རྒྱ་ནག་ཉེན་རྟོག་ཁང་གིས་ཟླ་བ་ ༡༠ ནང་བུད་མེད་དང་བྱིས་པ་ཁྱོན་ཁྲི་ ༧ ལྷག་བསླུ་ཚོང་བྱས་པའི་ཉེས་དོན་རྩད་ཆོད་ཡོད་པ་དང་། ཉེ་སྔོན་ཡང་བུད་མེད་ ༡༤ བསླུ་ཚོང་བྱས་པ་རྩད་ཆོད་ཡོད་ལུགས་བསྒྲགས་འདུག
ཁ་སང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༨ ཚེས་ ༢༦ ཉིན་ནང་སོག་རང་སྐྱོང་ཁུལ་པོ་ཐོ་གྲོང་ཁྱེར་ནས་རྒྱ་ནག་ནན་ཁྲིང་དུ་སྐྱོད་པའི་རླངས་འཁོར་ཞིག་གི་ནང་ནས། བུད་མེད་ཅིག་གིས་རྒྱ་སྐད་འཁྱར་འཁྱོར་གྱིས་ཁོང་མོ་འབར་མ་ནས་རྒྱ་ནག་ཏུ་བསླུ་ཚོང་བྱས་པ་ཡིན་སྐོར་ཉེན་རྟོག་པར་ཞུ་གཏུག་བྱས་པ་བརྒྱུད། བུད་མེད་བསླུ་ཚོང་གི་དོགས་ཡོད་ཉེས་ཅན་ ༣༡ འཛིན་བཟུང་བྱས་ཏེ་བུད་མེད་ ༡༤ བསྐྱབས་ཡོད་པ་དང་། དེའི་ནང་འབར་མའི་མི་སེར་ཡིན་པ་ ༡༡ ཡོད་འདུག
ཉེན་རྟོག་པར་ཞུ་གཏུག་བྱེད་མཁན་གྱི་བུད་མེད་དེས་ཁོང་མོའི་མིང་ལ་ཡཱས་ལོའུ་ཟེར་གྱི་ཡོད་པ་དང་། འབར་མའི་ཝཱ་པང་ཧྥོས་ལེ་ཟེར་བའི་མགྲོན་ཁང་ཞིག་གི་ཞབས་ཞུ་མ་ཡིན་ལ། འདི་ལོའི་ཕྱི་ཟླ་ ༦ པའི་ནང་ཁོང་མོ་དང་བུ་མོ་གཞན་ཞིག་མགོ་སྐོར་འོག་ཚུད་དེ་ཡུན་ནན་དུ་ཁྲིད་ཕྱིན་པ་དང་། དེ་ནས་མི་ལག་འགའ་བརྒྱུད་དེ་རྒྱ་ནག་ཧྲན་ཞི་ཞིང་ཆེན་ཐེན་ཀྲིན་རྫོང་དུ་བསྐྱལ་རྗེས། མི་ཞིག་གིས་ཁོང་མོ་མེ་འཁོར་ནང་བཞག་ཏེ་ཧྲན་ཏུང་ཞིང་ཆེན་ཙི་པོ་གྲོང་ཁྱེར་དུ་བཙོང་འཆར་ཡོད་སྐོར་བརྗོད་འདུག
ཉེན་རྟོག་ཕྱོགས་ནས་བརྗོད་པ་ལྟར་ན། རྩད་ཆོད་པའི་ནག་ཚོགས་དེའི་ཉེས་ཅན་མང་ཆེ་བས་སྤྲོ་འཆམ་དང་ལས་ཀ་ཡག་པོ་རག་རྒྱུར་ཁ་གཡར་ཏེ། འབར་མའི་བུ་མོ་ཚོ་ཡུན་ནན་ཞིང་ཆེན་དུ་ཁྲིད་ཡོང་བ་དང་། དེ་ནས་བརྒྱུད་ཚོང་གི་བྱེད་ཐབས་སྤྱད་དེ་ཧུའུ་ནན་དང་ཧྲན་ཞི་ཞིང་ཆེན་གྱི་ཞིང་གྲོང་ཁུལ་དུ། བུད་མེད་རེར་རྒྱ་སྒོར་ཁྲི་ ༥ ནས་༩ བྱས་ཏེ་མནའ་མར་བཙོང་གི་ཡོད་ལ། ཐེངས་འདིར་རྒྱ་སྒོར་ཁྲི་ ༡༩༢ ལྷག་གི་ཉེས་དོན་རྩད་གཅོད་ཡོད་འདུག ཡང་ཉེ་སྔོན་ཡུན་ནན་ཉེན་རྟོག་ཁང་གིས་ལོ་ན་ ༡༨ ལ་མ་སོན་པའི་གཞོན་ནུ་མ་ ༥ བཅའ་ཁྲིམས་ཀྱི་འགྲོ་ལུགས་བསྒྲུབས་ཏེ། འབར་མར་ཁྲིད་སོང་བའི་ཉེས་དོན་ཞིག་ཤེས་རྟོགས་བྱུང་སྟེ་ཞིབ་བཤེར་བྱེད་བཞིན་ཡོད་འདུག
ཨ་རིར་ཡོད་པའི་བུད་མེད་ཀྱི་ཁེ་དབང་སྲུང་སྐྱོབ་ལྷན་ཚོགས་ཀྱི་འགན་འགན་ལྕམ་རེ་གྷི་ནཱ་ལེ་ཊོལ་ཇོན་(Regina Littlejohn) ལགས་ཀྱིས། འཆར་ལྡན་བུ་སྐྱེས་ཀྱི་སྲིད་བྱུས་ལག་བསྟར་བྱས་རྐྱེན་རྒྱ་ནག་ནང་བུད་མེད་དང་བྱིས་པ་བསླུ་ཚོང་བྱེད་པ་དང་། བཙན་གཡེམ་གཡོག་ཉར་གྱི་ཉེས་དོན་རིམ་པར་བྱུང་བཞིན་ཡོད་པ་མ་ཟད། གནད་དོན་དེ་ཡ་གླིང་ལྷོ་ཤར་ཁུལ་གྱི་ཁྱིམ་མཚེས་རྒྱལ་ཁབ་ཁག་གི་ནང་ཁྱབ་ཅིང་། ཐ་ན་རྒྱ་ནག་དང་རྒྱང་ཐག་རིང་བའི་ཨུ་རུ་སུ་དང་ཨ་ཧྥེ་རི་ཁ། མེ་གླིང་གི་བུད་མེད་མང་པོ་རྒྱ་ནག་ནང་བཙོང་སྟེ་ཞིང་གྲོང་གི་མནར་མར་ཉར་གྱི་ཡོད། འཆར་ལྡན་བུ་སྐྱེས་ཀྱི་སྲིད་བྱུས་ཀྱིས་བུད་མེད་ཁྲི་སྟོང་གི་མངལ་གྱི་ཕྲུ་གུ་ཤོར་དུ་བཅུག་པ་དང་། ཕྲུ་གུ་བུ་མོ་མང་པོ་བདག་མེད་དུ་གྱུར་བའི་གནས་ཚུལ་བྱུང་བཞིན་ཡོད་སྐོར་དང་། ལྷན་ཚོགས་དེས་ད་ལོར་རྒྱ་ནག་ནང་བདག་མེད་ཕྲུ་གུ་བུ་མོ་ ༡༢༠ ལྷག་ལ་བདག་སྐྱོང་བྱེད་བཞིན་ཡོད་པ་དང་། ཕྱི་ལོ་ ༢༠༡༥ ལོར་རྒྱ་གར་ནང་དུའང་བདག་མེད་ཕྲུ་གུ་བུ་མོ་གཉོར་སྐྱོང་གི་ལས་གཞི་སྤེལ་འཆར་ཡོད་སྐོར་བརྗོད་འདུག
རྒྱ་ནག་ཉེན་རྟོག་ཁང་གིས་ད་ལོའི་ལོ་སྟོད་དུ་བསྒྲགས་པའི་གནས་ཚུལ་ལྟར་ན། འདས་ལོའི་ཟླ་ ༡༠ ནང་རྒྱ་ནག་རྒྱལ་ཡོངས་ཀྱི་ཉེན་རྟོག་ཁང་དག་གིས། སྔ་ཕྱིར་བུད་མེད་ཁྲི་ ༥ ལྷག་དང་བྱིས་པ་ཁྲི་ ༢.༤ ལྷག་བཅས་ཁྱོན་ཁྲི་ ༧.༤ ལྷག་བསླུ་ཚོང་བྱས་པའི་ཉེས་དོན་རྩད་ཆོད་དེ། འབྲེལ་ཡོད་ནག་ཚོགས་ ༥༠༠༠ ལྷག་གཏོར་ཏེ་ཉེས་ཅན་ཁྲི་ ༣༣ འཛིན་བཟུང་བྱས་ཡོད་འདུག
གསར་འགོད་པ། པདྨ་མཚོ།
བོད་ཁུལ་ནས་བཙན་འཁྲིད་བྱས་པའི་བུད་མེད་ཀྱི་གྲངས་ཀ་ཡང་ཉུང་ཉུང་ཞིག་གཏན་ནས་མིན། དཔེར་ན་ལྷོ་ཁ་ནས་ཡིན་པའི་བུད་མེད་གཅིག་རྒྱ་མིས་འཁྲིད་ནས་ལོ་མང་པོ་གར་སོང་ཆ་མེད་དུ་གྱུར་རྗེས་ལོ་སྔོན་མའི་ནང་སོ་སོའི་སྐྱེས་ས་སྐྱེ་ཁུངས་ཡག་པོ་ཤོད་རྒྱུ་མེད་ཀྱང་སྤུན་མཆེད་ཀྱི་མིང་གསལ་པོ་ཤོད་རྒྱུ་ཡོད་པར་བརྟེན་ནས་ཐུག་འཕྲད་བྱུང་བ་ལྟ་བུ།