རྒྱ་དམག་ཨ་རུ་ནཱ་ཅལ་ནང་སིམ་འཛུལ།

ཁ་སང་རྒྱ་ནག་དམག་གིས་ཨ་རུ་ནཱ་ཅལ་ནང་ཚུར་ལམ་ཁ་བཟོ་རྩིས་བྱེད་སྐབས་རྒྱ་གར་མཐའ་སྲུང་དམག་དཔུང་གིས་བཀག་འགོག་བྱས་ཏེ་ཕྱིར་ལོག་བྱས་ཡོད་འདུག

དེ་རིང་རྒྱ་གར་གསར་ལམ་ཁག་ཏུ་གནས་ཚུལ་ཐོན་པར། ཁ་སང་རྒྱ་གར་གྱི་ཤར་ཕྱོགས་ཨ་རུ་ནཱ་ཅལ་མངའ་སྡེའི་ཨ་སཱ་ཧྥེ་ལཱ་ (Asaphila) ས་ཁུལ་ནང་རྒྱ་ནག་བཅིངས་འགྲོལ་དམག་མི་ཁག་ཅིག་གིས་རླངས་འཁོར་འགའ་དང་ལམ་བཟོའི་ལག་ཆ་སོགས་སྐྱེལ་འདྲེན་བྱས་ནས་ལམ་ཁ་བཟོ་སྐབས།  རྒྱ་གར་མཐའ་སྲུང་དམག་གིས་བཀག་འགོག་བྱས་ཏེ་རྒྱ་དམག་དེ་དག་ཕྱིར་ལོག་བྱས་ཡོད་འདུག

ས་གནས་དམག་དཔུང་ལས་ཁུངས་ཀྱིས་རྒྱ་གར་དུས་བབ་གསར་འགོད་པར། ཐེངས་འདིར་ཟླ་སྔོན་མའི་ནང་རྒྱ་དམག་གིས་ལ་དྭགས་ཀྱི་ཆུ་དམར་ (Chumar) དང་བདེན་མཆོག་ (Demchok) གཉིས་ནང་བཙན་འཛུལ་བྱས་ཏེ་ཕན་ཚུན་ཁ་གཏད་ལངས་པའི་ཛ་དྲག་གནས་སྟངས་དེ་ལྟ་བུ་ཞིག་བྱུང་མེད་ཀྱང་། རྒྱ་དམག་གིས་ཨ་སཱ་ཧྥེ་ལཱ་ས་ཁུལ་གྱི་ས་ཐིག་ ༢༤༤༥ ཙམ་བར་ཚུར་ལམ་ཁ་བཟོ་རྒྱུར་གྲ་སྒྲིག་བྱེད་བཞིན་ཡོད་སྟབས། རྒྱ་གར་ཚོས་བཀག་འགོག་བྱས་ཡོད་ཅེས་བརྗོད་འདུག

ན་ནིང་རྒྱ་གར་མཐའ་སྲུང་དམག་གིས། ཨ་སཱ་ཧྥེ་ལཱ་ཁུལ་གྱི་ཤར་ཕྱོགས་ས་གནས་ཊྲ་སི་ཀིན་ (Tasking) ནང་། ས་མཚམས་སྲུང་དམག་གི་ལྟེ་གནས་གསར་རྒྱག་བྱས་ཡོད་པ་དང་། དེ་ནི་སྤྱི་ལེ་ ༥༠ ཙམ་གྱི་མཚམས་སུ་ཡོད་པའི་རྒྱ་མིའི་དམག་སྒར་གྱི་ཁ་གཏད་ཆགས་ཡོད་པ་དང་། ཕྱོགས་གཉིས་ཀྱི་དམག་མིས་ས་ཁུལ་དེར་སྐོར་གཡེང་བྱེད་སྐབས་ཕན་ཚུན་ལ་རྣམ་འགྱུར་མི་ལེགས་པ་ཡང་ཡང་སྟོན་བཞིན་ཡོད་པ་དང་། ཨ་རུ་ནཱ་ཅལ་ཁུལ་གྱི་སྟོད་ཕྱོགས་བྷན་སེ་རི་ (Upper Subansiri)རྫོང་དང་གྲོང་གསེབ་ཅཱ་ཁུ་ལཱ་གྷན་ (Chaglagam) གཙོས་རྩོད་རྙོག་ཡོད་པའི་ས་གནས་ཁག་ལ་སྐོར་སྲུང་ནན་མོ་བྱེད་ཀྱིན་ཡོད་འདུག

ལོ་འགའི་གོང་ནས་བཟུང་རྒྱ་ནག་གིས་བོད་ནང་དུ་གནམ་ཐང་དང་གཞུང་ལམ། མེ་འཁོར་ལྕགས་ལམ་འཛུགས་བྱས་པར་བརྟེན། ཟླ་འདིའི་ཚེས་ ༡༤ ཉིན་མུ་དྷི་སྲིད་གཞུང་གིས་ཨ་རུ་ནཱ་ཅཱའི་ས་མཚམས་སུ་རིང་ཚད་སྤྱི་ལེ་ ༢༠༠༠ ལྷག་གི་གཞུང་ལམ་གསར་རྒྱག་བྱ་རྒྱུ་ཡིན་པའི་གསལ་བསྒྲགས་བྱས་རྗེས། རྒྱ་ནག་གཞུང་གིས་རྒྱལ་ཁབ་གཉིས་བར་གྱི་ས་མཚམས་རྩོད་རྙོག་མ་སེལ་བར་དུ་གཞུང་ལམ་གསར་རྒྱག་མི་ཆོག་ཚུལ་བརྗོད་ཡོད།

ཟླ་འདིའི་ཚེས་ ༢༤ ཉིན་རྒྱ་གར་ནང་སྲིད་ལས་ཁུངས་ཀྱིས་ཧིན་སྒོར་འབུམ་ ༡༠༧༥ ཡི་འགྲོ་གྲོན་བཏང་སྟེ་ཨ་རུ་ནཱ་ཅལ་གྱི་ས་མཚམས་ཁག་ཏུ་ས་མཚམས་སྐོར་སྲུང་ས་ཚིགས་ཁག་ ༥༤ གསར་རྒྱག་བྱ་རྒྱུའི་གསལ་བསྒྲགས་བྱས་རྗེས། སླར་ཡང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་དཔའ་ཆོན་ཡུན་གྱིས། རྒྱ་ནག་གིས་རྒྱ་གར་མཉམ་དུ་ས་མཚམས་རྩོད་རྙོག་གི་གནད་དོན་གྲོས་མོལ་བརྒྱུད་ཐག་གཅོད་ཡོང་ཐུབ་བྱེད་དགོས། ས་མཚམས་ཀྱི་དཀའ་རྙོག་མཐའ་མའི་ཐག་གཅོད་མ་བྱས་བར་དུ་རྒྱ་གར་ཕྱོགས་ནས་ཡིད་གཟབ་མ་བྱས་ཚེ་ཆག་སྒོ་ཆེན་པོ་འབྱུང་སྲིད་པའི་ཉེན་བརྡ་བཏང་ཡོད་འདུག

རྒྱ་གར་ནང་སྲིད་ལས་ཁུངས་ཀྱིས། ཨ་རུ་ནཱ་ཅལ་ཁུལ་གྱི་ཧིན་བོད་མཐའ་མཚམས་ཉེན་རྟོག་ (ITBP) གི་དཔུང་རོགས་ཆེད་དམག་སྡེ་གསར་བ་ ༡༢ གསར་འཛུགས་ཀྱིས་ལོ་ལྔའི་རིང་དམག་མི་གསར་བ་ ༡༢༠༠༠ ལྷག་བསྡུ་སྒྲིག་གིས་གཏོང་འཆར་ཡོད་པ་དང་། ད་ལྟའི་ཆར་ཨ་རུ་ནཱ་ཅལ་གྱི་ས་མཚམས་ཁག་ཏུ་ཧིན་བོད་མཐའ་མཚམས་ཉེན་རྟོག་གི་དམག་སྡེ་ ༦༢ ལྷག་ཡོད་འདུག

རྒྱ་གར་གྱི་ས་མཚམས་སྐོར་སྲུང་ས་ཚིགས་གསར་རྒྱག་དགོས་པའི་སྐོར་ལ་རྒྱ་གར་ནང་སྲིད་བློན་ཆེན་ར་ཇི་ནཱ་ཐི་སིན་ (Rajnath Singh)མཆོག་གིས་གསར་འགོད་པར། ཨ་རུ་ནཱ་ཅཱལ་དམག་དོན་ཐབས་ཇུས་ཐོག་གནད་འགག་ཆགས་ཡོད་སྟབས། སྐོར་སྲུང་ས་ཚིགས་གསར་པ་ཁ་སྣོན་གྱིས་ཧིན་བོད་མཐའ་མཚམས་ཉེན་རྟོག་ལ་སྟོབས་ཤུགས་ཆེ་རུ་གཏོང་དོན། རྒྱ་ནག་ཕྱོགས་ནས་ས་མཚམས་ནང་བཙན་འཛུལ་བྱེད་པར་འགོག་སྲུང་བྱེད་ཆེད་ཡིན་ཞེས་བརྗོད་ཡོད་འདུག

ད་ལོའི་ཕྱི་ཟླ་ ༨ ཚེས་ ༤ ཉིན་བར་རྒྱ་ནག་གི་དམག་མི་ཨ་རུ་ནཱ་ཅལ་ཁུལ་གྱི་ས་མཚམས་ནང་ཐེངས་ ༣༣༤ ཙམ་ཚུར་འཛུལ་ཡོད་པ་དང་། ༢༠༡༣ ལོར་ཐེངས་ ༤༡༡། ༢༠༡༢ ལོར་ཐེངས་ ༤༢༦། ༢༠༡༡ ལོར་ཐེངས་ ༢༡༣ བཅས་འཛུལ་ཡོད་འདུག

གསར་འགོད་པ། ལྷ་སྐྱབས་རྒྱལ།