ཁ་སང་རྒྱ་གཞུང་གིས་དེང་སྐབས་རྒྱ་ནག་ནང་དབུལ་ཕོངས་རྫོང་ཁྱོན་ ༥༩༢ ཡོད་པ་དང་། རྒྱལ་ཡོངས་ཀྱི་དབུལ་ཕོངས་རྫོང་མང་ཤོས་བོད་རང་སྐྱོང་ལྗོངས་སུ་དབུལ་རྫོང་ ༧༤ ཡོད་ལུགས་བསྒྲགས་འདུག
རྒྱ་ནག་གི་གཞུང་འབྲེལ་གསར་ལམ་ཁག་ནས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་ལས་སྒྲུབ་ཁང་གིས་གསར་འགོད་ལྷན་ཚོགས་ཤིག་བསྐོངས་བའི་ཐོག རྒྱལ་སྲིད་སྤྱི་ཁྱབ་ཁང་དབུལ་སྐྱོར་ལས་ཁུངས་ཀྱི་མགོ་ཁྲིད་གཞོན་པ་ཀྲིན་ཝིན་ཁེ་ཡིས། རྒྱ་ནག་གི་དབུལ་ཕོངས་ཚད་གཞི་ལྟར་ན། དེང་སྐབས་རྒྱ་ནག་ནང་ཁྱོན་དབུལ་པོ་འབུམ་ ༨༢༠ ལྷག་ཡོད་པ་དང་། ཁོ་ཚོའི་ཡོང་འབབ་དམའ་བ་ཙམ་མ་ཟད། ས་ཁུལ་ཁག་ཅིག་ཏུ་བཟའ་བཏུང་དང་ལམ་ཀ། གློག སློབ་གྲྭ། སྨན་བཅོས་བཅས་ཀྱི་མཐུན་རྐྱེན་ཐོག་དཀའ་ངལ་ཆེན་པོ་ཡོད་པའི་ཁར། ཁོ་ཚོ་མང་ཆེ་བ་རང་བྱུང་གི་གནོད་སྐྱོན་མང་ཞིང་རྨང་གཞིའི་འཛུགས་སྐྲུན་རྗེས་ལུས་ཡིན་པའི་མཐའ་འཁོབ་ཁག་ཏུ་འཚོ་བ་སྐྱེལ་བཞིན་ཡོད་སྟབས། དཀའ་ངལ་ཐག་གཅོད་བྱེད་པར་དཀའ་ཁག་ཆེན་པོ་ཡོད་སྐོར་བརྗོད་འདུག
ཡང་ཚོགས་ཐོག་ཏུ་རྒྱལ་སྤྱིའི་ཚད་གཞི་ལྟར་རྩིས་ན། ད་སྐབས་རྒྱ་ནག་ནང་དབུལ་བོ་ཁྱོན་དུང་ཕྱུར་ ༢ ཙམ་ཡོད་པ་དང་། ཕྱི་ལོ་ ༡༩༨༦ ལོར་དབུལ་ཕོངས་རྫོང་ཁྱོན་ ༣༨༦ ལས་མེད་ཀྱང་། ༢༠༡༣ ལོར་རྫོང་ ༥༩༢ ལ་འཕར་སྣོན་བྱུང་སྟེ། རྒྱལ་ཡོངས་ཀྱི་སྤྱིའི་བསྡོམས་འབོར་ལས་བརྒྱ་ཆ་ ༡༠ ཡས་མས་ཟིན་ཡོད་པ་དང་། རྒྱ་ནག་ནང་དབུལ་ཕོངས་རྫོང་མང་ཤོས་ནི་བོད་རང་སྐྱོང་ལྗོངས་ཡིན་ཞིང་། དབུལ་ཕོངས་ཀྱི་གྲས་སུ་ཚུད་པའི་རྫོང་ ༧༤ ཡོད་པ་དང་། དེ་ནས་ཡུན་ནན་ཞིང་ཆེན་ནང་རྫོང་ཁག་ ༧༣ དང་། གཞན་མང་ཆེ་བ་སི་ཁྲོན་དང་ཧུའུ་པེ། ཀན་སུའུ་སོགས་ཀྱི་ནང་ཡོད་ཅིང་། དབུས་གཞུང་གིས་དབུལ་སྐྱོར་ལས་གཞི་སྤེལ་སའི་རྫོང་ཁྱོན་བསྡོམས་ ༨༠༠ ལྷག་ཡོད་སྐོར་སོགས་བསྒྲགས་ཡོད་འདུག
གནད་དོན་དེའི་ཐད་ཨ་རིའི་ལྷོ་ཁཱ་རོ་ལི་ནཱ་སློབ་ཆེན་(University of South Carolina)གྱི་དགེ་རྒན་ཆེན་མོ་ཞི་ཐེན་ལགས་ཀྱིས། དེང་སྐབས་ཀྱི་རྒྱལ་སྤྱིའི་ཚད་གཞི་ལྟར་ན། ཉིན་གཅིག་ལ་མི་རེའི་ཡོང་འབབ་ཨ་སྒོར་ ༢ ཡིན་པས། ཚད་གཞི་འདི་གཞིར་བཟུང་སྟེ་བརྩིས་ན། འཛམ་གླིང་རྒྱལ་ཁབ་ཁག་གི་དབུལ་ཕོངས་ཀྱི་མི་འབོར་དབྱེ་སྟངས་ལ་རིགས་མི་འདྲ་བ་གསུམ་དུ་ཡོད་པའི་དང་པོ་དབུལ་ཕོངས་མི་གྲངས་ཀྱིས་སྤྱིའི་གྲངས་འབོར་གྱི་བརྒྱ་ཆ་ ༢ མན་ཟིན་པ་དང་། གཉིས་པ་བརྒྱ་ཆ་ ༢ ནས་ ༥ ཟིན་པ། གསུམ་པ་བརྒྱ་ཆ་ ༦ ནས་ ༢༠ ཟིན་པ་བཅས་ཡིན་པས། དེང་སྐབས་རྒྱ་ནག་ནང་དབུལ་ཕོངས་མི་འབོར་དུང་ཕྱུར་ ༡ ནས་ ༢ ཙམ་ཡོད་པ་ངེས་གཏན་ཐུབ་པས། འཛམ་གླིང་གི་དབུས་ཕོངས་མི་འབོར་དབྱེ་སྟངས་ཀྱི་ཨང་རིམ་ ༣ པ་དེ་ཆགས་ཡོད། སྤྱིར་བཏང་ཕྱི་ལོ་ ༢༠༡༡ ལོའི་ལོ་མཇུག་ནས་བཟུང་རྒྱ་ནག་ནང་དབུལ་པོ་གཅིག་ལ་ལོ་རེར་ཆ་སྙོམས་ཡོང་འབབ་རྒྱ་སྒོར་ ༢༣༠༠ ལ་འཕར་ཡོད་ཀྱང་། རྒྱ་ནག་ནང་གི་དངོས་པོའི་རིན་གོང་ལ་བལྟས་ནས་བཤད་ན། ཉིན་རེར་མི་གཅིག་ལ་རྒྱ་སྒོར་ ༦ ཙམ་གྱི་ཡོང་འབབ་ནི་ཧ་ཅང་དབུལ་ཕོངས་རེད། ཅེས་བརྗོད་འདུག
རྒྱ་ནག་གཞུང་ཕྱོགས་ཀྱི་བརྒྱུད་ལམ་ཁག་ནས་འདི་ལོ་ནས་བཟུང་རྒྱ་ནག་ནང་ལོ་རེའི་ཕྱི་ཟླ་ ༡༠ ཚེས་ ༡༧ ཉིན་དབུལ་སྐྱོར་ཉིན་མོར་ངོས་འཛིན་གྱིས། སྲིད་གཞུང་གིས་དབུལ་ཕོངས་ལ་རོགས་སྐྱོར་གྱི་སྲིད་བྱུས་ཁག་ལ་བསྐྱར་ཞིབ་བྱས་ཏེ། དབུལ་ཕོངས་ཀྱི་གྲས་སུ་ཚུད་པའི་ཆ་རྐྱེན་དང་དབུལ་ཕོངས་ཀྱི་གནད་དོན་སེལ་བར་བྱ་དགའ་སྤྲོད་པ། དེ་བཞིན། དབུལ་ཕོངས་རྫོང་གི་ཞ་མོ་གྱོན་པའི་ཕྱུག་པོ་སོགས་ལ་ཞིབ་འཇུག་བྱ་རྒྱུ་ཡིན་སྐོར་བསྒྲགས་འདུག་ཀྱང་། གནད་དོན་དབྱེ་ཞིབ་པ་ཚོས། དབུལ་ཕོངས་ཀྱི་གནད་དོན་དེ་རྒྱ་ནག་གི་དཀའ་གནད་ཅིག་ཆགས་ཡོད་ལ། དབུལ་ཕོངས་ཏུ་གྱུར་བའི་རྒྱུ་རྐྱེན་ནི་ཧ་ཅང་རྙོང་ཟིང་ཆེན་པོ་ཡིན་པས། དབང་ཆ་གཅིག་སྡུད་ཀྱི་ལམ་ལུགས་འོག་གནད་དོན་དེ་ཐག་གཅོད་བྱེད་ཐབས་མེད་སྐོར་བརྗོད་ཀྱི་ཡོད་འདུག
གསར་འགོད་པ། པདྨ་མཚོ།
