ཧོང་ཀོང་སློབ་ཕྲུག་མཐུན་ཚོགས་ཀྱི་འཐུས་མི་ཚོ་པེ་ཅིན་དུ་ཕྱིན་ཏེ་གྲོས་མོལ་བྱེད་འཆར་ཡོད་ཀྱང་རྒྱ་གཞུང་གིས་ནང་སྐྱོད་ལག་ཁྱེར་སྤྲད་མི་འདུག
ཧོང་ཀོང་ནང་ཞི་རྒོལ་བྱས་ཏེ་ཉིན་གྲངས་ ༥༠ ཙམ་འགྲོ་བཞིན་ཡོད་ཀྱང་། ད་ལྟའི་བར་ཧོང་ཀོང་གཞུང་གིས་མི་མང་གི་མངོན་འདོད་ལ་བཟང་ཕྱོགས་ཀྱི་བརྡ་ལན་གང་ཡང་མ་སྤྲད་པར་བརྟེན། ཉེ་སྔོན་ནས་སློབ་ཕྲུག་མཐུན་ཚོགས་ཀྱི་འཐུས་མི་ཚོ་པེ་ཅིན་དུ་བསྐྱོད་དེ། ཐད་ཀར་སྲིད་བློན་ལི་ཁེ་ཆིང་སོགས་ལ་གྲོས་མོལ་བྱེད་རྩིས་ཡོད་པ་ལྟར། ཟླ་འདིའི་ཕྱི་ཚེས་ ༡༥ ཉིན་གྱི་སྔ་དྲོར་སློབ་ཕྲུག་མཐུན་ཚོགས་ཀྱི་མགོ་ཁྲིད་ཀྲུའུ་ཡཱོང་ཁང་སོགས་འཐུས་མི་གསུམ་པེ་ཅིན་དུ་བསྐྱོད་རྩིས་ཀྱིས་ཧོང་ཀོང་གནམ་ཐང་དུ་བསླེབས་སྐབས། རྒྱ་གཞུང་གིས་ནང་སྐྱོད་ལག་ཁྱེར་མ་སྤྲད་པར་ཕྱིར་ལོག་དགོས་བྱུང་ཡོད་འདུག ཐེངས་འདིའི་རྒྱ་གཞུང་གི་བྱེད་ཐབས་དེར་ཧོང་ཀོང་གཙོ་བོར་གྱུར་བའི་ཕྱི་རྒྱལ་ཁག་ཏུ་ཡོད་པའི་རྒྱ་རིགས་དང་འགྲོ་བ་མིའི་ཐོབ་ཐང་དོན་གཉེར་བ་ཚོས་འུ་ཐུག་ཐབས་ཟད་ཀྱི་བྱ་སྤྱོད་ཅིག་ཡིན་པའི་སྐྱོན་བརྗོད་བྱེད་བཞིན་འདུག
གོང་གི་གནད་དོན་ཐད་ཧོང་ཀོང་སློབ་ཕྲུག་མཐུན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་སྐབས་མཐུན་ཚོགས་ཀྱི་མགོ་ཁྲིད་ཀྲུའུ་ཡཱོང་ཁང་གིས། རྒྱ་གཞུང་གིས་ཁོང་ཚོའི་ནང་སྐྱོད་ལག་ཁྱེར་དང་ལེན་མ་བྱས་པ་དེས་ཧོང་ཀོང་གི་མི་རབས་གསར་པའི་ཁེ་དབང་དང་དུ་མ་བླངས་བ་གསལ་འདེབས་བྱས་པ་ཡིན་ལ། དེ་སྔོན་ཧོང་ཀོང་གི་སློབ་མ་ཚོས་ཚོར་བ་རྣོ་བོའི་ཐོག་ནས་གནད་དོན་ཅི་ཡང་བསྒྲུབས་མེད་ཀྱང་། རྒྱ་གཞུང་གིས་ནང་སྐྱོད་ལག་ཁྱེར་སྔ་ས་ནས་ཕྱིར་ལོག་བྱས་པ་དེས་ཧང་སང་དུ་བཅུག་ཡོད་སྟབས། ཧོང་ཀོང་གཞུང་གིས་གནད་དོན་དེར་འགྲེལ་བཤད་གསལ་བོ་རྒྱག་དགོས་སྐོར་བརྗོད་ཡོད་པ་མ་ཟད། རྒྱ་ནག་དབུས་གཞུང་གིས་ཐེངས་འདིའི་ཉི་གདུགས་ལས་འགུལ་ནང་ཞུགས་པའི་ཧོང་ཀོང་བ་ཁྲི་ ༢༠ ཡི་ནང་སྐྱོད་ལག་ཁྱེར་རྩིས་མེད་བཏང་བ་ཡིན་མིན་གྱི་དོགས་འདྲི་བྱས་ཡོད་འདུག
གཞན་ཡང་། ཕྱི་ཚེས་ ༡༥ ཉིན་གྱི་སྔ་དྲོར་ཧོང་ཀོང་ཅིན་ཧེའུ་སློབ་ཆེན་གྱི་སྐབས་ ༥༥ པའི་མཐར་ཕྱིན་མཛད་སྒོའི་ཐོག སློབ་མ་ཁག་ཅིག་གིས་ཞི་རྒོལ་གྱི་མཚོན་བྱེད་ཉི་གདུགས་སེར་པོ་བཟུང་སྟེ་མཐར་ཕྱིན་དཔང་ཡིག་ལེན་དུ་འགྲོ་སྐབས། སློབ་གཙོ་ཁྲེན་ཞིན་ཚི་ཟེར་བ་དེས་མཐར་ཕྱིན་དཔང་ཡིག་མ་སྤྲད་པར་ཁ་རྡུང་བཏང་ཡོད་པ་མ་ཟད། ཉིན་དེའི་མཛད་སྒོ་མཚམས་འཇོག་བྱས་ཡོད་འདུག
ཁ་སང་ཕྱི་ཚེས་ ༡༦ ཉིན་སློབ་ཆེན་དེའི་སློབ་མ་ཚོས་༼སློབ་གཙོ་ཁྲེན་ཞིན་ཚིས་མཐར་ཕྱིན་དཔང་ཡིག་མ་སྤྲད་པའི་སྤྱི་ བསྒྲགས་ཡི་གེ༽ཟེར་བ་ཞིག་སྤེལ་ཏེ། སློབ་གཙོ་ཁྲེན་གྱི་བྱ་སྤྱོད་ཀྱིས་སློབ་གྲྭའི་བར་གནས་ཀྱི་ཆབ་སྲིད་ལངས་ཕྱོགས་ལ་གཏོར་བརླག་དང་དགེ་སློབ་བར་གྱི་བརྩེ་འདང་ལ་སྣང་ཆུང་། སྒེར་གཅོད་ཀྱི་ལག་ཐབས་སྤྱད་དེ་སློབ་མའི་རང་དབང་གི་རེ་འདོད་ལ་འགོག་རྒོལ་བྱས་ལུགས་ཀྱི་སྐྱོན་བརྗོད་བྱས་ཡོད་པ་མ་ཟད། ཐེངས་འདིའི་མཐར་ཕྱིན་མཛད་སྒོའི་ཐོག་སློབ་མ་ཚོས་ཉི་གདུགས་སེར་པོ་བཟུང་ནས་དཔང་ཡིག་ལེན་དུ་འགྲོ་དགོས་པའི་སྐུལ་མ་ཡང་བཏང་ཡོད་འདུག
གསར་འགོད་པ། པདྨ་མཚོ།
ཧོང་ཀོང་པ་ཚོའི་ཆིག་སྒྲིལ་ལ་མཇུག་ཡོད་ཁག་པོ་འདུག
དེང་སང་ཆིག་སྒྲིལ་ཁག་པོ་ཡོད་པའི་རྒྱུ་མཚན་ནི་ཚང་མ་དཔལ་འབྱོར་མ་ཡིན་ནམ།
བོད་པའི་འཐབ་རྩོད་ཀྱང་དཔལ་འབྱོར་གྱི་དབང་གིས་དེ་བཞིན་མ་ཡིན་ནམ།