ཧོང་ཀོང་གི་ལས་འགུལ་བཀག་སྡོམ།

དེ་རིང་སྔ་དྲོར་ཧོང་ཀོང་ཉེན་རྟོག་པས་ཞི་རྒོལ་ས་ཁུལ་གྱི་གཞུང་ལམ་བཀག་སྡོམ་བྱས་ཏེ་ཡུལ་དངོས་གཙང་བཤེར་བྱས་ཡོད་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པར་ཧོང་ཀོང་ཉེན་རྟོག་ཕྱོགས་ནས་ཅིན་ཀྲུང་ཏོ་གཞུང་ལམ་དུ་གཙང་བཤེར་གྱི་ལས་འགུལ་སྤེལ་རྒྱུ་ཡིན་པ་ཁྱབ་བསྒྲགས་བྱས་ཡོད་པ་ལྟར། ཅིན་ཀྲུང་ཏོ་དང་ཐོང་ལོ་ཝན་སོགས་ཞི་རྒོལ་ས་ཁུལ་གྱི་གཞུང་ལམ་ཁག་ཅིག་ཉེན་རྟོག་པས་བཀག་སྡོམ་བྱས་ཏེ། ལས་འགུལ་བ་རྣམས་ཡོང་དུ་བཅུག་མེད་པ་མ་ཟད། གཞུང་ལམ་གཙང་སྦྲ་བྱས་ནས་འགྲིམ་འགྲུལ་གྱི་འགྲོ་འོང་བྱེད་མགོ་བརྩམས་ཡོད་པ་དང་། གཙང་བཤེར་སྐབས་ཉེན་རྟོག་ཕྱོགས་ནས་གཙང་བཤེར་བྱེད་ཀྱི་མེད་པས། ངོ་རྒོལ་བ་རྣམས་རང་འགུལ་གྱིས་ཡུལ་དངོས་དང་ཁ་བྲལ་དགོས་པའི་འབོད་སྐུལ་ཡང་ཡང་བྱས་པར་མི་མང་གིས་འཁོན་སེམས་འཛིན་གྱི་ཡོད་ཀྱང་། དེ་རིང་སྔ་དྲོར་མི་མང་དང་ཉེན་རྟོག་པའི་བར་འཁྲུག་འཛིང་ཤོར་མེད་པ་རེད།

ཧོང་ཀོང་ནང་མི་མང་གིས་ཞི་རྒོལ་བྱས་ཏེ་དེ་རིང་ནས་ཉིན་གྲངས་ ༡༧ འགྲོ་བཞིན་ཡོད་པ་དང་། ཟླ་འདིའི་ཕྱི་ཚེས་ ༡༠ ཉིན་ཧོང་ཀོང་གཞུང་དང་སློབ་ཕྲུག་མཐུན་ཚོགས་ཀྱི་འཐུས་ཚབ་བར་གྲོས་མོལ་བྱ་རྒྱུའི་ཐག་གཅོད་དེ་ཡང་ཧོང་ཀོང་གཞུང་གིས་ཕྱིར་འཐེན་བྱས་ཡོད་སྟབས། སློབ་ཕྲུག་དང་མི་མང་སྟོང་ཕྲག་མང་པོ་སླར་ཡང་འདུ་འཛོམས་ཀྱིས་མི་གཅིག་ལ་གུར་གཅིག་ཅེས་པའི་ལས་འགུལ་མུ་མཐུད་སྤེལ་བཞིན་ཡོད་ཀྱང་། ཧོང་ཀོང་དཀྱིལ་དབུས་བཙན་བཟུང་གི་ལས་འགུལ་ལ་ངོ་རྒོལ་བྱེད་མཁན་མང་པོས་ལས་འགུལ་བའི་སྡོད་གུར་གཤག་པ་སོགས་ཀྱི་རྙོག་དྲ་བསླངས་ཡོད་པ་མ་ཟད། ཉེན་རྟོག་པར་ལས་འགུལ་བ་རྣམས་མཐའ་སྐྲོད་གཏོང་དགོས་པའི་རེ་སྐུལ་ཡང་བྱས་ཡོད་འདུག ཡིན་ནའང་། ཉེན་རྟོག་པས་མི་དེ་ཚོ་དང་འབྲེལ་བ་གང་ཡང་མེད་སྐོར་བརྗོད་ཡོད་འདུག

ཟླ་འདིའི་ཕྱི་ཚེས་ ༡༠ ཉིན་རྒྱ་ནག་གི་སྲིད་བློན་ལི་ཁེ་ཆང་གིས་དབྱིན་ཡུལ་གྱི་གསར་འགོད་ལྷན་ཚོགས་ཤིག་གི་ཐོག རྒྱ་གཞུང་གིས་ཧོང་ཀོང་མེས་རྒྱལ་གྱི་པང་དུ་ལོག་པ་ནས་བཟུང་བློ་བརྟན་འགྱུར་མེད་ཀྱིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལག་བསྟར་བྱེད་བཞིན་ཡོད་ལ། སྲིད་བྱུས་དེར་ནམ་ཡང་འགྱུར་བ་མེད་པ་དང་། ཧོང་ཀོང་གཞུང་དང་མི་མང་གིས་རྣམ་དཔྱོད་ལྡན་པའི་སྒོ་ནས་ཁྲིམས་ལྟར་རྒྱལ་ཁབ་སྐྱོང་བར་ཡིད་ཆེས་བྱེད་ཀྱི་ཡོད་སྐོར་སོགས་བརྗོད་འདུག

ཁ་སང་རྒྱ་ནག་དབུས་བརྙན་འཕྲིན་ཁང་གིས། ཧོང་ཀོང་ནང་ཁྲིམས་འགལ་ཟིང་འཁྲུག་བསླངས་སྟེ་སྤྱི་ཚོགས་བརྟན་ལྷིང་དང་གཞུང་མང་མཐུན་སྒྲིལ་ཐད་གཏོར་བརླག་ཆེན་པོ་བཟོས་ཡོད་སྟབས། ཧོང་ཀོང་གི་དམངས་གཙོ་འཕེལ་རྒྱས་དང་མི་མང་གི་བདེ་འཇགས་ཆེད་ཐེངས་འདིའི་ལས་འགུལ་གྱི་སྣེ་ཁྲིད་པ་དང་དཔལ་འབྱོར་གྱི་འགྲོ་གྲོན་གཏོང་མཁན་རྩད་གཅོད་བྱས་ཏེ། ཁྲིམས་ལྟར་ཐག་གཅོད་བྱ་རྒྱུ་ཡིན་ལུགས་བསྒྲགས་འདུག

གསར་འགོད་པ། པདྨ་མཚོ།