འགྲོ་བ་མིའི་ཐོབ་ཐང་ལ་རྡོག་རོལ་གཏོང་མི་ཆོག

ཨ་རིའི་མངའ་སྡེ་ཁག་ཅིག་གིས་ཨི་བྷོ་ལཱ་ནད་ཡམས་ཁྱབ་ཡུལ་ནས་ཚུར་ལོག་མཁན་ཚོ་ཟུར་བཀག་གིས་བརྟད་དཔྱད་གཏོང་བཞིན་ཡོད་པ་དེར་མཉམ་འབྲེལ་རྒྱལ་ཚོགས་ཀྱིས་སྐྱོན་བརྗོད་བྱས།

ཉེ་ཆར་ཨ་རིའི་ནེའུ་ཡོག་དང་ནེའུ་ཇར་སིལ་གཙོས་པའི་མངའ་སྡེ་ཁག་ཅིག་གིས་ཨི་བྷོ་ལཱ་ནད་ཡམས་ཁྱབ་ཡུལ་ཨ་ཧྥི་རི་ཀའི་ཡུལ་ཁག་ནས་ཕྱིར་ལོག་པའི་ཨ་རིའི་སྨན་པ་དང་སྨན་ཞབས་པ་ཚོ་ཟུར་བཀག་གིས་བརྟག་དཔྱད་གཏོང་གི་ཡོད་སྟབས། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྒྲིག་འཛུགས་ཁག་གིས་བྱེད་སྟངས་དེར་སྐྱོན་བརྗོད་ཡོང་གི་ཡོད་སྟབས། ཁ་སང་ཨ་རིའི་གཞུང་ནད་བཅོས་སྔོན་འགོག་ཚོགས་ཆུང་གིས་ཨི་བྷོ་ལཱ་ནད་ཡམས་ཁྱབ་ཡུལ་ཨ་ཧྥི་རི་ཀའི་རྒྱལ་ཁབ་ཁག་ནས་ཕྱིར་ལོག་མཁན་ཚོར་རྟོག་ཞིབ་བྱེད་ཕྱོགས་ཀྱི་རྩ་འཛིན་ཡིག་ཆ་ཞིག་བསྒྲགས་ཡོད་འདུག

མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་གྱི་མགྲིན་ཚབ་པ་སི་ཌེ་ཧྥན་ (Stephane Dujarric) གྱིས། “ཨི་བྷོ་ལཱ་ནད་ཡམས་ཁྱབ་ཡུལ་གྱི་ཨ་ཧྥི་རི་ཀའི་རྒྱལ་ཁབ་ཁག་ནས་ནད་བཅོས་སྲོག་སྐྱོབ་བྱས་ཏེ། ཕྱིར་ལོག་མཁན་དག་ནི་དཀའ་ངལ་ནང་ལྷུང་ཡོད་པའི་མི་མང་ལ་ཞབས་ཞུ་སྒྲུབ་མཁན་ཡིན་སྟབས། གཞུང་གིས་ཟུར་བཀག་བྱས་པ་དེ་ནི་འགྲོ་བ་མིའི་བཟང་སྤྱོད་དང་འགལ་ཡོད་སྟབས། རྒྱལ་སྤྱིའི་སྤྱི་ཚོགས་ཀྱིས་ངོས་ལེན་བྱ་ཐབས་མེད།”ཅེས་དང་།  ཨ་རིའི་དབུས་གཞུང་ནད་བཅོས་སྔོན་འགོག་ཚོགས་ཆུང་གི་འགན་འཛིན་སྨན་པ་ཋོ་མཱ་སི་ (Dr. Thomas Frieden) ལགས་ཀྱིས། “ཨ་རིའི་གཞུང་གིས་ཨི་བྷོ་ལཱ་ནད་ཡམས་ཁྱབ་ཡུལ་གྱི་ཨ་ཧྥི་རི་ཀའི་རྒྱལ་ཁབ་ཁག་ནས་ཕྱིར་ཨ་རིར་ལོག་མཁན་ཚོ་ཟུར་བཀག་བྱས་པ་དེ་ཉིན་ ༢༡ རིང་ནད་འབུ་སྐྱེད་འཕེལ་གྱི་དུས་ཚོད་ཡོལ་བའི་བར་ཁོང་ཚོས་ལས་ཀ་དང་འགྲུལ་བཞུད་བྱེད་ཆོག་གི་མེད་པ་དང་། ལུས་ཁམས་ཀྱི་ཚ་བ་འཕར་གྱི་ཡོད་མེད་བརྟག་དཔྱད་གཏོང་ཆེད་ཡིན།”ཞེས་བརྗོད་འདུག

ནད་ཡམས་འདི་ད་ལོའི་ཕྱི་ཟླ་ ༣ པའི་ནང་ཐོག་མ་ཨ་ཧྥི་རི་ཀའི་ནུབ་ཕྱོགས་རྒྱལ་ཁབ་ཁག་ཅིག་ནང་ཁྱབ་བརྡལ་ཕྱིན་ཏེ། རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱིས་དེ་རིང་སྙན་ཐོ་བཏོན་པའི་ནང་། ད་བར་ཨི་བྷོ་ལཱ་ནད་ཡམས་ཀྱིས་འདས་གྲོངས་སུ་ཕྱིན་པ་ ༤༩༢༢ དང་། གཞན་མི་ ༡༣༩༨༣ ལྷག་ལ་ནད་ཡམས་དེ་འགོས་ཁྱབ་ཕྱིན་ཡོད་སྐོར་འཁོད་འདུག

ནད་ཡམས་ཁྱབ་ཡུལ་གྱི་ཨ་ཧྥི་རི་ཀའི་ནུབ་ཕྱོགས་རྒྱལ་ཁབ་ལི་བྷི་རི་ཡ་ནང་ཨ་རིའི་དམག་མི་ ༦༠༠ དང་། སི་ནི་གྷལ་(Senegal) ནང་དམག་མི་ ༡༠༠ ཙམ་ཡོད་པ་མ་ཟད། ད་དུང་བདུན་ཕྲག་རྗེས་མའི་ནང་ཡུལ་གྲུ་དེ་དག་ཏུ་ཨ་རིའི་དམག་མི་ ༣༢༠༠ ཙམ་མང་དུ་གཏོང་རྒྱུ་ཡིན་སྟབས། ཁ་སང་ཨ་རིའི་དམག་དོན་ལྷན་ཁང་གིས་ཨི་བྷོ་ལཱ་ནད་ཡམས་ཁྱབ་ཡུལ་ནས་ཕྱིར་ཨ་རིར་ལོག་མཁན་དམག་མི་དག་ལ་ཟུར་བཀག་གིས་བརྟག་དཔྱད་བྱ་རྒྱུ་ཡིན་སྐོར་བསྒྲགས་འདུག

གསར་འགོད་པ། དོན་གྲུབ།