བོད་ནང་འཁྲབ་བཞིན་པའི་༼རྒྱུན་བུའི་སྟེང་གི་རྣམ་ཤེས༽ཞེས་པའི་གློག་བརྙན་འཁྲབ་སྟོན་ཁྲོད་ཡུ་མོ་ཞིག་བསད་དེ་འཁྲབ་སྟོན་བྱས་པར་མི་མང་པོས་སྐྱོན་བརྗོད་བྱེད་བཞིན་འདུག
བོད་ནང་དུ་༼རྒྱུན་བུའི་སྟེང་གི་རྣམ་ཤེས༽ཟེར་བའི་གློག་བརྙན་ཞིག་འཁྲབ་སྟོན་བྱེད་བཞིན་ཡོད་པ་དང་། ཉེ་སྔོན་གློག་བརྙན་དེའི་འཁྲབ་ཁྲིད་པ་ཀྲང་དབྱང་ཟེར་བའི་རྒྱ་མི་ཞིག་གིས། འཁྲབ་སྟོན་པ་ཞིག་ལ་ཡུ་མོ་ཞིག་བཙན་གྱིས་གསོད་དུ་བཅུག་པའི་པར་རིས་སོགས་དྲ་ལམ་དུ་ཁྱབ་རྗེས། གློག་བརྙན་འཁྲབ་སྟོན་པ་སོགས་མི་མང་པོས་སེམས་ཅན་གྱི་ཚེ་སྲོག་ལ་སྣང་ཆུང་བྱས་པའི་སྐྱོན་བརྗོད་བྱེད་ཀྱི་ཡོད་པ་མ་ཟད། འབྲེལ་ཡོད་ལས་ཁུངས་ཀྱིས་གློག་བརྙན་འཁྲབ་སྟོན་ཚོགས་པ་དེར་ཁྲིམས་ཆད་གཅོད་དགོས་པའི་རེ་བའང་འདོན་གྱི་འདུག
ཟླ་འདིའི་ཕྱི་ཚེས་ ༢༢ ཉིན་གྱི་ཕྱི་དྲོར་གློག་བརྙན་འཁྲབ་ཁྲིད་པ་ཀྲང་དབྱང་ཟེར་བ་དེས་གསར་འགོད་པར། འཁྲབ་གཞུང་གི་དགོས་མཁོ་ལྟར་ཡུ་མོ་ཞིག་བསད་པ་ཡིན། ཡིན་ནའང་། ཡུ་མོ་དེ་འཁྲབ་སྟོན་ཚོགས་པས་རྒྱ་ནག་ནང་ལོགས་ཀྱི་ཤྭ་བའི་ར་བ་ཞིག་ནས་ཆེད་དུ་ཉོས་ཡོང་བ་ཡིན་ལ། ད་ལྟ་ལོ་ ༣ ལ་སོན་ཡོད་པས་གསོད་ཆོག་པའི་ལོ་ཚད་ལོན་ཡོད། བརྒྱུད་ལམ་ཁག་ནས་ཡུ་མོ་སྦྲུམ་མ་ཞིག་ཡིན་ཚུལ་བརྗོད་པ་དེ་བདེན་པ་མ་རེད། ང་ཚོས་ཡུ་མོ་དེ་གསོད་སྐབས་སྦྲིད་སྨན་བརྒྱབ་ནས་སྡུག་བསྔལ་ཆུང་ཐབས་བྱས་ཡོད་པ་མ་ཟད། བསད་ཚར་རྗེས་ཀྱང་བྱས་རྗེས་ཅན་དུ་བརྩིས་ཏེ་ཕུང་པོ་ས་འོག་ཏུ་སྦས་བ་ཡིན། ཡུ་མོ་དེ་གསོད་སྐབས་འཁྲབ་སྟོན་པ་ཚང་མར་སྐྱོ་སྣང་ཆེན་པོ་བྱུང་། ཡིན་ནའང་། འཁྲབ་གཞུང་གི་དགོས་མཁོ་ལྟར་ལག་བསྟར་བྱས་པ་ཡིན། ཡུ་མོའི་ཕུང་པོ་ས་འོག་ཏུ་སྦས་སྐབས་བོད་རིགས་འཁྲབ་སྟོན་པ་ཚོས་བསྔོ་སྨོན་བྱས་སོང་། ཞེས་དང་། བརྒྱུད་ལམ་ཁག་ཏུ་ཁྱབ་པའི་འབྲེལ་ཡོད་ཀྱི་གནས་ཚུལ་རྣམས་གསུབ་དགོས་སྐོར་བརྗོད་ཡོད་འདུག
ཡང་ཀྲང་དབྱང་ཟེར་བ་དེས། ཐེངས་འདིའི་གློག་བརྙན་འཁྲབ་སྟོན་གྱི་གཙོ་གཉེར་བ་དེ་སྲོག་གཅོད་ལ་ཅི་ཡང་མི་འཛེམས་མཁན་ཞིག་ཡིན་ཡང་། གནད་དོན་མང་པོའི་བྱུང་རིམ་ཁྲོད་རིམ་གྱིས་ཁོ་བོའི་བརྒྱུད་ལ་དད་མོས་བསླེབས་ཡོད་པ་མ་ཟད། ༼རྒྱུན་བུའི་སྟེང་གི་རྣམ་ཤེས༽ཟེར་བའི་གློག་བརྙན་དེ་འཁྲབ་སྟོན་ཆེད་ཤྭ་བ་གཉིས་ཉོས་ཡོད་ཀྱང་། ཤྭ་བ་གཞན་དེ་མ་འོངས་པར་གློག་བརྙན་འཁྲབ་ཚར་རྗེས་ཕོ་བྲང་པོ་ཏ་ལའི་མདུན་དུ་ཚེ་ཐར་གཏོང་རྒྱུ་ཡིན་སྐོར་ཡང་བརྗོད་ཡོད་འདུག
རྒྱ་ནག་གི་གློག་བརྙན་གྲགས་ཅན་༼རྒྱལ་ཁབ་གསུམ་གྱི་གཏམ་རྒྱུད༽སོགས་རྒྱའི་གློག་བརྙན་མང་པོའི་ནང་། སེམས་ཅན་ལ་མནར་གཅོད་དང་ཤི་རྨས་ཀྱི་གནད་དོན་རིམ་པར་བྱུང་ཡོད་ཀྱང་། ད་ལྟའི་བར་སེམས་ཅན་སྲུང་སྐྱོབ་ཚོགས་པ་མང་པོ་མཉམ་འབྲེལ་གྱིས། གློག་བརྙན་འཁྲབ་སྟོན་ཁྲོད་སེམས་ཅན་གསོན་པོ་ཡིས་ཉེན་འཚབ་ཆེ་བའི་འཁྲབ་སྟོན་ལག་ཆ་བྱེད་མི་ཆོག་པའི་བསྒྲགས་གཏམ་སྤེལ་ཡོད་པ་ཙམ་ལས། རྒྱ་གཞུང་གིས་གཏན་འབེབས་བྱས་པའི་༼གློག་བརྙན་དོ་དམ་སྲོལ་ཡིག༽དང་༼བརྙན་འཕྲིན་ཟློས་གར་ཞིབ་བཤེར་དོ་དམ་གཏན་འབེབས༽ཞེས་པ་སོགས་ཀྱི་ཁྲིམས་ཡིག་ནང་། གློག་བརྙན་འཁྲབ་སྟོན་ཁྲོད་སེམས་ཅན་ལ་སྲུང་སྐྱོབ་དགོས་པའི་སྐོར་གྱི་གཏན་འབེབས་གང་ཡང་བྱས་མེད་པ་རེད།
གསར་འགོད་པ། པདྨ་མཚོ།
