ན་ནིང་རྒྱ་ནག་གི་སྲིད་འཛིན་ཞི་ཅིན་ཕིན་ཨ་ཧྥི་རི་ཀའི་ནང་གཟིགས་སྐོར་བྱས་ཏེ་ཕྱིར་ལོག་སྐབས། ཁོ་རང་གི་འགྲོ་རོགས་དཔོན་རིགས་ཚོས་གླང་ཆེན་གྱི་མཆེ་བ་ཕོན་ཆེན་པོ་ཞིག་གནམ་གྲུ་བརྒྱུད་ནས་རྒྱ་ནག་ནང་འཁྱེར་འདུག་ཟེར།
ཁ་སང་ཕྱི་ཚེས་ ༦ ཉིན་དབྱིན་ཡུལ་ལོན་ཌོན་དུ་རྟེན་གཞི་བྱས་པའི་ཁོར་ཡུག་རྟོག་ཞིབ་ཚོགས་པས། ཨ་ཧྥི་རི་ཀའི་རྒྱལ་ཁབ་ཊན་ཛེད་ནའེ་ (Tanzania) ཡི་ནང་གི་གླང་ཆེན་གྲངས་འབོར་ཇེ་ཉུང་དུ་འགྲོ་བཞིན་ཡོད་པའི་སྐོར་ལ་སྙན་ཐོ་ཞིག་བཏོན་པའི་ནང་། ༢༠༡༣ ལོའི་ཟླ་ ༣ པའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་ཊན་ཛེད་ནའི་ནང་གཞུང་འབྲེལ་གཟིགས་སྐོར་སྐབས། ཁོང་དང་མཉམ་དུ་ཡོང་བའི་རྒྱ་ནག་གི་གཞུང་འབྲེལ་མི་སྣ་དང་ཚོང་པ་ཚོས་གཞུང་དོན་སྒྲུབ་ཞོར་དུ་བ་སོའི་གོང་ཚད་ཚོང་རའི་རིན་གོང་ལས་ལྡབ་གཉིས་ལྷག་སྤྲད་དེ། གླང་ཆེན་གྱི་མཆེ་བ་སྤྱི་རྒྱ་ཆིག་སྟོང་ལྷག་གནམ་གྲུའི་ནང་བཞག་ནས་རྒྱ་ནག་ཏུ་འབོར་འདྲེན་བྱས་ཡོད་ཚུལ་བསྒྲགས་འདུག
ཁོར་ཡུག་རྟོག་ཞིབ་ཚོགས་པའི་འགན་འཛིན་མ་རེ་རི་ཡེ་སེ་ (Mary Rice) ལགས་ཀྱིས། སྙན་ཐོ་འདིས་བ་སོའི་ནག་ཚོང་རྒྱག་མཁན་སུ་ཞིག་ཡིན་ཡང་བཟོད་སྒོམ་མེད་པའི་ཐོག་ནས་རྩ་མེད་བཟོ་དགོས་པའི་གནས་སྟངས་ཆགས་ཡོད་གསལ་སྟོན་བྱས་ཞིང་། འབྱུང་འགྱུར་ཊན་ཛེད་ནའེ་ཡི་ནང་གླང་ཆེན་དང་གླང་ཆེན་ཁྱུ་ཚོགས་ལ་ལྟ་མཁན་ཡུལ་སྐོར་སྤྲོ་འཆམ་པ་ཚོ་ལའང་ཉེན་ཚབས་ཆེ་རུ་འགྲོ་བཞིན་ཡོད་སྟབས། རྒྱལ་ཁབ་ནང་གི་བ་སོའི་ཚོང་ལས་རིགས་ལ་དམ་དྲག་དང་། གླང་ཆེན་སྲུང་སྐྱོབ་དང་འབྲེལ་བའི་ལས་དོན་ལས་ཁུངས་ནང་ལྐོག་ཟ་རུལ་སུངས་བྱེད་མཁན་དང་གླང་ཆེན་གསོད་མཁན་སོགས་ལ་བཀག་འགོག་ནན་མོ་བྱེད་དགོས་ཞེས་བརྗོད་འདུག
སྙན་ཐོ་དེའི་ནང་། རྒྱ་མི་རིགས་ཚོས་གླང་ཆེན་གྱི་མཆེ་བའི་སྟེང་ལ་རི་མོ་འདྲ་མིན་རྐོ་བའི་རིག་གཞུང་གོང་འཕེལ་དང་། ལྷག་པར་དུ་རྒྱ་ནག་ནང་བ་སོའི་ཅ་དངོས་དང་རྒྱན་ཆས་རིགས་སོགས་ཀྱི་ལེགས་སྐྱེས་འདྲ་མིན་བཟོ་བཞིན་ཡོད་སྟབས། ཊིན་ཛེད་ནའི་ནང་ཡོད་པའི་གླང་ཆེན་ཉུང་དུ་ཕྱིན་པའི་རྒྱུ་རྐྱེན་གཙོ་བོ་ཞིག་ཆགས་ཡོད། ཅེས་སོགས་བརྗོད་འདུག
ས་ཊན་ཛེད་ནའེ་ཡི་བ་སོའི་ནག་ཚོང་རྒྱག་སའི་དོ་སྐྱེལ་ཞབས་ཞུའི་བདག་པོ་མོལ་ཆིལ་ཝ་ (Suleiman Mochiwa) ཡིས་ཁོར་ཡུག་རྟོག་ཞིབ་ཚོགས་པའི་གསང་བའི་རྟོག་ཞིབ་པ་ཚོར། ཞི་ཅིན་ཕིན་ཊན་ཛེད་ནའི་ནང་མ་བསླེབ་པའི་ཉིན་གཉིས་གོང་བ་སོའི་རིན་གོང་ཆེན་པོ་འཕར་སོང་ཡང་། ཁོ་ཚོས་བ་སོ་སྤྱི་རྒྱ་སྟོང་ཕྲག་མང་པོ་ཉོས་ཏེ་རྒྱ་ནག་ཏུ་དབོར་འདྲེན་བྱས་སོང་། ཅེས་བརྗོད་པ་དང་། ཡང་མིང་བཤད་འདོད་མེད་པའི་ཚོང་རའི་མི་ཞིག་གིས་ཀྱང་། སྔོན་མ་ཧུའུ་ཅིན་ཐའོ་གཞུང་འབྲེལ་གཟིགས་སྐབས་སུའང་རྒྱ་མི་མང་པོས་སོ་སོའི་ལག་སྒམ་ཆེན་པོའི་ནང་བ་སོ་སྤྱི་རྒྱ་མང་པོ་བཞག་སྟེ་ཐད་ཀར་གནམ་ཐང་བརྒྱུད་ནས་མཐར་ཡོད་པ་རེད། གང་ཡིན་ཟེར་ན། ཁོ་ཚོ་རྒྱ་ནག་གི་ཕྱི་འབྲེལ་མཐོ་རིམ་མི་སྣ་ཡིན་སྟབས་གནམ་ཐང་དུ་ཁོ་ཚོའི་ལག་སྒམ་ལ་ཞིབ་བཤེར་བྱེད་ཆོག་གི་མེད་ཅེས་བརྗོད་ཡོད་འདུག
འདིའི་ཐད་ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལེ་ཡིས། རྒྱ་ནག་གཞུང་གིས་གླང་ཆེན་གྱི་མཆེ་བའི་ནག་ཚོང་རྒྱག་མཁན་རིགས་ལ་མཐའ་གཅིག་ཏུ་རྒོལ་རྡུང་དང་བཀག་སྡོམ་བྱེད་ཀྱིན་ཡོད་སྟབས། ཐེངས་འདིའི་སྙན་ཐོ་དེ་ནི་ནོར་འཁྲུལ་དང་རྫུན་སྒྲུག་ཅིག་ཡིན་པས་རྒྱ་ནག་གི་འདོད་བློ་ཁེངས་མ་སོང་ཞེས་སྐྱོན་བརྗོད་ཡོད་བྱས་འདུག
གཞན། རྒྱ་ནག་གི་ཉེན་ཁ་ཆེ་བའི་སྲོག་ཆགས་དང་རྩ་ཤིང་ཕྱིར་འདྲེན་ནང་འདྲེན་ལས་ཁུངས་ཀྱི་སྤྱི་ཁྱབ་འགན་འཛིན་མེན་ཞན་ལེན་ (Meng Xianlin)གྱིས་གསར་འགོད་པར། རྒྱ་ནག་གཞུང་འབྲེལ་མི་སྣ་ཚོས་ཊན་ཛེད་ནའེ་ཡི་ནང་བ་སོའི་ནག་ཚོང་བརྒྱབ་པའི་གནས་ཚུལ་གཏན་ནས་གོ་མྱོང་མེད་སྟབས། བདེན་དཔང་མེད་པའི་གནས་ཚུལ་དེར་ཡིད་ཆེས་མེད། ཁོར་ཡུག་རྟོག་ཞིབ་ཚོགས་པའི་ཞིབ་འཇུག་སྙན་ཐོ་དེ་ཚད་ལྡན་ཡིན་མིན་ལ་དོགས་པ་ཡོད། ཅེས་བརྗོད་འདུག
༢༠༡༣ ལོའི་ཟླ་ ༡༢ པའི་ནང་རྒྱ་རིགས་ནག་ཚོང་རྒྱག་མཁན་ཡུའུ་བྷོ་ (Yu Bo) ཟེར་བ་ཞིག་གིས་ཊན་ཛེད་ནའེ་ཡི་ནང་གླང་ཆེན་གྱི་མཆེ་བ་ ༨༡ རྒྱ་ནག་གི་མཚོ་དམག་གྲུ་གཟིངས་བརྒྱུད་དེ་རྒྱ་ནག་ཏུ་དབོར་འདྲེན་བྱེད་སྐབས། ཊན་ཛེད་ནའེ་ཡི་ཉེན་རྟོག་པས་འཇུས་ཏེ་ཁོ་རང་ལ་ལོ་ ༢༠ ཡི་ཁྲིམས་ཐག་བཅད་ཡོད་པ་དང། ༢༠༡༣ ལོའི་ཟླ་ ༡༡ པའི་ནང་། ཊན་ཛེད་ནའེ་ཡི་ཉེན་རྟོག་པས་རྒྱ་རིགས་ནག་ཚོང་རྒྱག་མཁན་གསུམ་གྱིས་ཁང་པའི་ནང་གླང་ཆེན་མཆེ་བ་ ༧༠༦ ཙམ་ཡོད་པའང་འཛིན་བཟུང་བྱས་ཡོད་འདུག
གསར་འགོད་པ། ལྷ་སྐྱབས་རྒྱལ།
