་མི་ ༣༢ ལ་རྨས་སྐྱོན་བཟོས་ཡོད་འདུག་ལ། ཁོ་ཚོས་གཞུང་གི་དམག་དཔུང་གྲོང་ཁྱེར་ནས་མཐར་བསྐྲོད་གཏོང་བར་དམིགས་ཡུལ་གཙོ་བཟུང་ནས་འགོག་སྲུང་བྱེད་ཀྱི་ཡོད་ཅེས་བརྗོད་འདུག 

ཁ་སང་ཨ་རིས་སྣེ་འཁྲིད་པའི་ནུབ་ཕྱོགས་མཉམ་འབྲེལ་དམག་དཔུང་ (NATO) གི་སྤྱི་ཁྱབ་དྲུང་ཆེ་གསར་པ་སྐུ་ཞབས་སི་ཊོལ་ཊེན་བྷ་གྷི་ (Jens  Stoltenberg) ལགས་ཀྱིས།  ཨུ་རུ་སུས་གྲང་དམག་རྗེས་ཀྱི་གྲོས་མཐུན་སྣང་མེད་བཞག་ཏེ་ཡུའུ་ཁུ་རེན་གྱི་རང་སྐྱོང་མངའ་ཁུལ་ཁུ་རེ་མཱེ་ (Crimea) བཙན་བཟུང་བྱས་སྟབས། ནུབ་ཕྱོགས་མཉམ་འབྲེལ་དམག་དཔུང་མཐུན་གྲོགས་རྒྱལ་ཁབ་ཚོའི་ནང་གི་ས་གནས་གང་ལའང་ཆེད་གཏོང་ཐུབ་ཀྱི་ཡོད་ཅེས་བརྗོད་ཡོད་འདུག

ཟླ་འགའི་སྔོན་ཨུ་རུ་སུས་ཡུའུ་ཁུ་རེན་ཤར་ཕྱོགས་གྲོང་ཁྱེར་ནང་ཡོད་པའི་ཨུ་རུ་སུའི་སྐད་བཤད་མཁན་ལ་སྲུང་སྐྱོབ་བྱེད་པའི་བདག་དབང་ཡོད་ཚུལ་བརྗོད་དེ། ཡུའུ་ཁུ་རེན་གྱི་ས་མཚམས་སུ་དམག་དཔུང་གྲ་སྒྲིག་དང་འགྲེམ་འཇོག་གི་གནས་སྟངས་ཛ་དྲག་ཆགས་སྐབས། ནུབ་ཕྱོགས་མཉམ་འབྲེལ་དམག་དཔུང་གིས་ཀྱང་ཡུ་རོབ་ཤར་ཕྱོགས་ཀྱི་འཐུས་མིའི་རྒྱལ་ཁབ་ཚོའི་ནང་དམག་དཔུང་འགྲེམ་འཇོག་གིས་ཨུ་རུ་སུར་རྣམ་འགྱུར་བསྟན་ཡོད་འདུག

ད་ལོའི་ཟླ་ ༢ ནང་ཡུའུ་ཁུ་རེན་ནང་སྲིད་དོན་གྱི་ཟིང་འཁྲུག་བྱུང་བ་ནས་བཟུང་། ནུབ་ཕྱོགས་རྒྱལ་ཁབ་ཚོས་ཡུའུ་ཁུ་རེན་ཤར་ཕྱོགས་ནང་གི་གྱེན་ལོག་པ་ཚོར་ཨུ་རུ་སུས་ལྐོག་ནས་མཚོན་ཆ་དང་དཔལ་འབྱོར་རོགས་སྐྱོར་བྱེད་ཀྱིན་ཡོད་པ་མཚམས་འཇོག་ཡོང་ཆེད། ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཨུ་སུ་རུར་དཔལ་འབྱོར་ཉེས་ཆད་རིམ་པ་གསུམ་བཏང་ཡོད་པ་མ་ཟད། ཨུ་རུ་སུས་གྱེན་ལོག་པ་ཚོར་རྒྱབ་སྐྱོར་བྱེད་པར་མཚམས་འཇོག་མ་བྱས་ཚེ་དཔལ་འབྱོར་ཉེས་ཆད་རིམ་པ་བཞི་བ་གཏོང་རྒྱུར་གྲ་སྒྲིག་བྱས་ཡོད་འདུག

ཨུ་རུ་སུའི་སྲིད་འཛིན་པུ་ཊིན་གྱིས་ནུབ་ཕྱོགས་རྒྱལ་ཁབ་ཚོའི་སྐྱོན་འཛུགས་ལ་ཁས་ལེན་བྱས་མེད་པ་མ་ཟད། ཨུ་རུ་སུར་དཔལ་འབྱོར་ཉེས་ཆད་བཏང་བ་དེ་དྲང་བདེན་མིན་སྐོར་དང་། ཨུ་རུ་སུས་ཡུ་རོབ་དང་ཨ་རི་གཉིས་ནས་ནང་འདྲེན་བྱེད་བཞིན་པའི་སྔོ་ཚལ་དང་ཤ་རིགས།  རྒྱུན་སྤྱོད་མཁོ་ཆས་རིགས་ལེན་རྒྱུ་མཚམས་འཇོག་བྱས་ཡོད་པ་དང་། འབྱུང་འགྱུར་ཨུ་རུ་སུས་རྒྱལ་སྤྱིའི་འགྲུལ་སྐྱོད་གནམ་གྲུ་ཨུ་རུ་སུའི་བར་སྣང་ནས་འཕུར་སྐྱོད་བྱེད་པར་བཀག་འགོག་དང་། སོལ་རླངས་གཏོང་མཚམས་འཇོག་རྒྱུ་ཡིན་པ་སོགས་ཀྱི་ཉེན་བརྡ་བཏང་ཡོད་འདུག

གནད་དོན་དབྱེ་ཞིབ་པ་ཚོས། ཡུའུ་ཁུ་རེན་གྱི་དཀའ་རྙོག་ཐོག་ནས་འཛམ་གླིང་ཤར་ནུབ་གཉིས་སུ་ཕྱེས་ཏེ་རྒྱལ་ཁབ་ཚང་མའི་དཔལ་འབྱོར་ལ་དོ་ཕོག་ཆེན་པོ་འགྲོ་བཞིན་ཡོད་སྟབས། ཨུ་རུ་སུས་ངེས་པར་དུ་ཡུའུ་ཁུ་རེན་གྱི་དཀའ་རྙོག་སེལ་ན་ཚང་མར་ཁེ་ཕན་ཆེན་པོ་ཡོད་ཚུལ་བརྗོད་ཡོད་འདུག