ཡུག་རེན་གྱེན་ལོག་ཤོག་ཁག་གིས་འོས་བསྡུ་བྱས་ཏེ་མགོ་ཁྲིད་བདམས་ཡོད་སྟབས་ནུབ་ཕྱོགས་རྒྱལ་ཁབ་ཁག་གིས་སྐྱོན་བརྗོད་བྱས་ཡོད་ཀྱང་ཨུ་རུ་སུས་རྒྱབ་སྐྱོར་ཡོད་པའི་རྣམ་པ་བསྟན་ཡོད་འདུག
ཟླ་འདིའི་ཚེས་ ༢ ཉིན་ཨུ་རུ་སུར་རྒྱབ་སྐྱོར་བྱེད་མཁན་ཡུག་རེན་གྱེན་ལོག་ཤོག་ཁག་གིས་ཡུག་རེན་གྱི་ཤར་ཕྱོགས་ས་ཁུལ་ཌོ་ནེ་ཌི་སི་ཁི་(Donetsk) དང་ལུ་ཧན་སེ་ཁི་ (Luhansk)ནང་འོས་བསྡུ་བྱས་པ་བརྒྱུད། ཨེ་ལེག་ཛིན་ཌར་ (Alexander Zakharchenko) ལགས་སུ་འོས་ཤོག་བརྒྱ་ཆ་ ༨༡ ཐོབ་སྟེ་ཌོ་ནེ་ཌི་སི་ཁི་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་དང་། ཨི་གྷོར་(Igor Plotnisky) ལགས་སུ་འོས་ཤོག་བརྒྱ་ཆ་ ༦༣ གྱི་རྒྱལ་ཁ་ཐོབ་ནས་ལུ་ཧན་སེ་ཁི་མངའ་ཁུལ་གྱི་མགོ་ཁྲིད་ལ་བསྐོ་བཞག་བྱས་ཚུལ་བསྒྲགས་ཡོད་པ་དང་། ཨུ་རུ་སུས་འོས་བསྡུ་དེར་རྒྱབ་སྐྱོར་ཡོད་པའི་རྣམ་འགྱུར་བསྟན་ཡོད་ཀྱང་། ཁ་སང་ཨ་རི་དང་ཡུ་རོབ་མཐུན་ཚོགས། འཇར་མན་རྒྱལ་ཁབ་བཅས་ཀྱིས་འོས་བསྡུ་དེ་ཁྲིམས་མཐུན་མིན་པའི་གསལ་བསྒྲགས་སྤེལ་ཡོད་པ་མ་ཟད། ཡུག་རེན་གྱི་སྲིད་འཛིན་པེ་ཌོར་ (Petro Poroshenko) ལགས་ཀྱིས་གྱེན་ལོག་ཤོག་ཁག་གི་བྱ་སྤྱོད་དེར་སྐྱོན་བརྗོད་བྱས་ཡོད་པ་དང་། དེ་རིང་ཡུག་རེན་བདེ་འཇགས་ལྷན་ཁང་གི་མགོ་ཁྲིད་འདུ་སྐོང་བྱས་ཏེ་གནས་ཚུལ་དེ་དག་ལ་ཇི་ལྟར་གདོང་ལེན་བྱེད་དགོས་པའི་ཐད་གྲོས་བསྡུར་བྱས་ཡོད་འདུག
འདིའི་ཐད་ཡུག་རེན་གྱི་སྲིད་འཛིན་པེ་ཌོར་ལགས་ཀྱིས། “འོས་བསྡུ་དེ་ནི་ཡུག་རེན་གྱི་རྩ་ཁྲིམས་དང་འགལ་བའི་ཁྲིམས་མཐུན་མིན་པའི་འོས་བསྡུ་ཞིག་ཆགས་ཡོད་པ་མ་ཟད། འདི་ལོའི་ཕྱི་ཟླ་ ༩ ཚེས་ ༥ ཉིན་ཡུ་རོབ་བྷེ་ལཱ་རུ་ཤི་ཡའི་རྒྱལ་ས་མིན་སི་ཁི་ (Minsk) ནང་ཡུག་རེན་གཞུང་དང་གྱེན་ལོག་ཤོག་ཁག་བར་གྲོས་ཆོད་བཞག་པ་དང་རྒྱབ་འགལ་ཆགས་ཡོད་སྟབས། ཡུག་རེན་གཞུང་གིས་ལྕགས་འཁྲབ་འཁོར་ལོ་དང་སྦག་སྦག་མེ་མདའི་འོག་གི་འོས་བསྡུ་དེར་ནམ་ཡང་ངོས་ལེན་མེད། ཨུ་རུ་སུ་གཞུང་གིས་ཀྱང་དེ་སྔའི་གྲོས་ཆོད་གཞིར་བཟུང་འོས་བསྡུ་དེར་ངོས་ལེན་མི་བྱེད་པའི་རེ་བ་ཡོད” ཅེས་བརྗོད་འདུག
ཨ་རིའི་གཞུང་གི་མགྲིན་ཚབ་པ་ལྕམ་ཇན་ (Jen Psaki) ལགས་ཀྱིས། “ ཐེངས་འདིའི་འོས་བསྡུ་དང་བདམས་ཐོན་མགོ་ཁྲིད་དག་ལ་སུས་ཀྱང་ངོས་ལེན་བྱེད་མི་སྲིད་པ་མ་ཟད། གལ་ཏེ་ཨུ་རུ་སུས་དེ་སྔའི་གྲོས་ཆོད་དང་འགལ་ནས་འོས་བསྡུར་ངོས་ལེན་བྱས་ཚེ། ཨུ་རུ་སུ་རྒྱལ་ཁབ་གཞན་དང་བར་ཐག་ཇེ་རིང་དུ་འགྲོ་རྒྱུ་ཡིན་སྟབས། འབྲེལ་ཡོད་རྒྱལ་ཁབ་ཀྱིས་གནད་དོན་དེར་ཞིབ་འཇུག་ཡག་པོ་བྱས་ཏེ་ཐག་གཅོད་ཐུབ་པའི་རེ་བ་ཞུ་བཞིན་ཡོད” ཅེས་བརྗོད་འདུག
༢༠༡༣ ལོའི་ཟླ་ ༡༡ ནང་ཡུག་རེན་སྲིད་འཛིན་ཡཱ་ཎོ་ཁོ་བེ་ཆི་ (Viktor Yanukovych) ཡིས་ཡུ་རོབ་མཐུན་ཚོགས་དང་ལྷན་དུ་ཚོང་དོན་གྲོས་ཆོད་འཇོག་རྒྱུའི་ཐག་གཅོད་བྱས་ཡོད་ཀྱང་། མཐའ་མ་ཁོང་གིས་ཨུ་རུ་སུའི་གནོན་ཤུགས་འོག་གྲོས་མཐུན་ལ་མིང་རྟགས་བཀོད་མེད་སྟབས། ༢༠༡༤ ལོའི་ཟླ་ ༢ ཚེས་ ༢༡ ཉིན་ཡུག་རེན་མང་ཚོགས་ཀྱིས་རྒྱལ་སའི་ཐང་ཆེན་དུ་འཛོམས་ཏེ་ངོ་རྒོལ་ཤུགས་ཆེན་བྱས་ཡོད་པ་མ་ཟད། ཚེས་ ༢༢ ཉིན་ཡུག་རེན་གྲོས་ཚོགས་ཀྱིས་དམིགས་བསལ་བཞུགས་མོལ་ཚོགས་འདུ་བསྐོངས་ཏེ་ཡཱ་ཎོ་ཁོ་བོ་ཆི་སྲིད་འཛིན་གྱི་ལས་གནས་ནས་གནས་དབྱུང་བཏང་ཡོད་པར་བརྟེན། ཨུ་རུ་སུར་དགའ་མོས་བྱེད་མཁན་གྱེན་ལོག་ཤོག་ཁག་དང་ཡུག་རེན་གཞུང་བར་དམག་འཁྲུག་བྱུང་རྗེས། ཨུ་རུ་སུས་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱས་ཏེ་གོ་མཚོན་དང་དཔལ་འབྱོར་རོགས་རམ་སྤྲད་ཡོད་སྟབས། འདི་ལོའི་ཕྱི་ཟླ་ ༣ ཚེས་ ༢༤ ནས་ ༢༥ ཉིན་བར་ཧོ་ལན་ཌིའི་གྲོང་ཁྱེར་ཧེད་གྷེ་ (Hugue) ནང་ཚོགས་པའི་རྒྱལ་སྤྱིའི་ཡར་ཐོན་ཅན་གྱི་རྒྱལ་ཁབ་ཁག་གི་བཞུགས་མོལ་ཚོགས་འདུའི་ཐོག་ཨ་རི་དང་དབྱིན་ཡུལ། འཇར་མན། ཁེ་ཎ་ཌ། ཧྥ་རན་སི། ཉི་ཧོང་། ཨི་ཊ་ལི་བཅས་ཀྱི་སྲིད་འཛིན་དང་སྲིད་བློན་ཚོས་ཨུ་རུ་སུས་ཡུག་རེན་གྱི་རང་སྐྱོང་མངའ་ཁོངས་ཁུ་རེ་མཱེ་བཙན་བཟུང་གིས། ཡུའུ་ཁུ་རེན་ས་མཚམས་སུ་དམག་དཔུང་འགྲེམས་འཇོག་བྱས་པའི་ཐད་དཔལ་འབྱོར་ཉེས་ཆད་གཏོང་དགོས་པ་དང་། ཨུ་རུ་སུ་བཟོ་ལས་ཡར་ཐོན་ཅན་གྱི་རྒྱལ་ཁབ་བརྒྱད་ཀྱི་ཁོངས་ནས་གནས་སྐབས་ཕྱིར་འཕུད་བྱས་པ་ཕྱིར་བསྒྲགས་སོགས་བྱས་ཡོད་པ་མ་ཟད། ནུབ་ཕྱོགས་རྒྱལ་ཁབ་ཚོས་ཡུག་རེན་ཤར་ཕྱོགས་ཀྱི་གྱེན་ལོག་པ་ཚོར་ཨུ་རུ་སུས་ལྐོག་ནས་མཚོན་ཆ་དང་དཔལ་འབྱོར་རོགས་སྐྱོར་བྱེད་ཀྱིན་ཡོད་པ་མཚམས་འཇོག་ཡོང་ཆེད། ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཨུ་སུ་རུར་དཔལ་འབྱོར་ཉེས་ཆད་རིམ་པ་གསུམ་བཏང་ཡོད་པ་མ་ཟད། ད་དུང་ཨུ་རུ་སུས་གྱེན་ལོག་པ་ཚོར་རྒྱབ་སྐྱོར་བྱེད་མཚམས་མ་བཞག་ཚེ་དཔལ་འབྱོར་ཉེས་ཆད་རིམ་པ་བཞི་པ་གཏོང་རྒྱུ་ཡིན་སྐོར་བསྒྲགས་ཡོད།
ཟླ་ ༩ ཚེས་ ༥ ཉིན་ཡུག་རེན་གྱི་ཁྱིམ་མཚེས་རྒྱལ་ཁབ་བྷེ་ལཱ་རུ་ཤི་ཡའི་རྒྱལ་ས་མིན་སི་ཁི་ (Minsk) ནང་ཡུག་རེན་གཞུང་དང་ཡུག་རེན་གྱེན་ལོག་ཤོག་ཁག ཨུ་རུ་སུའི་སྐུ་ཚབ་བཅས་ཀྱི་བར་ཡུག་རེན་ཤར་ཕྱོགས་གྲོང་ཁྱེར་ཁག་ནང་ཟླ་གཅིག་རིང་ཕན་ཚུན་འཇབ་རྒོལ་མི་བྱེད་པའི་གྲོས་མོལ་བྱས་ཏེ། ཞི་མོལ་ཐོག་ཡུག་རེན་གྱི་དཀའ་རྙོག་སེལ་རྒྱུའི་ཐག་གཅོད་བྱས་ཡོད་ཀྱང་། ཟླ་ ༩ ཚེས་ ༢༢ ཉིན་ཡུག་རེན་གྱེན་ལོག་ཤོག་ཁག་གིས་ཡུག་རེན་ཤར་ཕྱོགས་གྲོང་ཁྱེར་ཌོན་ནེ་ཊི་སི་ཀི་(Donetsk) ཡི་གནམ་ཐང་གཙོས་ཨུ་རུ་སུའི་ཉེ་འགྲམ་གྱི་ས་མཚམས་ཌེ་བྷལ་ཊི་སེ་ཧུད་ (Debaltseve) དང་ཞི་ཆཱ་སི་ཌེ་ (Shchastye) བཅས་ནང་འཇབ་རྒོལ་བྱས་ཏེ། གཞུང་གི་ལས་བྱེད་གཉིས་དང་གཞན་མི་དྲུག་ལ་རྨས་སྐྱོན་ཚབས་ཆེན་བཏང་ཡོད་པ་མ་ཟད། ཟླ་འདིའི་ཚེས་ ༢ ཉིན་མིན་སི་ཁི་ཡི་གྲོས་མཐུན་ལ་བརྩི་འཇོག་མ་བྱས་པར་འོས་བསྡུ་བྱས་ཏེ། གྱེན་ལོག་ས་ཁུལ་གྱི་མགོ་ཁྲིད་བདམས་པ་སོགས་བྱས་ཏེ། ཡུག་རེན་གཞུང་ལ་ཁོང་ཁྲོ་ཆེན་པོ་བསླངས་ཡོད་ཀྱང་། ཨུ་རུ་སུས་འོས་བསྡུ་དེར་རྒྱབ་སྐྱོར་ཡོད་པའི་རྣམ་འགྱུར་བསྟན་ཡོད་སྟབས། ནུབ་ཕྱོགས་རྒྱལ་ཁབ་ཀྱིས་ཨུ་རུ་སུ་དང་ཡུག་རེན་གྱེན་ལོག་ཤོག་ཁག་གི་བྱ་སྤྱོད་དེར་སྐྱོན་བརྗོད་བྱས་ཡོད་འདུག
ཨུ་རུ་སུའི་ཕྱི་སྲིད་བློན་ཆེན་གཞོན་པ་གྷེར་གྷོ་རི་ (Grigory Karasin) ཡིས། “ང་ཚོས་ཡུག་རེན་གྱེན་ལོག་ཤོག་ཁག་གི་འོས་བསྡུ་དེར་གཞུང་འབྲེལ་ཐོག་ངོས་ལེན་གང་ཡང་བྱས་མེད་ཀྱང་། ང་ཚོས་གསར་དུ་བདམས་ཐོན་བྱུང་བའི་ཡུག་རེན་ཤར་ཕྱོགས་ས་ཁུལ་གྱི་མགོ་ཁྲིད་ལ་ཡུག་རེན་དང་གྲོས་མོལ་བྱས་ཏེ་ཕྱོགས་གཉིས་པོའི་དཀའ་རྙོག་སེལ་རྒྱུའི་དབང་ཆ་ཡོད་པར་ངོས་ལེན་བྱེད་ཀྱིན་ཡོད།”ཅེས་བརྗོད་ཡོད་སྟབས། འཇར་མན་སྲིད་བློན་ལྕམ་ཨང་གྷེ་ལཱ་མར་གྷལ་མཆོག་གི་མགྲིན་ཚབ་པ་སི་ཌི་ཧྥེན་ (Steffen Seibert) ལགས་ཀྱིས། “ཨུ་རུ་སུ་གཞུང་གིས་ཡུག་རེན་གྱེན་ལོག་ཤོག་ཁག་གི་འོས་བསྡུ་དེར་ངོས་ལེན་ཡོད་པའི་རྣམ་འགྱུར་བསྟན་པ་དེ་ནི་བློ་ཡུལ་དུ་གཤོང་དཀའ་བའི་གནད་དོན་ཞིག་ཡིན་སྟབས། ད་དུང་ཨུ་རུ་སུས་མུ་མཐུད་ཡུག་རེན་གྱེན་ཤོག་ཤོག་ཁག་ལ་རོགས་རམ་བྱས་ཚེ། ཡུ་རོབ་མཐུན་ཚོགས་ངོས་ནས་དཔལ་འབྱོར་ཉེས་ཆད་སྔར་ལས་ལྕི་བ་གཅོག་རྒྱུ་ཡིན།”ཞེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། ཨུ་རུ་སུ་གཞུང་གིས་ཡུག་རེན་གྱེན་ལོག་ཤོག་ཁག་གི་འོས་བསྡུ་དེར་འདོད་པ་ཡོད་ པའི་རྣམ་འགྱུར་བསྟན་ཡོད་པ་མ་ཟད། ཡུག་རེན་ས་མཚམས་ཁུལ་དུ་དམག་དཔུང་འགྲེམས་འཇོག་བྱེད་མགོ་བཙུགས་ཡོད་སྟབས། མ་འོངས་པར་ཨུ་རུ་སུ་དང་ཡུག་རེན་ལ་རྒྱབ་སྐྱོར་བྱེད་མཁན་གྱི་ནུབ་ཕྱོགས་རྒྱལ་ཁབ་ཁག་གི་བར་འབྲེལ་ལམ་ཇེ་སྡུག་ཏུ་འགྲོ་རྒྱུ་ཡིན་སྐོར་བརྗོད་འདུག
༢༠༡༣ ལོ་ནས་བཟུང་ཟླ་ ༩ ཚེས་ ༥ ཉིན་བར་ཨུ་རུ་སུར་དགའ་མོས་བྱེད་མཁན་ཡུག་རེན་གྱེན་ལོག་ཤོག་ཁག་དང་ཡུག་རེན་གྱི་དམག་འཁྲུག་ཁྲོད་མི་ ༤༠༠༠ ལྷག་རྐྱེན་འདས་དང་མི་ ༥༠༤༣ ལ་རྨས་སྐྱོན་བཏང་ཡོད་པ་མ་ཟད། མི་ ༡༥༦༠༠༠ ཙམ་ཞིག་ཡུག་རེན་ནང་ཁུལ་གྱི་ས་གཞན་ལ་ཉེན་གཡོལ་དང་། ཡུལ་མི་ ༡༨༨༠༠༠ ལྷག་ཨུ་རུ་སུའི་ནང་བྲོས་བྱོལ་འགྲོ་དགོས་བྱུང་ཡོད་པ་དང་། ཟླ་ ༡༠ ཚེས་ ༢༦ ཉིན་ཡུག་རེན་རྒྱལ་ཡོངས་གྲོས་ཚོགས་འོས་བསྡུ་ཆེན་མོ་བྱས་པ་བརྒྱུད་ཡུ་རོབ་མཐུན་ཚོགས་ལ་རྒྱབ་སྐྱོར་བྱེད་མཁན་གྱི་ཆབ་སྲིད་ཚོགས་པ་གཉིས་ལ་རྒྱལ་ཁ་ཆེན་མོ་ཐོབ་ཡོད་འདུག
གསར་འགོད་པ། དོན་གྲུབ།
