ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཐུག་འཕྲད་སྐབས། ཨོ་བྷ་མས་བོད་དང་ཐེ་ཝན་རང་བཙན་ལ་རྒྱབ་སྐྱོར་བྱེད་ཀྱི་མེད་ཀྱང་། བོད་མི་ཚོའི་ཆོས་དང་རིག་གཞུང་ལ་སྲུང་སྐྱོབ་བྱེད་དགོས་པ་མ་ཟད། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱང་ཡར་རྒྱས་སུ་གཏོང་དགོས་སྐོར་བརྗོད་ཡོད་འདུག
བདུན་ཕྲག་འདིའི་ནང་རྒྱ་ནག་རྒྱལ་ས་པེ་ཅིན་དུ་ཨེ་ཤ་ཡའི་དཔལ་འབྱོར་གླེང་སྟེགས་སྐབས་ཉེར་གཉིས་པ་དེ་ཚོགས་བཞིན་ཡོད་པ་དང་བསྟུན་ཏེ། ཕྱི་ཚེས་ ༡༢ ཉིན་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་རྣམ་གཉིས་ཐུག་འཕྲད་བྱས་ཏེ། རྒྱལ་ཁབ་གཉིས་བར་ཚོང་དོན་དང་དམག་དོན། གནམ་གཤིས་འགྱུར་ལྡོག་སོགས་ཀྱི་སྐོར་ལ་གྲོས་མོལ་གནང་ཡོད་པ་མ་ཟད། འགྲོ་བ་མིའི་ཐོབ་ཐང་གནད་དོན་དང་། གསར་འགོད་པའི་རང་དབང་། ཧོང་ཀོང་དང་བོད་དོན་དོན་བཅས་ལ་གྲོས་མོལ་བྱས་ཡོད་འདུག
སྐབས་དེར་ཨོ་བྷ་མས་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པར་ངོས་འཛིན་བྱེད་བཞིན་ཡོད་ཀྱང་རྒྱ་ནག་གཞུང་གིས་བོད་ཀྱི་ཐུན་མོང་མིན་པའི་ངོ་བོ་མི་ཉམས་རྒྱུན་འཛིན་བྱེད་དགོས་སྐོར་བརྗོད་དོན། “ཨ་རིའི་སྲིད་བྱུས་ཏེ་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པར་ངོས་འཛིན་བྱེད་བཞིན་ཡོད་པ་ལས་རྒྱ་ནག་ནས་ལོགས་སུ་རང་བཙན་རྒྱལ་ཁབ་ཅིག་ཏུ་འགྱུར་རྒྱུར་རྒྱབ་སྐྱོར་བྱེད་ཀྱི་མེད་སྟབས། རྒྱ་ནག་གཞུང་གིས་བོད་ཀྱི་ཐུན་མོང་མ་ཡིན་པའི་ངོ་བོ་སྟེ་ཆོས་རིག་དང་སྐད་ཡིག་མི་ཉམས་རྒྱུན་འཛིན་ཐུབ་རྒྱུར་སྔར་ལས་ལྷག་པའི་གོམ་པ་སྤོ་ཐུབ་པ་བྱེད་དགོས།” ཞེས་དང་།
ཁོང་གིས་ཞི་ཅིན་ཕིན་ལ་རང་དབང་གལ་ཆེན་ཡིན་པའི་སྐོར་ལ། “ སྤྱི་དམངས་ཚོར་ང་ཚོས་ཡིད་ཆེས་བྱེད་བཞིན་ཡོད་པའི་ཡོངས་ཁྱབ་རང་དབང་སྐོར་ལ་སྐད་ཆ་ཤོད་རྒྱུ་ཙམ་མ་ཟད། ཁོང་ཚོར་ཐོབ་ཐང་ནི་འགྲོ་བ་མིའི་རིགས་ཀྱི་ལྷན་སྐྱེས་ཐོབ་ཐང་ཞིག་ཡིན་པ་འགྲེལ་བཤད་རྒྱག་དགོས། ནེའུ་ཡོག་དང་ཧོང་ཀོང་པེ་རི་སི་ག་པར་བསྡད་ཀྱང་སོ་སོའི་ཐོབ་ཐང་དང་། རང་དབང་རྩོད་ལེན་བྱེད་རྒྱུ་ཡོད་པ་དེ་གསལ་བཤད་བྱེད་དགོས། ད་ལྟ་ང་ཚོས་འདས་པའི་བྱུང་རབས་ལ་བསམ་གཞིགས་བྱས་ཚེ་འཛམ་གླིང་ཐོག་འགྲོ་བ་མིའི་ཐོབ་ཐང་དང་རང་དབང་། གྲངས་ཉུང་མི་རིགས་ཀྱི་ཆོས་དད་རང་དབང་དང་ཐོབ་ཐང་ལ་བརྩི་སྲུང་བྱེད་མཁན་གྱི་རྒྱལ་ཁབ་དག་གིས་མང་ཚོགས་ཀྱི་མངོན་འདོད་གྲུབ་ཐུབ་ཀྱི་ཡོད་པ་མ་ཟད། རྒྱལ་ཁབ་ཉིད་ཀྱང་ཡར་རྒྱས་ཕུན་སུམ་ཚོགས་ལ་གྲུབ་འབྲས་ལྡན་པ་ཞིག་ཏུ་འགྱུར་གྱིན་ཡོད་སྟབས། ང་ཚོས་ཐོབ་ཐང་དང་རང་དབང་ལ་བརྩི་སྲུང་བྱས་ཏེ་མང་ཚོགས་ཚོ་བདེ་ལ་འཁོད་ཐུབ་པ་བྱ་རྒྱུ་གལ་ཆེན་པོ་ཆགས་ཡོད།” ཅེས་སོགས་བརྗོད་འདུག
ཨ་རིའི་ཕོ་བྲང་དཀར་པོས་བསྒྲགས་གཏམ་ཞིག་སྤེལ་བའི་ནང་། “འདས་པའི་ལོ་མང་རིང་ནས་བཟུང་༧གོང་ས་མཆོག་གིས་བོད་རང་བཙན་རྩོད་ཀྱི་མེད་སྐོར་གསུངས་བ་མ་ཟད། ཁོང་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་བར་འབྲེལ་མོལ་མགོ་འཛུགས་ཡོང་རྒྱུའི་ཐུགས་རེ་གནང་གི་ཡོད་པའི་བཀའ་སློབ་ཕེབས་ཡོད་སྟབས། ད་རེབ་ཨ་རིའི་སྲིད་འཛིན་ཨོ་བྷ་མ་རྒྱ་ནག་གི་སྲིད་འཛིན་ལ་ཐུག་སྐབས་ཨ་རིས་བོད་རང་བཙན་ལ་རྒྱབ་སྐྱོར་བྱེད་ཀྱི་མེད་སྐོར་གསུངས་ཡོད་པ་མ་ཟད། བོད་ཀྱི་ཐུན་མོང་མ་ཡིན་པའི་རིག་གཞུང་མི་ཉམས་རྒྱུན་འཛིན་བྱེད་དགོས་པའི་སྐོར་ལ་གྲོས་མོལ་གནང་ཡོད། ”ཅེས་བཀོད་འདུག
ཞི་ཅིན་ཕིན་གྱིས། “བཅུ་ཕྲག་གསུམ་གོང་རྒྱ་ནག་གཞུང་གིས་བསྒྱུར་བཅོས་སྒོ་འབྱེད་ཀྱི་སྲིད་བྱུས་ལག་བསྟར་ བྱས་པ་ནས་བཟུང་། རྒྱ་ནག་ནང་འགྲོ་བ་མིའི་ཐོབ་ཐང་གནད་དོན་ཐད་ཡར་རྒྱས་ཆེན་པོ་ཕྱིན་ཡོད་ཀྱང་། ང་ཚོས་ལས་དོན་དེ་ཡོངས་སུ་གྲུབ་པ་ཞིག་ལ་ངོས་འཛིན་བྱེད་ཀྱི་མེད། ད་ལྟ་ལས་ཀ་བྱེད་བཞིན་ཡོད་ཀྱང་ད་དུང་ཡར་རྒྱས་གཏོང་རྒྱུ་མང་པོ་ཞིག་ལྷག་བསྡད་ཡོད་པར་ངོས་འཛིན་བྱེད་ཀྱི་ཡོད། རྒྱ་ནག་གིས་ཨ་རི་དང་མཉམ་དུ་འགྲོ་བ་མིའི་ཐོབ་ཐང་གནད་དོན་སྐོར་ལ་འདྲ་མཉམ་དང་ཐུན་མོང་བརྩི་འཇོག་བྱས་ནས་གྲོས་མོལ་བྱ་རྒྱུའི་གྲ་སྒྲིག་བྱེད་བཞིན་ཡོད་སྟབས། མ་འོངས་པར་རྒྱལ་ཁབ་གཉིས་བར་གྱི་མི་མཐུན་པའི་ཆ་རྣམས་གཞིལ་ནས་བསམ་ཤེས་བྱ་རྒྱུ་ཇེ་མང་འགྲོ་རྒྱུ་མ་ཟད། གཅིག་ཕན་གཅིག་གྲོགས་ངང་གནད་དོན་དེའི་ཐོག་ཕན་ཚུན་སློབ་སྦྱོང་བྱ་རྒྱུ་མང་པོ་ཡོང་གི་རེད།” ཅེས་བརྗོད་འདུག
དེ་སྔོན་ནེའུ་ཡོག་དུས་བབ་ཀྱིས་རྒྱ་ནག་གཞུང་གི་མཐོ་རིམ་དཔོན་རིགས་ཚོས་ལྐོག་ཟ་རུལ་སུངས་དང་དབང་ཆ་སྒེར་སྤྱོད་ཤུགས་ཆེན་བྱེད་བཞིན་ཡོད་པ། སྐབས་དེའི་སྲིད་བློན་ཝུན་ཅ་པོ་སོགས་ཀྱི་སྒེར་དངུལ་གྲངས་ཐོ་ཁྱབ་བསྒྲབས་བྱས་པ་བཅས་ལ་བརྟེན་ཏེ། རྒྱ་ནག་གཞུང་གིས་ཨ་རིའི་ནེའུ་ཡོག་དུས་བབ་ཀྱི་གསར་འགོད་པ་གཙོས་རྒྱལ་སྤྱིའི་གསར་འགོད་པ་ཁག་ལ་རྒྱ་ནག་ནང་དམ་དྲག་བྱས་ཤིང་། གསར་འགོད་པའི་ཐོངས་ཆན་དུས་འགྱངས་མ་བྱས་པ་བཅས་ལ་བརྟེན་ཏེ། རྒྱ་ནག་ནང་རྒྱལ་སྤྱིའི་གསར་འགོད་པ་ཇེ་ཉུང་དུ་གཏོང་ཐབས་བྱས་ཡོད་སྟབས། ཐེངས་འདིར་ཨོ་བྷ་མས་ཞི་ཅིན་ཕིན་ལ་གནད་དོན་དེའི་སྐོར་ལ་གྲོས་མོལ་བྱས་ཡོད་ཀྱང་། ཞི་ཅིན་ཕིན་གྱིས་གནད་དོན་དེ་ཨ་རིའི་གསར་འགོད་པས་རྒྱ་ནག་གི་གནས་ཚུལ་འགོད་སྟངས་ཐོག་ནས་བྱུང་བ་ཞིག་ཡིན་སྐོར་བརྗོད་པར། ཟླ་འདིའི་ཚེས་ ༡༣ ཉིན་ནེའུ་ཡོག་དུས་བབ་ཀྱི་རྒྱལ་སྤྱིའི་གནད་དོན་རྩོམ་སྒྲིག་པ་ཇོ་སེ་ཧྥ་ (Joseph Kahn) ལགས་ཀྱིས་རྒྱ་ནག་གཞུང་གིས་དམ་དྲག་བྱས་ཀྱང་། ང་ཚོའི་མགོར་ངན་ཁག་གཡོག་པ་དེ་ནི་དྲང་བདེན་ཞིག་མིན་པའི་སྐྱོན་བརྗོད་བྱས་འདུག
རྒྱ་ནག་གཞུང་གིས་༧གོང་ས་མཆོག་གཙོས་པའི་རྒྱ་ནག་གཞུང་དང་ལྟ་བ་མི་མཐུན་མཁན་ཚོ་ཕྱི་རྒྱལ་ཁག་གི་མགོ་ཁྲིད་ཚོས་ཐུག་འཕྲད་བྱེད་པར་འགོག་རྐྱེན་དང་གནོན་ཤུགས་སྣ་ཚོགས་སྤྲོད་བཞིན་ཡོད་ཀྱང་། ཨོ་བྷ་མ་ཨ་རིའི་སྲིད་འཛིན་ཆགས་རྗེས་༧གོང་ས་མཆོག་དང་མཇལ་འཕྲད་ཐེངས་གཉིས་གནང་ཡོད་པ་མ་ཟད། འདི་ལོའི་ཟླ་ ༢ ནང་༧གོང་ས་མཆོག་ཨ་རིར་ཕེབས་སྐབས་ཨོ་བྷ་མས་༧གོང་ས་མཆོག་དང་མཇལ་འཕྲད་གནང་སྟེ། ཁོང་གིས་གཉིས་ཕན་དབུ་མའི་ལམ་བརྒྱུད་ནས་བོད་དོན་བདེན་མཐའ་སེལ་རྒྱུར་རྒྱབ་སྐྱོར་ཞུ་བཞིན་ཡོད་པ་མ་ཟད། བོད་ནང་གི་འགྲོ་བ་མིའི་ཐབ་ཐང་གནད་དོན་དང་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་བྱ་རྒྱུར་རོགས་རམ་ཞུ་རྒྱུ་ཡིན་སྐོར་བརྗོད་ཡོད་ལ། རྒྱ་ནག་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་༧གོང་ས་མཆོག་གི་སྐུ་ཚབ་ལྷན་བོད་དོན་ཐག་གཅོད་བྱ་དགོས་སྐོར་བརྗོད་ཡོད།
གསར་འགོད་པ། དོན་གྲུབ།
