ཀིམ་ཇོང་ཨང་སྔར་བཞིན་མགོ་ཁྲིད་ཡིན།

ཉེ་ལམ་དུས་ཡུན་གང་འཚམ་རིང་བྱང་ཀོ་རི་ཡའི་མགོ་ཁྲིད་མཐོང་རྒྱུ་མེད་པ་ཆགས་ཡོད་ཀྱང་དེ་རིང་ཁོང་གི་པར་འགའ་ཕྱི་ལོགས་སུ་བཏོན་ཏེ་མུ་མཐུད་བྱང་ཀོ་རི་ཡར་སྣེ་འཁྲིད་བྱེད་ཀྱིན་ཡོད་པའི་རྣམ་པ་བསྟན་ཡོད་འདུག

དེ་རིང་ཕྱི་ཚེས་ ༡༤ ཉིན་གྱི་སྔ་དྲོར་བྱང་ཀོ་རི་ཡའི་དབུས་གསར་འགྱུར་ལས་ཁང་གིས་འགྲེལ་བཤད་ཁ་གསལ་མེད་པའི་ཐོག་ནས་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨང་ (Kim Jong-un)ལག་རྟེན་ནག་པོ་ཞིག་ལ་བརྟེན་ཏེ། ཉེ་ཆར་གསར་འཛུགས་བྱས་པའི་ཚན་རིག་པའི་སྡོད་ཁང་ཁག་ཅིག་ཏུ་ལྟ་སྐོར་བྱེད་ཀྱིན་པའི་པར་གསར་པ་འགའ་བཏོན་ཏེ། ཁོ་རང་གི་གཟུགས་པོ་བདེ་ཐང་ཡིན་པ་དང་མུ་མཐུད་བྱང་ཀོ་རི་ཡའི་མགོ་ཁྲིད་ཡིན་པའི་རྣམ་པ་བསྟན་ཡོད་འདུག

དེ་ནི་ཟླ་སྔོན་མའི་ཚེས་ ༣ ཉིན་ནས་བཟུང་ཉིན་ ༤༠ ལྷག་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ནང་། བྱང་ཀོ་རི་ཡའི་མགོ་ཁྲིད་ཀིམ་ཇོང་ཨང་ལ་གྲུམ་བུའམ་གཅིན་སྙི། དཔྱི་ཚིགས་གང་རུང་གི་ན་ཚའི་དབང་གིས་སྨན་བཅོས་དང་ངལ་གསོ་རྒྱག་དགོས་བྱུང་ཡོད་པ་དང་། ཡང་ན་དམག་མིས་གྱེན་ལོག་བྱས་ཏེ་ཀིམ་ཚང་གི་སྲིད་དབང་སྒེར་གཅོད་གཞུང་མགོ་རྟིང་སློག་ཡོད་པའི་གནས་ཚུལ་ཞིག་ཁྱབ་ཡོད།

ཟླ་སྔོན་མའི་ཚེས་ ༩ ཉིན་བྱང་ཀོ་རི་ཡ་དབུ་བརྙེས་པའི་དུས་དྲན་མཛད་སྒོ་དང་། ཟླ་འདིའི་ཚེས་ ༡༠ ཉིན་བྱང་ཀོ་རི་ཡ་ངལ་རྩོལ་ཚོགས་པ་དབུ་བརྙེས་པའི་དུས་དྲན་གཉིས་སྟེང་། ལོ་ལྟར་རྒྱལ་ཁབ་ཀྱི་མགོ་ཁྲིད་གཙོས་སྲིད་གཞུང་ལས་བྱེད་པ་དང་མི་མང་འདུ་འཛོམས་བྱེད་ཀྱིན་ཡོད་ཀྱང་། ད་རེབ་ཀིམ་ཇོང་ཨང་མཛད་སྒོའི་སྟེང་མཉམ་ཞུགས་བྱས་མེད་པ་དང་། འདིའི་ཐད་ལྷོ་ཀོ་རི་ཡའི་ནང་ཡོད་པའི་བྷེ་བྷེ་སེ་གསར་འགོད་པས་བརྗོད་དོན། ཐེངས་འདིར་ཕྱི་ལོགས་བཏོན་པའི་ཀིམ་ཇོང་ཨང་གི་པར་དེ་དག་ཁོ་རང་གི་ངོ་མ་ཡིན་པ་དང་། ད་ལྟ་ཁོ་རང་དངོས་སུ་གོམ་པ་རྒྱག་ཐུབ་མིན་ཚོད་དཔག་བྱེད་དཀའ་ཡང་། པར་དེ་དག་གིས་ཁོ་ད་དུང་བྱང་ཀོ་རི་ཡའི་ནང་དབང་ཆ་ཆེས་ཤོས་ཀྱི་མི་སྣ་ཡིན་པ་མཚོན་ཐུབ་ཀྱི་ཡོད། ཅེས་སོགས་བརྗོད་འདུག

ལྷོ་ཀོ་རི་ཡའི་ཨེན་ཇེ་གཙུག་ལག་སློབ་གྲྭའི་བྱང་ཀོ་ར་ཡའི་ཆེད་མཁས་ཀིམ་ཡུང་ཆོ་ (Kim Yeon-Chul) ལགས་ཀྱིས་གསར་འགོད་པར། ད་ལྟའི་ཆར་ཀིམ་ཇོང་ཨང་ལ་དོན་དངོས་ཐོག་ན་ཚ་ག་རེ་ཕོག་ཡོད་མེད་དང་། ད་ལྟ་ཁོའི་གཟུགས་པོ་དྲག་སྐྱེད་བྱུང་ཡོད་མེད་གསལ་བོ་མེད། ཨ་རི་དང་ལྷོ་ཀོ་རི་ཡ། རྒྱ་ནག་གསུམ་གྱིས་མཉམ་འབྲེལ་ཐོག་ནས་ཞིབ་འཇུག་བྱས་པ་ལྟར་ན། ཁོས་སྔར་བཞིན་བྱང་ཀོ་རི་ཡའི་དབང་ཆ་བཟུང་ཡོད་ཅེས་བརྗོད་འདུག

བྱང་ཀོ་རི་ཡའི་སྲིད་དོན་ཆེད་མཁས་ཇོན་ཌེབ་ལོ་རེ་ (John Delury) ལགས་ཀྱིས། ཀིམ་ཇོང་ཨང་གི་གཟུགས་པོའི་གནས་སྟངས་སྐྱོ་བོ་ཡིན་སྟབས། གཞུང་འཛིན་ཚོགས་པས་སོ་སོའི་མགོ་ཁྲིད་ཀྱི་གཟུགས་པོས་ལྕོགས་ཀྱི་མེད་དུས་གཞན་ལ་སྟོན་འདོད་ཡོད་པ་མ་རེད། གལ་སྲིད། གནས་ཚུལ་གྱི་དབང་གིས་སྲིད་གཞུང་མགོ་རྟིག་བསློག་ཡོད་ཚེ་ངེས་པར་གསང་བའི་གནས་ཚུལ་གང་རུང་ཞིག་ཕྱིར་ཐོན་ངེས་ཡིན་ཞེས་བརྗོད་འདུག

ནེའུ་ཡོག་དང་ལྷོ་བྱང་ཀོ་རི་ཡའི་ནང་ཡོད་པའི་བྱང་ཀོ་རི་ཡའི་གཞུང་འབྲེལ་མི་སྣ་དག་གིས། ཉེ་ལམ་གསར་འགྱུར་བརྒྱུད་ལམ་ཁག་དང་སྲིད་དོན་ཉམས་ཞིབ་པ་ཚོས་ཀིམ་ཇོང་ཨང་གི་གཟུགས་པོ་བདེ་ཐང་མེད་པའམ་སྲིད་གཞུང་མགོ་རྟིང་སློག་པའི་དཀྲོག་གཏམ་དེས། བྱང་ཀོ་རི་ཡའི་དམར་ཤོག་སྲིད་གཞུང་ཁ་འཐོར་དགུ་འཐོར་གཏོང་རྩིས་ཡོད་པ་རེད་ཅེས་བརྗོད་བྱས་འདུག

ཀིམ་ཇོང་ཨང་གི་འཕྲོད་བསྟེན་ཐད་ཁོང་གི་སྤོ་སྤོ་ཀིམ་སུང་ (Kim II Sung) གི་མི་སྒེར་སྨན་པ་ཀིམ་སོ་ཡུང་ (Kim So-Yeon) ལགས་ཀྱིས་སེ་ཨན་ཨན་ (CNN) གསར་འགོད་པར། ཁོའི་ཨ་ཕ་དང་སྤོ་སྤོ་གཉིས་ལ་གྲུམ་བུ་དང་གཅིན་སྙི། སྙིང་གི་ན་ཚ་བཅས་ཡོད་པར་བརྟེན། ཁོ་ལ་གོང་གི་རིགས་རྒྱུད་ན་ཚ་ཡོད་པའི་སྒང་ལ་སེམས་ཁམས་དང་གཟུགས་པོ་རྒྱགས་པའི་ན་ཚ་ཡང་འདུག་ཅེས་བརྗོད་འདུག

སྔོན་ཆད་ཀིམ་ཇོང་ཨང་ཐེངས་གཉིས་ལ་མང་ཚོགས་ཀྱི་མཐོང་ཡུལ་དུ་མ་མངོན་པ་ཆགས་མྱོང་ཡོད་ཅིང་། དེ་དག་ནི་ ༢༠༡༢ ལོའི་ཟླ་ ༦ ཚེས་ ༧ ཉིན་ནས་ཟླ་ ༧ ཚེས་ ༡ ཉིན་བར་ཐེངས་གཅིག་དང་། ༢༠༡༡ ལོའི་ཟླ་ ༧ ཚེས་ ༢༨ ནས་ཟླ་ ༨ ཚེས་ ༢༧ ཉིན་བར་ཐེངས་གཉིས་པ་དེ་ཆགས་ཡོད་པ་དང་། ད་རེབ་ཐེངས་གསུམ་པ་དེ་ཡིན་འདུག

གསར་འགོད་པ། ལྷ་སྐྱབས་རྒྱལ།