ཀྲུའུ་ཡོང་ཁང་ལ་ཁྲིམས་བཤེར་བྱེད་བཞིན་ཡོད།

ཁ་སང་རྒྱ་གཞུང་གི་ཁྲིམས་དོན་བློན་ཆེན་གྱིས་ཀྲུའུ་ཡོང་ཁང་ལ་འབྲེལ་ཡོད་ལས་ཁུངས་ཀྱིས་རྟོག་ཞིབ་བྱེད་བཞིན་ཡོད་པའི་གསལ་བསྒྲགས་སྤེལ་འདུག  

ཁ་སང་ཕྱི་ཚེས་ ༥ ཉིན་རྒྱ་གཞུང་གི་ཁྲིམས་དོན་བློན་ཆེན་གཞོན་པ་ཀྲང་སོ་ཅུན་ (Zhang Sujun) གྱིས་གསལ་བསྒྲགས་སྤེལ་བར། ད་ལྟ་རྒྱ་གཞུང་གི་འཛིན་བཟུང་བཀག་སྐྱིལ་འོག་ཡོད་པའི་རྒྱ་ནག་དབུས་ཆབ་སྲིད་རྒྱུན་ལས་དང་རྒྱལ་ཁབ་བདེ་འཇགས་ལྷན་ཁང་གི་མགོ་ཁྲིད་ཟུར་པ་ཀྲུའུ་ཡོང་ཁང་གིས་དབང་ཆ་སྒེར་གཅོད་དང་ལྐོག་ཟ་རུལ་སུངས། དམག་ཤོག་སྒྲིག་གཞི་རྡོག་རོལ་བཏང་པ་བཅས་ཀྱི་ནག་ཉེས་ལ་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ (CCDI) རྟོག་ཞིབ་བྱེད་བཞིན་ཡོད་སྟབས། ཞིབ་བཤེར་བྱས་ཚར་རྗེས་འབྲེལ་ཡོད་ལས་ཁུངས་ཀྱིས་མི་མང་ལ་གསལ་བསྒྲགས་བྱ་རྒྱུ་ཡིན་པ་མ་ཟད། ཀྲུའུ་ཡོང་ཁང་གི་རྟོག་ཞིབ་གྲུབ་འབྲས་དེས་རྒྱལ་ཁབ་ཁྲིམས་ལྟར་སྐྱོང་བའི་སྲིད་གཞུང་ལ་མི་མང་གིས་ཡིད་ཆེས་ཡོང་བར་ཕན་ཐོགས་ཆེན་པོ་འབྱུང་གི་ཡོད་སྐོར་བསྒྲགས་འདུག

ཟླ་འདིའི་ཚེས་ ༡ ཉིན་རྒྱ་ནག་ཆེས་མཐོའི་མི་དམངས་ཁྲིམས་ཁང་གི་མགོ་ཁྲིད་གཞོན་པ་ཅང་པེ་ཞིན་ (Jiang Bixin)ཤིན་ཧྭ་གསར་ཁང་གི་གསར་འགོད་པར། རྒྱ་ནག་དམར་ཤོག་ཚོགས་པར་ཀྲུའུ་ཡོང་ཁང་ལ་ནག་ཉེས་འཛུགས་པའི་ཁ་ཡོད་ལག་ཡོད་ཀྱི་བདེན་དཔང་ཞིག་དགོས་ཀྱི་ཡོད་སྟབས། ཁྲིམས་ཁང་གིས་ད་ལྟའི་བར་ཀྲུའུ་ཡོང་ཁང་ལ་ཁྲིམས་བཤེར་བྱེད་པའི་ལས་ཀ་གང་ཡང་མགོ་འཛུགས་ཐུབ་མེད་ཅེས་བརྗོད་ཡོད་འདུག

ཟླ་སྔོན་མའི་ནང་སྐབས་བཅོ་བརྒྱད་པའི་རྒྱ་ནག་དབུས་དམར་ཤོག་ཀྲུང་ཨུ་ཚང་འཛོམས་ཚོགས་ཆེན་ཐེངས་བཞི་པའི་སྟེང་། རྒྱ་ནག་གི་མགོ་ཁྲིད་ཚོས་ཀྲུའུ་ཡོང་ཁང་གཙོས་ཁོང་གི་ལག་རོགས་མཐོ་རིམ་མགོ་ཁྲིད་དྲུག་དམར་ཤོག་ཚོགས་པའི་ཚོགས་མིའི་ཁྲོད་ནས་ཕྱིར་འཕུད་བྱས་ཡོད་འདུག འོན་ཀྱང་གནས་ཚུལ་དེ་གསར་ལམ་ཁག་ཏུ་ཁྱབ་བཅུག་མེད།

གནད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་སྟག་བཟུང་རྗེས་པེ་ཅིན་གྱི་དམར་ཤོག་དཔོན་རིགས་ཚོའི་རྣམ་ འགྱུར་རྒྱུན་ལྡན་ལྟ་བུར་མཐོང་གི་ཡོད་ཅིང་།  དོན་དངོས་ཐོག་ཁོ་ཚོའི་བར་ཁྱོད་ཤི་ང་གསོན་གྱི་འཐབ་རྩོད་བྱེད་ཀྱི་ཡོད་སྟབས། ཀྲུང་ཨུ་ཚང་འཛོམས་ཚོགས་ཆེན་སྟེང་ཀྲུའུ་ཡོང་ཁང་གཙོས་མཐོ་རིམ་མགོ་ཁྲིད་འགའ་དམར་ཤོག་གི་ཚོགས་མིའི་ཁོངས་ནས་ཕྱིར་འཕུད་བྱས་པའི་གསལ་བསྒྲགས་ཐུབ་མེད་སྐོར་བརྗོད་འདུག

རྒྱ་ནག་གི་སྲིད་དོན་དབྱེ་ཞིབ་པ་ཚོས།  ད་རུང་ཀྲུའུ་ཡོང་ཁང་གི་ནག་ཉེས་ཐེར་འདོན་བྱེད་མ་ཐུབ་པའི་རྒྱུ་མཚན་གཙོ་བོ་ནི། དམར་ཤོག་དཔོན་རིགས་ཚོའི་བར་ཀྲུའུ་ཡོང་ཁང་གི་ནག་ཉེས་ཐག་གཅོད་ཇི་ལྟར་བྱེད་མིན་ཐད་མོས་མཐུན་ཡོང་གི་མེད་པ་བསྟན་ཡོད་ཚུལ་ཡང་བརྗོད་བྱེད་བཞིན་ཡོད་འདུག

ད་ལོར་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་ (CCDI) གིས་ཀྲུའུ་ཡོང་ཁང་ལ་འབྲེལ་བ་ཡོད་པའི་པའོ་ཞི་ལེ་ལ་ཚེ་བཙོན་དང་ལའོ་ཧན་ལ་སྲོག་ཁྲིམས་བཅད་རྗེས། ཟླ་ ༧ པའི་ནང་ཀྲུའུ་ཡོང་ཁང་འཛིན་བཟུང་འོག་རྟོག་ཞིབ་བྱེད་མགོ་བརྩམས་པ་མ་ཟད། ཀྲུའུ་ཡོང་ཁང་གི་བུ་ཀྲུའུ་བེན་ (Zhou Bin) དང་རྒྱ་ནག་བདེ་འཇགས་ལྷན་ཁང་གི་བློན་ཆེན་གཞོན་པ་ལེ་ཏུང་ཧྲིན་ (Li Donsheng)། རྒྱ་ནག་རྡོ་སྣུམ་ལས་ཁུངས་ཀྱི་མགོ་ཁྲིད་ཟུར་པ་ལེ་ཧྭ་ལིན་ (Li Hualin)དང་། ཅང་ཅེ་མིན་ (Jiang Jiemin)། གྲོང་ཁྱེར་ཧེད་ནན་གྲོང་ཁྱེར་གྱི་སྤྱི་ཁྱབ་གཞོན་པ་ཅེ་ཝེན་ལིན་ (Ji Wenlin) སི་ཁྲོན་ཞིང་ཆེན་གྱི་མཐོ་རིམ་མགོ་ཁྲིད་ཀོའོ་ཡོང་ཞང་ (Gou Yongxiang) དང་ལེ་ཁྲུང་ཁྲིན་ (  Li Chuncheng)བཅས་ལའང་དབང་ཆ་སྒེར་གཅོད་དང་ལྐོག་ཟ་རུལ་སུངས་ལ་སོགས་ཀྱི་ཉེས་མིང་འོག་འཛིན་བཟུང་དང་ཁྲིམས་བཤེར་བྱེད་བཞིན་ཡོད་འདུག