བལ་ཡུལ་དུ་གངས་ཉིལ་བྱུང་།

ཁ་སང་ཧི་མ་ལ་ཡའི་རི་བརྒྱུད་དུ་གངས་ཉིལ་བྱུང་སྟེ་ཉུང་མཐར་མི་གྲངས་ ༢༩ རྐྱེན་ལམ་དུ་ཤོར་བ་དང་། མི་མང་པོ་གར་སོང་ཆ་མེད་དུ་གྱུར་ཡོད་འདུག

ཁ་སང་སྔ་དྲོར་ཧི་མ་ལ་ཡའི་རི་བརྒྱུད་ཀྱི་གངས་རི་ཨན་ནཱ་པུར་ནཱ་ (Annapurna)ཟེར་བར་གངས་ཉིལ་བྱུང་སྟེ། ཨི་ཛི་རལ་དང་ཁ་ན་ཌ། འཇར་མན། ཧྥ་རན་སི། རྒྱ་གར། ཕོ་ལན་ཌི་སོགས་ནས་ཡིན་པའི་གངས་འཛེགས་པ ༨ བཅས་ཉུང་མཐར་སྣེ་ཤན་པ་དང་གངས་འཛེགས་པ། ས་གནས་ཕྱུག་རྫི་སོགས་ཁྱོན་མི་གྲངས་ ༢༩ རྐྱེན་ལམ་དུ་ཤོར་བ་དང་། མི་གྲངས་ ༡༥ ཙམ་ལ་རྨས་སྐྱོན་ཕོག་ཡོད་པ་མ་ཟད། མི་མང་པོ་གར་སོང་ཆ་མེད་དུ་གྱུར་ཡོད་སྟབས། ད་ལྟའི་ཆར་བལ་པོའི་གཞུང་གིས་ཐད་འཕུར་གནམ་གྲུ་གཉིས་ཆེད་གཏོང་གིས་མྱུར་སྐྱོབ་དང་བོར་བརླག་ཏུ་ཕྱིན་པ་ཚོ་འཚོལ་བཞིན་ཡོད་འདུག

མྱུར་སྐྱོབ་ནང་ཞུགས་པའི་ལས་བྱེད་ཅིག་གིས། མི་རྐྱེན་འདས་ཀྱི་གྲངས་འབོར་མུ་མཐུད་འཕར་རྒྱུ་ཡིན་ལ། དེ་ནི་ད་ལོར་གངས་འཛེགས་ཁྲོད་མི་རྐྱེན་འདས་ཀྱི་གྲངས་འབོར་མང་ཤོས་དེ་ཆགས་ཡོད་པ་དང་། སྤྱིར་བཏང་ཕྱི་ཟླ་ ༡༠ ནི་གངས་འཛེགས་ཀྱི་དུས་ཚིགས་ཡག་ཤོས་ཤིག་ཡིན་ཡང་། འདས་པའི་ཉིན་ ༢ རིང་བལ་ཡུལ་དུ་ཆར་པ་ཤུགས་ཆེན་བབས་པའི་རྐྱེན་གྱིས་དོན་རྐྱེན་དེ་བྱུང་ཡོད་སྐོར་བརྗོད་འདུག

གསར་འགོད་པ། པདྨ་མཚོ།