ཁ་སང་ཨ་རིའི་གཞུང་གིས་ཨ་ཧྥི་རི་ཀའི་ནང་འགྲོ་མྱོང་མཁན་ནེའུ་ཡོག་གི་སྨན་པ་ཞིག་ལ་ཨི་བྷོ་ལཱ་ནད་ཡམས་འགོས་ཡོད་པ་ཕྱིར་བསྒྲགས་བྱས་འདུག
ཟླ་འདིའི་ཚེས་ ༡༤ ཉིན་རྒྱལ་མཚམས་མེད་པའི་སྨན་པའི་ལྷན་ཚོགས་ཀྱི་ཨ་རིའི་སྨན་པ་སི་པན་སར་ (Dr Craig Spencer) ལགས་ཨི་བྷོ་ལཱ་ནད་ཡམས་ཁྱབ་བརྡལ་འགྲོ་ཡུལ་ཨ་ཧྥི་རི་ཀའི་ནུབ་ཕྱོགས་རྒྱལ་ཁབ་གྷི་ནཱ་ (Guinea) ནང་བསྐྱོད་དེ། ནད་ཡམས་དེ་འགོས་ཡོད་པའི་ནད་པ་ཚོར་སྨན་བཅོས་ཀྱི་ལས་དོན་བསྒྲུབས་ཏེ། ཚེས་ ༡༧ ཉིན་ཡུ་རོབ་རྒྱལ་ས་བྷར་སལ་བརྒྱུད་ཕྱིར་ཨ་རིར་ལོག་ཡོད་ཀྱང་། ཁ་སང་ཚེས་ ༢༣ ཉིན་གཟུགས་པོ་ཐང་ཆད་པ་དང་ཚ་བ་འཕར་བ། བཤལ་བ་སོགས་ཀྱི་གནས་ཚུལ་བྱུང་སྟེ་སྨན་ཁང་བརྟག་དཔྱད་གཏོང་སྐབས་ཨི་བྷོ་ལཱ་ནད་ཡམས་འགོས་ཡོད་པའི་མཇུག་འབྲས་ཐོན་ཡོད་པ་གསལ་བསྒྲགས་བྱས་འདུག ཁོང་ནི་ཨ་རིའི་ནང་ཨི་བྷོ་ལཱ་ནད་ཡམས་ཕོག་མཁན་བཞི་པ་དང་། ནེའུ་ཡོག་གྲོང་ཁྱེར་གྱི་ཨང་དང་པོ་དེ་ཆགས་ཡོད་འདུག ད་ལྟ་ཁོང་ནེའུ་ཡོག་གྲོང་ཁྱེར་གྱི་སྨན་ཁང་ (Bellevue Hospital) ཞེས་པའི་ནང་སྨན་བཅོས་བྱེད་བཞིན་ཡོད་འདུག
འདིའི་ཐད་མདང་དགོང་ནེའུ་ཡོག་གྲོང་ཁྱེར་གྱི་སྤྱི་ཁྱབ་བྷེལ་ཌི་ (Bill de Blasio) ཡིས་གསར་ལམ་དུ་བརྗོད་དོན། “ད་ལྟ་རྒྱལ་སྤྱིའི་ཐོག་ཨི་བྷོ་ལཱ་ནད་ཡམས་འདི་ཉེན་འཚབ་ཆེ་བའི་གནས་སྟངས་ཤིག་ཆགས་བཞིན་ཡོད་ཀྱང་། གལ་ཏེ་ནེའུ་ཡོག་གི་གྲོང་མི་ཚོར་ནད་ཡམས་ཕོག་མཁན་གྱི་རྔུལ་ཁྲག་སོགས་མ་འགོས་པ་ཡིན་ན་ནད་ཡམས་འདི་མི་ཕོག་སྟབས། གྲོང་མི་ཚོས་གནད་དོན་འདིར་འདྲོག་མགོ་ལངས་དགོས་དོན་མེད།”ཅེས་དང་། ནེའུ་ཡོག་གྲོང་ཁྱེར་གྱི་སྲིད་སྐྱོང་ཨན་ཌེའུ་ (Andrew Cuomo) ཡིས། “ཨ་རིའི་ནང་ཨི་བྷོ་ལཱ་ནད་ཡམས་ཁྱབ་བརྡལ་ཕྱིན་པ་དེ་གློ་བུར་དུ་བྱུང་བ་ཞིག་མིན་སྟབས། མ་འོངས་པར་གཞུང་སྒེར་གཉིས་ཀྱིས་ནད་གཞི་འདིར་དོ་སྣང་དང་བཀག་སྡོམ་ཐོག་ཤུགས་རྒྱག་དགོས། ནེའུ་ཡོག་ནང་ཨི་བྷོ་ལཱ་ནད་ཡམས་ཕོག་མཁན་སྨན་པ་སི་པན་སར་དང་འབྲེལ་བ་ཡོད་མཁན་མི་བཞི་ཡོད་སྟབས། ད་ལྟ་ང་ཚོས་ཁོ་ཚོར་ནད་ཡམས་དེ་ཕོག་ཡོད་མེད་བརྟག་དཔྱད་བྱེད་བཞིན་ཡོད།”ཅེས་བརྗོད་འདུག
ཉེ་ལམ་ཨ་རིའི་ནང་ནད་ཡམས་འདི་འགོས་ཡོད་པའི་ནད་པ་ཁག་གཅིག་གཉིས་ཤིག་འཐོན་པ་དང་བསྟུན་ཏེ། ཨ་རིའི་སྤྱི་མཐུན་ཚོགས་པ་གཙོས་པའི་ཆབ་སྲིད་ཚོགས་པ་དང་། མང་ཚོགས་ཁྲོད་ཨོ་བྷ་མའི་གཞུང་ལ་སྐྱོན་བརྗོད་བྱེད་མགོ་ཚུགས་ཡོད་ཅིང་། ནད་ཡམས་འདི་ཧ་ཅང་ཉེན་ཁ་ཅན་ཞིག་ཡིན་པ་ཤེས་བཞིན་དུ་ཨོ་བྷ་མའི་གཞུང་གིས་མང་ཚོགས་འགྲོ་སྐྱོད་ལ་དོ་ནན་མི་བྱེད་པ་དེ་ནི་ཨ་རིའི་རྒྱལ་དམངས་ཀྱི་འཕྲོད་བསྟེན་ལ་འགན་མ་འཁུར་བའི་བྱེད་སྟངས་ཤིག་ཡིན་སྐོར་སོགས་རྗོད་བཞིན་ཡོད་འདུག
འདི་ལོའི་ཕྱི་ཟླ་ ༣ པར་ཨི་བྷོ་ལཱ་ནད་ཡམས་འདི་ཨ་ཧྥི་རི་ཀའི་ནུབ་ཕྱོགས་གྷི་ནི (Guinea)དང་། ལེ་བྷི་རི་ཡ་(Liberia)། སི་ར་ལོན་ (Sierra Leone)། ནེ་ཇི་རེ་ཡ་(Nigeria) སོགས་ནང་ཁྱབ་བརྡལ་ཕྱིན་ཏེ། ཟླ་འདིའི་ཚེས་ ༢༣ ཉིན་བར་མི་ ༤༨༠༠ ལྷག་ཤི་ཡོད་པ་དང་། ད་ལྟ་མི་ ༡༢༩༧༦ ལྷག་ལ་ནད་ཡམས་དེ་འགོས་ཁྱབ་ཕྱིན་ཡོད་འདུག ད་བར་ཨ་རིའི་ནང་ནད་ཡམས་འདི་ཕོག་མཁན་མི་ ༤ ཙམ་བྱུང་སྟེ། མི་གཅིག་ཤི་ཡོད་པ་དང་། ཁ་སང་སྨན་པ་ཞིག་ལ་ནད་ཡམས་ཕོག་ཡོད་སྟབས། ཨ་རིའི་སྲིད་འཛིན་ཨོ་བྷ་མས་ནེའུ་ཡོག་གྲོང་ཁྱེར་གྱི་སྤྱི་ཁྱབ་ལ་ཁ་པར་བཏང་སྟེ། ནད་ཡམས་ཕོག་མཁན་དེར་གཞུང་ཕྱོགས་ནས་སྨན་བཅོས་མཐུན་རྐྱེན་གང་ཐུབ་སྦྱོར་དགོས་སྐོར་བརྗོད་འདུག
ཨི་བྷོ་ལཱ་ནད་ཡམས་འདི་ཨ་ཧྥི་རི་ཀའི་ཡུལ་གྲུ་ཁག་ཅིག་ཏུ་ཁྱབ་བརྡལ་ཆེན་པོ་ཕྱིན་ཡོད་ཀྱང་། ཡུལ་གྲུ་འགའ་ཞིག་གིས་སྔོན་འགོག་ལེགས་པོ་བྱས་ཡོད་སྟབས། ནད་ཡམས་འདི་ཁྱབ་བརྡལ་ཕྱིན་མེད་ཀྱང་། ཟླ་འདིའི་ཚེས་ ༢༣ ཉིན་ཨ་ཧྥི་རི་ཀའི་རྒྱལ་ཁབ་མཱ་ལི་ (Mali) ནང་ལོ་གཉིས་ཅན་གྱི་བུ་མོ་ཞིག་ལ་ནད་དེ་ཕོག་ཡོད་སྟབས། མཱ་ལི་ནི་ཨ་ཧྥི་རི་ཀའི་ནང་གི་ནད་ཡམས་ཁྱབ་ཡུལ་རྒྱལ་ཁབ་ཨང་ ༦ དེ་ཆགས་ཡོད་འདུག
ཁ་སང་སུད་སི་རྒྱལ་ས་ཇི་ནི་ཝ་ནང་རྒྱལ་སྤྱིའི་འཕྲོན་བསྟེན་ལྷན་ཚོགས་ཀྱིས་ཚོགས་འདུ་ཞིག་འདུ་བསྐོངས་ཏེ། ཟླ་ ༡༢ པའི་ཟླ་མཇུག་ཏུ་ཨི་བྷོ་ལཱ་ནད་ཡམས་སྔོན་འགོག་སྨན་ཁབ་གསར་བཟོ་ཐུབ་པ་བྱ་རྒྱུ་མ་ཟད། ཉེ་ལམ་གསར་བཟོ་བྱས་པའི་སྨན་ཁབ་གཉིས་ཀྱིས་ནད་ཡམས་དེ་སྔོན་འགོག་ཐུབ་རྒྱུར་ཡིད་ཆེས་དང་། ད་བར་ཨི་བྷོ་ལཱ་ནད་ཡམས་རྐྱེན་པས་རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱི་འཕྲོད་ལས་པ་ ༤༤༣ ལ་ནད་ཡམས་དེ་འགོས་ཡོད་པ་མ་ཟད། དེ་དག་ཁྲོད་ནས་འཕྲོད་ལས་པ་ ༢༤༤ རྐྱེན་འདས་ཕྱིན་ཡོད་སྐོར་བསྒྲགས་འདུག
གནད་དོན་དབྱེ་ཞིབ་པ་ཚོས། ད་ལྟ་ཨི་བྷོ་ལཱ་ནད་ཡམས་འདི་ཨ་ཧྥི་རི་ཀ་ཙམ་མ་ཟད། རྒྱལ་ཁབ་གཞན་མང་པོ་ཞིག་ལ་ཁྱབ་བཞིན་ཡོད་སྟབས། གལ་ཏེ་རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱིས་གང་མགྱོགས་བཅོས་ཐབས་མ་བྱས་ཚེ་མི་མང་པོ་ཞིག་གི་ཚེ་སྲོག་ཤོར་རྒྱུ་ཡིན་སྐོར་བརྗོད་འདུག
གསར་འགོད་པ། དོན་གྲུབ།
