བྱེས་ཀྱི་ས་སྐྱ་ཆོས་སྒར་ལོ་ངོ་ ༥༠ འཁོར།

ཁ་སང་དེ་རིང་གཉིས་སུ་རྒྱ་གར་བྱང་ཕྱོགས་རཇ་པུར་དུ་ཡོད་པའི་དཔལ་ས་སྐྱའི་ཆོས་སྒར་དབུ་བརྙེས་ཏེ་ལོ་ངོ་ལྔ་བཅུ་འཁོར་བའི་མཛད་སྒོ་ཚོགས་ཡོད།

ཁ་སང་དཔལ་ས་སྐྱའི་ཆོས་སྒར་དབུ་བརྙེས་ཏེ་ལོ་ངོ་ ༥༠ འཁོར་བའི་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྟེང་འཁོན་རིགས་བསྟན་པའི་གཙུག་རྒྱན་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དབུ་བཞུགས་ཐོག དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག བོད་མིའི་སྒྲིག་འཛུགས་ཆོས་རིག་བཀའ་བློན་པདྨ་ཆོས་འབྱོར་མཆོག་བཅས་ཕེབས་ཡོད་འདུག

ཐེངས་འདིའི་མཛད་སྒོའི་སྒེང་༧གོང་ས་མཆོག་གིས་འཚམས་འདྲིའི་གསུང་འཕྲིན་ཞིག་བསྩལ་ཡོད་པའི་ནང་། ཕྱི་ལོ་ ༡༩༦༤ ལོར་རྒྱ་གར་ཡུ་པི་མངའ་སྡེ་ཁོངས་རཇ་པུར་དུ་དཔལ་ས་སྐྱའི་བྱེས་ཀྱི་གདན་ས་བརྩེ་ཆེན་བསྟན་པའི་དགའ་ཚལ་བཤད་སྒྲུབ་གླིང་གཙུག་ལག་ཁང་རྟེན་དང་བརྟེན་པ་བཅས་པ་ཕྱག་འདེབས་མཛད་དེ་མི་ལོ་ ༥༠ འཁོར་བའི་དུས་དྲན་མཛད་སྒོ་གནང་བཞིན་ཡོད་པར་བླ་སློབ་འདུ་སྡེ་སྐུ་མགྲོན་བཅས་པར་འཚམས་འདྲི་བཀྲ་ཤིས་བདེ་ལེགས་ཞུ་བཞིན་ཡོད། ཅེས་འཁོད་ཡོད་འདུག

དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྟེན་འབྲེལ་ཞུ་ཡིག་ཕུལ་ཡོད་པའི་ནང་། བོད་མིའི་སྒྲིག་འཛུགས་ཀྱི་ངོས་ནས་དུས་དྲན་དེའི་ཐོག་དཔལ་ས་སྐྱའི་ཆོས་སྒར་གྱི་དབུ་བླ་འདུས་མང་ཡོངས་ལ་དགའ་གུས་ཆེན་པོས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། དུས་དྲན་གོ་སྒྲིག་གནང་མཁན་འབྲེལ་ཡོད་རྣམ་པར་ལེགས་གསོའི་བསྔགས་བརྗོད་ཞུ་རྒྱུ་ཡིན། བརྩེ་ཆེན་བསྟན་པའི་གཙུག་ནོར་སྐྱབས་མགོན་ས་སྐྱའི་ཁྲི་འཛིན་ཞེ་གཅིག་པ་ཆེན་པོ་མཆོག་ནས་སྐུ་ན་ཕྲ་མོའི་དུས་ནས་བཟུང་ཐུགས་བསྐྱེད་དམ་བཅའ་བརྟན་པོས་བསྟན་པ་དང་། འགྲོ་བའི་དོན་དུ་སྐུ་ངལ་བརྒྱ་ཕྲག་ལྷུར་བཞེས་མཛད་པའི་འབྲས་བཟང་མངོན་གྱུར་རང་ཅག་ཡོངས་ཀྱི་མཐོང་ཆོས་སུ་གྲུབ་པ་འདི་དག་དང་། ཁྱད་པར་བོད་ཀྱི་བསྟན་སྲིད་བདེ་ཐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཞོགས་འདེགས་བླ་ན་མེད་པ་མཛད་དང་མཛད་བཞིན་པ་བཅས་ཀྱི་བཀའ་དྲིན་ནི་བསྐལ་པའི་བར་དུ་གཞལ་བར་མི་ནུས་པ་ཞིག་ཡིན་ན། ད་རེས་གོ་སྐབས་འདི་བརྒྱུད་སྐྱབས་མགོན་ས་སྐྱའི་ཁྲི་འཛིན་རིན་པོ་ཆེར་བཀའ་དྲིན་ལན་བརྒྱར་ཆེ་ཆེ་ཞུ་རྒྱུ་དང་། སླད་མའི་ཆར་ཡང་བོད་ཀྱི་བསྟན་སྲིད་ཉག་ཕྲའི་གནས་ལ་དགོངས་ཏེ་སྐུ་ཚེ་ཞབས་པད་ཡུན་དུ་བརྟན་པའི་གསོལ་འདེབས་ཤུགས་དྲག་ཞུ་རྒྱུ་ཡིན། ཞེས་སོགས་འཁོད་ཡོད་འདུག